Read Samo, Southern MNS 23 Bible Online

MNS 23 - Samo, Southern bible

MNS 23

¹Balaamu pɛ Balaaki ni: «*Wúlu bɔ ǹ bǎã sɔbaa dɔ kànaa n nə ǹ kɔ masɛ la, n dii gɔ̀lɔ̀ sɔbaa laanka sère gɔ̀lɔ̀ sɔbaa dɔ yɔrɔ bɔ a din bǎã kɛ lɛ nɛ, n nə ǹ kɔ ma la.»

²Balaaki dɔ́ zɛnaa, ka Balaamu pɛ-n lɔn. Ǹ dinin min paa tɔ́n wúlu bɔ ka dii gɔ̀lɔ̀ goon laanka sère gɔ̀lɔ̀ goon ne, wúlu bɔ ǹ bǎã lɛ a gogoonmaa la.

³Balaamu pɛ Balaaki ni: «Giã n *wúlu màn tiɛ̃ genli, masɛ nə n wɔlɔ lui. Kɔntan, Dɛnaa Lawa á re die masɛ li. Bɛ̀ á boo mɛn da ma nɛ, ta bɛa boo kɛ lɛ n lɔn, ma á re pii n ni.» Bɛ kio, Balaamu kiɛ̃ á woo tenten kɔn la.

⁴Lawa daa Balaamu yɔrɔ-a, Balaamu tɔ́n pɛ nɛ: «Má wúlu bɔ ǹ bǎã sɔbaa dɔ, má wúlu bɔ ka dii gɔ̀lɔ̀ goon laanka sère gɔ̀lɔ̀ goon ne, ǹ gogoonmaa la.»

⁵Dɛnaa Lawa tɔ́n boo da, á wɔ Balaamu lɛ-n. Bɛ kio, á pɛ Balaamu ni: «Wusoo n wo Balaaki li, n bɛa boo lɛ pɛ nɛ.»

⁶Balaamu nə́ n bɔyaa á woo Balaaki li, á woo yaa golee ne a wúlu màn tiɛ̃ lɛ genli, kun ka Moabu gána a min dadaran nɛ.

⁷Balaamu tɔ́n bɔ boon kɛn nɛ kɛnɛn á ǹ pɛ: Balaaki na á minin dia die ma kuĩ Siirii gána nɛ, Moabun kii na á min dia die lɛ diɛ ma la, lɛ̀giala a kelen kɛn bǎã nɛ, á pɛ ma nɛ: Da lɛn baraa bii Zakɔba tɔrɔn kɛn li, maa lɛa. Da dɔlɔ da Izirayeli minin kɛn mìi ni.

⁸Lawa bɛ́ a n lɛn baraa da min mɛn kio wa, masɛ n siɛ lɔn ma tɔn nə n lɛn baraa da bɛ kio? Dɛnaa Lawa bɛ́ a dɔlɔ da min mɛn mìi-n wa, masɛ n siɛ lɔn ma tɔn dɔlɔ da bɛ mìi ni?

⁹Bɛ̀ má n toa gɛ̀fun mìi ni, má ga zaman kɛ ganaa, bɛ̀ má n toa kelen mìi ni, má n yii doa la, a n zaman lɛa, zaman mɛn nə́ ke giã nɛ a mìi ni, á n doɛ̃ mà asɛ a goon ka tɔrɔ kɔsɔn kɛn nɛ wa.

¹⁰Die n boe la, a Izirayeli min damata kɛ nimi, a Zakɔba tɔrɔ gigiã kɛ lɛ yɛ? Masɛ n zoɛ̃ li, máa ma dinmaa min peperen gɛ̀ tɔrɔ wɔ, maa lɛ-nyɔmiɛ̃ goã goon ka ǹ wɔ nɛ.

¹¹Balaaki pɛ Balaamu ni: «Wàa sii n ke ń zɛnaa ma nɛ? Masɛ n má daa n nɛ máa n lɛn baraa bíi maa zɔ́ɔn li, á ke ń yoo ń barka da ǹ ganaa taãn-taãnɛ.»

¹²Balaamu tɔ́n na a lɛ si: «Dɛnaa Lawa bɛ́ boo mɛn we ma lɛ-n, maa wɔ bie ka bɛ dinsɔɔ̃ a pɛ-n wa?»

¹³Balaaki wusoo á pɛ Balaamu ni: «Bǐɛ̃ kɔ n kiɛ̃ n nə n ta kun ka masɛ-n bǎã kɔsɔ nɛ, n bɛ́ re boe la n nə n toa bǎã mɛn nɛ, n zaman lɛ gialakun yɛ, n nə́ n ba ǹ tumaa yii wa. N die n nə n toa walan kəni, n lɛn baraa bii ǹ li maa lɛa.»

