Read Samo, Southern Zak 4 Bible Online

Zak 4 - Samo, Southern bible

Zak 4

¹Lon a dia dí-a wole mɛn lɛ da boo da ma nɛ, á wusoo á daa ma bũ ka min bɛ́ nyuù-n lɔn.

²Á nɔ̀n da ma la kɛnɛn: «N yii n wàa ganaa?» Má a lɛ si kɛnɛn: «Ma yii n bolon koa ǹ bǎã ganaa, sana lɛa. Nyɔɔ kaa ǹ bǎã na a ganaa a lon wɔlɔ-a. Bolon sɔbaa na a ganaa, tɛ sɔbaa n bolon lɛ a gogoonmaa ganaa.

³ *Olivie da màn paa n kunu nyɔɔ kaa ǹ bǎã lɛ li, goon nə gusin, goon nə gɔsɛ.»

⁴Lon a dia dí-a wole mɛn lɛ bɛ́ boo diɛ ma nɛ, má nɔ̀n da bɛ la kɛnɛn: «Kɛ n wàa giala pii, maa Dɛnaa?»

⁵Á ma lɛ si: «N ba bɛ doɛ̃ wa?» Má a lɛ si kɛnɛn: «Haayii, Dɛnaa.»

⁶ Á ma lɛ si á pɛ: Kɛ n Dɛnaa Lawa a boo lɛa Zorobabeli wɔ paǹ li. «Dí ke n gɔn, n din a foo tãbaa hinlaa n pàã kɛ bie die toɛ n boo la n nya wa, sɛnɛ, ma din yiri kɛ nɛ, Dɛnaa Lawa Pàãyiidɛnaa n pii miɛ̃.»

⁷Á pɛ doo: «Kele kaaraa[4] kɛ n die n sàabiɛ a ganaa? Zorobabeli, n tá re bɔyɛɛ n baa nyankɔrɔ basa lɛa. N tá re Lawa a kion a gòã daa ǹ kɔlɔ boe a nɛ. Minin tá re n lɛ dii, ǹ pɛ mà á siĩni, mà á siĩni.»

⁸Dɛnaa Lawa wusoo á kɛ pɛ ma-n doo:

⁹«Zorobabeli Lawa a kion lɛ gòã daa. A din dɔ n die nyɔmiɛ̃.» Bɛ̀ bɛ nə́ n zɛnaa ǹ mɛn waáraa, ka á re doɛ̃ ka bɛ nɛ mà Dɛnaa Lawa Pàãyiidɛnaa na á ma dia ka li.

¹⁰ Doa boɛɛn mɛn nə n wɔ sii giala kɔ waáraa, ka nyan zín bɔ bɛ-n wa. Zorobabeli bɛ́ re Lawa a kion lɛ a doe giala koe, ka doamaa-n ka n nyanyaa. «Bolon sɔbaa kɛ n goon ka Dɛnaa Lawa yiin ni. Maǹ giɛ tán tumaa walan.»

¹¹ Má nɔ̀n da la má pɛ: «Olivie dan kɛn bolon koa ǹ bǎã kɛa gusin ka a gɔsɛ, bɛn man wàa giala pii?»

¹²Má nɔ̀n da la doo: «Olivie da gɔn màn paan kɛn sana tiyoo màn paan kɛn genli, nyɔɔ yii lɔɔdɛnaa n baa sii ǹ ni, bɛn man wàa giala pii?»

¹³Á ma lɛ si kɛnɛn: «N ba bɛ doɛ̃ wa?» Má a lɛ si: «Haayii, maa Dɛnaa.»

¹⁴Á tɔn a giala pɛ ma-n kɛnɛn: «Giĩ màn paa mɛnɛn nə n bɔ, ǹ nə́ n koa tán tumaa a Dɛnaa a dí taman yii, bɛn manɛ.»