Read Samo, Southern Abak 2 Bible Online

Abak 2 - Samo, Southern bible

Abak 2

¹Masɛ Abakuku, man die giɛ̃ wɔlɔ lɛduə̃ ǹ bǎã kɛ nɛ, ma gole lon kungɔn la, man yii da ma ga, Dɛnaa Lawa bɛ́ re boo mɛn pii ma nɛ, maa lɛ dia lɛ a binyəə lɛa.

²Dɛnaa Lawa ma lɛ si á pɛ: Ma bɛ́ sii mɛn nyɛɛ n nɛ, a kiɛ̃. A kiɛ̃ goon la màn mɛn bɛ́ toɛ, ǹ boo la ǹ pɛ foaã nɛ.

³ Siin kɛn ma á ǹ nyɛɛ, ǹ tá re yɔrɔ yii. Sɛnɛ, yǎa ǹ biikoo doe. Kànaa ka boɛɛnɛ, ǹ tá re yɔrɔ yii. Soɛ bie wa. Haalɛ ta a biikoo n sɔsɔɔ, n yii da n foo n doa nɛ. Ma boo mɛn pɛ, á re yɔrɔ yii a biikoo li, sàabaa ba la wa.

⁴ Á ke: Min mɛn bɛ́ a pepere wa, bɛa dɛnaa á re mɛnɛɛ. Sɛnɛ, min mɛn bɛ́ pepere, a bɔlɔgoondɛnaabaa n die toɛ a yii goã koo.

⁵Duvɛ̃ nə min piɛ̃ boe. Din gole-kɔlin ba kiɛ̃ bǎã goon ne wa. Ǹ bɔlɔ yala n koo banabana ka geren piɛ bɛ́ lɔn. Ǹ ba kiɛ̃ wa ka gɛ̀ bɛ́ lɔn. Maǹ nə́ n dinin lɛnpɛnɛ ka gánan nɛ, ǹ tɔrɔn tumaa kaa ǹ pǎã giulun.

⁶Sɛnɛ, ǹ tɔrɔn mɛnɛn tumaa kũ, bɛn tá re yui ǹ gialaa ka suusun ni, ka boo baraan nɛ. Maǹ pii: Kaa wɔ n ka koe ne, kasɛn mɛnɛn bɛ́ gɔn mànan soekɔn, ǹ nə ǹ ba kaa wɔ lɛa wa. Kaa giɔ̀mɔ kɛ n goɛ̃ gole yǎa biĩ kəni?

⁷Kaa giɔ̀mɔdɛnan tá re yui bǎã goon ne, ǹ da ka kio. Ǹ tá re n yii dɔrɛɛ, ǹ ka gɔ̀nɔn da bìn diɛ ganaa. Ǹ dɔn tá re ka kokoe.

⁸Ká tɔrɔ gigiã gɔn duduu. A bɛ́ miɛ̃, tɔrɔ gialakunun tá re ka dɔn gɔn dudui. A giala, ka mà kaa tán. Ka kakaarɛbaa zɛnaa gánan manɛ, kiwin ni ka ǹ minin ni.

⁹Kaa wɔ ǹ ka bɔ̀n nɛ! Ka mɛnaa minin la, ka gɔn mànan yɛ, kaa kion minin wɔ lɛa. Ka bàan wɔ bɛ́ lɔn, ka n kaa giãǹ bǎã doe lon, màn mɛn bɛ́ toɛ koe ná a doe ka ganaa wa.

¹⁰Ka n sìi diɛ kaa sumu minin ganaa. Ka tɔrɔ gigiãn mɛnɛn dɛ, ka n ka dinin nyin boe ka bɛ nɛ.

¹¹Haalɛ ǹ kion a kigiala kɔlɔn dinin tá re n lɛ dii ǹ ka zɛ̀rɛ baa, ǹ kion a mɛnɛn nə ǹ lɛ si.

¹²Kaa wɔ n ka koe ne! Ka ǹ kaa kiwin doe gɛ̀-dɛ gɔ́ɔ̃ nɛ, ka nə ǹ koɛ ka mɛnaa kɔn la nɛ.

¹³Á ke, minbuiin nɛn dí tumaa n die n gɔn nyɔmiɛ tɛ-n. Minbuiin nɛn man nɔmaa kooro we. Bɛ tumaa bie boe Dɛnaa Lawa Pàãyiidɛnaa din li wa?

¹⁴ Sonbore, min tumaa á re Dɛnaa Lawa a gugurubaa doɛ̃. Á re tán piɛ̃ ka yìsi mu gole bɛ́ lɔn.

¹⁵Kaa wɔ n ka koe ne! Mi ǹ màn mɛn bɛ́ baraa ka sèwò bɛ́ lɔn, ka ǹ bɛ koe ka miãkɛnɛn la ka pàã nɛ ǹ mi a ǹ yii kũ, màn mɛn bɛ́ toɛ ka ǹ tontoro yɛ.

¹⁶Sɛnɛ, kaa wɔ ǹ die goɛ̃ ka sìi ni, gugurubaa ná a bie wa. A mii dɔ ka dɔn ganaa kanna. Ka dɔn tontoro á re goɛ̃, ǹ kaa soromabaa nyaa. Dɛnaa Lawa n die a foo-yoo baraa kɛ kiɛ ka la taãn-taãnɛ. Kaa gugurubaa kɛ á re n bɔyɛɛ a sìi baa.

¹⁷Ka kakaarɛbaa mɛn zɛnaa Liban ganaa, bɛ n die kuĩ ka dinin mìi ni. Ka tɔɔn dɛ, á ke tɔɔn tá re ka gɔ̀nɔn diɛ bìn diɛ ganaa nyɛ́ɛ gunun. Bɛ tumaa ǹ die n zɛnɛɛ a giala ka mà kaa tán, Ka kakaarɛbaa zɛnɛɛ gánan manɛ kiwin ni ka ǹ minin ni.

¹⁸Dì zɛnaa a là n ka wàa nɛ? Gɔn kooro ne ǹ nə́ sɛlɛ. Fɔlɔ màn nyín zɛnaa nɛ, a n minin kiɛ golee soɛ li ganaa. Gɔn dí-nyali na á zɛnaa, a ba boo diɛ wa. A n siɛ lɔn kəni gɔn dí-nyali kɛ tá n foo doɛ a ganaa.

¹⁹Kaa wɔ n ka koe ne! Ka ǹ pii gɔn lɛkoro ne: «N yii bũ!» Ka ǹ pii màn nyín ni kɔlɔ lɛa a ná a boo diɛ wa: «N nyan nyuù wɔ wa!» A da yaa ǹ ba boe la ǹ tá sii kɔn nyɛɛ ka-n wa. Sonbore, maǹ nə́ sana laanka wɔrɔ kaa bɛa màn nyínin lɛn la. Sɛnɛ, yiikoonaabaa ǹ piɛ̃ goon din ba ǹ nɛ wa!

²⁰Dɛnaa Lawa sɛ na a kion sonbore kɛ nɛ. Tán tumaa nə́ n lɛ tã a nyɛɛnɛ!