Read Samo, Southern MNS 3 Bible Online

MNS 3 - Samo, Southern bible

MNS 3

¹Dɛnaa Lawa bɛ́ boo diɛ ka Muizu ni biikoo mɛn li, Sinayii kele la, min mɛnɛn nə goã Aarɔn laanka Muizu a kion minin lɛa, bɛn man ka kɛn nɛ:

² Aarɔn a nɛgiĩn tɔn nə́ ke: a gɔn binaa nɛ Nadaabu ni, bɛ kio, Abiu ni, Eleyazaara nɛ, ka Itamaara nɛ.

³Aarɔn a nɛgiĩn lɛn tɔn man ka bɛn nɛ. Maǹ nə́ nyɔɔ lɔ ǹ ganaa ǹ nə́ ǹ bɔ ǹ nə́ ǹ koa Lawa a wúlu-bɔlen lɛa, ǹ nə́ Lawa a wúlu bɔ ǹ dí wɔ ǹ gɔn.

⁴ Nadaabu laanka Abiu gã Dɛnaa Lawa yɔrɔ-a, a giala maǹ nə́ goã ǹ nə́ woo ka tɛ soree ne a yɔrɔ-a. Ǹ nə́ gã Sinayii diə gole kɛ nɛ, ǹ nə́ ǹ nɛ yɛ wa. Eleyazaara laanka Itamaara nɛ, bɛn sɛn man nə́ goã wúlu bɔ ǹ dí lɛ nyɛɛ ǹ di Aarɔn lɛ yii ni.

⁵Dɛnaa Lawa boo da ka Muizu ni á pɛ:

⁶«*Levii tɔrɔn lɛn bii ǹ nə n wɔlɔ kunu kɔ, n nə ǹ kɔ Lawa a wúlu-bɔle Aarɔn la, màn mɛn bɛ́ toɛ ǹ nə ǹ dɔ lɛ.

⁷Ǹ tá re goɛ̃ dí nyɛɛ Aarɔn laanka Izirayeli zaman lɛ tumaa nɛ, kɔn yɛ ka Lawa nɛ ǹ kion kɛ yɔrɔ-a, màn mɛn bɛ́ toɛ ǹ kion lɛ a sii yɔrɔ bɔ.

⁸Ǹ tá re giɛ kɔn yɛ ka Lawa nɛ ǹ kion lɛ a màn bisinin tumaa walan, n kion lɛa sii yɔrɔ bɔ Izirayeli minin lɛa.

⁹N die n Levii tɔrɔn lɛn kɔ Aarɔn laanka a nɛgiĩn la kəni. Ǹ tá re n boe Izirayeli minin lɛn bii ǹ nə n kɔ Aarɔn laanka a nɛgiĩn lɛn la a tɔ-a.

¹⁰N die n Aarɔn laanka a minin kaa ǹ dí lɛ la, màn mɛn bɛ́ toɛ ǹ nə ǹ wúlu bɔ ǹ dí lɛ nya. Min kooro mɛn bɛ́ re n mɔrɛ, ǹ dɛnaa nyin nə n boe.»

¹¹Dɛnaa Lawa wusoo á pɛ Muizu ni:

¹²«Á ke: Ma din ni má Levii tɔrɔn lɛn yii gɔgɔɔ̃ Izirayeli min gialakun lɛ tumaa bii. Maǹ dí nyɛɛ masɛ nɛ, ǹ nə́ Izirayeli zaman lɛ a nɛgiĩ bibinaan tumaa bǎã nɛ. Levii tɔrɔn lɛn man masɛ wɔn lɛa.

¹³ A giala gɔn binaa nɛ tumaa n masɛ wɔ lɛa. Ma nɛ bibinaan tumaa dɛ Ezipti gána nɛ ǹ mɛn pinaa, man má Izirayeli minin nɛgiĩ bibinaan tumaa baa ma din wɔn lɛa, ka ǹ tɔɔn nɛ bibinaan nɛ. Maǹ masɛ wɔn lɛa. Ma din ni Dɛnaa Lawa lɛa.»