¹⁴Bɛ kio, Balaaki Balaamu kũ á woo ne bǎã-lɛduə̃lin doa ǹ bǎã kɛ nɛ, Pisigaa kele mìi ni. Á *wúlu bɔ ǹ bǎã sɔbaa dɔ, á wúlu bɔ ka dii gɔ̀lɔ̀ goon laanka sère gɔ̀lɔ̀ goon ne ǹ gogoonmaa la.

¹⁵Balaamu pɛ nɛ: «Giã kànaa n wúlu màn tiɛ̃ genli, masɛ wo n yii da kɛnɛn li.»

¹⁶Dɛnaa Lawa daa Balaamu yɔrɔ-a, á boo da á wɔ a lɛ-n, bɛ kio, á pɛ nɛ: «Wusoo n wo Balaaki lɛ li, n bɛa boo lɛ pɛ nɛ.»

¹⁷Balaamu dɔ́ wusoo á woo Balaaki li, á woo yǎa golee ne a wúlu màn tiɛ̃ lɛ genli, kun ka Moabu gána a min dadaran nɛ. Balaaki tɔ́n nɔ̀n da la: «Dɛnaa Lawa mà wàa?»

¹⁸Balaamu tɔ́n bɔ boon kɛn nɛ kɛnɛn á ǹ pɛ: Balaaki, yoo n nə n too kɔ! N too kɔ ma lon, Sipɔɔrɔ a nɛgiĩ!

¹⁹Lawa bie min lɛa, a tɔn soɛ bɔ wa! A bie minbuiin nɛ lɛa, a tɔn wusoo a kio-n wa! A ba boo diɛ, bɛ̀ a ná a ba a lɛ piɛ̃ wa! A boo diɛ a n lɛ bɔ wa!

²⁰Masɛ n má lɛ kɔ, má barka da zaman kɛ lɛ-a, a giala, Lawa din na á barka da ǹ ganaa. Ma bie re wusii man bɔlɔ baa wa.

²¹Dɛnaa Lawa sii baraa yɛ Zakɔba tɔrɔn lɛn ganaa wa. A kɔkɔrɔbaa yɛ Izirayeli minin lɛn ganaa wa. A nə ǹ Lawa Dɛnaa Lawa lɛa, giã nɛ ǹ bii. Ǹ tá n lɛ dii ka a kiibaa nɛ.

²²A din na á ǹ waa Ezipti gána nɛ á soo ǹ ne. Á pàã kɔ ǹ la, ka don a zù bɛ́ lɔn.

²³Wɔ-kũli ba kun ka Zakɔba tɔrɔn lɛn nɛ wa. Boo baa ǹ dí ba Izirayeli minin lɛn li wa. Lawa bɛ́ sii mɛn zɛnɛɛ, bɛ nə n pii Zakɔba tɔrɔn lɛn nɛ, a nə n pii Izirayeli tɔrɔn lɛn nɛ, a kɔnpɛ a biikoo ne.

²⁴Á ke, bɛa zaman kɛ lɛ n yui ka don siĩ bɛ́ lɔn. A nə n goã doa ka yára bɛ́ lɔn a màn mɛn kũ, bɛ̀ a bɛ siĩ sɔ̃ wa, a gɔn dɔ màn mɛn-a, bɛ̀ a bɛ mà mi wa, a bie wɛɛ tán wa.

²⁵Bɛ kio, Balaaki pɛ Balaamu ni: «Bɛ̀ n ba re lɛn baraa bii ǹ li wa, n baran barka da ǹ ganaa sɛn wa.»

²⁶Balaamu tɔ́n na a lɛ si kɛnɛn: «Táa ma goã má pɛ n nɛ, máa bɛ̀ Dɛnaa Lawa boo woo boo da ma nɛ, masɛ n koen bɛ yii lɛ.»

²⁷Balaaki wusoo á pɛ Balaamu ni: «Da kiɛ̃ kəni, ma n kũ ma wo n ne bǎã kɔsɔ nɛ. Kɔntan, Lawa á die lɛ koe la, a n toa bɛa bǎã lɛ nɛ, n lɛn baraa bii zaman kɛ lɛ li maa lɛa.»

²⁸Balaaki tɔ́n Balaamu kũ á woo ne Pewɔrɔ kele kɛ la, zumii-n diə gole kɛ nɛ.

²⁹Balaamu pɛ Balaaki ni: «*Wúlu bɔ ǹ bǎã sɔbaa dɔ kànaa n nə ǹ kɔ ma la, dii gɔ̀lɔ̀ sɔbaa laanka sère gɔ̀lɔ̀ sɔbaa dɔ yɔrɔ bɔ, a din bǎã kɛ lɛ nɛ, n nə ǹ kɔ ma la.»

³⁰Balaaki dɔ́ zɛnaa ka Balaamu pɛ-n lɔn. Bɛ kio, á wúlu bɔ ka dii gɔ̀lɔ̀ goon laanka sère gɔ̀lɔ̀ goon ne, wúlu bɔ ǹ bǎã lɛ a gogoonmaa la.