Read Samo, Southern Zak 8 Bible Online

Zak 8 - Samo, Southern bible

Zak 8

¹Dɛnaa Lawa Pàãyiidɛnaa boo da ma nɛ, á pɛ:

²«Dɛnaa Lawa bɛ́ boo mɛn pii á ke: Maa *Siɔn narɛ ǹ gɔn tá baraa taãn-taãnɛ. Bɛa kɔn-narɛɛ kɛ lɛ n kuĩ ma gɔ́ɔ̃ nɛ, ka tɛ bɛ́ lɔn.»

³Dɛnaa Lawa bɛ́ boo mɛn pii á ke: «Man wusii die Siɔn, hiĩ, man wusii giɛ̃ Zeruzalɛmu. Ǹ tá re Zeruzalɛmu bíi "kiwi bɔlɔgoondɛnaa", Dɛnaa Lawa Pàãyiidɛnaa a kele ke, ǹ tá re bɛ bíi "Kele sonbore".»

⁴Dɛnaa Lawa Pàãyiidɛnaa n kɛ pii: «Giĩ zizin laanka lɔ zizin tá re wusii doo ǹ da giã Zeruzalɛmu a bǎã dadaran nɛ, ǹ nə́ bàlà doɛ, ǹ zizi kɔ taman yii.

⁵Kiwi lɛ a bǎã dadaran tá re piɛ̃ ka nɛnyaanan nɛ, nɛgiĩ laanka nɛlɔn lɛa, sàn koe a nɛ.»

⁶Dɛnaa Lawa Pàãyiidɛnaa a da ǹ boo á ke: «Bɛ̀ bɛ á kaãbaa ǹ sii lɛa Izirayeli minin gialakunun kɛn yii li, a kaãbaa ǹ sii lɛa masɛ Dɛnaa Lawa Pàãyiidɛnaa yii li wa. Dɛnaa Lawa Pàãyiidɛnaa a da ǹ boo ne.

⁷Dɛnaa Lawa bɛ́ boo mɛn pii á ke: Taãn nɛ, má n pii, man die maa zaman lɛ kirisibiɛ ma bɔ-n lɛ̀nyɛɛn laanka lɛ̀giala gánan nɛ.

⁸Man die wusii ma da ǹ nɛ, màn mɛn bɛ́ toɛ ǹ giã Zeruzalɛmu. Ǹ tá re maa zaman biɛ, ma dɔ á re ǹ Lawa biɛ, Lawa pepere bɔlɔgoondɛnaa lɛa.»

⁹Dɛnaa Lawa bɛ́ boo mɛn pii á ke: Ka n foo taã. Ka bɛ́ boon mɛnɛn miɛ pelo, a din boon lɛn manɛ ka ǹ ma Lawa a boo gii-dalin lɛ-n Lawa a kion lɛ a gòã daa li a doe waáraa.

¹⁰Lɛlɛ, saraa goã minbuiin nɛn dí-n wa. Là goã tɔɔn dí dɔ-n wa. Zɔ́ɔn taman yii, yii-nyɛɛ goã zii tɔ wɔ-n wa. A giala, man má minbuiin nɛ tumaa yii soo kɔn-a.

¹¹Sɛnɛ, kanna, Dɛnaa Lawa Pàãyiidɛnaa a da ǹ boo á ke: Zaman kɛa min mɛnɛn yii goã koo, ma á re ǹ kuĩ ka lɛlɛ ǹ bɛ́ lɔn wa.

¹²Là nyantoro n die goɛ̃ a tan, *rezɛ̃ dan tá re nɛ koe, tán kɔsiɛ̃ mànan tá re bǐɛ̃ koe, pele á re koe. Maa zaman lɛ a min mɛnɛn yii goã koo, man die ǹ koe bɛn la kíɛ̃ lɛa.

¹³Zudaa laanka Izirayeli zaman, ka bɛ́ ka goã sii a kɔnboe lɛa, liɛ baraa we a paǹ li tɔrɔn bii, kanna kəni, man die ka kirisibiɛ ma barka da ka ganaa. Nyɛ́ɛ nyan ka kũ doo wa, ka n foo taã!

¹⁴Dɛnaa Lawa bɛ́ boo mɛn pii á ke: Ka digolon bɛ́ ǹ nə́ ma foo yoo, má golee goon la máa man die baraa zɛnɛɛ ka nɛ.

¹⁵Sɛnɛ, kanna, Zeruzalɛmu minin laanka Zudaa minin lɛn, má golee li máa man die bǐɛ̃ zɛnɛɛ ka nɛ. Nyɛ́ɛ nyan ka kũ wa.

¹⁶ Ka doamaa bɛ nɛ ka kɔ gɔn waa ǹ boon mɛnɛn lɛ, ǹ nə́ ke: Ka sonbore pɛ kɔn nɛ. Ka kiri pepere wɔ kiri wɔ ǹ bǎãn nɛ, ǹ mɛn bɛ́ là nyantoro koe.

¹⁷Ka nyan taasiɛ baraa wɔ kɔn a paǹ li wa. Ka nyan nə n liɛ soɛ la wa. Bɛa sii bɔbɔnɛɛn kɛn lɛn ba ma foo sii wa. Dɛnaa Lawa a da ǹ boo ne.

¹⁸Dɛnaa Lawa Pàãyiidɛnaa pɛ ma-n kɛnɛn:

¹⁹Ka bɛ́ nɛn bɛ̀ ka n lɛ sɔɔ lɛ̀ a mui siibaa ǹ wɔ kɛ li, a soorobaa ǹ wɔ nɛ, a sɔbaabaa ǹ wɔ nɛ ka a fùbaa ǹ wɔ nɛ, bɛn tá re n bɔyɛɛ ǹ zɔ́n lɛawaan baa, piɛ̃-n ka nyɛnyaa laanka foo kɔɔ̃n nɛ, Zudaa minin ganaa. «Sɛnɛ, ka sonbore laanka là nyantoro narɛ.»

²⁰Dɛnaa Lawa bɛ́ boo mɛn pii á ke: Taãn nɛ, tɔrɔ kɔsɔn ka kiwi gigiã minin tá re wusii doo ǹ da Zeruzalɛmu.

²¹Kiwi goon a minin tá re pii kiwi kɔsɔ wɔn manɛ: «Ka daa, wɔ n woe Dɛnaa Lawa Pàãyiidɛnaa nyankoe, wɔ ga li.» Ǹ tá re wɔ lɛ sii ǹ pɛ kɛnɛn: «Wɔ dɔn tá woe.»

²²Taãn nɛ, tɔrɔ gigiã pàãdɛnan tá re die Zeruzalɛmu, ǹ da ga ma li, ǹ ma nyankɔ.

²³Masɛ Dɛnaa Lawa Pàãyiidɛnaa n kɛ pii ka nɛ: Bɛa waáraa, tii tɔrɔ fù, ǹ tumaa n bɔlɔ totoro pii, bɛn tá re n gɔn parɛɛ *Zuifu min a mɔnaa lɛkoro ganaa, ǹ pɛ nɛ: «Wɔ n li wɔ wo kunun n ni. A giala, wɔ ma mà Lawa n kun ka nɛ.»