Read Samo, Southern MNS 4 Bible Online

MNS 4 - Samo, Southern bible

MNS 4

¹Dɛnaa Lawa pɛ Muizu laanka Aarɔn nɛ:

²«*Levii tɔrɔn lɛn bii, ǹ mɛnɛn bɛ́ Keyati tɔrɔn lɛa, ǹ nə́ dɔ lɛ̀ pɔsɔɔ, ka lɛ̀ pɔsɔɔ ka kio ne, a wo dɔ yǎa lɛ̀ posooro, ka bɛn nimi tanlɛ yii li, sumu lɛ yii li. Ka die ka Keyati tɔrɔn lɛn goa, màn mɛn bɛ́ toɛ ǹ dín tɛnɛn nya kɔn yɛ ka Lawa nɛ ǹ kion kɛ nɛ.

⁴Kaa dí n die goɛ̃ ka màn sonbore sonboren kɛn gama walan nɛ, kɔn yɛ ka Lawa nɛ ǹ mɔnaa zìã lɛ nɛ.

⁵Bɛ̀ Izirayeli minin lɛn tá yui n boe ǹ giã ǹ bǎã nɛ, Aarɔn laanka a nɛgiĩn die ǹ da kion bii kuru kɔn-a ǹ mɔnaa kɛ bɔ, ǹ kɔ *lɛ kɔ kɔn la ǹ goo lɛ lɛ.

⁶Kɔmalɛ mɛn nə́ ke á n zɛnaa ka siĩ ki kəkə ne, ǹ bɛ kɔ lɛ. Bɛ kio, mɔnaa mɛn nə́ ke a gɔ̀nɔn yii n bɔlaan lɛa, ǹ bɛ kuməə a din tumaa ganaa, ka goo lɛ a saa ǹ bàlàn kaa a ganaa.

⁷Ma gɔ ǹ buuru bɛ́ n koɛ tabala mɛn la, ǹ mɔnaa bɔlaan naa bɛ la. Tasanan kɛn, ka kaaranan kɛn nɛ, ka tàanan kɛn laanka duvɛ̃ zuməə ǹ mànan kɛn nɛ, ǹ bɛn kaa bɛa tabala lɛ la. Masɛ a baraabaraa gɔ ǹ buuru kɛ n die goɛ̃ walan.

⁸Bɛ kio, ǹ mɔnaa tã bonbon kɔ a tumaa lɛ, ka siĩ ki kəkə ne, ǹ tabala lɛ a saa ǹ bàlàn kaa a ganaa.

⁹Bolon koa ǹ bǎã ke wɔlɔ fúlu boe, ǹ mɔnaa bɔlaan kɔ bɛ lɛ, kɔnlɛ ka a bolonən ne, a bolon lɛ bɔ ǹ banbaalanan nɛ, a ton kaa ǹ bǎãn nɛ, ka a nyɔɔ tàanan kɛn nɛ, ǹ nə́ giɛ a walan nɛ.

¹⁰Kɔmalɛ mɛn bɛ́ á n zɛnaa ka siĩ ki kəkə ne, ǹ bolon koa ǹ bǎã lɛ da bɛ nɛ, kɔnlɛ ka a mànan tumaa nɛ, ǹ da màn gũ ǹ gɔn la.

¹¹Da yon gìĩ tã n bǎã ke sana lɛa, ǹ mɔnaa bɔlaan kɔ bɛ lɛ, ǹ siĩ ki kəkə dɔ kɔ lɛ, ǹ na a saa ǹ bàlàn kaa a ganaa.

¹²Mànan mɛnɛn tumaa bɛ́ ǹ tá dí nyɛɛ ǹ nɛ bǎã sonbore kɛ nɛ, ǹ bɛn goa ǹ nə ǹ kaa mɔnaa bɔlaan nɛ, kɔmalɛ mɛn bɛ́ á n zɛnaa ka siĩ ki kəkə ne, ǹ nə ǹ kaa bɛ nɛ, ǹ nə ǹ kaa màn gũ ǹ gɔn la.

¹³Ǹ *wúlu bɔ ǹ bǎã lɛ a ton goa ǹ mɔnaa tã naa la.

¹⁴Ǹ bɛ́ a dí nyɛɛ ka mànan mɛnɛn tumaa nɛ, ǹ bɛn kaa la: a tɛ nàn kaa ǹ mànan kɛn nɛ, a siĩ fɔ̃ ǹ bàlàn kɛn nɛ, a ton goa ǹ lasanan kɛn nɛ, ka a mà pɛ̃sɛn tàanan nɛ. Kɔmalɛ mɛn nə́ ke á n zɛnaa ka siĩ ki kəkə ne, ǹ bɛ kɔ lɛ, ǹ na a saa ǹ bàlàn kaa a ganaa.

