Read Samo, Southern Aze 2 Bible Online

Aze 2 - Samo, Southern bible

Aze 2

¹Dariyusu a kiibaa a lɛ̀ paabaa ǹ wɔ a mui sɔbaabaa ǹ wɔ a lɛawaa fuəwengoonbaa ǹ wɔ, Dɛnaa Lawa boo da á wɔ, a boo gii-dali Azee lɛ-n kɛnɛn.

²Boo da Salatieli Zudaan gánadɛnaa a nɛ Zorobabeli ka Zozoe Lawa a wúlu-bɔlen goledɛnaa Zozadaaki a nɛ, ka zaman gialakun kɛ tumaa nɛ, n pɛ:

³Min tá tɔn ka bii á Lawa a kion kɛa lɛlɛ a gugurubaa kɛ yɛ? Sɛnɛ kanna dɔn, ka n giɛ a ganaa lɔn? A bie màn kooro lɛa ka yii li pelo wa?

⁴Dɛnaa Lawa pɛ: Zorobabeli n foo taã, nsɛ dɔ Zozadaaki a nɛ Lawa a wúlu-bɔlen goledɛnaa Zozoe n foo taã. Gána lɛ a min din tumaa ka n foo taã, Dɛnaa Lawa na á pɛ. Ka n we yii dí li, ma tá kun ka nɛ. Dɛnaa Lawa Pàãyiidɛnaa a da ǹ boo n ke.

⁵ Ma lɛ kɔ kɔn la mɛn wɔ ka ka nɛ bɛ̀ ka bɛ́ ka soo Ezipti gána nɛ, ma yiri tá kun ka nɛ biikoo tumaa li, ka nyan nyɛ́ɛ baa màn kɔn nɛ wa.

⁶ Sɛnɛ á ke masɛ Dɛnaa Lawa Pàãyiidɛnaa pɛ: Kànaa ka boɛɛn nɛ ma á re bìn diɛ lon laanka tán ganaa yìsi mu laanka tán gere ne.

⁷Ma á re bìn diɛ kanaa tɔrɔn ganaa, kanaa gɔn màn tumaa á re die kanna. Lawa a kion kɛ á re piɛ̃ ka gugurubaa nɛ. Dɛnaa Lawa Pàãyiidɛnaa a da ǹ boo n ka kɛ nɛ.

⁸Wɔrɔ laanka sana yii n ma din wɔ lɛa. Dɛnaa Lawa Pàãyiidɛnaa a da ǹ boo n ka kɛ nɛ.

⁹Lawa a kion dii ke a gugurubaa á re n gɔn sii a zizi kɛ wɔ la lenlen. Ma á re yii-nyɛɛ diɛ a nɛ. Dɛnaa Lawa Pàãyiidɛnaa a da ǹ boo n ka kɛ nɛ.

¹⁰Dariyusu a kiibaa lɛ̀ paabaa ǹ wɔ, a mui manangɔrɔbaa ǹ wɔ a lɛawaa fuəwensii Dɛnaa Lawa boo da a boo gii-dali Azee ne:

¹¹— Á ke Dɛnaa Lawa Pàãyiidɛnaa n kɛ pii: «Nɔ̀n da Lawa a wúlu-bɔlen kɛn la ka dí-pɛn kɛn nɛ.

¹²Wúlu-bɔ ǹ siĩ mɛn bɛ́ á n bɔ á n koa Lawa wɔ lɛa, bɛ̀ min bɛ bɔ á da a mɔnaa nɛ, yǎa bɛa mɔnaa kɛ lɛ nə turu buuru ganaa, duvɛ̃ nɛ, nyɔɔ nɛ hinlaa màn-bii tɔrɔ kɔsɔ nɛ bɛa màn kɛ lɛ á n bɔyɛɛ a màn sonbore baa?» Lawa a wúlu-bɔlen lɛn ná a lɛ si mà haayii.

