Read Samo, Southern MNS 27 Bible Online

MNS 27 - Samo, Southern bible

MNS 27

¹Selofadi a nɛlɔn man nə́ goã ka Malaa nɛ, Noa nɛ, Ogla nɛ, Milkaa nɛ, ka Tirsa nɛ. Selofadi lɛ n Zozɛfu a nɛgiĩ Manaasee a tanlɛn goon a min lɛa. A n Makiiri tɔrɔ lɛa, ka Galaati laanka Hefɛɛrɛ nɛ.

²Ka ǹ kɔn nɛ, Selofadi a nɛlɔ sooro lɛ daa golee Muizu laanka Lawa a wúlu-bɔle Eleyazaara yɔrɔ-a, ka nyɛɛnaandɛnan laanka zaman lɛ tumaa yɔrɔ-a, kɔn yɛ ka Lawa nɛ ǹ kion kɛ a kiɛnlɛ-a, ǹ nə́ pɛ:

³«Wɔsɛn di na á gã diə gole ne. A goã kun ka gòãn dii wolen kɛn nɛ wa, min mɛnɛn lɛn nə kaa Koree kio ǹ nə́ n gòãn dii Dɛnaa Lawa ganaa. A na á gã a dinmaa a sã taman yii. A nɛginin dɔ yɛ wa.

⁴Wàa na á baa wɔsɛn di lɛ tɔ n die papaɛ̃ a n bɔ a tanlɛ minin bii, a nɛginin yɛ baã kɛ taman yii? Ka bǎã kɔ wɔsɛn dɔn la, wɔ di ǹ dɔɔ̃nɔn lɛn li.»

⁵Muizu nɛlɔn lɛn boo lɛ saa á da tán Dɛnaa Lawa giulun.

⁶Dɛnaa Lawa tɔ́n pɛ Muizu ni:

⁷ «Taãn tá Selofadi a nɛlɔn lɛn lon. Bǎã kɔ ǹ la kíɛ̃ lɛa, ǹ díi lɛ dɔɔ̃nɔn lɛn li, n nə ǹ díi lɛ a kíɛ̃ kɔ ǹ la.

⁸A pɛ Izirayeli minin lɛn manɛ: Bɛ̀ giĩ gã a ná a nɛginin toa a kio wa, ka die ka a kíɛ̃ kɔ a nɛlɔ la.

⁹Bɛ̀ nɛlɔ dɔ ba a lon wa, ka a kíɛ̃ kɔ ǹ dɔɔ̃nɔn la.

¹⁰Bɛ̀ ǹ dɔɔ̃nɔn dɔn banban wa, mà ǹ kíɛ̃ lɛ kɔ ǹ di ǹ dɔɔ̃nɔn la.

¹¹Bɛ̀ ǹ di ǹ dɔɔ̃nɔn dɔn banban wan, wɔ taãn bɛ́ ka min mɛn nɛ, ǹ tanlɛ nɛ, kíɛ̃ lɛ n doe bɛ ganaa. Bɛ n die sii zɛnaa ǹ gɔn biɛ, Izirayeli minin lɛn mìi ni, ka Dɛnaa Lawa pɛ Muizu-n lɔn.»

¹² Dɛnaa Lawa pɛ Muizu ni: «Dii Abarimu kele kɛ la, ma bɛ́ re gána mɛn lɛ koe Izirayeli minin lɛn la, n ga bɛ ganaa.

¹³N yii á die gána lɛ yii, bɛ kio, n dɔ n die giɛ̃ ka n dɔɔ̃n Aarɔn bɛ́ lɔn.

¹⁴A giala, ka masɛ bɔlɔ tii Sini diə gole ne. Zaman lɛ bɛ́ giɛ masɛ lɛ li ǹ mɛn waáraa, ǹ nə́ nɔ̀n diɛ mu li, ka nyaa Izirayeli minin lɛn manɛ, mà ma din lɛ n Lawa taãn lɛ lɛa wa.» Sii mɛn nə goã á n zɛnaa Kadɛsi, Sini diə gole ne, Meribaa mu kɛ wɔ paǹ li, bɛa boo n ke.

¹⁵Muizu tɔ́n pɛ Dɛnaa Lawa nɛ:

¹⁶«N din Dɛnaa Lawa mɛn bɛ́, da ǹ màn tumaa a fɔfoã nə́ n gɔn, ga min li, n da zaman lɛ mìi la,

¹⁷ min mɛn nə́ ke die boe la a zaman lɛ nyɛɛnaan bɔ ka a sii yii ni, ń giɛ zaman lɛ baran n baa ka tɔɔn mɛnɛn bɛ́ ǹ lɛduə̃ wole ná a banban wa.»

¹⁸Dɛnaa Lawa Muizu lɛ si kɛnɛn: «Nunu a nɛgiĩ Zozoe kũ, n nə n gɔn da la. Zozoe lɛ n min lɛa, masɛ yiri ń la.

¹⁹N die n wo ne Lawa a wúlu-bɔle Eleyazaara laanka zaman lɛ tumaa yɔrɔ-a, n na a dí wɔ a gɔn ǹ yii ni.

²⁰N die n nə n pàã lɛ kɔn kɔ Zozoe lɛ la, màn mɛn bɛ́ toɛ Izirayeli zaman lɛ tumaa na a bɔlɔ si.

²¹ Zozoe lɛ die a goã bɛ̀ a golee Lawa a wúlu-bɔle Eleyazaara kɛ yɔrɔ-a, bɛ̀ a ga a sii giala li Lawa li, ka Lawa dùũ dɔ ǹ mànan kɛn nɛ. Zozoe lɛ laanka Izirayeli zaman lɛ die a Eleyazaara lɛ bɔlɔ si ka sii yii ni.»

²²Dɛnaa Lawa goã á boo lɛ pɛ Muizu-n lɔn, Muizu dɔ́ zɛnaa miɛ̃. Á Zozoe kũ, á daa nɛ Lawa a wúlu-bɔle Eleyazaara laanka zaman lɛ tumaa li.

²³ Muizu nə́ n gɔn da la, a ná a dí wɔ a gɔn, ka Dɛnaa Lawa goã á pɛ nɛ, mà a zɛnaa lɔn.