Read Samo, Southern Zak 6 Bible Online

Zak 6 - Samo, Southern bible

Zak 6

¹Má n yii saa lon doo, ma yii n ziabaa ǹ wotoro sii ganaa. Maǹ kiɛ̃ kele màn paa bii n ni. Bɛa kelen lɛn man zan lɛa.

² Sùi tãtãn man wotoro bibinaa kɛ ganaa, sùi tìtìn man a paabaa ǹ wɔ kɛ ganaa,

³ sùi fufun man a sɔɔbaa ǹ wɔ ganaa, sùi tã bababan man a siibaa ǹ wɔ kɛ ganaa.

⁴Lon a dia dí-a wole mɛn lɛ bɛ́ boo diɛ ma nɛ, ma nɔ̀n da bɛ la kɛnɛn: «Maǹ wàa giala pii, maa Dɛnaa?»

⁵ Á ma lɛ si kɛnɛn: «Lon a piɛ̃ sii kɛ nɛ. Maǹ nə́ goã kunu tán tumaa a Dɛnaa li, kanna, maǹ woe.»

⁶Sùi tìtìn bɛ́ ziabaa ǹ wotoro mɛn baɛ̃, bɛ n woe gɔsɛ a lɛ̀gɔn la gána kɛ nɛ, sùi fufun nə́ ǹ kio. Sùi tã bababan man woe gusin a lɛ̀gɔn la gána kɛ nɛ.

⁷Sùi tãtãn kɛn man die, zoɛ̃ li ǹ nə kɔ tán tumaa lɛ ǹ ga a ganaa. Dɛnaa Lawa pɛ ǹ nɛ: «Ka wo kɔ tán lɛ ka ga a ganaa.» Maǹ nə́ zɛnaa miɛ̃ dɔn.

⁸Dɛnaa Lawa tɔn ma bii kəni á pɛ ma-n kɛnɛn: «Ga! Ǹ mɛnɛn bɛ́ woe gɔsɛ a lɛ̀gɔn la, maǹ woe ma yiri gisin walan.»

⁹Dɛnaa Lawa na á boo kɛ da ma nɛ á pɛ:

¹⁰«Wo bɛ̀rɛbaa ǹ bǎã wolen nə bǐɛ̃baa ǹ mànan mɛnɛn kɔ Ɛldayii laanka Tobia ka Yedayaa la, lɛ kɔ bɛn ganaa. Maǹ boe *Baabilonii ǹ nə́ daa. Pelo dinin, n tá re woe Sefania a nɛgiĩ Zozia li, ǹ dɔn nə goã ǹ nə́ woo maa lɛn.

¹¹Sana laanka wɔrɔ bɔ, n kii bafolo zɛnaa nɛ, n wɔ Zozadaaki a nɛgiĩ Lawa a wúlu-bɔle gole Yesuwa mìi ganaa.

¹² N pɛ-n kɛnɛn mà Dɛnaa Lawa Pàãyiidɛnaa n kɛ pii: Giĩ goon tan kanaa a tɔ n "Da ten". Á re gole koe. A din nə die wusii a maa kion lɛ dɔ.

¹³Sonbore, a din nə die Dɛnaa Lawa a kion lɛ doe. Á re kii dɔnkɛn we, a giã kii dankan la, a nyɛɛnaan bɔ. Lawa a wúlu-bɔle goon tá re giɛ̃ a genli, kii dankan la, ǹ tá re kɔn miɛ̃ parsiini.

¹⁴Kii bafolo lɛ n die goɛ̃ Dɛnaa Lawa a kion lɛ nɛ a minin yiri gisĩ Ɛldayii ni, Tobia ni ka Yedayaa nɛ ka Sefania a nɛgiĩ a bǐɛ̃ kɛ nɛ.»

¹⁵Min mɛnɛn wɔlɔ bɛ́ sɔsɔɔ, bɛn tá re die n doe Dɛnaa Lawa a kion lɛ a dɔlen lɛ. Ka bɛ-n kəni, ka á re doɛ̃ mà Dɛnaa Lawa Pàãyiidɛnaa na á masɛ Zakarii dia ka li Lawa a boo gii-dali lɛa. Bɛ n die yɔrɔ yii bɛ̀ kaa Dɛnaa Lawa ka Lawa bɔlɔ sii sonbore.