¹⁴Dɛnaa Lawa pɛ Muizu ni Sinayii diə gole ne:

¹⁵«Levii tɔrɔn lɛn nimi sumu lɛ yii li, tanlɛ yii li: n die n nə ǹ giĩn tumaa nimi, a kũ mui goon nɛn ganaa a wo lon.»

¹⁶Muizu tɔ́n Levii tɔrɔn giĩn lɛn nimi á kɔnpɛ ka Dɛnaa Lawa a boo lɛ nɛ. Dɛnaa Lawa nə n gɔn waa-n lɔn, a na á zɛnaa á kɔnpɛ ka bɛ nɛ.

¹⁷Levii a minin tɔn nə́ ke: Gɛrsɔn nɛ, Keyati ni, ka Meraarii ni.

¹⁸Gɛrsɔn a nɛnyaanan man ka Livini laanka Simiyi ni. Ǹ tɔ bɛ́ tanlɛn mɛnɛn ganaa, maǹ bɛn minin digolon lɛa.

¹⁹Keyati a nɛnyaanan man ka Amuramu ni, Yisirari ni, Ebrɔn nɛ, ka Uziili ni. Ǹ dɔn manə ǹ tanlɛn minin digolon lɛa.

²⁰Merarii a nɛnyaanan man ka Mayili laanka Musi ni. Ǹ dɔn manə ǹ tanlɛn minin digolon lɛa. Levii a tanlɛn minin lɛn man ka bɛn nɛ, ǹ nə́ ǹ nimi ǹ kion minin lɛ yii li.

²¹Gɛrsɔn nə Gɛrsɔn tɔrɔn digolo lɛa. Gɛrsɔn tɔrɔn lɛn man niɛ-n kɔn tanlɛ paa: Levini a tanlɛ minin laanka Simiyi a tanlɛ minin manɛ.

²²Ǹ min mɛnɛn nimi kunun ǹ ni giĩn lɛa, a kũ mui goon nɛn ganaa a wo lon, bɛn man min duu sɔbaa ka biɛsooro (7 500).

²³Gɛrsɔn tɔrɔn tanlɛn minin man nə́ goã giã-n kɔn yɛ ka Lawa nɛ ǹ zìã kion kɛ kio, lɛ̀ nyɛɛn gɔn la.

²⁴Gɛrsɔn tɔrɔn lɛn goledɛnaa na á goã ka Layeli a nɛgiĩ Eliasafu ni.

²⁵Kɔn yɛ ka Lawa nɛ ǹ kion lɛ a paǹan mɛnɛn gama walan sii nə n wɔ Gɛrsɔn tɔrɔn lɛn gɔn bɛn nə́ ke: kion gɔ́ɔ̃ mɔnaa kɛ nɛ, mɔnaan kɛn nɛ koe-n lɛ, mɔnaa kɛ nɛ koe ne kion lɛ a kiɛnlɛ lɛ,

²⁶Mɔnaa gɔnɔn kɛn manɛ sumu lɛ lɛnpɛnɛ, kion lɛ laanka Lawa a *wúlu bɔ ǹ bǎã lɛ bɛ́ sumu mɛn nɛ, bɛa wɔ ǹ kiɛnlɛ-a ǹ mɔnaa kɛ nɛ, ka mɔnaa zìã lɛ a biɛn kɛn nɛ. Bɛa mànan kɛn lɛn gama walan na á goã Gɛrsɔn tɔrɔn lɛn gɔn.

²⁷Keyati n Keyati tɔrɔn digolo lɛa. Keyati tɔrɔn lɛn man niɛ-n kɔn tanlɛ sii: Amuramu a tanlɛ minin manɛ, Yisirari a tanlɛ minin ni, Ebrɔn a tanlɛ minin ni, ka Uziili a tanlɛ minin ni.

