Read Samo, Southern Zak 11 Bible Online

Zak 11 - Samo, Southern bible

Zak 11

¹Liban gána, n kiɛnlɛn bũ tɛ nə n *sɛdrə dan kɛn kũ!

²Siprɛsi dan, ka gini, a giala, sɛdrə dan nə́ kaa, bɛa da siĩn-siĩnin lɛn nə́ bɔ̀n baa. Basan da sɔsɔrɔn, ka toa kaa ginii wuu bɔ, a giala, ǹ nə́ kaa daã kɛkɛ lɛ dɛ.

³Ka n too kɔ tɔrɔn tɔɔn-lɛduə̃lin kɛn lon gini. A giala, ǹ pàã nya. Ka n too kɔ yàra nɛ tenən lɛ-baa li. A giala, Zurdɛ̃ tà lɛ a bǎã sonbore lɛ ziziɛ̃.

⁴Dɛnaa Lawa, maa Lawa kɛa boo kɛ da ma nɛ: — Ǹ bɛ́ woe ka sèren mɛnɛn nɛ ǹ dɛ ǹ bǎã nɛ, bɛn lɛduə̃li baa.

⁵Min mɛnɛn bɛ́ ǹ pii ǹ nə́ ǹ dii, maǹ taasɛ mà ǹsɛn ba sii baraa kɔn zɛnɛɛ wa. Ǹ mɛnɛn bɛ́ ǹ siɛ̃, bɛn man pii: «Lawa barka, a giala, wɔ màndɛnan baa!» Ǹ makara dɔ din ba boe ǹ lɛduə̃lin ganaa wa.

⁶Dɛnaa Lawa a da ǹ boo á ke: — Gána lɛ a minbuiin nɛn makara a re ma kuĩ doo wa. Man die didie diɛ ǹ miãkɛn a pàã giulun, ka ǹ kii ni. Kiin tá re ǹ gána ziziɛ̃ lenlen. Min kɔn ba re kanbiɛ ǹ ganaa wa.

⁷Ǹ bɛ́ woe ka sèren mɛnɛn nɛ ǹ dɛ ǹ bǎã nɛ, sanparɛ a makaradɛnan kɛn, ma dinmaa-n bɛn lɛduə̃li lɛa. Má tɔɔn lɛduə̃ ǹ bàlà màn paa saa. Má a bibinaa bíi "giaárabaa", má a paabaa ǹ wɔ bíi "goonbaa", má maa sèren lɛduə̃ giala kɔ.

⁸Bɛ kio, ma boo la má n foo kũ sèren-lɛduə̃lin lɛn li wa. Ma dɔ nə́ ǹ dɔn gɔ̀nɔn bɔ. Mui goon gɔ́ɔ̃ nɛ, má sère-lɛduə̃li sɔɔ toa walan.

⁹Má tɔ́n nə n toa ǹ ganaa kɛnɛn: «Ma a re giɛ ka walan doo wa. Ǹ mɛnɛn bɛ́ re giɛ̃, ǹ gã! Ǹ mɛnɛn bɛ́ siĩni ǹ gã, ǹ gã! Ǹ mɛnɛn yii bɛ́ re goɛ̃ koo bɛ kio, ǹ dinin nə kɔn sɔ̃!»

¹⁰Bɛ kio, má maa "giaárabaa" bàlà kɛ saa, má yiɛ. Bɛa yɔrɔ lɛ la, ma lɛ kɔ kɔn la mɛn wɔ ka tɔrɔn tumaa nɛ, man má bɛ lɛ ziziɛ̃.

¹¹Lɛ kɔ kɔn la lɛ na á n ziziɛ̃ bɛa pinaa kɛ lɛ nɛ. Sère makara dɛnan mɛnɛn nə goã giɛ ma ganaa, bɛn nə dɔ̃, mà Dɛnaa Lawa a boo na a gialaa yɔrɔ yii.

¹² Má tɔ́n nə n toa ǹ ganaa kɛnɛn: «Bɛ̀ á kɔɔ̃n ka ganaa, ka maa saraa kɔ ma la, hinlaa, ka toa walan!» Ǹ nə́ tɔn maa saraa nimi, wɔrɔ we pɔsɔɔ[8], ǹ nə́ kɔ ma la.

¹³Dɛnaa Lawa nə́ n toa ma ganaa kɛnɛn: «Ma giɔ̀mɔ n ka kɛ lɛ nɛ ǹ dinin yii li! Bɛa wɔrɔ lɛ zũ dɔn-bɔle ne!» Má bɛa wɔrɔ we pɔsɔɔ lɛ saa, má zũ dɔn-bɔle ne Dɛnaa Lawa a kion.

¹⁴Bɛ kio, "goonbaa ǹ" bàlà ke, má bɛ yiɛ. Bɛa yɔrɔ lɛ la, màn mɛn bɛ́ Zudaa laanka Izirayeli biɛ goon ka dɔɔ̃nɔn bɛ́ lɔn, man má bɛ lɛ yiɛ.

¹⁵Dɛnaa Lawa wusoo doo á kɛ pɛ ma nɛ: «Sisia, sère-lɛduə̃li baãnaa a mànan si.

¹⁶A giala, man die tɔɔ-lɛduə̃li kɔsɔ diɛ gána lɛ nɛ: Sèren mɛnɛn bɛ́ ǹ banban, a re n taasɛ bɛn nɛ wa, ǹ mɛnɛn nə papaã, a re giɛ bɛn li wa, ǹ mɛnɛn bɛ́ busulən lɛa, a re giɛ bɛn walan wa, ǹ mɛnɛn bɛ́ kakabaa la, a re màn kɔn koe bɛn la wa. Sɛnɛ, n mɛnɛn bɛ́ kasiɛ̃ nɛ ǹ bii, a n die bɛn soɛ̃, a ǹ gòon tɔnɔn wɔwoɛ̃.»

¹⁷Tɔɔn-lɛduə̃li baãnaa mɛn bɛ́ n la boe a tɔɔn ganaa, bɛ wɔ n ka bɔ̀n nɛ! Gɔya sa á re a nyàa goon niɛ̃, a na a gusin a yii puru! A nyàa á re laɛ, a laa kakaka. A gusin a yii á re tiɛ̃, a tã lenlen!