Read Samo, Southern MNS 6 Bible Online

MNS 6 - Samo, Southern bible

MNS 6

¹Dɛnaa Lawa boo da Muizu ni, á pɛ:

²«Boo da Izirayeli minin lɛn nɛ n pɛ ǹ nɛ: Bɛ̀ giĩ hinlaa lɔ lɛ kɔ, mà asɛ n die n din koe Dɛnaa Lawa la, a dí nya nɛ,

³ bɛa dɛnaa lɛ doamaa bie a duvɛ̃ laanka yɔ kakaarɛn mi wa, a doamaa bie a duvɛ̃ a pipiã hinlaa yɔ kakaarɛ a pipiã mi wa. A doamaa bie a rezɛ̃ mu tɔrɔ kɔn din mi wa, a doamaa bie a rezɛ̃ nɛ buruu hinlaa rezɛ̃ nɛ laa bii wa.

⁴A din-kɔ biikoo lɛ tumaa gɔ́ɔ̃ nɛ, màn mɛn bɛ́ ǹ nə́ zɛnaa ka *rezɛ̃ da nɛ nɛ, a we-n hinlaa a fɔrɔ nɛ, a baran bɛ kɔn wɔ a lɛ-n wa.

⁵Din-kɔ biikoo lɛ tumaa gɔ́ɔ̃ nɛ, kùn ba re n diɛ a mìi-n wa, yǎa a din-kɔ Dɛnaa Lawa la biikoo lɛ lɛ piɛ̃. A doamaa nɛ a goã *yoreene Lawa a paǹ li, a mìi ka pã suuni.

⁶A din-kɔ Dɛnaa Lawa la biikoo lɛ tumaa gɔ́ɔ̃ nɛ, a baran n mɔrɔ min kɔn gere ganaa wa.

⁷Ta ǹ di ni hinlaa ǹ dan nɛ, Ta ǹ dɔɔ̃ngiĩ hinlaa ǹ miãnɛn nɛ, bɛ̀ bɛ mɛn gã, a doamaa bie a n mɔrɔ a gere-a, a *gɔ̀ da a din-a wa. A giala, a din-kɔ Lawa la lɛ a sii a kɔnboe tá a mìi ni.

⁸A din-kɔ biikoo lɛ tumaa gɔ́ɔ̃ nɛ, a n Lawa wɔ lɛa.

⁹Bɛ̀ gɛ̀ min dɛ tán bǎã goon ne din-kɔ Lawa la wole lɛ genli, yiri ná a ba li wa, yǎa bɛ gɔ̀ da a din-kɔ Lawa la ǹ mìi lɛ ganaa, bɛ̀ a tá gɔ̀ boe a din-a ǹ mɛn pinaa, a doamaa nɛ, a n mìi lɛ kɔɔ̃. A kɔɔ̃ a lɛawaa sɔbaabaa ǹ wɔ pinaa.

¹⁰A lɛawaa kiwisibaa ǹ wɔ pinaa, a doamaa nɛ, a da wuruun màn paa hinlaa zɛrɛkantoan ten màn paa kɔ Lawa a wúlu-bɔle la, kɔn yɛ ka Lawa nɛ ǹ kion kɛ a kiɛnlɛ-a.

¹¹Lawa a wúlu-bɔle lɛ n die goon biɛ sii baraa sawaa ǹ *wúlu màn lɛa, a goon kɛ baa wúlu màn tiɛ̃ lɛa. Din-kɔ Lawa la wole lɛ sã mɛn wɔ gere lɛ taman yii, Lawa a wúlu-bɔle lɛ bɛa sawaa ǹ sii zɛnaa. A din pinaa lɛ nɛ, din-kɔ Lawa la wole lɛ gɔ̀ bɔ a mìi ganaa.

¹²A wusoo doo a na a din-kɔ Dɛnaa Lawa la ǹ biikoo lɛ kɔ Dɛnaa Lawa la. A da ka lɛ̀ goon sère nɛ nɛ, zɛ̀rɛ si ǹ wúlu màn lɛa. A biikoo mɛn zɛnaa lɛlɛ din-kɔ lɛ gɔ́ɔ̃ nɛ, bɛ ba a-n wa, a giala a ná a n din-kɔ Lawa la lɛ ziziɛ̃.

¹³ Landa mɛn bɛ́ a tan din-kɔ Lawa la wole lɛ wɔ paǹ li, bɛ á ke: Bɛ̀ a din-kɔ Lawa la biikoo lɛ lɛ pã, ǹ kũ ǹ da nɛ kɔn yɛ ka Lawa nɛ ǹ kion kɛ a kiɛnlɛ-a.

