Read Samo, Southern Zak 3 Bible Online

Zak 3 - Samo, Southern bible

Zak 3

¹ Dɛnaa Lawa wúlu-bɔlen kiã Yesuwa nyaa ma nɛ. A n golee-n lon Dɛnaa Lawa a lon a dia dí-a wole lɛ yɔrɔ-a. *Sɛtaan, zɛ̀rɛ da ma la wole kɛ n golee-n Yesuwa gusin, a n die a zɛ̀rɛ biɛ.

² Dɛnaa Lawa pɛ zɛ̀rɛ da ma la wole lɛ nɛ: «Dɛnaa Lawa nə n lɛ tã, zɛ̀rɛ da ma la wole! Sonbore, á n lɛ tã, asɛ mɛn Zeruzalɛmu bɔ á koa! Yesuwa bie ka gɔn lɛkoro bɛ́ lɔn ǹ nə́ bɔ tɛ-n wa[2]?»

³Bɛ á zɛnɛɛ bɛ̀ Yesuwa n golee-n lon a dia dí-a wole lɛ yɔrɔ-a mɔnaa gɔgɔrɛn ná a ganaa.

⁴Min mɛnɛn bɛ́ kun ka lon a dia dí-a wole lɛ nɛ, á pɛ ǹ nɛ mà ǹ na a mɔnaa gɔgɔrɛn lɛn sɔlɔ. Á tɔn pɛ Yesuwa nɛ: «Ga, má n siɛ̃n lɛn bɔ má ǹ bɔ n ganaa. Ǹ tá re zɔ́n mɔnaan we n ganaa.»

⁵Á pɛ doo mà ǹ mɔnaa gɔn *yoreen yii Yesuwa mìi ganaa. Ǹ nə́ mɔnaa gɔn yoreen yii a mìi-a, ǹ nə́ mɔnaa yoreenən wɔ a ganaa Dɛnaa Lawa a lon a dia dí-a wole lɛ yɔrɔ-a.

⁶Bɛ kio, Dɛnaa Lawa a lon a dia dí-a wole lɛ pɛ Yesuwa nɛ:

⁷«Dɛnaa Lawa Pàãyiidɛnaa a lɛ kɔ goon nə́ ke: Ma bɛ́ boo mɛn pii n ni bɛ̀ n bɛ zɛnaa, bɛ̀ n kɔ maa dí-pɛn kɛn lɛ, n tá re maa kion lɛ a nyɛɛnaandɛnaa biɛ, ka a sumun dɔn nɛ. Min mɛnɛn bɛ́ maa dí nyɛɛ kànaa, man die n diɛ kun ka bɛn nɛ.

⁸ Yesuwa, n too kɔ, nsɛ mɛn bɛ́ Lawa a wúlu-bɔlen kiã lɛa, ka kasɛn kɛn dɔn nɛ kun ni Lawa a wúlu-bɔlen lɛa. A giala, sii mɛn bɛ́ re n zɛnɛɛ, kasɛn Lawa a wúlu-bɔlen kɛn tan nə bɛ giala pii. Á ke man die die ka maa dí-nyali ni, a tɔ n "da ten"[3].

⁹Man die kɔlɔ diɛ tán Yesuwa yɔrɔ-a. Bɛa kɔlɔ goon kɛ lɛ la, yii nàn sɔbaa n tɛ pii la. Ma dinmaa n die sɛ́wɔ kiɛ̃ la. Lɛawaa goon toto gɔ́ɔ̃ nɛ, man die gána kɛa sii baraan boe ma ǹ bɔ a ganaa. Masɛ Dɛnaa Lawa Pàãyiidɛnaa a da ǹ boo ne.

¹⁰ Bɛa pinaa lɛ nɛ, ka á re kɔn bíi kaa rezɛ̃ wurun ni ka kaa gɔ́rɔ dan giulun ni. Dɛnaa Lawa a da ǹ boo ne.»