Read Samo, Southern Mat 23 Bible Online

Mat 23 - Samo, Southern bible

Mat 23

¹Bɛ kio, Yezu pɛ zaman laanka a kialandɛnan manɛ:

²«Minin daraa Muizu a Landa siin ganaa na á n baa landa sii-daraalin laanka *Fariziɛ̃n dí lɛa.

³Bɛ lɛ taman yii, ǹ bɛ́ boo mɛn tumaa pii ka nɛ, ka ǹ bɔlɔ si ka zɛnaa miɛ̃. Sɛnɛ, nyan ka toa ka kɔ ǹ zɛnaa ǹ siin lɛ wa. A giala, ǹ bɛ́ màn mɛn pii, ǹ dinin ba koe bɛ lɛ wa.

⁴Maǹ guĩ gugurun yii bɛ̀ ǹ da tán mà minin nə saa, sɛnɛ, ǹ dininmaan ba lɛ koe ǹ nə n gɔn da li, ǹ nə ǹ yu-n wa.

⁵ Ǹ zɛnaa ǹ siin dinin tumaa n din nyaa sii lɛa. Bɛ lɛ na á toa, bɛ̀ ǹ Lawa a boo bǎãn kɔnɔn kiɛ̃, bɛ̀ ǹ kìri dadaran zumu ǹ ganaa a tɔ-a, bɛ̀ ǹ wɔ ǹ mìi-a hinlaa ǹ gɔn ganaa, pàsa mɛn bɛ́ ǹ tá kiɛ ǹ mɔnaa lɛkoron ganaa, bɛn man sɔsɔrɔ taãn-taãnɛ.

⁶Màn-bii dadara bǎãn nɛ, giã ǹ bǎã sonboren man kɔɔ̃nɛ ǹ ganaa. Lɛsɔkɔn kion, giã nyɛɛn nə kɔɔ̃nɛ ǹ ganaa.

⁷Maǹ giɛ li minin nə guguru kɔ ǹ fòo da ǹsɛn manɛ zaman bǎãn nɛ, ǹ nə ǹsɛn bíi "mìinaa".

⁸Sɛnɛ, kasɛn baran toa minin nə́ ka bíi "mìinaa" wa. A giala, ka dinin tumaa n goon, kɔn dɔɔ̃nɔn lɛa, Mìinaa goon toto dinsɔɔ̃ n ka lon.

⁹Ka nyan toa ka min baa gole tán kɛ la, ka bíi "Díi" wa. A giala Díi goon toto dinsɔɔ̃ n ka lon, bɛ n ka Lon a Lawa nɛ.

¹⁰Ka nyan toa dɔn minin nə ka bíi "Goledɛnaa" wa, a giala, kaa Goledɛnaa n ka Krita Minin Nyin-sili dinsɔɔ̃ nɛ.

¹¹ Min mɛn bɛ́ gole ka bii, bɛ doamaa nɛ a n baa ǹ miãn dí-nyali lɛa.

¹² Min mɛn bɛ́ n din gole koe, bɛa dɛnaa n die kiɛɛrɛ koe. Min mɛn bɛ́ n din kiɛɛrɛ koe, bɛa dɛnaa á die golebaa yii.»

¹³Yezu tɔ́n pɛ: — Kasɛn landa sii-daraalin laanka Fariziɛ̃ gɔ́ɔ̃ tì-an kɛn, bɔ̀n na á ka yɛ! Ka n lon a kiibaa ǹ bǎã lɛ a wɔ ǹ kiɛnlɛ tiɛ̃ minin ganaa. Ka dinin ba we wa, min mɛnɛn bɛ́ li ǹ wɔ, ka a toɛ bɛn dɔn tá we wa! [

¹⁴Kasɛn landa sii-daraalin laanka Fariziɛ̃ gɔ́ɔ̃ tì-an kɛn, kaa wɔ n ka bɔ̀n nɛ! Ka n mɛnɛɛ lɔ giɔɔrɔn la ka tá ǹ gɔn màn yii sii ǹ la, bɛ̀ ka wusoo ka wo Lawa nyankɔ ka belebɔ la, ka ka sii zɛnaa wa. Bɛ lɛ taman yii, Lawa á die dɔlɔ gole boe ka ganaa.]