²⁸Ǹ min mɛnɛn nimi kunun ǹ ni giĩn lɛa, a kũ mui goon nɛn ganaa a wo lon, bɛn man min duu kiwisi ka biɛsɔrɔ (8 600), ǹ nə́ Lawa guguru kɔ ǹ bǎã lɛ a dí nyɛɛ.

²⁹Keyati tɔrɔn tanlɛn minin lɛn man nə́ goã giã-n kɔn yɛ ka Lawa nɛ ǹ kion lɛ a gusin a lɛ̀gɔn la.

³⁰Keyati tɔrɔn lɛn goledɛnaa na á goã ka Uziili a nɛgiĩ Elizafan nɛ.

³¹Keyati tɔrɔn lɛn man nə́ goã giɛ *lɛ kɔ kɔn la ǹ goo kɛ walan, tabala kɛ nɛ, bolon da ǹ bǎã kɛ nɛ, mànan kɛn nɛ ǹ nə́ dí nyɛɛ ǹ nɛ Lawa a kion, ka kion lɛ a bii kuru kɔn-a ǹ mɔnaa kɛ nɛ, ka a wɔ kɔn lɛ ǹ dí tumaa nɛ.

³²Levii tɔrɔn lɛn goledɛnaa gole na á goã ka Lawa a wúlu-bɔle Aarɔn a nɛgiĩ Eleyazaara nɛ. Min mɛnɛn nə goã Lawa a kion lɛ a dí nyɛɛ, bɛn sii na á goã asɛ gɔn.

³³Merarii n Merarii a tanlɛ digolo lɛa. Merarii a tanlɛ n niɛ-n kɔn wɔlɔ paa: Mayili a tanlɛ minin manɛ, ka Musi a tanlɛ minin ni.

³⁴Ǹ minin mɛnɛn nimi kunun ǹ ni giĩn lɛa, a kũ mui goon nɛn ganaa a wo lon, bɛn man min duu sɔrɔ ka biɛpaa (6 200).

³⁵Merarii tɔrɔn tanlɛn minin lɛn goledɛnaa n ka Abiayili a nɛgiĩ Suriyeli ni. Maǹ nə́ goã giã-n kion lɛ a gɔsɛ a lɛ̀gɔn la.

³⁶Merarii tɔrɔn lɛn man nə́ goã giɛ kion sonbore lɛ a doa ǹ bàlàn walan, a bàlà kerekaãn nɛ, a giãmala ǹ mànan nɛ, a màn bisinin tumaa nɛ, a wɔ kɔn lɛ ǹ dí tumaa nɛ,

³⁷ka doa ǹ bàlàn kɛn dɔn nɛ sumu lɛ lɛnpɛnɛ, kɔnlɛ ka ǹ giãmala ǹ mànan nɛ, ǹ kiɛn dere ni, ǹ biɛn nɛ.

³⁸Muizu ni, ka Aarɔn laanka a nɛgiĩn ni, bɛn man nə́ goã giã-n kɔn yɛ ka Lawa nɛ ǹ kion lɛ yɔrɔ-a, a lɛ̀giala gɔn la. Maǹ nə́ goã kion lɛ a sii yɔrɔ boe, Izirayeli minin lɛn tɔ la. Bɛ̀ min kooro ná a dí nyɛɛ lɛn zɔɔ̃ ǹ dɛnaa ná a ba Lawa a wúlu-bɔle lɛa wa, n dɛnaa nyin nə n bɔ.

³⁹Ǹ Levii tɔrɔn mɛnɛn tumaa nimi, giĩn lɛn tumaa, a kũ mui goon nɛn ganaa a wo lon, ǹ tumaa a kaa kun nə min duu fuəwenpaa (22 000). Muizu laanka Aarɔn na á ǹ nimi ǹ tanlɛn yii li, á kɔnpɛ ka Dɛnaa Lawa a gɔn waa nɛ.