¹³ Azee tɔ́n wusoo á nɔ̀n da: «Bɛ̀ min nə́ n gɔn da màn gere ganaa á n din gɔgɔrɛ kɔ nɛ, bɛ á n gɔn da bɛa man-biin kɛn lɛn ganaa, á boe la a ǹ baa gɔgɔrɛ?» Lawa a wúlu-bɔlen lɛn ná a lɛ si mà hiĩ ma á boe la a ǹ baa gɔgɔrɛ.

¹⁴Azee tɔ́n wusoo a boo saa á pɛ ǹ nɛ: «Zaman kɛ n miɛ̃. Tɔrɔ kɛ n miɛ̃ masɛ yɔrɔ-a. Ǹ gɔn màn tumaa dɔ n miɛ̃ ǹ bɛ́ màn mɛn yii koe masɛ la, a tumaa n gɔgɔrɛ». Dɛnaa Lawa a da ǹ boo ne.

¹⁵Dɛnaa Lawa pɛ doo: «Sisia kəni, sii mɛn bɛ́ re n zɛnɛɛ a saa pelo ganaa, ka n yiri koa bɛ li taãnɛ ká laan bɛ̀ ka n kɔlɔ diɛ n miã kɔrɔn Dɛnaa Lawa a kion kɛ wɔ lɛa,

¹⁶wàa sii na á goã ka yii? *Belee dakɔn mɛn bɛ́ màn yii fuə boe ka woo bɛ yaa fù. Bɛ̀ ka woo duvɛ̃ litiri posooro bɔ, ka n woe yiɛ bɛ̀ a n fuə.

¹⁷Má dɔlɔ bɔ ka ganaa ka gìa nɛ, doloka nɛ ka la gii ni. Gɔn dí bɛ́ màn mɛn koe ka la, ma bɛ tumaa ziziɛ̃. Ka bɛ tumaa nɛ, ka n bɔyaa ka daa ma li wa. Dɛnaa Lawa a da ǹ boo ne.

¹⁸A saa pelo ganaa ka lɛawaa kɔsɔn kɛn nɛ die, sii mɛn bɛ̀ re n zɛnɛɛ, ka n yiri koa li parasii ni. Mui manangɔrɔbaa ǹ wɔ a lɛawaa fuəwensii n Lawa a kion lɛ a gòã daa pinaa lɛa, ka n yiri koa li taãn-taãnɛ.

¹⁹Ta màn tɔrɔ a yii dɔǹ nɛ doo wa, duvɛ̃ da nɛ, gɔ́rɔ da nɛ, grenadie da nɛ, *olivie da nɛ, ta bɛn dɔn dinin nə nɛ kɔ duduu wa, a kũ pelo ganaa, man die maa barka gisĩ ka la.»

²⁰Ká a paabaa ǹ wɔ nɛ, Dɛnaa Lawa wusoo á boo da Azee ne mui a lɛawaa fuəwensiibaa ǹ wɔ pinaa:

²¹— A pɛ Zudaan gánadɛnaa Zorobabeli ni: «Ma á re bìn diɛ lon ganaa, ma á re bìn diɛ tán ganaa.

²²Ma á re kiin nyɛnɛɛ ma ǹ kaa, ma ǹ bɔ kii dankan la, ma á re kiin laanka gánan pàã ziziɛ̃, ma á re ziabaa ǹ wotoron noɛ̃ ma ǹ kaa kɔnlɛ ka ǹ da baa a wolen ne, sùi laanka a dii mala wole á re mɛnɛɛ, dɔɔ̃n tá re ǹ dɔɔ̃n diɛ gɛ̀ nɛ.»

²³Dɛnaa Lawa Pàãyiidɛnaa pɛ: «Bɛa pinaa kɛ lɛ nɛ, man die n kuĩ, nsɛ Zorobabeli, Salatieli a nɛ maa kialandɛnaa, hiĩ, Dɛnaa Lawa na á pɛ, man die n biɛ ka kaaran bɛ́ lɔn ǹ tá we góon ganaa, n tá re sii zɛnɛɛ ka ma tɔ nɛ. A giala ma din ni má n bɔ. Dɛnaa Lawa Pàãyiidɛnaa a da ǹ boo n ka kɛ nɛ.»