¹⁵Kasɛn landa sii-daraalin laanka Fariziɛ̃ gɔ́ɔ̃ tì-an kɛn, kaa wɔ n ka bɔ̀n nɛ! Ka nə n gɔ̀nɔn diɛ ka dinin ganaa, bɛ̀ ka n bibiə̃ gánan gɔ́ɔ̃ nɛ, mà kasɛn nə min goon dinsɔɔ̃ yɛ ka da Zuifun Lawa a zii ni. Bɛ̀ ka gɔn dɔ a ganaa, ka n wusii ka bɛa dɛnaa baa *Sɛtaan a piɛ min lɛa á la ka dinin manɛ gunyin paa.

¹⁶Kasɛn nyɛɛnaan sabɔle yii tere-an kɛn, kaa wɔ n ka bɔ̀n nɛ! Ka n pii: «Bɛ̀ min nə́ n liɛ ka Lawa a kion ne, bɛa sii lɛa wa, sɛnɛ, bɛ̀ min mɛn nə́ n liɛ ka Lawa a kion a sana nɛ, bɛa dɛnaa parsii ni.»

¹⁷Baãnaa yii tere-an kɛn! Ǹ mɛn a sii n kaka? Sana lɛ sɛ-n hinlaa Lawa a kion mɛn bɛ́ sana lɛ biɛ Lawa a màn lɛa a gɔrɔn?

¹⁸Ka n pii dɔn: Bɛ̀ min mɛn nə́ n liɛ ka *wúlu bɔ ǹ bǎã nɛ, bɛa sii lɛa wa, sɛnɛ, *wúlu màn mɛn bɛ́ a lalan, bɛ̀ min mɛn nə́ n liɛ ka bɛ nɛ, bɛa dɛnaa parsii ni.

¹⁹Yii tere-an lɛn! Ǹ mɛn a sii n kaka? Wúlu màn lɛ sɛ-n hinlaa, a bɔ ǹ bǎã mɛn bɛ́ biɛ Lawa a màn lɛa a gɔrɔn?

²⁰Bɛ lɛ nɛ, bɛ̀ min mɛn nə́ n liɛ ka Lawa a wúlu bɔ ǹ bǎã nɛ, wúlu màn mɛn bɛ́ a lalan ǹ dɛnaa na á n liɛ ka bɛ lɛ dɔ nɛ.

²¹Bɛ̀ min mɛn nə́ n liɛ ka Lawa a kion ne, Lawa mɛn bɛ́ giɛ̃ a gɔ́ɔ̃ nɛ, a na á n liɛ ka bɛ lɛ dɔ nɛ.

²² Bɛ̀ min mɛn nə́ n liɛ ka lon ne, bɛa dɛnaa na á n liɛ ka Lawa a kii dankan nɛ, Lawa dinmaa mɛn bɛ́ giã-n la, a na á n liɛ ka bɛ lɛ dɔ nɛ.

²³ Kasɛn landa sii-daraalin laanka Fariziɛ̃ gɔ́ɔ̃ tì-an kɛn, kaa wɔ n ka bɔ̀n nɛ! Ka n Lawa wɔ gii boe ka dù luu buruu bisin tumaa nɛ. Sɛnɛ, Lawa a dí-pɛn lɛn mɛnɛn dinin sii bɛ́ kaka, ka peperebaa á ke lɔn, ka makara bɔ min ganaa laanka bɔlɔgoondɛnaabaa nɛ, ka a bɛn diɛ sii li wa. Bɛ̀ ka doamaa nɛ, ka bɛn lɛn zɛnaa, a ná a ba gialakun kɛ lɛ dɔ sàabiɛ wa.

²⁴Nyɛɛnaan sabɔle yii tere-an kɛn! Ka n kaa mi ǹ mu sɔlɛɛ bɛ̀ ka nyuun bɔ li, sɛnɛ, ka n wusii bɛ̀ ka nyɔɔmaa mui!

²⁵Kasɛn landa sii-daraalin laanka Fariziɛ̃ gɔ́ɔ̃ tì-an kɛn, kaa wɔ n ka bɔ̀n nɛ! Ka n paan laanka kunun dɔ̀ɔ̃ pii mà ǹ *yoreen kɔ. Sɛnɛ, ǹ piɛ̃maa-n ka mɛnaa minin la ǹ mànan laanka taasiɛ babaraan nɛ.

²⁶Fariziɛ̃ yii tere-an kɛn! Ka paan lɛ gɔ́ɔ̃ pii bɔrɔ, a dɔ̀ɔ̃ lɛ dɔ á die boe.

