Read Samo, Southern MNS 12 Bible Online

MNS 12 - Samo, Southern bible

MNS 12

¹Muizu na á goã á Etiopii gána nɛ saa lɔ lɛa. Miriyamu laanka Aarɔn tɔ́n Muizu tɔ pɛ bɛa sii lɛ gɔ́ɔ̃ nɛ,

²ǹ nə́ pɛ: «Dɛnaa Lawa na á boo da ka Muizu dinsɔɔ̃ nɛ? A boo da ka wɔsɛn dɔn nɛ wa? Dɛnaa Lawa nə́ ǹ lɛ ma.»

³Muizu na á goã din gisiĩ wole lɛa, á la kanaa lɛ a min tumaa nɛ.

⁴Bǎã goon ne, Dɛnaa Lawa pɛ Muizu ni, ka Aarɔn laanka Miriyamu ni: «Ka dinin min sɔɔ tumaa wo kɔn yɛ ka Lawa nɛ ǹ kion kɛ nɛ.» Ǹ dinin min sɔɔ tumaa kiɛ̃, ǹ nə́ woo kɔn yɛ ka Lawa nɛ ǹ kion lɛ nɛ.

⁵Dɛnaa Lawa gisĩ tɛmaa bara bii, á golee zìã lɛ a wɔ ǹ kiɛnlɛ-a. Á lɛ dia Muizu laanka Miriyamu la, yǎa ǹ dinin paanan nə n zɔ̃ ǹ dɔ.

⁶Dɛnaa Lawa nə́ n toa ǹ ganaa: — Ka n too kɔ masɛ a boo ganaa kəni: «Bɛ̀ Lawa a boo gii-dali mɛn tá ka bii, sii-nyaa gòã wuu li ni, masɛ Dɛnaa Lawa n toɛ, bɛ n masɛ doɛ̃. Narɛɛ dɔ gɔ́ɔ̃ nɛ, masɛ n boo diɛ nɛ.

⁷ Sɛnɛ, masɛ a dí-nyali Muizu wɔ bie miɛ̃ wa, kɛ lɛ giɛ masɛ a zaman lɛ walan ka bɔlɔgoondɛnaabaa nɛ.

⁸Masɛ n boo diɛ nɛ, wɔ bobo kɔn, ma boo lɛ toɛ̃ nɛ, ma ń ma a toɛ ti wa má n din nyaa nɛ, á maa siĩnbaa yɛ a yɔrɔ-a. A n siɛ lɔn kəni, ka tá masɛ a dí-nyali Muizu lɛ tɔ pii?»

⁹Dɛnaa Lawa foo yoo ǹ li taãn-taãnɛ, bɛ kio á woo.

¹⁰Tɛmaa bara lɛ kiɛ̃ á n bɔ zìã lɛ la, bɛ̀ Miriyamu á ke gɔ̀nɔn ki busu babaraadɛnaa lɛa, á kũ á fu kɔ ka koara nɛ. Aarɔn nə́ n bɔyaa á ga Miriyamu ganaa, bɛ̀ gɔ̀nɔn ki busu babaraa á ke a ganaa.

¹¹Aarɔn tɔ́n pɛ Muizu ni: «Ee! Maa dɛnaagiĩ ganaa, wɔsɛn zɛ̀rɛ nɛ. Sɛnɛ, bǐɛ̃ kɔ, sii baraa ke wɔsɛn nə́ zɛnaa ka baãnaabaa nɛ, n baran bɛa dɔlɔ da wɔsɛn mìi-n wa.

¹²Bǐɛ̃ kɔ, Miriyamu baran n baa ka nɛ mɛn nə́ ke á ziziɛ̃ ǹ dan gɔ́ɔ̃ nɛ, a gɔ̀nɔn siĩ talɛɛ n sɔlɛɛ a yɛ biikoo li wa.»

¹³Muizu tɔ́n nə n lɛ dɛ Dɛnaa Lawa ganaa kɛnɛn: «E, Lawa, masɛ n gòã-kũ diɛ n ganaa, bǐɛ̃ kɔ, n Miriyamu lɛ kaka kɔ.»

¹⁴ Dɛnaa Lawa tɔ́n pɛ Muizu ni: «Bɛ̀ Miriyamu lɛ a díi na á sɛ̀ kaa a yɔrɔ nɛ, bɛ̀ sìi ba goɛ̃ a ganaa a dɔ pii zii goon wa? Bɛ lɛ nɛ, ka bɔ kaa giã ǹ bǎã lɛ nɛ ka da kanaa a lɛawaa sɔbaa, bɛ kio ka tɔn nə n bɔyaa ka da a bǎã nɛ.»

¹⁵Ǹ nə́ tɔ́n Miriyamu bɔ giã ǹ bǎã lɛ nɛ ǹ nə́ da kanaa a lɛawaa sɔbaa. Izirayeli minin lɛn nə yoo ǹ nə́ n bɔ giã ǹ bǎã lɛ-n wa, yǎa Miriyamu lɛ wusoo á daa a bǎã nɛ.

¹⁶Bɛ kio, zaman lɛ yoo a n bɔ Haserɔti, ǹ nə́ woo golee Paran diə gole ne.