Read Samo, Southern Mat 15 Bible Online

Mat 15 - Samo, Southern bible

Mat 15

¹*Fariziɛ̃n kɔnɔn laanka landa sii-daraalin kɔnɔn nə́ n toa Zeruzalɛmu, ǹ nə́ daa nɔ̀n da Yezu la:

²«Wɔsɛn digolon nə landa mɛn koa, wàa na á baa nsɛ a kialandɛnan ba bɛ tamaɛ wa? Ka a n gɔn pii ká landa bɛ́ pii lɔn, bɛ̀ ka tɔn màn bii wa.»

³Yezu tɔ́n pɛ ǹ nɛ: — Kasɛn dɔn, wàa na á baa ka tá Lawa a dí-pɛ ziziɛ̃ ka ka dinin landa siin ni?

⁴ Táa Lawa pɛ: «N díi laanka n náa guguru kɔ,» hinlaa «bɛ̀ min boo baraa da ǹ di-a hinlaa ǹ dan ganaa, ǹ doamaa nɛ ǹ bɛ dɛ a gã.»

⁵Sɛnɛ, kasɛn man pii mà bɛ̀ min pɛ ǹ di-n hinlaa ǹ dan nɛ mà asɛ doamaa bɛ́ nɛ a n dɔ lɛ ka màn mɛn nɛ, mà asɛ n die Lawa goe ka bɛ nɛ,

⁶bɛa dɛnaa kɛ laadoo ba a ganaa doo, a ǹ di guguru kɔ ka màn nɛ wa. Ka ǹ Lawa a boo sàabiɛ kɛnɛn lɛn ka dinin landan lɛa!

⁷Gɔ́ɔ̃ tì-an kɛn! Sonbore tá Izayii lon, bɛ̀ a bɛ́ á pɛ kaa wɔ gɔn la kɛnɛn:

⁸ Lawa pɛ: «Minin kɛn man ma guguru koe ka ǹ lɛ nɛ, sɛnɛ, ǹ gɔ́ɔ̃ wɔlɔ á lui-n ma ganaa.

⁹Maǹ ma guguru koe kooro, a giala, maǹ minbuiinin dí-pɛn siɛ ǹ tá ǹ biɛ Lawa a dí-pɛn lɛa, bɛ̀ ǹ minin daraa ǹ ganaa.»

¹⁰Bɛ kio, Yezu lɛ dia zaman lɛ la, á pɛ ǹ nɛ: «Ka n too kɔ ka kɛ giala ma:

¹¹Màn mɛn bɛ́ we minbuiin nɛ lɛ-n, bɛ bie a gɔgɔrɛ koe wa. Sɛnɛ, màn mɛn bɛ́ boe a lɛ-n, bɛ lɛ na a gɔgɔrɛ koe.»

¹²Yezu a kialandɛnan nə́ n zɔ̃ ǹ nə́ dɔ a li, ǹ nə́ pɛ nɛ: «N boo da ǹ gɔn kɛ lɛ kɛnɛn, n tá doɛ̃ mà á Fariziɛ̃n lɛn foo busu?»

¹³Yezu tɔ́n pɛ ǹ nɛ: «Da mɛn tumaa bɛ́ masɛ Di Lawa ná a zumu wa, bɛ tumaa á die n wɛɛ̃.

¹⁴ Ka ǹ toa walan. Maǹ yii tere-an lɛa yii tere-an bàlà kuĩ! Bɛ̀ yii tere-a nə́ ǹ miã yii tere-a a bàlà kũ, ǹ dinin paanan tá re boe ǹ kaa nyankɔrɔ nɛ.»

¹⁵Piɛrɛ tɔ́n pɛ nɛ: «Boo giməə kɛ giala pɛ wɔsɛn manɛ.»

¹⁶Yezu pɛ: «Haalɛ tɔn pelo, ka dɔn ba tɔn boo giala miɛ wa?

¹⁷Ka a doɛ̃ mà màn mɛn din tumaa bɛ́ we minbuiin nɛ lɛ-n, mà a n woe a gɔ́ɔ̃ nɛ, bɛ kio a tɔn soo goɛ̀rɛ lɛa wa?

¹⁸ Sɛnɛ, màn mɛn bɛ́ soe lɛ-n, bɛ lɛ n boe foo ne, bɛ lɛ dɔ n minbuiin nɛ gɔgɔrɛ koe.

¹⁹A giala, taasiɛ naarɛn lɛn man boe a foo ne, bɛn lɛn man diɛ gɛ̀ dɛ ganaa, ka naarɛbaa nɛ, ka kɔrɔbaa nɛ, ka wurumubaa nɛ, ka soɛ-bɔ nɛ, ka min kɔsɔ tɔ ziziɛ̃ nɛ.

²⁰Siin mɛnɛn bɛ́ min gɔgɔrɛ koe, bɛn lɛn man ka bɛn nɛ! Sɛnɛ, màn bii bɛ̀ n nə́ n nə n gɔn pii ka landa bɛ́ pii lɔn wa, bɛa min gɔgɔrɛ koe wa.»

