Read Samo, Southern MNS 13 Bible Online

MNS 13 - Samo, Southern bible

MNS 13

¹Dɛnaa Lawa boo da Muizu ni á pɛ:

²«Minin dia ǹ wo ga Kanaan gána lɛ ganaa, gána kɛ lɛ man koe Izirayeli minin la. Ka bɛa minin lɛn tumaa bɔ nyɛɛnaandɛnan bii, tɔrɔ gogoonmaa min goon, ka ǹ dia.»

³Muizu tɔ́n nə n toa Paran diə gole lɛ nɛ, á bɛa minin kɛn lɛn dia, á kɔnpɛ ka Dɛnaa Lawa a da ǹ boo ne. Ǹ tumaa na á goã Izirayeli minin lɛn nyɛɛnaandɛnan lɛa.

⁴Ǹ tɔn nə́ ke: Zakuuru a nɛgiĩ Samuwa n Urubɛn tɔrɔn wɔ lɛa,

⁵Hori a nɛgiĩ Safati n Simiɔn tɔrɔn wɔ lɛa,

⁶Yefunee a nɛgiĩ Kalɛbu n Zudaa tɔrɔn wɔ lɛa,

⁷Zozɛfu a nɛgiĩ Igaali n Isakaara tɔrɔn wɔ lɛa,

⁸Nunu a nɛgiĩ Hozee n Efrayimu tɔrɔn wɔ lɛa,

⁹Rafuu a nɛgiĩ Paltii n Bɛnzamɛn tɔrɔn wɔ lɛa,

¹⁰Sodii a nɛgiĩ Gadiyeli n Zabulɔn tɔrɔn wɔ lɛa,

¹¹Suusi a nɛgiĩ Gaadii n Zozɛfu a nɛgiĩ Manaasee tɔrɔn wɔ lɛa,

¹²Gemalii a nɛgiĩ Amiyeli n Dan tɔrɔn wɔ lɛa,

¹³Mikayeli a nɛgiĩ Setuuru n Asɛɛrɛ tɔrɔn wɔ lɛa,

¹⁴Vɔfuusi a nɛgiĩ Nabii n Nɛfutalii tɔrɔn wɔ lɛa,

¹⁵Makii a nɛgiĩ Guweli n Gaadi tɔrɔn wɔ lɛa.

¹⁶Muizu min mɛnɛn lɛn dia ǹ nə́ woo ga gána lɛ-a, bɛn tɔn lɛn man ke kɛnɛn. Muizu Zozoe baa wɔ Nunu a nɛgiĩ Hozee ganaa.

¹⁷Ǹ bɛ́ bɛa minin kɛn lɛn diɛ woe, Muizu na á goã á pɛ ǹ nɛ: «Ka bɔ kɛnɛn li, gusin a lɛ̀gɔn la, ka wo kele yii kɛ nɛ, ka ga gána lɛ a giã ǹ gɔn ganaa.

¹⁸Ka ga a ganaa, bɛ̀ pàã tá a minin lon, hinlaa bɛ̀ pàã ba ǹ lon wa, bɛ̀ a zaman ba didi wa, hinlaa bɛ̀ á didi.

¹⁹Ka ga a ganaa, bɛ̀ gána lɛ á kɔɔ̃n hinlaa bɛ̀ á laa nɛ, bɛ̀ kungɔn tá pɛnɛɛ nɛ a kiwin ganaa, hinlaa bɛ̀ maǹ bii-a kooro.

²⁰Ka ga a ganaa, bɛ̀ a tán tá siĩn hinlaa bɛ̀ a siĩn wa, bɛ̀ da bǎã nɛ hinlaa bɛ̀ da bǎã bie wa. Ka n foo taã, ka gána lɛ a da nɛ na ka da nɛ ka gɔn.» Bɛ́ daa yǎa bɛ̀ *rezɛ̃ da nɛ bibinaan ma biikoo ne.

²¹Bɛ kio, ga bǎã ganaa wolen lɛn nə́ woo. Ǹ nə́ gána lɛ a gama a saa tán Sinin diə gole kɛ nɛ yǎa Rewɔbu kiwi, kunu Lebo-Amaati kiwi ganaa.

²²Bɛ kio, ǹ nə́ woo gusin a lɛ̀gɔn li, ǹ nə́ woo soo yǎa Ebrɔn kiwi. Anaaki a nɛnyaanan kɛn, Ayiman nɛ, Sesayii ni ka Talmayii ni, bɛn tanlɛn minin man nə́ goã giã-n bɛa bǎã lɛ nɛ. (Ǹ nə́ goã ǹ nə́ Ebrɔn kiwi kɛ koa á dɔ lɛ̀ sɔbaa, ǹ nə́ tɔ́n Soan kiwi kɛ koa Ezipti gána nɛ.)

