Read Samo, Southern MNS 19 Bible Online

MNS 19 - Samo, Southern bible

MNS 19

¹Dɛnaa Lawa boo da Muizu laanka Aarɔn nɛ, á pɛ:

²«Ma n gɔn waa ka nɛ ka dí-pɛ lɛ a landa siin mɛnɛn nɛ, bɛn nə́ ke: Ka pɛ Izirayeli minin lɛn manɛ, ǹ da dii dan tã kəwuu kɔ ka la, dii dan mɛn nə́ ke wɔ̀lɔ̀ goon ná a ba a ganaa wa, ǹ nə́ ǹ tɔn zǔu dɔ da a ganaa wa.

³Ka die ka dii lɛ kɔ Lawa a wúlu-bɔle Eleyazaara la. Bɛ die a wo ne giã ǹ bǎã kɛ kio, ǹ dɛ a yii ni.

⁴Eleyazaara lɛ die a n gòon sã dii dan lɛ mà kɔn nɛ a pɛsɛ̃ gunyin sɔbaa, dia-n woe kɔn yɛ ka Lawa nɛ ǹ mɔnaa zìã kɛ yɔrɔ-a.

⁵Bɛ kio, ǹ dii dan lɛ tã a yii ni. Ǹ na a ki tã, a siĩ laanka a mà nɛ, ka a bù dɔ nɛ.

⁶Lawa a wúlu-bɔle lɛ die a *sɛdrə da gɔn saa, ka *izopi gùrù laanka gɛ̀sɛ tã bonbon ne, dii dan lɛ bɛ́ kuĩ tɛ mɛn nɛ, a ǹ kaa bɛ nɛ.

⁷Bɛ kio, Lawa a wúlu-bɔle lɛ die a na a mɔnaan pii, a n zoo mu li, a tɔn nə n bɔyaa a wo giã ǹ bǎã lɛ nɛ. Sɛnɛ, a n goɛ̃ gɔ̀dɛnaa lɛa yǎa wasa miɛ̃.

⁸Min mɛn bɛ́ re dii dan lɛ tiɛ̃, bɛa dɛnaa dɔ na a mɔnaan pii, a n zoo mu li. Sɛnɛ a n goɛ̃ gɔ̀dɛnaa lɛa yǎa wasa miɛ̃.

⁹ Min mɛn nə́ ke *yoreene landa wɔ paǹ li, bɛa dɛnaa n die dii dan lɛ a ton goɛ, a kaa bǎã sonbore ne giã ǹ bǎã lɛ kio. Bɛa ton lɛ n die goɛ̃ koa-n Izirayeli minin lɛn gɔn li, ǹ *gɔ̀ bɔ ǹ mu zɛnaa nɛ. Sii baraa sawaa ǹ *wúlu màn nɛ.

¹⁰Min mɛn bɛ́ re dii dan ton lɛ goɛ, bɛa dɛnaa dɔ na a mɔnaan pii. A n goɛ̃ gɔ̀dɛnaa lɛa yǎa wasa miɛ̃. Bɛ n die goɛ̃ landa lɛa, a ba n bɔyɛɛ wa, á n Izirayeli minin lɛn mìi ni, ka gùli mɛn dɔ bɛ́ giã nɛ ǹ li.

¹¹Bɛ̀ min mɛn nə́ n gɔn da gere woo gere ganaa, ǹ dɛnaa n goɛ̃ gɔ̀dɛnaa lɛa yǎa lɛawaa sɔbaa.

¹²Ǹ dɛnaa die a gɔ̀ bɔ a din-a ka bɛa gɔ̀ bɔ ǹ mu kɛ lɛ nɛ, a lɛawaa sɔɔbaa ǹ wɔ pinaa, ka sɔbaabaa ǹ wɔ nɛ, á die goɛ̃ yoreene bɛ kio, a lɛawaa sɔbaabaa ǹ wɔ pinaa. Sɛnɛ, bɛ̀ a gɔ̀ bɔ a din-a a lɛawaa sɔɔbaa ǹ wɔ pinaa wa, a ba re goɛ̃ yoreene a lɛawaa sɔbaabaa ǹ wɔ pinaa wa.

¹³Bɛ̀ min nə́ gã, yǎa min woo min nə n gɔn da bɛa gere kɛ lɛ-a, ǹ dɛnaa ná a gɔ̀ bɔ a din-a, bɛ kio wa, a n Dɛnaa Lawa a kion kɛ gɔgɔrɛ koe, ka ǹ dɛnaa na ka bɔ Izirayeli zaman lɛ ganaa. Gɔ̀ bɔ ǹ mu kɛ bɛ́ a bie á n pɛsɛ̃ ǹ dɛnaa ganaa wa, a n tɔn na a gɔ̀ gɔ́ɔ̃ nɛ.

