Read Samo, Southern Mis 6 Bible Online

Mis 6 - Samo, Southern bible

Mis 6

¹Dɛnaa Lawa bɛ́ màn mɛn pii, ka bǐɛ̃ kɔ ka n too kɔ bɛ li: «Yoo n nə n bɔ tán, n boo da maa lɛa. Golee kelen kɛn yɔrɔ-a, n boo da, boo da tentenen kɛn nə n lɛ ma.

²Kelen lɛn, ka n too kɔ Dɛnaa Lawa a foo busu ǹ boo li, kasɛn dɔn, tán giala wɔ ǹ bǎã kakan kɛn, ka n too kɔ. A giala, Dɛnaa Lawa na a foo busu ǹ boo diɛ a zaman nɛ, a laanka Izirayeli minin lɛn man kɔn.

³Maa minin, man má wàa la ka la? Fuu mɛn tɔrɔ n má da ka mìi ni? Ka bɛ pɛ masɛ nɛ.

⁴ Maa ka waa a bɔ Ezipti gána-n lɛ sɛ a lɛa nɛ? Maa ka si bɛ̀rɛbaa la lɛ a lɛa nɛ? Hinlaa Muizu dia ka la kɛa lɛa nɛ, ka Aarɔn laanka Miriyamu ni?

⁵ Moabun kii Balaaki bɛ́ á goã mà a n die sii mɛn zɛnɛɛ ka nɛ, Pewɔɔrɔ a nɛgiĩ Balaamu na a lɛ si ka boo mɛn nɛ, kaa toa Sitimu a da Gilgaali ke, maa minin, ka toa ka n taasɛ ka bɛn nɛ. Ka á re doɛ̃ kəni, mà Dɛnaa Lawa sii sonboren zɛnaa ka nɛ.»

⁶Wɔ n die woe golee Dɛnaa Lawa yɔrɔ-a ka wàa nɛ? Wɔ n die woe lon a Lawa guguru koe ka wàa nɛ? Wɔ n die woe ka lɛ̀ goon diin nɛn nɛ, wɔ bɛn baa *wúlu màn tiɛ̃ lɛa kəni?

⁷Dɛnaa Lawa n giɛ sère gɔ̀lɔ̀ duu damata li wúlu màn lɛa? Hinlaa a n giɛ nyɔɔ gigiã li? Ma doamaa-n ma maa nɛgiĩ bibinaa kɔ, maa bɔlɔ-tii kɛa lɛa? Ma doamaa-n ma maa yɛ ǹ nɛ kɔ, maa sii baraan kɛn lɛa?

⁸E minbuiinin! Sii mɛn bɛ́ siĩni, a bɛ́ á bɛ pɛ ka nɛ. Dɛnaa Lawa bɛ́ giɛ li mà ka sii mɛn zɛnaa, a bɛ́ á bɛ pɛ ka nɛ: a n mà ka lɛ kɔ sii pepere zɛnaa ganaa, ka toa sii bǐɛ̃ zɛnaa kɔɔ̃n kɔ ka ganaa, ka Lawa a zii tɔ wɔ ka din-gisiĩ ni.

⁹Dɛnaa Lawa lɛ á boe kiwi lɛ gialaa. Min mɛnɛn bɛ́ nyɛ́ɛ biɛ nɛ, á die bɛn kirisibiɛ. Dɔlɔ mɛn nə n da ka mìi ni, ka n yii da bɛ la. Min mɛn dɔ da ka mìi ni, ka n too kɔ bɛ lon.

¹⁰Kaa baraabaa ke ka á zɛnɛɛ, kaa wurumubaa ǹ mànan kɛn kaa kion, kaa *belee zɔɔ̃ ǹ màn ke ká màn bɔ lɛ, sii bɔbɔnɛɛ n ká zɛnaa. Ma á boe la ma bɛ si ma ganaa sonbore?

¹¹Màn mɛn bɛ́ a màn zɔɔ̃ ǹ màn taãn lɛa wa, ka bɛ saa ka màn zɔɔ̃ nɛ! Màn zɔɔ̃ ǹ mànan kɔsɔn man ka á ǹ kiɛ ka lon. Ma á boe la ma bɛ lɛ si ma-a sonbore?

¹²A giala, kiwi lɛ a pàãman kakaarɛbaa la yii ni, a minin kɛn man soɛn boboe, màn kɔn ba ǹ lɛ-n wa, yǎa kɔn bebelee.

¹³Bɛ lɛ n ke, man die ka dii, yǎa ma busu diɛ ka ganaa. Man die basaã koe ka nɛ, kaa sii baraan lɛn taman yii.

¹⁴Kasɛn kɛn, ka á re màn bii, ka n ka a kiɛ̃ wa. Ka nàn tá re pipi bòo gɔn. Ka bɛ́ re màn mɛn koɛ ka gɔn li, bɛa re goɛ̃ wa. Ka bɛ́ re màn mɛn tamaɛ, ma á re toɛ zia bɛ bii.

¹⁵Kasɛn kɛn, ka á re màn diɛ kaa wuru-n, sɛnɛ, ka n ka a re kuri wa. Kasɛn kɛn, ka á re *olivie nyɔɔ boe, sɛnɛ, ka n ka a re loe ka ganaa wa. Ka á re rezɛ̃ mu boe, sɛnɛ, ka n ka a re a duvɛ̃ mii wa.

¹⁶ Ɔmuri a landa sii kɔrɔn kɛn, a nɛ Akaabu a kion minin zɛnaa ǹ sii gɛsɛn kɛn tumaa, ka gɔn nə paraa-n bɛn lɛn ganaa. Bɛ lɛ a lɛa nɛ, ma á die kaa gána lɛ yui. Kaa kiwi minin kɛn, ǹ tá re bɛn diɛ yaa lɛa. Sìi sii mɛn bɛ́ re maa zaman lɛ yii, a guĩ á re doe ka ganaa.