Read Samo, Southern MNS 28 Bible Online

MNS 28 - Samo, Southern bible

MNS 28

¹Dɛnaa Lawa boo da Muizu ni á pɛ:

²«Boo da Izirayeli minin lɛn nɛ n pɛ ǹ nɛ, mànan mɛnɛn bɛ́ doe masɛ ganaa maa màn-bii lɛa, ǹ nə́ ǹ tiɛ̃ ǹ gìĩ kɔɔ̃n masɛ ganaa, ǹ die ǹ nə n doa ǹ da bɛn kɔ ma la a biikoo li.

³A pɛ ǹ nɛ dɔn, mà ǹ bɛ́ re mànan mɛnɛn koe masɛ la màn-bii lɛa, bɛn nə́ ke: lɛ̀ goon sère nɛ màn paa, wɔ̀lɔ̀ ná a ba ǹ ganaa wa, bɛn nə́ baraabaraa a *wúlu màn tiɛ̃ lɛa duduu.

⁴Sère nɛ bibinaa ke, ǹ bɛ dɛ baayɛlɛ, a paabaa ǹ wɔ ke, ǹ bɛ dɛ wasamiɛ̃nɛ.

⁵*Wùsu sonbore mɛn nə́ ke ka yia ka *olivie nyɔɔ sonbore litiri goon ka talɛɛ nɛ, ǹ bɛa kilo sɔɔ ti ǹ ganaa.

⁶Bɛ n baraabaraa a wúlu màn tiɛ̃ lɛa, a gìĩ n kɔɔ̃nɛ Dɛnaa Lawa ganaa, goon ka kɛ nɛ ǹ nə́ goã boe Sinayii kele la.

⁷Ǹ doamaa nɛ ǹ duvɛ̃ litiri goon ka talɛɛ ti baayɛlɛ sère nɛ lɛ ganaa, ǹ bɛa wúlu bɔ ǹ duvɛ̃ kakaarɛ kɛ lɛ kɔ Dɛnaa Lawa la bǎã sonbore kɛ nɛ.

⁸Ǹ sère nɛ lɛ a paabaa ǹ wɔ kɛ sɛ kɔ Dɛnaa Lawa la wasamiɛ̃nɛ. Wúlu mànan mɛnɛn nə n ti baayɛlɛ wɔ lɛ ganaa, ǹ bɛn lɛn ti kɛ lɛ dɔ ganaa. A n wúlu màn tiɛ̃ lɛa, a gìĩ kɔɔ̃n Dɛnaa Lawa ganaa.

⁹*Susu ǹ pii pinaa, ǹ lɛ̀ goon sère nɛ paa bɔ, wɔ̀lɔ̀ ná a ba ǹ ganaa wa, kun ka Lawa gɔ ǹ wùsu sonbore kilo sɔrɔ nɛ, á n yia ka nyɔɔ nɛ, kun ka Lawa gɔ ǹ duvɛ̃ nɛ.

¹⁰Bɛ n susu ǹ pii a wúlu màn tiɛ̃ lɛa, kiɛ kun ka baraabaraa a wúlu màn tiɛ̃ kɛ laanka Lawa gɔ ǹ duvɛ̃ kɛ nɛ, ǹ nə́ tii a ganaa.

¹¹Mui gogoonmaa a giala kɔ pinaa, ǹ dii gɔ̀lɔ̀ paa baa wúlu màn tiɛ̃ lɛa ǹ kɔ Dɛnaa Lawa la, ka sère gɔ̀lɔ̀ goon laanka lɛ̀ goon sère nɛ sɔbaa nɛ, wɔ̀lɔ̀ ná a ba ǹ kɔn ganaa wa.

¹²Wùsu mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ǹ bɛ ti tɔɔ lɛ gogoonmaa ganaa. Dii gɔ̀lɔ̀ lɛ a gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ n kilo sɔrɔ,

¹³sère nɛ lɛ a gogoonmaa wɔ n kilo sɔɔ. A n wúlu màn tiɛ̃ lɛa, a gìĩ ń kɔɔ̃nɛ, Dɛnaa Lawa a màn-bii lɛa.

¹⁴Ǹ Lawa gɔ ǹ duvɛ̃ litiri sɔɔ da kun ka dii gɔ̀lɔ̀ lɛ gogoonmaa nɛ, a litiri paa nə n da kun ka sère gɔ̀lɔ̀ kɛ nɛ, a litiri goon ka talɛɛ nə n da kun ka sère nɛ lɛ a gogoonmaa nɛ. Ǹ bɛ́ re wúlu mànan mɛnɛn boe lɛ̀ a mui gogoonmaa a giala kɔ li, bɛn man ke.

