Read Samo, Southern MNS 36 Bible Online

MNS 36 - Samo, Southern bible

MNS 36

¹Makiiri a nɛgiĩ Galaati ke Manaasee a nɔ̀ɔn lɛa, bɛa tanlɛ minin kɛn Zozɛfu tɔrɔn lɛa, bɛn kɛdɛnan nə́ n zɔ̃ ǹ nə́ dɔ Muizu li, ka Izirayeli tɔrɔn lɛn nyɛɛnaandɛnan nɛ,

² ǹ nə́ pɛ: «Muizu ganaa, Dɛnaa Lawa bɛ́ á pɛ n nɛ, mà ǹ nə n pã ǹ gána lɛ gii Izirayeli tɔrɔn lɛn manɛ, táa á pɛ-n nɛ dɔn mà n wɔsɛn dɔɔ̃n Selofaadi a bǎã gii kɔ a nɛlɔn la.

³Sisia, bɛ̀ bɛa nɛlɔn kɛn lɛn nə́ yoo, ǹ nə́ wɔ giĩn li, giĩn mɛnɛn nə́ ke Izirayeli tɔrɔ kɔsɔ minin lɛa, nɛlɔn lɛn bǎã gii n die n boe wɔsɛn tɔrɔ wɔ lɛ, a wo mɛ ǹ tɔrɔ dii lɛ wɔ li. Bɛa yɔrɔ lɛ la, ǹ nə n pã ǹ nə́ bǎã mɛn kɔ wɔsɛn la wɔa wɔ gii lɛa, màn nə die n boe bɛ lɛ.

⁴Bɛ̀ lɛ̀ posooro zɔ́n kɛ́ dɔ, nɛlɔn lɛn wɔ gii lɛ nə n boe a n bɔ wɔsɛn tɔrɔ wɔ baa-n duduu, a dɔ ǹ tɔrɔ dii lɛ ganaa.»

⁵Dɛnaa Lawa tɔ́n Muizu da boon kɛn pɛ ganaa Izirayeli minin lɛn nɛ: «Sonbore tá Zozɛfu tɔrɔn lɛn lon.

⁶Dɛnaa Lawa bɛ́ boo mɛn diɛ Selofaadi a nɛlɔn lɛn wɔ paǹ li, bɛ á ke: Bɛ̀ min mɛn kɔɔ̃n kɔ ǹ ganaa, ǹ tá boe la ǹ zuũ yɛ bɛ li, yǎa bɛa dɛnaa lɛ goã nɛlɔn lɛn díi tɔrɔn tanlɛ min lɛa.

⁷Bɛa yɔrɔ lɛ la, Izirayeli minin lɛn li, tɔrɔ kɔn a bǎã ba re n bɔyɛɛ a dɔ ǹ miã kɔsɔ-a wa. Izirayeli minin lɛn didie gɔn nə die goɛ̃ paraa nɛ a tɔrɔn bǎã ganaa kaka.

⁸Bɛ̀ bǎã dɔ nɛlɔ mɛn ganaa kíɛ̃ lɛa Izirayeli tɔrɔn lɛn bii, bɛ doamaa nɛ a zuũ yɛ a din di tɔrɔn tanlɛ goon a min li. Bɛa yɔrɔ lɛ la, Izirayeli minin lɛn didie digolon bǎã á re goɛ̃ a gɔn, a wɔ lɛa.

⁹Tɔrɔ kɔn a bǎã ba re n bɔyɛɛ a kɔsɔ wɔ baa wa, sɛnɛ Izirayeli tɔrɔn lɛn gogoonmaa gɔn nə die goɛ̃ paraa nɛ a bǎã ganaa.»

¹⁰Selofaadi a nɛlɔn lɛn nə́ tɔ́n sii lɛ zɛnaa ka Dɛnaa Lawa goã á pɛ Muizu-n lɔn.

¹¹Malaa nɛ, Tirsaa nɛ, Ogla nɛ, Milkaa nɛ, ka Noa nɛ, ǹ nə́ wɔ ǹ di ǹ dɔɔ̃nɔn nɛgiĩn li.

¹²Maǹ nə́ wɔ giĩn li, giĩn mɛnɛn nə́ ke Zozɛfu a nɛgiĩ Manaasee tɔrɔn lɛa. Bɛa yɔrɔ lɛ la, bǎãn mɛnɛn nə dɔ ǹ ganaa kíɛ̃ lɛa, bɛn nə́ goã kun ka ǹ di tɔrɔn wɔn nɛ.

¹³Dɛnaa Lawa gɔn waa ǹ boon laanka sii yɔrɔ bɔ ǹ boon mɛnɛn kɔ Muizu la á ǹ kɔ Izirayeli minin lɛn la, Moabu gána a nyankɔrɔ lɛ nɛ, kunu Zurdɛ̃ tà li, Zerikoo kiwi yɔrɔ-a, ǹ dinin lɛn man ka kɛn nɛ.