Read Samo, Southern MNS 21 Bible Online

MNS 21 - Samo, Southern bible

MNS 21

¹ Aaradi kiwi a kii ke, Kanaan min lɛa, giã-n gána lɛ a gusin a lɛ̀gɔn la, bɛ ná a boo ma, mà Izirayeli minin tá die ka Ataarimu zii kɛ nɛ. Á tɔ́n zia da Izirayeli minin lɛn ganaa, á minin baa bɛ̀rɛn lɛa ǹ bii.

²Bɛ kio, Izirayeli minin lɛn nə́ n lɛ kɔ Dɛnaa Lawa la ǹ nə́ pɛ: «Bɛ̀ ń lɛ kɔ ń tɔrɔ kɛa minin wɔ wɔsɛn gɔn, wɔsɛn manə ǹ kiwin tumaa bɔ̀n biɛ lenlen.»

³Dɛnaa Lawa Izirayeli minin boo lɛ si, á Kanaan minin lɛn wɔ ǹ gɔn. Izirayeli minin lɛn nə́ ǹ dɛ lenlen, ǹ nə́ ǹ kiwin dɔn ziziɛ̃. Ǹ nə́ nɔmaa ǹ nə́ bɛa bǎã lɛ bii Ɔrmaa, bɛ giala mà "bɔ̀n".

⁴ Izirayeli minin lɛn nə́ n toa Hɔɔrɔ kele bǎã nɛ, ǹ nə́ Sawɛɛ tà zii kɛ saa, màn mɛn bɛ́ toɛ ǹ Edɔmu gána lɛ lɛ bɔ ǹ da. Sɛnɛ zaman lɛ gù gã zii la.

⁵ Ǹ ná a giala kɔ, ǹ nə́ boo diɛ Lawa laanka Muizu ganaa kɛnɛn: «Wàa na á baa ka wɔsɛn waa ká soo wɔ nɛ Ezipti gána nɛ, ka n die wɔ dii diə gole kɛ nɛ? A giala, buuru ba bǎã kɛ lɛ-n wa, mu dɔ ba a-n wa. Bɛa màn-bii naarɛ kɛ wɔsɛn gɔ̀nɔn bɔ.»

⁶Dɛnaa Lawa tɔ́n miɛ̃ babaraan kaa zaman lɛ ganaa. Bɛa miɛ̃ babaraan lɛn nə́ zaman lɛ a min gigiã kũ, ǹ nə́ gã.

⁷Zaman lɛ tɔ́n daa dɔ Muizu li, ǹ nə́ pɛ nɛ: «Wɔsɛn nə́ sii baraa zɛnaa, a giala, wɔ boo da n laanka Dɛnaa Lawa ganaa. Dɛnaa Lawa nyankɔ, a miɛ̃n lɛn wɔlɔ lui wɔ ganaa.» Muizu Lawa nyankɔ zaman lɛ a lɛa.

⁸Dɛnaa Lawa tɔ́n pɛ nɛ: «Miɛ̃ babaraa nyín zɛnaa n pɛnɛ bàlà sasa ganaa lon. Bɛ̀ miɛ̃ min woo min kũ, yǎa ǹ dɛnaa nə n yii saa a ga bɛa miɛ̃ nyín lɛ ganaa, ǹ dɛnaa á die liɛ.»

⁹ Muizu tɔ́n miɛ̃ nyín zɛnaa ka zan nɛ, á pɛnɛ bàlà sasa ganaa lon. Miɛ̃ goã min mɛn tumaa kuĩ, bɛ̀ ǹ mɛn nə́ n yii saa á ga miɛ̃ nyín lɛ ganaa, ǹ dɛnaa n liɛ.

¹⁰Izirayeli minin lɛn nə́ yoo, ǹ nə́ woo golee Obɔti.

¹¹Bɛ kio, ǹ nə́ yoo Obɔti, ǹ nə́ woo golee Ye-Abarimu, diə gole kɛ nɛ Moabu gána yɔrɔ-a, dia-n woe lɛ̀giala li.

