Read Samo, Southern MNS 9 Bible Online

MNS 9 - Samo, Southern bible

MNS 9

¹ Izirayeli minin lɛn soo a bɔ Ezipti gána-n a lɛ̀ paabaa ǹ wɔ, lɛ̀ a mui bibinaa li, Dɛnaa Lawa boo da Muizu ni, Sinayii diə gole ne, á pɛ:

²«Lɛawaa mɛn nə n bɔ á n koa, Izirayeli minin lɛn nə *kiɛ̃mala ǹ zɔ́n kɛ zɛnaa bɛ li.

³Mui bibinaa kɛ lɛ a lɛawaa fulusiibaa ǹ wɔ pinaa nɛ, wasamiɛ̃n tutu, ǹ nə́ die kiɛ̃mala ǹ zɔ́n lɛ zɛnɛɛ. Ǹ die ǹ zɛnaa, a kɔnpɛ ka a landan laanka a zɛnaa ǹ gɔn nɛ.»

⁴Muizu tɔ́n pɛ Izirayeli minin lɛn manɛ, mà ǹ kiɛ̃mala ǹ zɔ́n lɛ zɛnaa.

⁵Ǹ nə́ zɔ́n lɛ zɛnaa, Sinayii diə gole ne, lɛ̀ a mui bibinaa a lɛawaa fulusiibaa ǹ wɔ pinaa, wasamiɛ̃n tutu. Dɛnaa Lawa goã á boo mɛn pɛ Muizu ni, Izirayeli minin nə́ bɛa sii zɛnaa ka te.

⁶Sɛnɛ, gɔn da min gere ganaa taman yii, *gɔ̀ goã min tɛnɛn ganaa, ǹ nə́ ǹ goã boe la ǹ nə́ kiɛ̃mala ǹ zɔ́n lɛ zɛnɛɛ bɛa pinaa lɛ-n wa. Bɛa minin lɛn nə́ tɔ́n woo Muizu laanka Aarɔn li a din pinaa lɛ nɛ, ǹ nə́ pɛ ǹ nɛ:

⁷«Gɔn da gere ganaa na á wɔsɛn gɔgɔrɛ kɔ. Lɛawaa mɛn nə n koa, wàa na á baa ǹ tá wɔsɛn kurii mà wɔ baran da wɔa Lawa gɔ ǹ màn kɔ Dɛnaa Lawa la, bɛa pinaa kɛ lɛ nɛ ka Izirayeli min tumaa bɛ́ lɔn wa?»

⁸Muizu tɔ́n pɛ ǹ nɛ: «Ka n yii da, yǎa masɛ doɛ̃ Dɛnaa Lawa bɛ́ re màn mɛn pii kaa wɔ paǹ li.»

⁹Dɛnaa Lawa boo da Muizu ni, á pɛ:

¹⁰— Boo da Izirayeli minin lɛn nɛ n pɛ: «Ka dinin bii, hinlaa kaa nɛnyaanan mɛnɛn bɛ́ die ka kio, bɛn bii, bɛ̀ gere min mɛn gɔgɔrɛ kɔ, hinlaa bɛ̀ min mɛn woo zii sɔsɔɔ nɛ, ǹ dɛnaa die a kiɛ̃mala ǹ zɔ́n lɛ zɛnaa Dɛnaa Lawa nɛ.

¹¹Sɛnɛ, bɛa minin lɛn sɛn man die zɛnɛɛ lɛ̀ a mui paabaa ǹ wɔ a lɛawaa fulusiibaa ǹ wɔ pinaa, wasamiɛ̃n tutu. Ǹ die ǹ wúlu sère nɛ siĩ lɛ sɔ̃ kun ka yɔ bùbaã buuru laanka liɛ kɔɔsɛ nɛ.

¹² Ǹ baran màn kɔn koa baayɛlɛ wa, ǹ baran siĩ lɛ a wen yiyiɛ wa. N die ǹ kiɛ̃mala ǹ zɔ́n lɛ zɛnaa, a kɔnpɛ ka a zɛnaa ǹ gɔn nɛ ka te.

¹³Sɛnɛ, bɛ̀ min mɛn tá yoreene, hinlaa bɛ̀ min mɛn nə wo zii-n wa, yǎa ǹ dɛnaa nə n piã ka kiɛ̃mala ǹ zɔ́n lɛ a zɛnaa nɛ, ǹ bɛa dɛnaa lɛ bɔ ǹ bɔ ǹ dɔɔ̃nɔn bii. A giala, biikoo mɛn nə n bɔ á n koa, a da ka Dɛnaa Lawa gɔ ǹ màn nɛ, bɛa biikoo lɛ li wa. Ǹ dɛnaa tá re n toɛ̃ ka a sii baraa lɛ a mìi gɔ́ɔ̃ ǹ siin ni.

