Read Samo, Southern Zak 2 Bible Online

Zak 2 - Samo, Southern bible

Zak 2

¹Sii-nyaa gɔ́ɔ̃ nɛ, má n yii saa lon. Á ke, má bɛn màn sii yɛ.

²Lon a dia dí-a wole mɛn bɛ́ boo diɛ ka ma nɛ, má nɔ̀n da bɛ la kɛnɛn: «Bɛnən kɛn man wàa giala pii?» Á ma lɛ si: «Gánan mɛnɛn bɛ́ pàã nə́ ǹ lon, ǹ nə́ Zudaa minin loo, Izirayeli wɔn nɛ ka Zeruzalɛmu wɔn nɛ, ǹ nə ǹ sasawaa paǹ yii li, maǹ bɛ giala pii.»

³Bɛ kio, Dɛnaa Lawa fuũ màn sii nyaa ma nɛ.

⁴Má nɔ̀n da: «Maǹ nə́ daa wàa pɛ?» Á ma lɛ si kɛnɛn: «Maǹ nə́ daa nyɛ́ɛ da gána pàãdɛnan kɛn ganaa ǹ nə́ ǹ ziziɛ̃, ǹ mɛnɛn lɛn nə da Zudaa gána yu. Ǹ nə́ Zudaa a zaman loo paǹ yii li, min kɔn boo la á n gòãn doa ǹ nyɛɛn wa.»

⁵Sii nyaa gɔ́ɔ̃ nɛ, masɛ Zakarii, má n yii saa lon, ma sii mɛn yɛ, á ke: Giĩ goon ne, ka màn zɔ́ɔ̃ ǹ biɛ ná a gɔn.

⁶Má nɔ̀n da la má a n woe maa. Á ma lɛ si mà asɛ n woe Zeruzalɛmu zoɛ̃, asɛ na a pəməbaa laanka a sasabaa dɔ̃.

⁷Lon a dia dí-a wole mɛn bɛ́ boo diɛ ma nɛ, a bɛ́ á n zɔ̃ á die, lon-a dia dí-a wole kɔsɔ daa n da lɛ,

⁸á pɛ-n kɛnɛn: — Baa si n wo pɛ tɔntɔraagiĩ kɛ nɛ biɛ ná a gɔn: «Zeruzalɛmu doamaa nɛ a goã kiwi lɛa kungɔn ná a ba a ganaa wa. A giala, minbuiin nɛn laanka tɔɔn mɛnɛn bɛ́ a nɛ, ǹ tá re mɔnɛɛ ǹ la yii ni.

⁹Dɛnaa Lawa a da ǹ boo á ke: Ma dinmaa á re goɛ̃ ma tan ka tɛ kungɔn bɛ́ lɔn kiwi lɛ lɛnpɛnɛ. Ma á re maa tɔ golebaa nyɛɛ kiwi lɛ bii.»

¹⁰Dɛnaa Lawa pɛ: «Haya, ka baa si, ka baa si. Ka soo ka n bɔ gɔsɛ a lɛ̀gɔn la gána kɛ nɛ, Dɛnaa Lawa a da ǹ boo ne. Kasɛn manɛ má ka pɛsɛ̃ kanaa gùrù sii tumaa ganaa. Dɛnaa Lawa a da ǹ boo ne.

¹¹Ka soo, Zeruzalɛmu minin lɛn, kasɛn mɛnɛn bɛ́ giã-n *Baabilonii, ka soo ka wo fufuu!»

¹²Dɛnaa Lawa Pàãyiidɛnaa a da ǹ boo á ke, asɛ mɛn dí gole wɔ ma gɔn, mà ma pɛ tɔrɔn kɛn manɛ ǹ nə́ ka kokoo: «Min woo min yoo ka gialaa, ǹ dɛnaa na á n gɔn sã masɛ din yii ni.

¹³Sonbore, man die yui tɔrɔn kɛn gialaa. Min mɛnɛn nə goã ǹ bɛ̀rɛn lɛa, bɛn tá re ǹ dɔn kokoe.» Bɛ̀ bɛ nə́ n zɛnaa, ka á re doɛ̃ ka bɛ nɛ, mà Dɛnaa Lawa Pàãyiidɛnaa na á ma dia.

¹⁴«N lɛ dɛ ka foo kɔɔ̃n nɛ, n nə n nyɛnyɛɛ, *Siɔn. Ma á ke die. Man die giɛ̃ ka bii. Dɛnaa Lawa a da ǹ boo ne.

¹⁵Bɛa pinaa kɛ nɛ, tɔrɔ gigiã á re n kiɛ kun ka masɛ Dɛnaa Lawa nɛ. Ǹ tá re maa zaman biɛ. Sɛnɛ man die giɛ̃ kasɛn bii.» Bɛ̀ bɛ nə́ n zɛnaa ǹ mɛn waáraa, ka á re doɛ̃ ka bɛ nɛ mà Dɛnaa Lawa Pàãyiidɛnaa na á ma dia ka li Lawa a boo gii-dali lɛa.

¹⁶Zudaa n die wusii a Dɛnaa Lawa wɔ baa gána kɛ nɛ a din wɔ lɛa. Zeruzalɛmu á re wusii doo a n baa kiwi lɛa, á bɔ á koa a din wɔ lɛa.

¹⁷Màn yiikoonaa tumaa nə n lɛ tã Dɛnaa Lawa nyɛɛnɛ. A giala, a yii kaa, a n soe a kion sonbore kɛ nɛ.