¹²Ǹ bɛ́ ǹ nə́ yoo walan, ǹ nə́ woo golee Zerɛdi tà lɛ-a.

¹³Ǹ bɛ́ ǹ nə́ yoo walan dɔ nɛ, ǹ nə́ woo golee Arnɔn tà kio. Bɛa tà lɛ nə n toɛ Amɔɔrɔ tɔrɔn tán la, a mu baa si a da bɔ diə gole kɛ nɛ, a tɔn nə n baa Moabu tɔrɔn laanka Amɔɔrɔ tɔrɔn tán gèlè lɛa.

¹⁴Bɛ lɛ nɛ, ǹ nə́ pɛ Dɛnaa Lawa a zia boon sɛ́wɔ kɛ nɛ: «Wayɛbu tà ke Sufaa, bɛ laanka a tà gòãn nɛ,

¹⁵Arnɔn laanka a tà gòãn nɛ, ka tà basan mɛnɛn nə́ ke dia-n woe Aara ganaa, ǹ mu nə́ n diɛ Moabu gána gèlè para li.»

¹⁶Bɛ kio, Izirayeli minin lɛn nə́ yoo ǹ nə́ woo bǎã kɛ nɛ, ǹ nə́ bíi "Tù". Walan lɛ nɛ, Dɛnaa Lawa pɛ Muizu ni mà a zaman lɛ sɔkɔn, màn mɛn bɛ́ toɛ asɛ mu kɔ ǹ la.

¹⁷Izirayeli minin lɛn nə́ tɔ́n loe kɛ lɔ: «Mu bɔ, tù! Ka a para pɛ!

¹⁸Tù mɛn lɛ á ke, nyɛɛnaandɛnan nə́ fɔ̃, zaman lɛ a min yii guguru-an nə́ fɔ̃, ka ǹ pàã zɛnaa ǹ bàlàn nɛ, ka ǹ bàlàn nɛ.» Bɛ kio, Izirayeli minin lɛn nə́ n toa diə gole lɛ nɛ, ǹ nə́ woo Matanaa.

¹⁹Ǹ nə́ n toa Matanaa, ǹ nə́ woo Nahalieli, ǹ nə́ yoo Nahalieli ǹ nə́ woo Bamɔti.

²⁰Ǹ nə́ tɔ́n nə n toa Bamɔti, ǹ nə́ woo nyankɔrɔ lɛ kɛ nɛ kiɛ̃ Moabu gána nɛ, dia-n woe kele kɛ ganaa, ǹ nə́ bíi Pisigaa. Bɛa kele lɛ baã n zuməə-n diə gole kɛ la.

²¹Izirayeli minin nə́ minin dia woe pii Amɔɔrɔ tɔrɔn kii Sihɔn nɛ:

²²Toa wɔ bɔ n gána nɛ wɔ kiɛ̃. Wɔ ba re kanɛɛ wɔ bɔ wuru gɔ́ɔ̃-n wa, wɔ ba re boe *rezɛ̃ da wuru gɔ́ɔ̃-n wa, wɔ ba re tù mu dɔ mii wa. Wɔsɛn man die koe gána lɛ a zii gole kɛ lɛ miɛ̃, yǎa wɔ soe wɔ n boe n tán la.

²³Sɛnɛ, Sihɔn toa Izirayeli minin lɛn nə́ kiɛ̃ a tán la wa. Á ná a zaman tumaa sɔkɔn, á woo ǹ gialaa diə gole gɔ́ɔ̃ nɛ, á dɔ Zaasaa, á zia da ǹ ganaa.

²⁴Izirayeli minin lɛn nə́ boo la. Ǹ nə́ saa Arnɔn tà ganaa gusin a lɛ̀gɔn la, ǹ ná a gána lɛ kũ, yǎa Yabɔki gɔsɛ a lɛ̀gɔn la, ǹ nə́ kũ miɛ̃ yǎa Amɔn tɔrɔn tán gèlè la lɛ̀giala gɔn la. Bɛa gèlè kɛ lɛ n Kungɔn lɛa.

