Read Samo, Southern Mat 16 Bible Online

Mat 16 - Samo, Southern bible

Mat 16

¹ *Fariziɛ̃n laanka *Sadusɛɛ̃n nə́ n zɔ̃ ǹ nə́ dɔ Yezu li. Ǹ bɛ́ giɛ ma ǹ nə n da a gɔ́ɔ̃ li, ǹ nə́ nɔ̀n da la, mà a nyaa ǹsɛn manɛ ka kaãbaa ǹ sii ni, mà a pàã lɛ n boe Lawa li.

²Yezu tɔ́n pɛ ǹ nɛ: «Bɛ̀ wasa á re n yii siɛ̃, ka n pii mà wɔlɔ á re goɛ̃ siĩni, a giala labara n tã.

³Baayɛlɛ yiisoone, ka n pii, mà la á re die pelo, a giala labara n tã birəə ne. Ka n lon gɔ̀nɔn doɛ̃, sɛnɛ, biikoon sii a kɔnboen kɛn, ka a bɛn doɛ̃ wa!

⁴ Pelo min babaraan, Lawa bɔlɔ tii wolen kɛn ka n giɛ kaãbaa ǹ sii li! Kaãbaa ǹ sii kɔ́n ba re n nyɛɛ ka nɛ, a kiɛ̃ Lawa a boo gii-dali Zonaasi wɔ kɛ la wa. Bɛ kio, á kiɛ̃ á ǹ toa walan.»

⁵A kialandɛnan lɛn yiri bɔ ǹ buuru saa wa. Ǹ bɛ́ kiɛ̃ tà kio,

⁶ Yezu tɔ́n pɛ ǹ nɛ: «Haya, ka n parabaa Fariziɛ̃n ǹ yɔ bù ganaa, ka n parabaa Sadusɛɛ̃n ǹ yɔ bù ganaa!»

⁷Ǹsɛn man nə́ goã taasɛ, mà ǹ bɛ́ ǹ buuru saa wa, mà bɛ lɛ na á toa, a tá pii miɛ̃.

⁸Sɛnɛ, Yezu bɔ a siére-a, á tɔ́n pɛ ǹ nɛ: «Wàa na á baa ka á taasɛ mà masɛ n kaa buuru támalonbaã boo diɛ. Kaa golee Lawa li á kiɛɛrɛ dɛ!

⁹ Ka a tɔn boo giala miɛ wa? Masɛ bɛ́ má buuru sooro lɛ yiyiɛ kɔn-a má kɔ minbuiin duu sooro (5 000) la, ka n ká a gialakun lɛ kaa kankaan gia nɛ ka woo ne? Ka yiri ba a-n wa?

¹⁰ Buuru sɔbaa lɛ má yiyiɛ kɔn-a, má kɔ minbuiin duu sii (4 000) la, ka n ká a gialakun lɛ kaa kankaan gia nɛ ka woo ne? Ka yiri ba bɛ dɔ-n wa koɛ?

¹¹Ma bɛ́ má pɛ ka nɛ, máa ka n parabaa Fariziɛ̃n laanka Sadusɛɛ̃n ǹ yɔ bù ganaa, wàa na á baa ka a giala ma mà buuru boo bie masɛ a diɛ ka nɛ wa!»

¹²Bɛa biikoo li, ǹ ná a giala ma, mà a n boo diɛ Fariziɛ̃n laanka Sadusɛɛ̃n yiri baraa kɔ minin la wɔ gɔn la, mà a bie á pɛ mà ǹsɛn nə n parabaa ka buuru zɛnaa ǹ yɔ bù-n wa.

¹³Filipi Sezaaree kiwi mɛn koa, Yezu bɛ́ á dɔ walan, á nɔ̀n da a kialandɛnan lɛn la, á pɛ: «Minin man pii mà Min a Nɛgiĩ lɛ n die lɛa?»

¹⁴ Ǹ nə́ tɔ́n pɛ: «Min tɛn mà Zaã, *batɛmu-dali ni, ǹ tɛn mà Lawa a boo gii-dali gole Yilii ni, ǹ tɛn dɔ n pii doo, mà Lawa a boo gii-dali Zeremii ni hinlaa Lawa a boo gii-dali kɛ lɛ kɔ́n nɛ.»

¹⁵Á tɔ́n pɛ ǹ nɛ: «Ka dininmaan kɛn lɛn man pii mà masɛ n die lɛa?»

