Read Samo, Southern Mal 1 Bible Online

Mal 1 - Samo, Southern bible

Mal 1

¹Dɛnaa Lawa boo mɛn da Malakii ni mà a pɛ Izirayeli minin manɛ, á ke:

² Dɛnaa Lawa pɛ a zaman nɛ: «Ma á ka narɛ.» Sɛnɛ, ǹ nə́ nɔ̀n da la: «Wàa n nyɛɛ mà n tá wɔ narɛ?» Dɛnaa Lawa nə́ ǹ lɛ si: — Ezawu bie á goã Zakɔba ǹ dɔɔ̃n lɛa wa? Sɛnɛ má Zakɔba narɛ,

³má Ezawu toa walan. Ezawu tɔrɔn nə goã kele yii mɛn nɛ, má bɛ ziziɛ̃, má gána lɛ kɔ diə gole a tolokan la.

⁴Bɛa minin kɛn lɛn tá re pii: Ǹ nə́ wɔ yɔyɔrɛ, sɛnɛ, wɔ n die wusii wɔ wɔa kiwi soen lɛn dɔ. Masɛ Dɛnaa Lawa Pàãyiidɛnaa, man kɛ pii: Ka wusoo ka dɔ, man die kaa dí lɛ ziziɛ̃. Ǹ tá re tɔ kɛ koe a ganaa: «Gána mɛn bɛ́ sii baraa na á nɛ» ká «zaman mɛn bɛ́ Dɛnaa Lawa foo n yoo-n li biikoo yii li».

⁵Kasɛn Izirayeli minin ka á re bɛ tumaa yii, ka á re pii: «Dɛnaa Lawa nə́ n pàã nyaa á Izirayeli gána a gèlè la bɔ nɛ.»

⁶Masɛ Dɛnaa Lawa Pàãyiidɛnaa n kɛ pii Lawa a wúlu-bɔlen manɛ: Nɛ na a díi guguru koe, dí-nyali na a miilandɛnaa guguru koe. Ma din bie kaa díi lɛa man ka miilandɛnaa dɔ lɛa wa? Sɛnɛ wàa na á baa kaa ma lɛ sii, kaa ma guguru koe wa, ka n ma pɔpɔsɛ ka n nɔ̀n diɛ: «Wɔ n wɔ́ n pɔpɔsɛ ka wàa nɛ?»

⁷Man-biin mɛnɛn bɛ ǹ kɔnbɔ ka masɛ-n wa, ka n die ka bɛ nɛ maa *wúlu bɔ ǹ bǎã kɛ nɛ ka n pii: «Wɔ n wɔ́ sã n yii gugurubaa ganaa ka wàa nɛ? Asɛ n ka a maa wúlu bɔ ǹ bǎã lɛ yii puusə koe!»

⁸ Bɛ̀ ka daa tɔɔ yii tere-a nɛ, tɔɔ mɛn bɛ gisiĩ hinlaa tɔɔ bɔlɔka kɔ ma la *wúlu màn lɛa ka n taasɛ mà á siĩni? Bɛ̀ ka bɛa tɔɔ kɛ lɛ miã kɔ kaa gánadɛnaa la, ka á taasɛ mà a foo á re kɔɔ̃n koe a lɛ kɔ a sii zɛnaa kaa lɛa? Man nɔ̀n diɛ ka la masɛ Dɛnaa Lawa Pàãyiidɛnaa.

⁹Kanna ka n doa ka ma nyankɔ, masɛ, kaa Lawa, ń giɛ maa zaman lɛ makara á ma kuĩ. Ka n taasɛ mà ma á re n too koe ka lon sonbɔraanɛ kaa sii zɛnaa kɛ kio. Bɛ a yɔrɔ yii wa.

¹⁰Bɛ̀ kaa min goon na á woo Lawa a kion kɛa kiɛnlɛn tã á soɛ. Ka a re woe tɛ koɛ wúlu bɔ ǹ bǎã kɛ-n kooro wa. A bɛ miɛ̃ kaa yɛ ka ma yiin din ba foo kɔɔ̃n goon din lɛa ma ganaa wa, ka bɛ́ wúlu bɔ ǹ mànan mɛnɛn dɔn koe ma la, man pii ka nɛ, ma ba ǹ li wa, masɛ Dɛnaa Lawa Pàãyiidɛnaa mà miɛ̃.

¹¹A saa lɛ̀giala ganaa a wo lɛ̀nyɛɛn yaa, tɔrɔ tumaa n maa golebaa doɛ̃, maǹ màn giĩ kɔɔ̃n tiɛ̃ bǎã tumaa nɛ ka ma tɔ nɛ, wúlu màn mɛn bɛ́ kɔnboe ka ma nɛ, ǹ nə́ die ka bɛ nɛ. Hiĩ! Tɔrɔ tumaa n maa golebaa doɛ̃, man pii ka nɛ masɛ, Dɛnaa Lawa Pàãyiidɛnaa.

¹²Sɛnɛ kasɛn, ka n ma tɔ kuĩ ka n taasɛ ka yiri ni mà maa wúlu bɔ ǹ bǎã lɛ a gɔgɔrɛ mà ǹ tá boe la ǹ da màn tɔrɔ tumaa kɔ ma la.

¹³Ka n pii dinin: «Kɛa nɔmaa lɛa.» Ka masɛ Dɛnaa Lawa Pàãyiidɛnaa da ka gɔn dɔ̀ɔ̃ nɛ. Ka tɔɔn mɛnɛn koã, ǹ mɛnɛn bɛ́ gisiĩ ka á bɔlɔkan nɛ ka n bɛn koe masɛ la. Man siɛ lɔn ma tɔn bɛa wúlu màn kɛ miã si? Man nɔ̀n diɛ ka la.

¹⁴Koe n die boe koɛɛ̃n-wɔle ganaa, ǹ mɛn bɛ́ tɔɔ kaka ná a tɔɔn bii, a lɛ-kɔ taman yii á tɔɔ wɔ̀lɔ̀dɛnaa kuĩ die koe ma la wúlu màn lɛa. Koe bɔ bɛ-a, a giala mà man kii gole lɛa tɔrɔ tumaa n nyɛ́ɛ biɛ ma pàã nɛ. Masɛ Dɛnaa Lawa Pàãyiidɛnaa n kɛ pii.