²¹Bɛ kio, Yezu kiɛ̃ á n bɔ walan á woo bǎã kɔ́n nɛ, kunu Tiiri kiwi laanka Sidɔn kiwi ganaa.

²²Kanaan lɔ goon dɔ goã giã-n walan, á daa Yezu li á n lɛ dɛ a ganaa: «Mìinaa, kii Davida tɔrɔ, makara bɔ masɛ ganaa! Nɔ̀ɔnɔn man maa nɛlɔ ganaa, a giã ǹ gɔn ba siĩn duduu wa!»

²³Sɛnɛ, Yezu nə n lɛ da lɛ wa. A kialandɛnan nə́ n zɔ̃ ǹ nə́ dɔ a li, ǹ ná a nyankɔ mà a pɛ lɔ lɛ nɛ mà a woo, á n bɔ ǹsɛn kio ka bɛa lɛ-dɛ kɛ-n miɛ̃.

²⁴Yezu tɔ́n pɛ: «Izirayeli minin mɛnɛn bɛ́ ǹ nə́ papaã ka sèren bɛ́ lɔn, Lawa na á ma dia bɛn lɛn dininsɔɔ̃nɔn li.»

²⁵Lɔ lɛ nɔmaa á daa kaa tán-a a giulun, á pɛ: «Mìinaa, n dɔ masɛ lɛ!»

²⁶Yezu tɔ́n pɛ: «A ba siĩni min nə nɛnyaanan màn-bii saa a kɔ gin tienən ma la wa.»

²⁷Lɔ lɛ tɔ́n pɛ: «Mìinaa, sonbore ne, sɛnɛ, màn-bii bisin mɛn bɛ́ kiɛ tán-a, gindɛnaa a gin tienən tá bɛ goɛ ǹ bii sɛn.»

²⁸Yezu tɔ́n pɛ nɛ: «E, lɔ lɛɛ, n golee Lawa li á gole! N bɛ́ giɛ màn mɛn li, bɛ á die n zɛnɛɛ n nɛ.» A din biikoo li gɔrɔ, a nɛlɔ lɛ a busu nya.

²⁹Yezu kiɛ̃ á n bɔ walan á woo Galilee tà lɛ-a. Á dii kele goon la, á giã tán-a.

³⁰Zaman gigiã daa a li ka gɔ̃naan nɛ, yii tere-an nɛ, wɔ̀lɔ̀dɛnan nɛ, lɛ tere-an nɛ, ka busulə tɔrɔ gigiã kɔsɔn nɛ. Ǹ nə́ ǹ kaa tán-a Yezu giulun, á ǹ kaka kɔ.

³¹Minin bɛ́ ǹ nə́ lɛ tere-an yɛ boo diɛ, ǹ bɛ́ ǹ nə́ wɔ̀lɔ̀dɛnan yɛ ǹ nə́ kaka kɔ, gɔ̃naan nə́ tɔ we telee ne, yii tere-an yii n wɔlɔ yii, ǹ nə́ n kaãbaa parsiini, ǹ ná a giala kɔ ǹ nə́ Izirayeli minin Lawa guguru kɔ.

³²Yezu ná a kialandɛnan bíi, á pɛ ǹ nɛ: «Minin kɛn makara á boe masɛ ganaa, a giala ǹ lɛawaa sɔɔ n ke kun ka masɛ nɛ, sɛnɛ, màn kɔ́n banban doo ǹ tá re bii wa. Ma ba li ma ǹ toa ǹ wo ka ǹ gɔ́ɔ̃ kooro-n wa, ǹ tá re kerekaɛ̃ zii la.»

³³A kialandɛnan nə́ nɔ̀n da la: «Wɔ n die boe ka màn-bii-n maa, wɔ zaman kɛ miã too ne don kɛ nɛ?»

³⁴Yezu tɔ́n nɔ̀n da ǹ la: «Buuru mìi gia n ka lon?» Ǹ nə́ tɔ́n pɛ: «Sɔbaa, ka zɔ̀ bisin kɔ́n nɛ.»

³⁵Yezu tɔ́n pɛ zaman lɛ nɛ, mà ǹ giã tán.

³⁶Bɛ kio, á buuru sɔbaa lɛ laanka zɔ̀ lɛ goa, á barka da Lawa nɛ, á ǹ yiyiɛ kɔn, á ǹ kɔ a kialandɛnan ma la, ǹ nə́ gii zaman lɛ nɛ.

³⁷Didie màn bii á kã. Màn-bii gialakun mɛn nə goã, a kialandɛnan nə́ goa ǹ nə́ kaa kankaan sɔbaa piɛ̃, ǹ nə́ woo ne.

³⁸Min mɛnɛn nə sɔ̃, giĩ duu sii (4 000) ni, lɔn laanka nɛnyaanan gòɛ̃ ná a ba a-n wa.

³⁹Yezu bɛ́ á zaman lɛ toa á woo ǹ mɛn waáraa, a din wɔ tà kuru ǹ goo ne, á woo Magadan gána nɛ.