²⁵Izirayeli minin lɛn nə́ Amɔɔrɔ tɔrɔn kiwin tumaa si, ǹ nə́ giã ǹ nɛ. Ǹ nə́ giã Ɛsibɔn kiwi dɔ nɛ, ka a kiwi bisinin tumaa nɛ.

²⁶A giala, Ɛsibɔn lɛ na á goã Amɔɔrɔn kii Sihɔn lɛ a kiwi gole lɛa. Sihɔn lɛ na á goã á zia da Moabu gána a kii bibinaa kɛ ganaa, á ná a gána tumaa si la, yǎa Arnɔn tà li.

²⁷Bɛ lɛ n ke loe-lɔlin tá pii mà: Ka da Ɛsibɔn! Ka wusoo ka Sihɔn a kiwi lɛ da a giala la!

²⁸ Tɛ soo Ɛsibɔn kiwi, Tɛ buə̃ soo Sihɔn a kiwi, á n daa Aara kiwi la, Moabu gána nɛ, á n daa dì nyìnin kɛn la, ka Arnɔn a wúlu bɔ ǹ bǎãn nyɛɛnandɛnaan nɛ.

²⁹Moabu gána, koe bɔ n ganaa! Dì Kemɔɔsi guguru-kɔlen, kaa wɔ nya! Ǹ nə́ baa da kaa nɛgiĩn gòã li. Ǹ nə́ kaa nɛlɔn baa kii Sihɔn, Amɔɔrɔ tɔrɔ kɛa bɛ̀rɛn lɛa.

³⁰Wɔ́ kiɛ dɔrɔ ǹ ganaa. A kũ Ɛsibɔn ganaa yǎa Dibɔn, màn tumaa bɔ̀n baa. Wɔ́ bɔ̀n da miɛ̃ yǎa Nofaa, ka Madabaa nɛ.

³¹Izirayeli minin lɛn man nə́ giã Amɔɔrɔ tɔrɔn gána nɛ, ka bɛa yɔrɔ lɛ nɛ.

³²Muizu minin dia woe giɛ Zazɛɛrɛ kiwi ganaa ka durii ni. Bɛ kio, Izirayeli minin lɛn nə́ Zazɛɛrɛ kiwi lɛ a kiwi bisinin si ǹ nə́ nɔmɔ ǹ ganaa. Amɔɔrɔ tɔrɔ mɛnɛn nə goã giã-n bɛa kiwin kɛn lɛn nɛ, Muizu bɛn loo.

³³Izirayeli minin lɛn nə́ wusoo, ǹ nə́ n yɔrɔ dia paǹ kɔsɔ li, ǹ nə́ Basan zii kɛ saa ǹ nə́ woo. Basan gána a kii Ɔgu laanka a minin tumaa tɔ́n soo, ǹ nə́ woo wɔ ǹ lɛ, màn mɛn bɛ́ toɛ ǹ zia da ǹ ganaa Edreyii kiwi.

³⁴Dɛnaa Lawa pɛ Muizu ni: «N baran nyɛ́ɛ baa-n wa. Masɛ á die we n gɔn, kɔnlɛ ka a zaman tumaa laanka a gána nɛ. Amɔɔrɔ tɔrɔn kii Sihɔn kɛ lɛ á goã pàã la Ɛsibɔn kiwi, a goã á sii mɛn zɛnaa bɛ nɛ, bɛ lɛ miã zɛnaa Ɔgu dɔ nɛ.»

³⁵Izirayeli minin lɛn nə́ boo Ɔgu la, kɔnlɛ ka a nɛgiĩn laanka a zaman tumaa nɛ, min goon din yii goã koo wa. Ǹ nə́ gána lɛ si ǹ nə́ nɔmɔ a ganaa.