¹⁵Bɛ̀ Izirayeli minin lɛn tá yui n boe bǎã nɛ biikoo mɛn li, bɛ̀ Aarɔn laanka a nɛgiĩn nə́ màn pɛnɛ kion sonbore lɛ laanka a dí nya ǹ mànan kɛn tumaa ganaa ǹ nə́ nya, Keyati tɔrɔn lɛn nə da ǹ goa. Sɛnɛ ǹ gɔn na a ba re miɛ màn sonboren lɛn gɔ̀nɔn kooromaa-a wa, màn mɛn bɛ́ toɛ ǹ baran gã wa. Keyati tɔrɔn lɛn dí n ka bɛ lɛ nɛ, kɔn yɛ ka Lawa nɛ ǹ kion lɛ nɛ.

¹⁶Lawa a wúlu-bɔle Aarɔn a nɛgiĩ Eleyazaara kɛ n die giɛ bolon da ǹ nyɔɔ kɛ walan, ka da yon gìĩ kɔɔ̃n kɛ nɛ ǹ nə́ tiɛ̃, ka *wúlu màn kɛ nɛ ǹ nə́ koe Lawa la baraabaraa, ka nyɔɔ sonbore kɛ nɛ ǹ nə́ loe minin ganaa. A n die giɛ kion lɛ dɔ walan, ka a gɔ́ɔ̃gɔ́ɔ̃ ǹ màn tumaa nɛ, bǎã sonbore kɛ laanka a màn bisinin ni.»

¹⁷Dɛnaa Lawa boo da ka Muizu laanka Aarɔn nɛ á pɛ:

¹⁸Ka baran zɛnaa, Keyati tɔrɔn tanlɛn minin lɛn nə gã ǹ nə n bɔ Levii tɔrɔ gialakun lɛ bii wa.

¹⁹Keyati tɔrɔn lɛn bɛ́ re siɛ lɔn, ǹ nə n mɔrɔ bǎã sonbore sonbore kɛ-a, ǹ yii goã koo ǹ nə́ ǹ ba giɛ̃ wa, ka sii kɛ zɛnaa ǹ nɛ: Aarɔn din laanka a nɛgiĩn lɛn nə daa, ǹ Keyati tɔrɔn lɛn didie a dí kɔ la, ǹ didie bɛ́ re guĩ mɛn guĩ ǹ bɛ kɔ la.

²⁰Keyati tɔrɔn lɛn doamaa bie ǹ wɔ ǹ ga màn sonboren lɛn yii ganaa wa, màn mɛn bɛ́ toɛ ǹ baran gã wa.

²¹Dɛnaa Lawa pɛ Muizu ni:

²²Gɛrsɔn tɔrɔn dɔn nimi sumu lɛ yii li, tanlɛ yii li.

²³Giĩn mɛnɛn nə dɔ lɛ̀ pɔsɔɔ, ka lɛ̀ pɔsɔɔ ka kio ne, a wo dɔ yǎa lɛ̀ posooro, bɛn nimi. Ka die ka ǹ gòɛ̃ wɔ dín tɛnɛn nɛ, kɔn yɛ ka Lawa nɛ ǹ kion kɛ nɛ.

²⁴Gɛrsɔn tɔrɔn lɛn dí n die goɛ̃ ka mànan lɛn kɛn guĩ ni:

²⁵mɔnaan mɛnɛn bɛ́ naa-n kion lɛ-a, bɛn manɛ, kɔn yɛ ka Lawa nɛ ǹ kion kɛ laanka a kɔmalɛ nɛ, kɔmalɛ ke á n zɛnaa ka siĩ ki kəkə ne, ǹ nə́ koe kion lɛ mìi lɛ, bɛ nɛ. Kɔ kiɛnlɛ lɛ ǹ mɔnaa ke kɔn yɛ ka Lawa nɛ ǹ kion lɛ a kiɛnlɛ-a, bɛ nɛ,

²⁶sumu mɛn bɛ́ pɛnɛɛ-n kion lɛ laanka wúlu bɔ ǹ bǎã lɛ-a, bɛa mɔnaa gɔnɔn kɛn manɛ, a kiɛnlɛ-a ǹ mɔnaa kɛ nɛ, kɔnlɛ ka ǹ biɛn nɛ, ka ǹ mànan tumaa nɛ. Dí mɛn tumaa yɔrɔ bɛ́ dia-n bɛ paǹ li, ǹ die ǹ bɛ nya.

