Read Samo, Southern MNS 30 Bible Online

MNS 30 - Samo, Southern bible

MNS 30

¹Dɛnaa Lawa nə n gɔn waa Muizu ni ka boo mɛn tumaa nɛ, Muizu bɛ pɛ Izirayeli minin lɛn manɛ.

²Bɛ kio, Muizu Dɛnaa Lawa a gɔn waa ǹ boo kɔsɔn pɛ Izirayeli tɔrɔn lɛn nyɛɛnaandɛnan manɛ:

³ Bɛ̀ giĩ nə́ n lɛ kɔ Dɛnaa Lawa la ka sii ni, hinlaa bɛ̀ á n liɛ ka sii ni á da a din bɔlɔ-a, a doamaa bie a wusoo a boo kio wa. Lɛkɔ ǹ boo mɛn soo a lɛ-n, a doamaa nɛ a sii lɛ zɛnaa a kɔnpɛ ka bɛ-n ka te.

⁴Sɛnɛ, lɔ mɛn nə́ ke tɔn nɛniɛ lɛa kion, bɛ̀ bɛ nə́ n lɛ kɔ Dɛnaa Lawa la ka sii ni, hinlaa bɛ̀ á n liɛ ka sii ni á da a din bɔlɔ-a,

⁵bɛ̀ a díi bɔ a siére-a ǹ mɛn pinaa, ǹ di lɛ ná a boo kɔn da-n wa, nɛlɔ lɛ doamaa nɛ a na a da ǹ boon lɛn sii zɛnaa.

⁶Sɛnɛ, bɛ̀ ǹ di lɛ boo lɛ woɛ̃ á zumu, a miɛ pinaa lɛ din ni, nɛlɔ lɛ lɛ-kɔn mɛnɛn tumaa wɔ, a boon mɛnɛn tumaa da á da a din bɔlɔ-a, bɛn zɛnaa ba giala yii doo wa. Dɛnaa Lawa tá re bɛa zɛ̀rɛ toɛ nɛ, a giala a díi na á woɛ̃ á zumu.

⁷Bɛ̀ nɛlɔ lɛ daa á wɔ zuũ li, lɛ-kɔn ná a li hinlaa a da ǹ boo ná a bɔlɔ-a,

⁸bɛ̀ ǹ zuũ bɔ a siére-a ǹ mɛn pinaa, a ná a boo kɔn da-n bɛa pinaa kɛ lɛ-n wa, lɔ lɛ doamaa nɛ a na a da ǹ boon lɛn sii zɛnaa.

⁹Sɛnɛ, bɛ̀ ǹ zuũ lɛ boo lɛ woɛ̃ á zumu, a miɛ pinaa lɛ din ni, lɛ-kɔ laanka da ǹ boo mɛn bɛ́ lɔ lɛ bɔlɔ-a, ǹ zuũ lɛ na á bɛ ziziɛ̃. Dɛnaa Lawa tá re bɛa zɛ̀rɛ toɛ lɔ lɛ nɛ.

¹⁰Sɛnɛ, bɛ̀ lɔ mɛn nə giɔɔrɔ lɛa, hinlaa ǹ zuũ na á n gɔn bɔ a ganaa, bɛ̀ bɛ́ lɛ-kɔ woo lɛ-kɔ wɔ, a doamaa nɛ a na a lɛ pã.

¹¹Sɛnɛ, a lɔ toa zuũ kion, bɛ̀ á lɛ-kɔ wɔ, hinlaa bɛ̀ á n liɛ ka sii ni á da a din bɔlɔ-a,

¹²bɛ̀ ǹ zuũ lɛ bɔ a siére-a biikoo mɛn li, ǹ zuũ lɛ ná a boo kɔn da-n wa, a ná a boo lɛ woɛ̃ á zumu wa, lɔ lɛ lɛ-kɔn mɛnɛn tumaa wɔ, a boo mɛn tumaa da á da a din bɔlɔ-a, a doamaa nɛ a bɛa sii zɛnaa.

¹³Sɛnɛ, bɛ̀ ǹ zuũ lɛ nə́ n piã boo lɛ a miɛ pinaa, lɔ lɛ baran a da ǹ boo lɛ lɛ pã wa, lɔ lɛ lɛ-kɔ mɛn tumaa wɔ, a n lɛ kɔ ka sii mɛn tumaa nɛ á da a din bɔlɔ-a, bɛ kɔn ba giala yii doo wa. Ǹ zuũ bɛ́ na á n piã ǹ nɛ, Dɛnaa Lawa tá re bɛa zɛ̀rɛ toɛ lɔ lɛ nɛ.

¹⁴Lɔ bɛ́ lɛ-kɔ mɛn yii we, hinlaa a bɛ́ liɛ mɛn yii we a n boe a din yii-n ni, ǹ zuũ á boe la a lɛ kɔ ka bɛ nɛ, hinlaa a n piã nɛ.

¹⁵Bɛ̀ ǹ zuũ lɛ boo kɔn da-n wa, yaa a wo belebɔ, lɔ lɛ nə n lɛ kɔ ka siin mɛnɛn zɛnaa nɛ, ǹ zuũ lɛ na á lɛ kɔ bɛn ganaa. A lɛ tã lɛ n nyɛɛ mà á lɛ kɔ ǹ ganaa.

¹⁶Sɛnɛ, bɛ̀ giĩ lɛ yoo bɛ kio, mà a nə ǹ piɛ̃ ǹ nɛ, a din nə die n toɛ̃ ka a lɔ lɛ a sã nɛ.

¹⁷Dɛnaa Lawa landan mɛnɛn kɔ Muizu la, giĩ laanka a lɔ wɔ paǹ li, hinlaa díi laanka a nɛlɔ mɛn bɛ́ tɔn kion, bɛn man ka kɛn nɛ.