Read Samo, Southern MNS 22 Bible Online

MNS 22 - Samo, Southern bible

MNS 22

¹Izirayeli minin lɛn nə́ yoo doo, ǹ nə́ woo golee Moabu gána a nyankɔrɔ lɛ kɛ nɛ, Zurdɛ̃ tà kio, Zerikoo yɔrɔ-a.

²Izirayeli minin lɛn nə goã ǹ nə́ sii mɛn tumaa zɛnaa Amɔɔrɔ tɔrɔn manɛ, Sipɔɔrɔ a nɛgiĩ Balaaki ke, á goã Moabu gána a kii lɛa bɛa waáraa lɛ nɛ, bɛ ná a yii boo ma. A laanka a zaman tumaa nyɛ́ɛ baa Izirayeli zaman lɛ nyɛɛn taãn-taãnɛ, a giala Izirayeli zaman lɛ goã mɔnaa nɛ. Moabu minin lɛn nə́ tɔ́n pɛ Madiã min golen manɛ: «Màn mɛn tumaa bɛ́ wɔsɛn lɛnpɛnɛ, bɛa zaman damata kɛ lɛ n die a yii mamaɛ, ka dii bɛ́ buu soɛ̃ a bɔ tán lɔn.»

⁵ Bɛ kio, Balaaki minin dia Bewɔɔrɔ a nɛgiĩ Balaamu ǹ di-piɛ Petɔrɔ kiwi, Efrati tà lɛ-a, mà ǹ wo kɛ pɛ Balaamu ni: Á ke, tɔrɔ kɔn a minin man nə́ n toa Ezipti gána nɛ, ǹ nə́ daa. Ǹ nə́ wɔlɔ gɔ̀nɔn bɔ gána lɛ nɛ. Maǹ nə́ giã kunu masɛ li.

⁶Bǐɛ̃ kɔ n daa kəni, n lɛn baraa bii bɛa tɔrɔ kɛ lɛ a minin lɛn li, masɛ a lɛa. A giala, ǹ pàã la masɛ wɔ nɛ. Bɛ̀ ń lɛ kɔ, kɔntan, masɛ á die boe ǹ la, ma ǹ loo ma ǹ bɔ bǎã lɛ nɛ. A giala, ma á doɛ̃, bɛ̀ ń barka da min woo min ganaa, bɛ wɔ n bǐɛ̃ koe, bɛ̀ ń lɛn baraa bii min woo min li, bɛ wɔ n ziziɛ̃.

⁷Bɛ kio, Moabu gána a min golen laanka Madiã gána wɔn nə́ yoo ǹ nə́ woo ka màn nə́ ǹ gɔn, sii-nyaali lɛ a saraa ǹ wɔ lɛa. Ǹ bɛ́ ǹ nə́ dɔ Balaamu li, ǹ nə́ Balaaki a boon lɛn pɛ nɛ.

⁸Balaamu tɔ́n pɛ ǹ nɛ: «Ka golee ka waa kànaa, Dɛnaa Lawa bɛ́ re boo mɛn pii ma nɛ, masɛ n die ka lɛ sii, a kɔnpɛ ka bɛ nɛ.» Moabu gána a min dadaran lɛn dɔn nə́ golee Balaamu li.

⁹Lawa daa Balaamu li, á nɔ̀n da la: «Minin kɛn man dien lɛa n piɛ?»

¹⁰Balaamu ná a lɛ si: — Sipɔɔrɔ a nɛgiĩ Balaaki ke, Moabu gána a kii lɛa, bɛ na á ǹ dia die pii ma-n kɛnɛn:

¹¹«Á ke, zaman mɛn lɛ nə n toa Ezipti gána nɛ á daa, ǹ nə́ wɔlɔ gɔ̀nɔn bɔ gána lɛ nɛ. Bǐɛ̃ kɔ, n daa kəni, n lɛn baraa bii ǹ li, maa lɛa. Bɛ̀ n lɛ kɔ, kɔntan ma á re boe Izirayeli minin lɛn la, ma ǹ loo ma ǹ bɔ gána lɛ nɛ.»

¹²Lawa pɛ Balaamu ni: «N baran toa n wo kun ka bɛa minin kɛn lɛn nɛ wa. N baran toa n lɛn baraa bii zaman kɛ lɛ li wa, a giala masɛ barka da zaman lɛ ganaa.»