¹⁴A da ka a Lawa gɔ ǹ màn nɛ a kɔ Lawa la: lɛ̀ goon sère nɛ gɔ̀lɔ̀n mɛn nə́ ke wɔ̀lɔ̀ ná a ba a ganaa wa, wúlu màn tiɛ̃ lɛa, lɛ̀ goon sère nɛ luun mɛn nə́ ke wɔ̀lɔ̀ ná a ba a ganaa wa, sii baraa sawaa ǹ wúlu màn lɛa, ka sère gɔ̀lɔ̀ mɛn nə́ ke wɔ̀lɔ̀ ná a ba a ganaa wa, barka da ǹ wúlu màn lɛa.

¹⁵Yɔ bùbaã buuru mɛn bɛ́ ǹ nə́ da ka *wùsu sonbore ne, a da ka bɛa kankaan yii goon ne, ka wùsu sonbore kiɔmɔsɔ̃ mɛn bɛ́ ǹ ná a wùsu yia ka nyɔɔ nɛ, ka yɔ bùbaã mɔ̀mɔ mɛn bɛ́ ǹ nə́ nyɔɔ kaa a ganaa, ka Lawa gɔ ǹ wùsu kɛ laanka duvɛ̃ kɛ nɛ bɛ̀ ǹ ti wúlu mànan ganaa.

¹⁶Lawa a wúlu-bɔle lɛ die a wo ka bɛa Lawa gɔ ǹ mànan lɛn nɛ Lawa yɔrɔ-a, bɛ kio, a sii baraa sawaa ǹ wúlu bɔ, a wúlu màn tã.

¹⁷A die a sère gɔ̀lɔ̀ kɛ laanka kankaan yɔ bùbaã buuru lɛ kɔ Dɛnaa Lawa la, barka da ǹ wúlu màn lɛa. Ka bɛ dɔ nɛ, a die a wúlu bɔ ka Lawa gɔ ǹ wùsu kɛ laanka duvɛ̃ kɛ nɛ.

¹⁸Bɛ kio, din-kɔwole lɛ nə n mìi ka mɛn koa a din kɔ lɛ a sii a kɔnboe lɛa, a die a bɛ kɔɔ̃ kɔn yɛ ka Lawa nɛ ǹ kion kɛa kiɛnlɛ-a, a bɛa mìi ka kɛ lɛ goa a zũ tɛ kɛ nɛ kuĩ barka da ǹ wúlu màn kɛ giulun.

¹⁹Lawa a wúlu-bɔle lɛ die a sère gɔ̀lɔ̀ lɛ nyàa saa a miɛ̃maa, a yɔ bùbaã kiɔmɔsɔ̃ goon bɔ kankaan lɛ nɛ, ka yɔ bùbaã mɔ̀mɔ nɛ, a ǹ kaa din-kɔwole lɛ gɔn, a mìi kɛ a kɔɔ̃ kio, mìi mɛn lɛ bɛ́ a dinkɔ ǹ sii a kɔnboe lɛa.

²⁰Lawa a wúlu-bɔle lɛ die a ǹ kɔ Lawa la ǹ sii zɛnaa. Bɛa Lawa gɔ ǹ mànan kɛn lɛn man doe Lawa a wúlu-bɔle lɛ ganaa ka màn tìã lɛ laanka a gisi kɛ nɛ doe a ganaa lɛlɛndun. Bɛ kio, din-kɔwole lɛ á boe la a duvɛ̃ mi.

²¹Bɛ̀ min mɛn nə́ n din-kɔ Lawa la, á lɛ-kɔ wɔ, landa mɛn bɛ́ a tan a wɔ paǹ li, a din lɛ n ka bɛ nɛ. A doamaa bɛ́ nɛ a màn mɛn kɔ Dɛnaa Lawa la, a din-kɔ lɛ wɔ lɛa, a din nə ka bɛ nɛ, ka a din gɔn bɛ́ re kɔnpii ka màn mɛn nɛ a da bɛ la. A lɛ-kɔ mɛn wɔ á kɔnpɛ ka a din-kɔ Lawa la ǹ landa kɛ nɛ, a doamaa nɛ a bɛ lɛ pã.»

²²Dɛnaa Lawa boo da Muizu ni, á pɛ:

²³— Boo da Aarɔn laanka a nɛgiĩn ni, n pɛ ǹ nɛ mà ǹ doamaa bɛ́ nɛ ǹ barka da Izirayeli minin lɛn ganaa ka boon mɛnɛn nɛ, mà bɛn nə́ ke:

²⁴«Dɛnaa Lawa die a n dɔ ka lɛ, a ka tamaa.

²⁵Dɛnaa Lawa die a n yɔrɔ bǐɛ̃ da ka la, a bǐɛ̃ kɔ ka ganaa.

²⁶Dɛnaa Lawa yii die a goã ka la, a là nyantoro kɔ ka la.»

²⁷Ka die ka n lɛ koa masɛ tɔ lɛ-a Izirayeli minin lɛn lɛa miɛ̃, ma á die barka diɛ ka ganaa.