¹⁶ Simɔn mɛn tɔ bɛ́ Piɛrɛ, bɛ tɔ́n nə n toa: «Ma n Minin Nyin-sili lɛa, Lawa bɛ́ a pɛ mà asɛ á re ǹ mɛn lɛ diɛ, ma n Lawa yiikoonaa a Nɛ lɛa.»

¹⁷Yezu tɔ́n pɛ a dɔ nɛ: — Zonaasi a nɛgiĩ Simɔn ganaa, n wɔ na á bǐɛ̃ kɔ. A giala minbuiin nɛ bie á kɛ nyaa n nɛ wa, ma Di Lawa na á nyaa n nɛ.

¹⁸Bɛ lɛ taman yii, man pii n dɔ Piɛrɛ nɛ: «Ma n Piɛrɛ lɛa (bɛ giala mà gɛ̀taã). Masɛ n die maa sɔmɔ giala koɛ bɛa gɛtaã lɛ la. Haalɛ gɛ̀ din ba re màn kɔ́n zɛnɛɛ a minin man wa.

¹⁹ Ma á die lon a kiibaa ǹ bǎã lɛ a goo nɛn koe n la. Bɛ̀ n nə́ n piã ka sii mɛn tumaa-n tán, Lawa dɔ á die n piɛ̃ ka bɛ nɛ, bɛ̀ n lɛ kɔ sii mɛn tumaa ganaa tán, Lawa dɔ á die lɛ koe bɛ ganaa.»

²⁰Bɛ kio, Yezu nə́ n gɔn waa a kialandɛnan manɛ mà ǹ nyan toa ǹ pɛ min kɔ́n yii ni, mà asɛ n Minin Nyin-sili lɛa wa.

²¹A saa bɛa biikoo lɛ ganaa, Yezu ná a giala kɔ á nyaa a kialandɛnan manɛ ka a fubaa nɛ, á pɛ: «Masɛ doamaa nɛ ma wo Zeruzalɛmu, ma nɔmaa Zuifun sii yɔrɔ-bɔlen gɔn parsiini: ǹ goledɛnan nɛ, ǹ Lawa a wúlu-bɔlen goledɛnan nɛ ka ǹ landa sii-daraalin ni. Ǹ tá re ma dii, maa gɛ̀ lɛawaa sɔɔ, ma yii á die kiɛ.»

²²Piɛrɛ kũ á soo-n tiãlɛa, á yoo a gialaa: «Dɛnaa, Lawa nə n kanbaa bɛ ganaa! Aba, bɛa re n yii wa!»

²³Yezu tɔ́n nə n bɔyaa á pɛ Piɛrɛ nɛ: «N *Sɛtaan kɛ nə n tan n nə n bɔ masɛ kio! Masɛ sã ǹ gɔn nə ke n tá giɛ li. A giala, n taasiɛ laanka Lawa wɔ a goon wa, minbuiinin taasiɛ nə n lon.»

²⁴ Bɛ kio, Yezu pɛ a kialandɛnan manɛ: «Bɛ̀ min mɛn tá li a kɔ masɛ kio lɛ, yǎa bɛa dɛnaa nə n yiri boe a din ganaa, a nɔmaa sii a ganaa, a kɔ masɛ lɛ.

²⁵ A giala, min mɛn bɛ́ giɛ a din nyin li, bɛa dɛnaa nyin tá re nyɛɛ. Sɛnɛ, min mɛn nyin bɛ́ re nyɛɛ masɛ taman yii, bɛa dɛnaa nyin tá re goɛ̃.

²⁶A là n ka wàa nɛ min kanaa gɔn màn tumaa yɛ, a din nyin wusoo a papaã. Hinlaa bɛ̀ min mɛn nyin papaã, ǹ dɛnaa n die wàa koe Lawa la a tɔn wusoo a yɛ?

²⁷ A giala, Min a Nɛgiĩ tá re die ka ǹ Di a gugurubaa kɛ nɛ kun ka lon a dia dí-a wolen ne. Bɛa biikoo li ma á re didie sarɛɛ a kɔnpɛ ka a nya ǹ dí ni.

²⁸Masɛ n pii ka nɛ, sonbore, kasɛn mɛnɛn bɛ́ kànaa, ka tɛnɛn yii á die Min a Nɛgiĩ yii die kii lɛa ka tɔn gã.»