Read Samo, Southern Mis 3 Bible Online

Mis 3 - Samo, Southern bible

Mis 3

¹Zakɔba tɔrɔn goledɛnan lɛn, Izirayeli minin sii yɔrɔ-bɔlen lɛn, masɛ Misee n ka nyankoe: ka bǐɛ̃ kɔ ka n too kɔ. Min doamaa nɛ a sii yɔrɔ bɔ ǹ gɔn nyaa kasɛn kɛn ma-n doo?

²Sɛnɛ, ka a sii bǐɛ̃ li wa, yǎa a baraa. Ka dinin man ma tɔrɔn lɛn ki boe, ka dinin man ma tɔrɔ minin lɛn siĩ sɔlɛɛ boe ǹ wen ganaa.

³A n goon ka ka n ma tɔrɔ minin lɛn siĩ soɛ̃. A n goon ka ka n ká ǹ ki bɔ, ka ǹ wen yiyiɛ, ka siĩ din bɛ́ ǹ tá kukuri, bɛ̀ ǹ kaa kùsì-n lɔn, ka siĩ bɛ́ ǹ tá kukuri, bɛ̀ ǹ kaa fɔlɔ donkolon ne lɔn, ka n ká ma tɔrɔn lɛn baa miɛ̃.

⁴Min mɛnɛn bɛ́ bɛ lɛ zɛnɛɛ, ta ǹ nə́ n lɛ dɛ Dɛnaa Lawa ganaa ǹ mɛn pinaa, a re n nyii ǹ la wa. A n die n yɔrɔ din bɔyɛɛ a bɔ ǹ la bɛa pinaa, ǹ zɛnaa ǹ sii babaraan lɛn taman yii.

⁵Lawa a boo gii-dalin mɛnɛn bɛ́ Dɛnaa Lawa a zaman kɛ yiri siɛ̃, Dɛnaa Lawa na á kɛ pɛ bɛn wɔ paǹ li: «Bɛ̀ min mɛn gɔn màn tá ǹ lɛ-n, maǹ là nyantoro boo diɛ bɛa dɛnaa nɛ. Bɛ̀ min mɛn gɔn màn ba ǹ lɛ-n wa, maǹ zia yɔrɔ diɛ bɛa dɛnaa la.

⁶A bɛ́ miɛ̃, á nya kəni! Ma a die sii kɔn nyɛɛ ǹ nɛ doo wa, ǹ yii ba re sii kɔn yii doo wa. Lɛawaa á die tèlò biɛ ǹ ganaa, wasa yii á die wɔlɔ tì biɛ ǹ ganaa.

⁷Sii-nyalin kɛn wɔ n ka sìi ni, sii yɛ wolen kɛn wɔ n ka sìi ni. Ǹ tá re pìi koe ǹ yɔrɔ lɛ, mà ǹsɛn manə ǹ sìi duri ni. A giala, Lawa a re ǹ lɛ sii doo wa.»

⁸Sɛnɛ, masɛ Misee, Dɛnaa Lawa yiri na á pàã gole kɔ ma la, ka peperebaa laanka foo tãbaa nɛ, màn mɛn bɛ́ toɛ, ma Zakɔba tɔrɔn kɛn Lawa bɔlɔ tii boo kɛ da ǹ nɛ, ma Izirayeli minin kɛn sii baraa kɛ pɛ ǹ nɛ.

⁹Zakɔba tɔrɔn goledɛnan lɛn, ka bǐɛ̃ kɔ, ka n too kɔ kɛ li! Izirayeli mìilandɛnan lɛn, sii pepere a kɔɔ̃n ka ganaa wa. Ka n sii pepere din tumaa kɔrɛ.

¹⁰Ka n ká mà kaa, ká tɔ́n *Siɔn kiwi kɛ dɔ nɛ. Ka n ká sii baraa zɛnaa, ká tɔ́n Zeruzalɛmu kiwi kɛ dɔ nɛ.

¹¹A kiri-wɔlen man minin sii yɔrɔ boe màn ganaa, A Lawa a wúlu-bɔlen man minin darɛɛ giɛ saraa li, A Lawa a boo gii-dalin manə ǹ dí nyɛɛ wɔrɔ-a. Maǹ wusii n gòãn koɛ Dɛnaa Lawa la, ǹ nə́ pii: Dɛnaa Lawa bɛ́ kun ka wɔsɛn nɛ, wàa mɛn sii baraa n die wɔ yii?

¹² Bɛ lɛ na á toa, ka dinin kɛn lɛn taman yii, Zeruzalɛmu á die kɛbɔlɔ biɛ, ǹ tá re Siɔn kele kɛ kɔsɛ wuru lɛa, kion bǎã lɛ a kele lɛ á re daã biɛ.