Read Samo, Southern Zak 5 Bible Online

Zak 5 - Samo, Southern bible

Zak 5

¹Má n yii saa lon doo, má sɛ́wɔ munii goon yɛ piɛ̃ li.

²Lon a dia dí-a wole lɛ nɔ̀n da ma la: «N yii n wàa ganaa?» Má a lɛ si kɛnɛn: «Ma yii n sɛ́wɔ munii ganaa piɛ̃ li. A sasabaa n mɛtərə fù a kununbaa n mɛtərə sooro.»

³Lon a dia dí-a wole lɛ tɔn pɛ ma-n kɛnɛn: — Lɛn baraa mɛn bɛ́ re n bíi gána tumaa li, bɛ lɛ n ka kɛ nɛ. Sɛ́wɔ munii lɛ a yɔrɔ goon la, a n kiɛ̃ nɛ mà wurumu tumaa n die n lui ǹ nə n bɔ gána lɛ nɛ. A yɔrɔ goon kɛ dɔ la, a n kiɛ̃ nɛ mà min mɛnɛn bɛ́ n liɛ soɛ la, mà ǹ tá re bɛn dɔn lui ǹ nə ǹ bɔ gána lɛ nɛ.

⁴Dɛnaa Lawa Pàãyiidɛnaa a da ǹ boo á ke: «Man má bɛa lɛn baraa kɛ bíi máa a wɔ wurumunun kion ka min mɛn tumaa bɛ́ n liɛ soɛ la ka masɛ tɔ nɛ. A n die goɛ̃ a tan, a màn tumaa ziziɛ̃, haalɛ kion a mɛnɛn dinin ka a kɔlɔn nɛ.»

⁵Lon a dia dí-a wole mɛn lɛ bɛ́ boo diɛ ma nɛ, á n zɔ̃ á dɔ á pɛ ma nɛ: «Bǐɛ̃ kɔ, n nə n yii saa lon, n ga màn kɛ ganaa bii-a.»

⁶Má nɔ̀n da la kɛnɛn: «Wàa n ka kɛ nɛ?» Á ma lɛ si: «Kakaa gole ne, a n die.» Á wusoo á pɛ ma-n kɛnɛn doo: «Gána lɛ a sii baraan tumaa na a nɛ.»

⁷Bɛa waáraa kəni, lɛ pii ke fɔlɔ bù lɛa koe ne màn lɛ lɛ, bɛ nə n lɛ bũ. Ma yii n lɔ ganaa giã-n tán kakaa lɛ gɔ́ɔ̃ nɛ.

⁸Lon a dia dí-a wole lɛ pɛ ma nɛ: «Lɔ kɛ lɛ n yii tá a ganaa, baraabaa nɛ.» Bɛ kio, á nɔɔ á da kakaa lɛ gɔ́ɔ̃ nɛ, á pìi kɔ lɛ.

⁹Ma tɔ nə n yii saa lon, bɛ̀ lɔ màn paa á ke die. Ǹ nyàan manə ǹ tan ka gɔgɔrɔ wɔn bɛ́ lɔn, piɛ̃ nə́ ǹ noɛ̃. Ǹ nə́ kakaa lɛ saa, ǹ nə́ woo-n lon laanka tán bii n ni.

¹⁰Lon a dia dí-a wole mɛn lɛ bɛ́ boo diɛ ma nɛ, má nɔ̀n da bɛ la kɛnɛn: «Maǹ woe ka kakaa lɛ-n maa?»

¹¹Á ma lɛ si: «Maǹ woe ne *Baabilonii. Walan, maǹ die kion doe a wɔ lɛa, ǹ doa tán walan yǎa duduu.»