Read Samo, Southern Zak 12 Bible Online

Zak 12 - Samo, Southern bible

Zak 12

¹Dɛnaa Lawa a da ǹ boo á ke Izirayeli a paǹ li, asɛ mɛn nə lon lɛ bɔ, a ná a gòã daa, á fɔfoã kɔ minbuiin nɛ la, a da ǹ boo á ke:

²— Man die Zeruzalɛmu biɛ kaaran lɛa, piɛ̃ nɛ ka maa foo yoo ǹ duvɛ̃ nɛ. Tɔrɔn mɛnɛn tumaa bɛ́ a lɛnpɛnɛ, á re bɛn yii tii. Bɛ̀ ǹ nə́ yoo Zeruzalɛmu gialaa ǹ mɛn waáraa, ǹ tá re yui Zudaa minin dɔn gialaa.

³Sonbore, bɛa biikoo li, man die Zeruzalɛmu biɛ kɔlɔ guguru lɛa tɔrɔ kɔ́n ná a boe la a saa wa. Tɔrɔ mɛn bɛ́ re n zoɛ̃ a saa li, a n die busu diɛ a din-a. Bɛ lɛ nɛ, tán a tɔrɔn tumaa á re kiɛ kun, ǹ yoo a gialaa.

⁴Bɛa waáraa, Dɛnaa Lawa a da ǹ boo ne, man die nyɛ́ɛ kiɛ sùin tumaa ganaa, ǹ da baa-a wolen kɛn, ma gàãn yoo bɛn li. Sɛnɛ ma á re giɛ Zudaa walan, ma a zɔ́ɔn sùin tumaa yiin tã.

⁵Zudaa a kiãn tá re taasiɛ we ǹ pɛ: «Pàã n Zeruzalɛmu minin lon, a giala, ǹ pàã n ka ǹ Lawa, Dɛnaa Lawa Pàãyiidɛnaa nɛ.»

⁶Bɛa waáraa kəni, ma á re Zudaa a kiã biɛ ka tɛ bɛ́ lɔn gɔn dakɔnla giulun, hinlaa ka tɛ bɛ́ lɔn làpaa ganaa toa giulun. Tɔrɔn mɛnɛn bɛ́ ǹ lɛnpɛnɛ, ǹ tá re bɛn tumaa yɔyɔrɛ lenlen. Sɛnɛ, Zeruzalɛmu minin tá re giɛ̃ ǹ kiwin ni.

⁷Dɛnaa Lawa n die Zudaa tɔrɔn sumu lɛn kirisibiɛ bibinaa nɛ. Màn mɛn bɛ́ toɛ, Davida a sumu minin laanka Zeruzalɛmu minin baran gugurubaa yɛ a la Zudaa min gialakunun kɛn man wa.

⁸Bɛa waáraa kəni, Dɛnaa Lawa á re Zeruzalɛmu minin tamɛɛ: Pàã n die goɛ̃ ǹ pàãwɛɛnaan lon ka Davida bɛ́ lɔn. Davida a sumu minin man die goɛ̃ ka Lawa bɛ́ lɔn, ka Dɛnaa Lawa a lon a dia dí-a wole bɛ́ lɔn.

⁹Dɛnaa Lawa pɛ: «Bɛa waáraa kəni, tɔrɔn mɛnɛn tumaa bɛ́ re yui Zeruzalɛmu gialaa, man die bɛn tumaa dii lenlen.

¹⁰ Man die sonborebaa ǹ yiri laanka Lawa nyankɔ ǹ yiri koe Davida a sumu minin laanka Zeruzalɛmu minin la. Ǹ masɛ mɛn lɛ fɔ̃, ǹ tá re n yiin doɛ ma la, bɛ lɛ taman yii. Ǹ tá re gɛ̀ loe loe la, ka ǹ bɛ́ nɛgiĩ goon toto a gɛ̀ loe loe lɔn. Maǹ die wuu pii la, ka ǹ bɛ́ nɛgiĩ bibinaa a gɛ̀ wuu pii lɔn.

¹¹Bɛa waáraa kəni, gɛ̀ zɛnaa gole n die n zɛnɛɛ Zeruzalɛmu, ka Adaadi-Rimɔn wɔ kɛ bɛ́ lɔn Megidoo nyankɔrɔ basa kɛ nɛ.

¹²Sumun lɛn mɛnɛn tumaa bɛ́ gána lɛ nɛ, ǹ tumaa n die bɛa gɛ̀ lɛ zɛnɛɛ totoro: Davida a sumu minin, ǹ giĩn laanka ǹ lɔn nɛ, Natan a sumu minin, ǹ giĩn laanka ǹ lɔn nɛ,

¹³Levii a sumu minin, ǹ giĩn laanka ǹ lɔn nɛ, Simeyii a sumu minin, ǹ giĩn laanka ǹ lɔn nɛ.

¹⁴A din yɔrɔ goon kɛ lɛ la, sumu gialakunun kɛn tumaa a minin man die gɛ̀ koɛ, giĩn laanka ǹ lɔn nɛ.