¹³Bɛa lɛawaa baayɛlɛ, Balaamu yoo á pɛ Balaaki a min dadaran lɛn manɛ: «Ka wusoo ka wo kaa gána nɛ, a giala, Dɛnaa Lawa n masɛ kurii, mà ma baran wo kun ka-n wa.»

¹⁴Bɛ kio, Moabu gána a min dadaran lɛn nə́ yoo ǹ nə́ n bɔyaa ǹ nə́ woo Balaaki li, ǹ nə́ pɛ nɛ: «Balaamu nə́ n piã mà a die kun ka wɔsɛn nɛ wa.»

¹⁵Sɛnɛ, Balaaki wusoo á min dadara kɔsɔn dia mɔnaa nɛ, ǹ yii ń guguru á la bibinaa dɛnan kɛn wɔ nɛ.

¹⁶Ǹ bɛ́ ǹ nə́ dɔ Balaamu li, ǹ nə́ pɛ nɛ: — Sipɔɔrɔ a nɛgiĩ Balaaki na á pɛ kɛnɛn: «Sabara baa, n baran n piã mà n ba die masɛ li wa.

¹⁷A giala, ma á die gugurubaa koe n la a tɔ-a, bɛ̀ ń nɔ̀n da ma la ka màn mɛn nɛ, ma á die bɛ koe n la. Sabara baa n daa kəni, n lɛn baraa bii bɛa zaman kɛ lɛ li, masɛ a lɛa.»

¹⁸Sɛnɛ, Balaamu Balaaki a dí-nyalin lɛn lɛ si: «Ta Balaaki na a kion wɔrɔ tumaa laanka a kion sana tumaa koe masɛ la, ma ba re sii boɛɛn hinlaa sii gole zɛnɛɛ, màn mɛn nə́ ke a ba woe kun ka maa Lawa, Dɛnaa Lawa a boo-n wa.

¹⁹Ka dɔn nə sabara baa ka golee kəni, tèlò kɛ lɛ nɛ, ka n yii da yǎa masɛ doɛ̃, Dɛnaa Lawa bɛ́ re wusii a boo mɛn pɛ ma nɛ.»

²⁰Lawa daa Balaamu li tèlò-n á pɛ nɛ: «Bɛ̀ bɛa minin kɛn lɛn man nə́ daa lɛ dia n la, yoo n dɔ ǹ ganaa n woo. Sɛnɛ, bɛ̀ ma boo mɛn pɛ n nɛ, n doamaa nɛ n bɛ lɛ dinsɔɔ̃ zɛnaa.»

²¹Bɛa lɛawaa baayɛlɛ, Balaamu yoo á ná a dundun dan kũ, á kɛkɛrɛ da a dɔ̀ɔ̃-n, á woo kun ka Moabu gána a min dadaran lɛn nɛ.

²²Sɛnɛ, Lawa bɛ́ á Balaamu yɛ woe, a foo yoo li. Dɛnaa Lawa a lon a dia dí-a wole goon tɔ́n woo n doa zii la, á n die zii tiɛ̃ a ganaa. Balaamu lɛ na á goã a dundun dan la, a dí-nyali min paa ń kun ni.

²³Dundun dan lɛ Dɛnaa Lawa a lon a dia dí-a wole lɛ yɛ doa-n zii lɛ la, ka gɔya sa ná a gɔn, a ná a ba a kii-n wa. Dundun dan lɛ tɔ́n zii da, á n dɔ da lɛ-n. Balaamu dundun dan lɛ məə, á da zii la doo.

²⁴Dɛnaa Lawa lon a dia dí-a wole lɛ wusoo á woo n doa zii nyankɔrɔ bǎã goon ne, kiɛ̃ rezɛ̃ dan laanka kungɔn màn paa bii ni.

²⁵Dundun dan lɛ Dɛnaa Lawa a lon a dia dí-a wole lɛ yɛ doo, á tɔ́n woo n naa kungɔn lɛ ganaa, á Balaamu gòã kɛmɛ a ganaa. Balaamu tɔ́n bɔ á mɛ dundun dan lɛ la doo, á məə.

²⁶Dɛnaa Lawa a lon a dia dí-a wole lɛ wusoo á kiɛ̃ á woo ǹ nyɛɛn doo, á n doa kiɛ̃ ǹ bǎã boɛɛn kɔn nɛ, min ná a ba boe la a kanaa la, a wo a gɔsɛ hinlaa a gusin wa.