¹⁵Ka bɛ dɔ nɛ, ǹ butumu goon baa sii baraa sawaa ǹ wúlu màn lɛa, ǹ da baraabaraa a wúlu màntiɛ̃ lɛ laanka a Lawa gɔ ǹ duvɛ̃ la.

¹⁶ Lɛ̀ a mui bibinaa a lɛawaa fulusiibaa ǹ wɔ pinaa, ka die ka *kiɛ̃mala ǹ zɔ́n zɛnaa ka Dɛnaa Lawa guguru kɔ nɛ.

¹⁷ A din mui kɛ lɛ a lɛawaa fulusoorobaa ǹ wɔ pinaa, kaa lɛawaa sɔbaa zɔ́n kɛ nə n giala koe. Ka n die yɔbùbaã buuru soɛ̃ bɛa zɔ́n kɛ lɛ a biikoo li.

¹⁸Zɔ́n lɛ a giala kɔ pinaa, ka die ka n sɔkɔn ka Dɛnaa Lawa guguru kɔ, ka n ka a n gɔn diɛ dí kaka kɔn-a wa.

¹⁹Ka dii gɔ̀lɔ̀ paa kɔ Dɛnaa Lawa la wúlu màn tiɛ̃ lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ, wɔ̀lɔ̀ ná a ba ǹ kɔn ganaa wa.

²⁰Wùsu mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ka bɛ ti tɔɔ lɛ gogoonmaa ganaa. Dii gɔ̀lɔ̀ lɛ gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ n kilo sɔrɔ,

²¹sère nɛ sɔbaa lɛ gogoonmaa wɔ n kilo sɔɔ.

²²Ka bɛ dɔ nɛ, ka butumu goon bɔ sii baraa sawaa ǹ wúlu màn lɛa, ka sii baraa sawaa ǹ sii zɛnaa ka ganaa nɛ.

²³Ka n die bɛ yii zɛnɛɛ ka da baayɛlɛ wúlu màn tiɛ̃ kɛ la, ka n boe baraabaraa nɛ.

²⁴Ka die ka bɛa mànan kɛn lɛn bɔ baraabaraa lɛawaa sɔbaa lɛ gɔ́ɔ̃ nɛ, wúlu màn-bii tiɛ̃ lɛa, a gìĩ ń kɔɔ̃n Dɛnaa Lawa ganaa. Ka n die ǹ boe ka da wúlu màn kɛ la ka n boe baraabaraa, ka Lawa gɔ ǹ duvɛ̃ kɛ nɛ bɛ̀ ka ti a ganaa.

²⁵A lɛawaa sɔbaabaa ǹ wɔ, ka wusoo ka n sɔkɔn ka Lawa guguru kɔ, ka n ka a n gɔn diɛ dí kaka kɔn-a wa.

²⁶ *Kaa-piɛ zɔ́n pinaa, bɛ̀ ka tá die kaa wuru màn lɛ bibinaa koe Dɛnaa Lawa la, ka die ka n sɔkɔn ka Dɛnaa Lawa lɛ guguru kɔ, ka ka a n gɔn diɛ dí kaka kɔn-a wa.

²⁷Ka die ka dii gɔ̀lɔ̀ paa baa wúlu màn tiɛ̃ lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ. A gìĩ kɔɔ᷉n Dɛnaa Lawa ganaa.

²⁸Wùsu mɛn bɛ́ á n yia ka nyɔɔ nɛ, Dɛnaa Lawa gɔ ǹ wɔ lɛa, ka bɛ da kun ka tɔɔ lɛ gogoonmaa nɛ. Dii gɔ̀lɔ̀ lɛ gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ n kilo sɔrɔ,

²⁹sère nɛ sɔbaa lɛ gogoonmaa wɔ n kilo sɔɔ.

³⁰Ka bɛ dɔ nɛ, ka butumu goon dɔ bɔ, màn mɛn bɛ́ toɛ ka sii baraa sawaa ǹ sii zɛnaa ka ganaa nɛ.

³¹Bɛa wúlu mànan kɛn lɛn tumaa n die kiɛkun ka baraabaraa a wúlu màn tiɛ̃ kɛ nɛ, ka wúlu màn kɛ nɛ ka n tii a ganaa. Tɔɔn mɛnɛn bɛ́ wɔ̀lɔ̀ ná a ba ǹ ganaa wa, ka die ka wúlu lɛ bɔ ka bɛn nɛ, kun ka wúlu bɔ ǹ duvɛ̃ mɛn kɔnbɔ a n da kunun ǹ ni.