¹⁴Bɛ̀ min mɛn tá tii lɛa giã nɛ ǹ li, bɛ̀ ǹ dɛnaa tá kiɛ̃mala ǹ zɔ́n lɛ zɛnɛɛ Dɛnaa Lawa nɛ, a die a kɔ a zɛnaa ǹ landan laanka a zɛnaa ǹ gɔnɔn lɛ. Sii zɛnaa ǹ gɔn goon dinsɔɔ̃ n die goɛ̃ ka lon, ta tii-n hinlaa gána lɛ a min ni.»

¹⁵Ǹ bɛ́ ǹ nə́ kion sonbore lɛ doa ǹ mɛn pinaa, kɔn yɛ ka Lawa nɛ ǹ kion lɛ, tɛmaa bara nə́ n kuməə a ganaa. A saa wasamiɛ̃n ganaa, tɛmaa bara lɛ na á goã kion lɛ la ka tɛ bɛ́ lɔn, yǎa baayɛlɛ.

¹⁶A na á goã miɛ̃ baraabaraa. Tɛmaa bara lɛ na á goã n kumii kion lɛ ganaa, tèlò-n a na á goã ka tɛ bɛ́ lɔn.

¹⁷Bɛ̀ tɛmaa bara lɛ yoo kion lɛ lalan ǹ mɛn waáraa, Izirayeli minin lɛn dɔn man yui gɔrɔ ǹ nə ǹ zii tɔ wɔ. Bɛ̀ tɛmaa bara lɛ golee bǎã mɛn nɛ, ǹ dɔn man golee walan.

¹⁸Izirayeli minin lɛn man nə́ goã yui ǹ giã ǹ bǎã nɛ, á n kɔnpii ka Dɛnaa Lawa a da ǹ boo ne. Maǹ nə́ goã golee dɔn, á n kɔnpii ka Dɛnaa Lawa a da ǹ boo ne. Tɛmaa bara lɛ goã lɛawaa lɛ mɛn zɛnɛɛ kɔn yɛ ka Lawa nɛ ǹ kion lɛ la, Izirayeli minin lɛn man nə́ goã golee ǹ nə́ bɛa lɛawaa lɛ lɛ zɛnɛɛ ǹ giã ǹ bǎã nɛ.

¹⁹Bɛ̀ tɛmaa bara lɛ goã kion lɛ la, á belebɔ, Izirayeli minin lɛn man Dɛnaa Lawa bɔlɔ sii bɛa biikoo lɛ gɔ́ɔ̃ nɛ, ǹ nə́ ǹ ba yui wa.

²⁰Ǹ tɛn nɛ, tɛmaa bara lɛ n goɛ̃ kion lɛ la, biikoo boɛɛn kooro. Izirayeli minin lɛn man nə́ goã golee á n kɔnpii ka Dɛnaa Lawa a da ǹ boo ne, maǹ nə́ goã yui á kɔnpii ka Dɛnaa Lawa a da ǹ boo ne.

²¹Bɛ̀ tɛmaa bara lɛ golee wasamiɛ̃nɛ, á woo baayɛlɛ yaa, bɛ̀ á yoo baayɛlɛ, Izirayeli minin lɛn dɔn man yui. Bɛ̀ tɛmaa bara lɛ golee á dɔ lɛawaa goon laanka tèlò goon, bɛ̀ á yoo bɛ kio, Izirayeli minin lɛn man yui.

²²Bɛ̀ tɛmaa bara lɛ golee kion lɛ lalan, ta a n doe lɛawaa paa, mui goon hinlaa ta a n liɛ bɛ nɛ lɛ̀ goon, Izirayeli minin lɛn man goɛ̃ ǹ giã ǹ bǎã nɛ, ǹ nə́ ǹ ba yui wa. Bɛ̀ á yoo maǹ yui.

²³Izirayeli minin lɛn man nə́ goã golee á n kɔnpii ka Dɛnaa Lawa a da ǹ boo ne, maǹ nə́ goã yui, á n kɔnpii ka Dɛnaa Lawa a da ǹ boo ne. Maǹ nə́ goã Dɛnaa Lawa a dí nyɛɛ, á n kɔnpii ka daraan kɛn nɛ Dɛnaa Lawa goã á ǹ kɔ Muizu la á ǹ kɔ ǹ la.