¹⁴Bɛ̀ min gã mɔnaa zìã nɛ, bɛa dí-pɛ á ke: bɛ̀ min woo min wɔ mɔnaa zìã lɛ nɛ, hinlaa bɛ̀ min woo min tá a gɔ́ɔ̃-n lɛlɛndun, ǹ dɛnaa n goɛ̃ gɔ̀dɛnaa lɛa yǎa lɛawaa sɔbaa.

¹⁵Bɛ̀ màn woo màn lɛ á koo mɔnaa zìã lɛ nɛ, a lɛ ná a n tã taãn wa, bɛ dɔ gɔ́ɔ̃gɔ́ɔ̃ ǹ màn nə gɔgɔrɛ koe.

¹⁶Don gɔ́ɔ̃ nɛ, bɛ̀ min mɛn nə́ n gɔn da min gere ganaa, kana gere mɛn nə́ ke zia wɔ lɛa hinlaa min mɛn bɛ́ á gã kooro, hinlaa bɛ̀ min mɛn nə́ n gɔn da min wen ganaa, hinlaa gere yala ganaa, ǹ dɛnaa n goɛ̃ gɔ̀dɛnaa lɛa yǎa lɛawaa sɔbaa.

¹⁷Bɛ̀ ka tá gɔ̀ boe min ganaa, ka dii dan mɛn lɛ bɔ sii baraa sawaa ǹ wúlu màn lɛa, ka bɛa ton bɔ ka kaa màn nɛ, ka mu yoreen kaa li.

¹⁸Min mɛn nə́ ke yoreene, bɛ izopi gùrù saa a sã màn gɔ́ɔ̃ mu lɛ li, min gã mɔnaa zìã mɛn lɛ gɔ́ɔ̃ nɛ a pɛsɛ̃ bɛ ganaa kɔnlɛ ka a gɔ́ɔ̃gɔ́ɔ̃ ǹ màn tumaa nɛ, ka min mɛnɛn dɔn nə goã a gɔ́ɔ̃ nɛ. Bɛ̀ min mɛn dɔ nə n gɔn da gere wen ganaa, hinlaa zia kana gere ganaa, hinlaa gɛ̀ kooro wole ganaa, hinlaa gere yala ganaa, ka pɛsɛ̃ bɛ dɔ ganaa.

¹⁹Min mɛn lɛ á ke yoreene, bɛ lɛ die a mu lɛ pɛsɛ̃ gɔ̀dɛnaa lɛ-a, sii lɛ a zɛnaa a lɛawaa sɔɔbaa ǹ wɔ pinaa, ka a lɛawaa sɔbaabaa ǹ wɔ pinaa nɛ. Min yoreen lɛ die a gɔ̀ bɔ gɔ̀dɛnaa lɛ-a, a lɛawaa sɔbaabaa ǹ wɔ pinaa, bɛ kio, gɔ̀dɛnaa lɛ na a mɔnaan pii, a n zoo mu li, á die yoreen koe wasamiɛ̃nɛ.

²⁰Sɛnɛ, bɛ̀ min mɛn gɔ̀dɛnaa baa, a ná a gɔ̀ bɔ a din-a wa, ka bɛa dɛnaa na ka bɔ Izirayeli zaman ganaa a giala a n die Dɛnaa Lawa a kion lɛ gɔgɔrɛ koe. Gɔ̀ bɔ ǹ mu bɛ́ a bie á n pɛsɛ̃ a ganaa wa, a n gɔgɔrɛ.

²¹Bɛ n die goɛ̃ landa lɛa ka mìi ni, a ná a ba n bɔyɛɛ wa. Min mɛn bɛ́ re gɔ̀ bɔ ǹ mu lɛ pɛsɛ̃, ǹ dɛnaa die a na a mɔnaan pii. Bɛ̀ min nə́ n gɔn da gɔ̀ bɔ ǹ mu lɛ ganaa, a n goɛ̃ gɔ̀dɛnaa lɛa yǎa wasa woe miɛ̃.

²²Bɛ̀ gɔ̀dɛnaa lɛ nə́ n gɔn da màn woo màn ganaa, bɛ n gɔgɔrɛ koe, bɛ̀ min mɛn dɔ nə́ n gɔn da gɔ̀dɛnaa lɛ ganaa, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.»