²⁷Gɛrsɔn tɔrɔn lɛn man die ǹ dí lɛ nyɛɛ Aarɔn laanka a nɛgiĩn giulun, ta guĩ gũ ni, hinlaa ta dí kɔsɔ nya nɛ. Ǹ doamaa bɛ́ nɛ ǹ mànan mɛnɛn gũ, ǹ bɛn sii wɔ ǹ gɔn.

²⁸Gɛrsɔn tɔrɔn lɛn dí n ka bɛ lɛ nɛ kɔn yɛ ka Lawa nɛ ǹ kion lɛ nɛ. Bɛ lɛ nə ǹ dí lɛa, ǹ nə́ nyɛɛ Lawa a wúlu bole Aarɔn a nɛgiĩ Itamaara giulun.

²⁹Merarii tɔrɔn kɛn, n die n nə ǹ nimi tanlɛ yii li, sumu lɛ yii li.

³⁰Giĩn mɛnɛn nə dɔ lɛ̀ pɔsɔɔ, ka lɛ̀ pɔsɔɔ ka kio ne, a wo dɔ yǎa lɛ̀ posooro, n bɛn nimi. N die ǹ nə ǹ gòɛ̃ wɔ kɔn yɛ ka Lawa nɛ ǹ kion kɛ a dín tɛnɛn nɛ.

³¹Ǹ dí n die goɛ̃ ka kɛ nɛ: maǹ die kion sonbore lɛ a doa ǹ bàlàn guĩ, a bàlà kerekaãn nɛ, a yirən ne, a giãmala ǹ mànan nɛ,

³²bìbìn mɛnɛn bɛ́ sumu lɛ lɛnpɛnɛ, bɛn nɛ, ǹ giãmalan mànan nɛ, ǹ kiɛ dere ne, ǹ biɛn nɛ, kɔnlɛ ka ǹ mànan tumaa nɛ. Ǹ didie doamaa bɛ́ nɛ a mànan mɛnɛn gũ, ǹ bɛn nyaa nɛ.

³³Merarii tɔrɔn tanlɛn minin lɛn dí n ka bɛ nɛ. Ǹ dí din tumaa n ka bɛ lɛ nɛ kɔn yɛ ka Lawa nɛ ǹ kion kɛ nɛ, ǹ nə́ nyɛɛ Lawa a wúlu-bɔle Aarɔn a nɛgiĩ Itamaara giulun.

³⁴Levii tɔrɔn mɛnɛn tumaa bɛ́ Keyati tɔrɔ lɛa, Gɛrsɔn tɔrɔ laanka Merarii tɔrɔ lɛa, a kũ lɛ̀ pɔsɔɔdɛnan ganaa a wo lɛ̀ posoorodɛnan yaa, ǹ nə́ bɛn tumaa nimi tanlɛ yii li, sumu lɛ yii li. Muizu laanka Aarɔn nɛ, ka Izirayeli minin nyɛɛnaandɛnan nɛ, bɛn man nə́ goã ǹ nə́ ǹ nimi. Maǹ nə́ bɛa minin kɛn lɛn gòɛ̃ wɔ dí tɔrɔ gigiã nɛ kɔn yɛ ka Lawa nɛ ǹ kion lɛ nɛ. Dɛnaa Lawa goã á pɛ Muizu-n lɔn, maǹ nə́ minin lɛn nimi á kɔnpɛ ka bɛ nɛ. Keyati tɔrɔn man nə́ goã min duu paa ka biɛsɔbaa ka posooro (2 750) Gɛrsɔn tɔrɔn man nə́ goã min duu paa ka biɛsɔrɔ ka pɔsɔɔ (2 630). Merarii tɔrɔn man nə́ goã min duu sɔɔ ka biɛpaa (3 200). Levii tɔrɔn lɛn tumaa a kaa kun na á goã min duu kiwisi ka biɛsooro ka pɔkiwisi (8 580). A kɔnpɛ ka Dɛnaa Lawa a da ǹ boo ne, didie doamaa bɛ́ nɛ a dí mɛn nya, a màn mɛn gũ, Muizu bɛ kɔ didie la, ka Dɛnaa Lawa goã á ná a boo da-n lɔn.