Read Samo, Southern Sof 3 Bible Online

Sof 3 - Samo, Southern bible

Sof 3

¹Kiwi mɛn bɛ́ piã-wɔle lɛa, á n din ziziɛ̃, piɛ̃ nɛ ka pàã zɛnaa wolen ne, bɔ̀n bɛ yɛ.

²A n too kɔ min kɔn a bii wɔ li wa. A n too kɔ min kɔn a doroo li wa. A n foo doa Dɛnaa Lawa ganaa wa. A n mɔrɔ a Lawa ganaa wa.

³A nyɛɛnaandɛnan man ka yàran mɛnɛn bɛ́ gini. A kiri-wɔlen man ka don ginin bɛ́ lɔn, ǹ nə́ goɛ̃ bɛ ǹ dɔ dɔ wasamiɛ̃nɛ, sɛnɛ baayɛlɛ, màn kɔn ba goɛ̃ wa.

⁴A Lawa a boo gii-dalin man din koa wolen lɛa, ǹ tá ǹ miãn yiri siɛ̃. A wúlu-bɔlen man Lawa a kion zaãbiɛ, ǹ ná a dí-pɛn ziziɛ̃.

⁵A da yaa, Dɛnaa Lawa tá kunun ǹ ni bɛa kiwi lɛ nɛ, a sii kɔn zɛnɛɛ baraa wa. Baayɛlɛ woo baayɛlɛ, a n kiri pepere we, a nyaabiɛ a zɛnaa ganaa pinin goon wa. Bɛ tumaa kio, min baraan man sii kɔkɔrɔ zɛnɛɛ, sìi ná a ba ǹ kuĩ wa.

⁶Dɛnaa Lawa pɛ: Má tɔrɔn papaã, má ǹ lɛduə̃ ǹ kungɔnɔn kɛn wuru, má ǹ kiwi gɔ́ɔ̃ baa ka diə gole bɛ́, min kɔn din ba kiɛ̃ walan doo wa. Ǹ kiwin nə́ bɔ̀n baa lenlen, min goon din ba ǹ nɛ doo wa.

⁷Má pɛ ma din ni: Sisia, kiwi lɛ á die ma guguru koe, á re n too koe maa doroon li. Bɛ̀ á miɛ̃, ma a re maa dɔlɔn kɛn boe a ganaa doo wa, ma a re a bɔ̀n biɛ doo wa. Sɛnɛ, haayii! Kiwi lɛ a minin man nə́ n gòã yii fuu saa ǹ nə́ kaa sii baraa nɛ.

⁸Dɛnaa Lawa a da ǹ boo á ke: Ka n yii da lɛawaa kɛ la kəni, man die zɛ̀rɛ diɛ ka la! A n ma gɔ́ɔ̃ nɛ ma zaman tumaa sɔkɔn, ma gánan tumaa kaa kun, màn mɛn bɛ́ toɛ, ma maa foo-yoo baraa kɛ kaa ǹ la. Hĩĩ, maa foo-yoo tɛ kɛ n die tán din tumaa kukuĩ.

⁹Ma á re tɔrɔn tumaa *yoreen koe, màn mɛn bɛ́ toɛ, ǹ boo la ǹ masɛ Dɛnaa Lawa nyankɔ, ǹ dí nya ma nɛ ka foo goon ne.

¹⁰Min mɛnɛn bɛ́ ma guguru koe, giã nɛ gána tumaa nɛ, bɛn tá re boe bǎã sɔsɔɔn nɛ Etiopii tàn kɛn kio dinin, ǹ da gɔn màn kɔ ma la.

¹¹Bɛa pinaa lɛ nɛ, maa zaman sii baraa mɛn tumaa zɛnaa, ǹ sii woo sii zɛnaa masɛ nɛ, bɛa sìi ba re ǹ kuĩ doo wa. Bɛa biikoo li kəni, min mɛn tumaa bɛ́ ka bii ǹ nə́ n dinin gole koe, ma á re bɛn lui ma ǹ bɔ ka bii, nsɛ, maa zaman, n tɔ nə n din gole kɔ kɛ kaa kəni, n bɔ maa kele sonbore kɛ la.

¹²Má bɛ́ re min mɛnɛn toɛ ka bii, doobaan laanka pàãwɛɛnaan manɛ, ǹsɛn mɛnɛn foo bɛ́ doa-n Dɛnaa Lawa ganaa.

¹³ Izirayeli minin mɛnɛn yii bɛ́ re goɛ̃ koo, bɛn ba re sii baraa zɛnɛɛ doo wa, ǹ ba re soɛ boe doo wa, ǹ ba re ǹ miãn yiri siɛ̃ ka ǹ da ǹ boo n doo wa, ǹ tá re màn bii, ǹ nyuù wɔ, min kɔn ba re nyɛ́ɛ diɛ ǹ ganaa wa.

¹⁴Loe lɔ, n bɛ̀ baa, *Siɔn kiwi! Ka foo kɔɔ̃n lɛ dɛ, Izirayeli minin! N nyanyaa ka n foo tumaa nɛ, Zeruzalɛmu!

¹⁵Zɛ̀rɛ mɛn tumaa bɛ́ ka bɔlɔ-a, Dɛnaa Lawa bɛ bɔ, á kaa zɔ́ɔn kaa baa la. Dɛnaa Lawa, Izirayelin kii tá kun ka ka nɛ. Ka nyan nyɛ́ɛ baa bɔ̀n nɛ doo wa.

¹⁶Bɛa pinaa kɛ lɛ nɛ, ǹ tá re pii Zeruzalɛmu ni: N nyan nyɛ́ɛ baa doo wa, Siɔn kiwi, n foo nyan ziziɛ̃ wa!

¹⁷Dɛnaa Lawa, n Lawa ta kunun n ni. A din nə gɔ̀lɔ̀ lɛa, a n gɔ̀lɔ̀ biɛ miɛ̃, a foo n kɔɔ̃nɛ n wɔ paǹ li. A kɔn-narɛɛ n nyin dii koe n la. A n foo kɔɔ̃n lɛ dii n din taman yii,

¹⁸ka zɔ́n pinaa bɛ́ lɔn. Dɛnaa Lawa pɛ: Màn mɛn bɛ́ guĩ lɛa n ganaa Zeruzalɛmu, ma á re bɛ wɔlɔ lui n ganaa, màn mɛn bɛ toɛ, sìi nyan nə n kũ doo wa.

¹⁹Bɛa biikoo li, min mɛnɛn nə bɔ n yii ni ka mɛnaa ma la siin ni, ma á re yui bɛn gialaa. Ma á re kaa busulən kaka koe. Ǹ wo ka min mɛnɛn nɛ gùli kɔ ǹ bàã nɛ, ma á re die bɛn nɛ piɛ. Kaa tɔ golebaa á re n diɛ wɔlɔ la, sìi ka kũ gánan mɛnɛn tumaa nɛ.

²⁰Bɛa biikoo li, ma á re die ka ka nɛ. Bɛa biikoo li, ma á re ka lɛ soekɔn. Kanna kəni, ka tɔ á re boe, ka tɔ á re gole koe a là tɔrɔ tumaa nɛ tán la, ma wusoo ma bǐɛ̃ kɔ ka ganaa ka gɔn-nyɔmiɛ̃ sonbore ne. Dɛnaa Lawa mà miɛ̃.