²⁷Dundun dan lɛ wusoo doo á Dɛnaa Lawa a lon a dia dí-a wole lɛ yɛ, yǎa a na, a waa tán ka Balaamu ni. Balaamu foo yoo li, á məməə ka bàlà nɛ.

²⁸Dɛnaa Lawa tɔ́n dundun dan lɛ da boo diɛ ganaa, á n lɛ da Balaamu lɛ: «Ma n má wàa pɛ n ganaa, ń tá koɛ kɔn la gunyin sɔɔ masɛ dii?»

²⁹Balaamu tɔ́n pɛ dundun dan lɛ nɛ: «A giala, n nə n sàn kɔ ka masɛ nɛ. Bɛ̀ ń nə n daa gɔya yaa masɛ gɔn, bɛ̀ ma n dɛ a din bǎã nɛ ń gã.»

³⁰Dundun dan lɛ wusoo á pɛ Balaamu ni: «Ma din bie n dundun dan lɛ lɛa, n nə dii ma la haalɛ bibindun wa ya? Ma á nɛn bɛ̀ ma kɛ miã tɔrɔ zɛnaa nɛ?» Balaamu ná a lɛ si mà haayii.

³¹Bɛ kio, Dɛnaa Lawa Balaamu yii na, á Dɛnaa Lawa a lon a dia dí-a wole lɛ yɛ doa-n zii la, gɔya sa ná a gɔn, a ná a ba a kii-n wa. Balaamu nə́ n zuməə, á na, á kaa tán a lɛ la.

³²Dɛnaa Lawa a lon a dia dí-a wole lɛ tɔ́n nɔ̀n da la kɛnɛn: «Wàa na á baa ń koa kɔn la gunyin sɔɔ, n nə́ n dundun dan lɛ dɛ? Á ke, ma din ni má soo má daa zii tã n ganaa, a giala zii-tɔ lɛ nyɛɛn ba re bǐɛ̃ biɛ n ganaa wa.

³³Dundun dan lɛ sɛ ma yɛ gunyin sɔɔ, á kanaa á n bɔ ma li. Bɛ̀ a bie á kanaa á n bɔ ma nyɛɛn wa, bɛ̀ má n dɛ a din bǎã nɛ ń gã, ma dundun dan lɛ sɛ yii toa koo.»

³⁴Balaamu pɛ Dɛnaa Lawa a lon dia dí-a wole lɛ nɛ: «Má sii baraa zɛnaa, a giala ma goã doɛ̃, máa n din nə ke ń goã doa nɛ, ma nyɛɛn zii lɛ la wa. Kanna, bɛ̀ zii-tɔ lɛ á baraa n yii li, man wusii.»

³⁵Sɛnɛ, Dɛnaa Lawa a lon a dia dí-a wole lɛ pɛ nɛ: «Wo kũ ka bɛa minin kɛn lɛn nɛ, sɛnɛ bɛ̀ masɛ boo mɛn pɛ n nɛ, n bɛ lɛ dinsɔɔ̃ pɛ.» Bɛ kio, Balaamu woo kũ ka Balaaki a min dadaran lɛn nɛ.

³⁶Balaaki bɛ́ á ma, mà Balaamu á die, á soo á woo n da lɛ yǎa Iri-Moabu kiwi kɛ nɛ, kaa-n Arnɔn tà lɛ, a gána lɛ gèlè la.

³⁷Balaaki pɛ Balaamu ni: «Ma bɛ́ má minin dia die lɛ diɛ n la bibinaa nɛ, wàa na á baa n lɛ kɔ ń daa wa? Ma n taasɛ, mà masɛ n ma ba re boe la ma gugurubaa gole kɔ n la wa?»

³⁸Balaamu tɔ́n Balaaki lɛ si kɛnɛn: «Á ke, má daa n li dɔn. Masɛ n die boe la ma wàa boo da? Bɛ̀ Lawa boo mɛn wɔ ma lɛ-n, man die bɛ lɛ pii.»

³⁹Bɛ kio, Balaamu kiɛ̃ kun ka Balaaki ni, ǹ nə́ woo Kiriyati-Usoti kiwi.

⁴⁰Balaaki wúlu bɔ ka diin laanka sèren ne, á Balaamu gii bɔ nɛ, ka goledɛnan mɛnɛn nə goã kun ni.

⁴¹Bɛa lɛawaa baayɛlɛ, Balaaki Balaamu kũ, ǹ nə́ woo dii, Bamɔti-Baali la. Balaamu nə́ n toa walan, a yii n Izirayeli zaman lɛ gialakun ganaa.