⁴⁰Dɛnaa Lawa pɛ Muizu ni: Izirayeli minin lɛn nɛgiĩ bibinaan tumaa nimi n nə ǹ tɔn goa, a kũ mui goon nɛn ganaa a wo lon.

⁴¹Bɛ kio, n die n Levii tɔrɔn kɛn kaa ǹ gɔrɔn màn mɛn bɛ́ toɛ ǹ nə n baa masɛ din Dɛnaa Lawa lɛ wɔn lɛa, Izirayeli minin nɛgiĩ bibinaan lɛn tumaa bǎã nɛ. Levii tɔrɔn lɛn tɔɔn kaa Izirayeli minin lɛn tɔɔ nɛ bibinaan bǎã nɛ. A din yɔrɔ goon lɛ la, Levii tɔrɔn lɛn tɔɔn kaa ǹ gɔrɔn masɛ wɔn lɛa Izirayeli minin tɔɔ nɛ bibinaan tumaa bǎã nɛ.

⁴²Muizu tɔ́n Izirayeli minin nɛgiĩ bibinaan tumaa nimi ka Dɛnaa Lawa goã á n gɔn waa-n lɔn.

⁴³Ǹ nɛgiĩ bibinaan mɛnɛn tɔn goa ǹ nə́ ǹ nimi, a kũ mui goon nɛn ganaa a wo lon, ǹ kaa kun nə min duu fuəwenpaa ka biɛpaa ka pɔsɔbaawensɔɔ (22 273).

⁴⁴Dɛnaa Lawa boo da Muizu-n doo á pɛ:

⁴⁵Levii tɔrɔn lɛn kaa Izirayeli minin nɛgiĩ bibinaan tumaa bǎã nɛ. Ka bɛ dɔ nɛ, n Levii tɔrɔn lɛn tɔɔn kaa Izirayeli minin lɛn tɔɔ nɛ bibinaan bǎã nɛ. Levii tɔrɔn lɛn man die goɛ̃ masɛ wɔn lɛa. Ma din ni Dɛnaa Lawa lɛa.

⁴⁶Sɛnɛ, Izirayeli minin nɛgiĩ bibinaan lɛn nə la Levii tɔrɔn lɛn manɛ ka min biɛpaa ka pɔsɔbaawensɔɔ mɛn nɛ, bɛn mìi-si n die goɛ̃ kanaa.

⁴⁷Muizu, n die n wɔrɔ we soorobaa ǹ gogoonmaa mìi si ǹ giɔ̀mɔ lɛa. N toa wɔrɔ lɛ goã Lawa a kion wɔrɔ we kɛ lɛa, ke a gogoonmaa n garamu fù.

⁴⁸N die n bɛa wɔrɔ lɛ kɔ Aarɔn laanka a nɛgiĩn la. Nɛgiĩ bibinaan lɛn nə min lɛ mɛn kaa Levii tɔrɔn lɛn la, maǹ die bɛn mìi sii ka bɛa yɔrɔ lɛ nɛ.

⁴⁹Levii tɔrɔn lɛn nə min lɛ mɛn mìi si, min lɛ kɔsɔ mɛn mɛ bɛ la, Muizu bɛn mìi si ǹ wɔrɔ si.

⁵⁰A na á bɛa wɔrɔ lɛ si Izirayeli minin nɛgiĩ bibinaan la, Lawa a kion wɔrɔ we kɛa duu goon biɛsɔɔ ka pɔsɔrɔwensooro (1 365).

⁵¹Muizu tɔ́n bɛa mìi si ǹ wɔrɔ kɛ lɛ saa á kɔ Aarɔn laanka a nɛgiĩn la, ka Dɛnaa Lawa goã á pɛ nɛ, á n gɔn waa-n lɔn.