Read Samo, Southern Zak 10 Bible Online

Zak 10 - Samo, Southern bible

Zak 10

¹Ka la mu nyɔɔbaa nyankɔ Dɛnaa Lawa la, a din nə die ka la nɛ. Á re la gigiã koe ka la, kaa wuru gɔ́ɔ̃gɔ́ɔ̃ ǹ mànan nə siĩn kɔ.

² Lawa kooron kɛn man soɛ boon diɛ, wɔ-kũlin man soɛ siin yii. Maǹ narɛɛ kooron we, fofolo lɛa. Ǹ foo waa ǹ boon tumaa n piɛ̃ lɛa. Bɛ lɛ nɛ, zaman lɛ woo, ka tɔɔ makaradɛnaa bɛ́ lɔn, a giala, lɛduə̃li ba ǹ la wa.

³«Ma foo n yoo-n sére-lɛduə̃li baraan kɛn li. Man die yui butumun kɛn gialaa. Taãn nɛ, masɛ Dɛnaa Lawa Pàãyiidɛnaa, man die n doe maa zaman Zudaa minin kɛn lɛ. Man die ǹ biɛ maa ziabaa ǹ sùi sonboren lɛa.

⁴Kiã tɔrɔ tumaa n die boe Zudaa gána nɛ, pàã nə́ ǹ tɛnɛn lon ka kion giala daa ǹ kɔlɔn bɛ́ lɔn, ǹ tɛnɛn nə́ paraa-n tán ka zìã kion a kiɛn bɛ́ lɔn, gialakunun man kaka ka ziabaa ǹ sa bɛ́ lɔn.

⁵Maǹ die goɛ̃ ka sɔraasi foo taãnaan bɛ́ lɔn. Min mɛnɛn bɛ́ zia biɛ ǹ ganaa, ǹ tá re bɛn tɔtɔrɛ ka zii la ǹ bɛrɛɛ bɛ́ lɔn. Maǹ die yɔ boe miɛ̃, a giala, Dɛnaa Lawa á re goɛ̃ kunun ǹ ni. Sìi á re n koe zɔ́ɔn sùi da baa-a wolen lɛ.

⁶Ma á re Zudaa a zaman foo kaka koe, ma Zozɛfu[6] a zaman kirisibaa. Ma á re wusii ma da ǹ nɛ piɛ, a giala, ǹ makara ma kũ. Maǹ die n biɛ ka ma bie má goã má n la bɔ ǹ ganaa wa. Hiĩ, ma din nə Dɛnaa Lawa, ǹ Lawa lɛa, ma á re ǹ nyankɔ lɛ sii.

⁷Efrayimu minin foo n die tã koe, ka zia-baali zanbian bɛ́ lɔn. Ǹ foo n die kɔɔ̃n koe, ka maǹ nə́ duvɛ̃ mi. Ǹ nɛnyaanan tá re bɛ yii, maǹ die goɛ̃ ǹ foo n kɔɔ̃nɛ, ǹ nə n nyɛnyɛɛ Dɛnaa Lawa taman yii.

⁸Man die maa zaman bíi, ka lɛ pii ni, ma ǹ sɔkɔn. Taãn nɛ, man die ǹ sii ma ǹ kaa, ǹ mɔnaa ka lɛlɛ ǹ bɛ́ lɔn.

⁹Má ǹ sasawaa paǹ tumaa li tɔrɔn bii, ka ǹ bɛ́ màn nàn pɛsɛ̃ lɔn. Sɛnɛ, bɛa gána sɔsɔɔn lɛn nɛ, ǹ yiri á re gisĩ ma nɛ. Ǹ tá re giɛ̃ walan, kun ka ǹ nɛnyaanan nɛ, ǹ tɔn nə n bɔyaa ǹ daa.

¹⁰Ma á re boe ǹ ne Ezipti gána nɛ, ma bɔ ǹ nɛ Asiirii gána nɛ, ma da ǹ nɛ Galaati gána nɛ, ka Liban gána nɛ. A laan bɛ yii ni, bǎã ba re yii a ǹ bɔ wa.

¹¹Ǹ tá re koe yìsi mu[7] kɛ kuri. Masɛ Dɛnaa Lawa, ma á re yìsi mu gole a mu duwii. Haalɛ Niili tà gɔ́ɔ̃ din tá re laɛ. Asiirii gána, din gole-kɔle kɛ á re mɛnɛɛ. Ezipti a pàã á re nyɛɛ.

¹²Ma á re pàã koe maa zaman la. Sii mɛn bɛ́ kɔɔ̃n ma ganaa, ǹ tá re bɛ zɛnɛɛ. Dɛnaa Lawa a da ǹ boo ne.»