²³Bɛ kio, ga bǎã ganaa wolen lɛn nə́ woo yǎa Ɛsikɔli a nyankɔrɔ lɛ kɛ nɛ. Walan nɛ, ǹ nə́ rezɛ̃ da gùrù goon yiɛ, nɛ lɛa a san ganaa, ǹ min paa gũ ka bàlà nɛ. Ǹ nə́ grenadie da nɛ laanka gɔ́rɔ nɛ dɔ na ǹ gɔn.

²⁴Ǹ nə́ bɛa bǎã lɛ bii mà Ɛsikɔli nyankɔrɔ lɛ, bɛ giala mà "Da nɛ san nyankɔrɔ lɛ". A giala Izirayeli minin lɛn man nə́ rezɛ̃ san lɛ na bɛa bǎã lɛ nɛ.

²⁵Min mɛnɛn nə wo ga gána lɛ ganaa, ǹ bɛ́ ǹ nə́ dɔ lɛawaa pusi walan, ǹ nə́ n bɔyaa ǹ nə́ daa.

²⁶Ǹ nə́ daa Muizu yaa, ka Aarɔn laanka Izirayeli a zaman lɛ tumaa nɛ, Paran diə gole ne, Kadɛsi. Ǹ yii sii mɛn yɛ, ǹ nə́ bɔ ka bɛa boo ne ǹ nə́ pɛ ǹ tumaa nɛ, ǹ nə́ gána lɛ a da nɛn dɔn nyaa ǹ nɛ.

²⁷Maǹ nə́ goã ǹ nə́ boo lɛ yɔrɔ pɛ Muizu-n kɛnɛn: «N wɔsɛn dia gána mɛn lɛ nɛ, wɔ woo. Taãn mà a n pɛ, bɔ̀nyaa laanka zoo nyɔɔ n baa sii a nɛ. A da nɛn nə́ ke.

²⁸Sɛn kəni, pàã tá gána lɛ a minin lon, ǹ kiwin nə́ dadara, kungɔn nə́ pɛnɛɛ nɛ ǹ ganaa sɔnbɔraanɛ. Wɔ Anaaki tɔrɔn dinin yɛ a nɛ.

²⁹Amalɛki tɔrɔn man giã nɛ a gusin a lɛ̀gɔn la bǎã nɛ, Ɛti tɔrɔn nɛ, Zebuzu tɔrɔn nɛ, ka Amɔɔrɔ tɔrɔn nɛ, bɛn nə́ giã nɛ kele yii kɛ nɛ, Kanaan minin nə́ giã nɛ yìsi mu lɛ-a ka Zurdɛ̃ tà lɛ-a nɛ.»

³⁰Min mɛnɛn nə goã ǹ nə́ mɛ Muizu tɔ la ǹ nə́ pii, Kalɛbu paraa, á ǹ da lɛ tã ganaa á pɛ kɛnɛn: «Ka daa wɔ n tan. Wɔsɛn man die gána kɛ lɛ sii wɔ baa wɔa wɔ lɛa, wɔ n boe bɛ la a giala yii li.»

³¹Sɛnɛ, giĩn mɛnɛn nə goã ǹ nə́ woo kun ka Kalɛbu lɛ nɛ, bɛn nə́ pɛ mà ǹsɛn ba boe la ǹ zia baa bɛa tɔrɔn kɛn lɛn ganaa wa, a giala, mà pàã tá ǹ lon á la ǹsɛn manɛ.

³²Ǹ goã ǹ nə́ woo ga gána mɛn lɛ-a, ǹ nə́ tɔ́n bɔ ǹ nə́ mɛ bɛ piɛ̃-bɔ la, Izirayeli minin lɛn yɔrɔ-a ǹ nə́ pɛ: «Wɔsɛn nə gána mɛn lɛ kɔ kɔn wɔ́ ga a ganaa, a na a minin bii.

³³ Wɔ min mɛnɛn tumaa yɛ a nɛ, maǹ sɔsɔrɔ. Wɔ́ Anaaki tɔrɔn yɛ a nɛ, bɛa min sasa gegere tɔrɔn kɛn lɛn. Wɔ́ goã giɛ wɔ dinin ganaa bisinin lɛa ǹ genli, ǹ dɔn yii na á goã wɔsɛn ganaa miɛ̃ lɛn.»