²⁷ Kasɛn landa sii-daraalin laanka Fariziɛ̃ gɔ́ɔ̃ tì-an kɛn, kaa wɔ n ka bɔ̀n nɛ! Gere yalan mɛnɛn lalan bɛ́ fu, ka n goon ka bɛn nɛ. Ǹ tá siĩn yɔrɔ-a, sɛnɛ, ǹ gɔ́ɔ̃ piɛ̃maa-n ka gere wen laanka màn bɔnɛɛ tɔrɔ din tumaa nɛ.

²⁸Ka dɔn man miɛ̃. Ka nə n dinin biɛ min sonboren lɛa minin yɔrɔ-a, sɛnɛ, ka gɔ́ɔ̃ piɛ̃maa-n ka sii-duriin laanka sii baraan nɛ.

²⁹Kasɛn landa sii-daraalin laanka Fariziɛ̃ gɔ́ɔ̃ tì-an kɛn, kaa wɔ n ka bɔ̀n nɛ! Ka digolon nə Lawa a boo gii-dalin mɛnɛn dɛ, kasɛn man bɛn yala lalan doe sɔnbɔraanɛ. Ka Lawa bɔlɔ-silin mɛnɛn dɛ, ka ǹ nyaǹ kiɛ bɛn yalan ganaa.

³⁰Ka n wusii pii doo: «Bɛ̀ wɔsɛn man wɔ tan wɔ digolon wɔa biikoo li, wɔsɛn ba n gòɛ̃ diɛ kunun ǹ ni, wɔ Lawa a boo gii-dalin kɛn mà kaa wa.»

³¹Bɛa yɔrɔ lɛ la, ka dinin man siére boe ka dinin wɔ gɔn la, kasɛn man Lawa a boo gii-dalin dɛlen lɛn tɔrɔn lɛa.

³²Haya! Ka digolon nə sii mɛn giala kɔ, kasɛn nə n doa ka a lɛ pã!

³³ Kɔrɔkan tɔrɔn, min babaraan kɛn! Ka n die siɛ lɔn ka tɔn kanbaa Sɛtaan a piɛ a dɔlɔ kɛ ganaa?

³⁴Bɛ lɛ na á toa, ka n too kɔ: Man die Lawa a boo gii-dalin laanka yiridɛnan diɛ ka la ka Lawa a boo-dɔ̃lin ni. Ka tá re ǹ tɛn dii ǹ gã, ka ǹ tɛn dere gɔn ganaa, ka á re ǹ tɛn duduwii ka sɔsɔrɔ nɛ kaa lɛsɔkɔn kionən ne, ka ǹ tɛn loo ka kiwin kakaa kɔn la ǹ nɛ, ka fuu nyaa ǹ yii ni.

³⁵ Bɛ lɛ n toɛ, ka digolon nə Lawa bɔlɔ-silin mɛnɛn dɛ kooro, a saa Lawa bɔlɔ-sili Abeli a dɛ biikoo ganaa a wo Baraaki a nɛgiĩ Zakarii a dɛ biikoo yaa, ǹ nə ǹ mɛn dɛ Lawa a kion, Lawa laanka a wúlu-bɔlen kɔn yɛ ǹ bǎã laanka *wúlu bɔ ǹ bǎã bii ni, bɛ lɛ din tumaa a dɔlɔ á die kasɛn kɛn lɛn kuĩ.

³⁶Man taãn pii ka nɛ: Bɛa gɛ̀-dɛn kɛn lɛn tumaa a dɔlɔ á die pelo minbuiinin lɛn kuĩ!

³⁷Zeruzalɛmu kiwi ganaa, nsɛ mɛn bɛ́ Lawa a boo gii-dalin dii, bɛ̀ n Lawa a dia dí-a wolen dɛ ka kɔlɔ nɛ ǹ gã. Ma gunyin damata n ke giɛ li, ma tá n minin lɛ soekɔn ma din li, ka koo dan bɛ́ a nɛn lɛ soekɔn-a a nyàa kan giulun lɔn, sɛnɛ, ka bɛ́ ka lɛ kɔ wa!

³⁸ Haya, ka á re soe, ka kaa Lawa a kion kɛ toa walan ka lenlen, a ziziɛ̃ ka lon.

³⁹Masɛ n pii ka nɛ, a giala, a saa sisia ganaa, ka a re masɛ yii doo wa, yǎa ka bɛ́ re pii ǹ mɛn pinaa: «Min mɛn bɛ́ die ka wɔa Dɛnaa tɔ nɛ, Lawa die a barka wɔ bɛ nɛ!»