Read Samo, Southern Mar 6 Bible Online

Mar 6 - Samo, Southern bible

Mar 6

¹Yezu soo á n bɔ bɛa bǎã lɛ nɛ. A bɛ́ á too kiwi mɛn nɛ, a kialandɛnan nə́ kɔ lɛ, ǹ nə́ woo walan.

²*Susu ǹ pii pinaa, á yoo á minin daraa Zuifun lɛsɔkɔn kion. Min gigiã mɛn tumaa na a lɛ ma, bɛn nə́ n kaãbaa parsiini, ǹ nə́ goã pii: «Eebe, a n boe ka kɛ-n maa? Die na á yiridɛnaabaa kɛ kɔ la? Wàa ǹ kaãbaa ǹ siin man kɛn nɛ a tá ǹ zɛnɛɛ?

³A din da-sɛlɛli kɛ lɛ bie wa ya? Mariya a nɛ kɛ lɛ bie wa? Ǹ dɔɔ̃ngiĩ bie ka Zaaki ni, ka Zoze ne ka Zude laanka Simɔn nɛ wa? Ǹ miãnɛnɛn bie ke kun ka wɔsɛn nɛ kànaa wa ya?» Bɛ lɛ na á toa, ǹ nə́ n piã nɛ.

⁴ Yezu tɔ́n pɛ ǹ nɛ: «Lawa a boo gii-dali yii a puusə koe bǎã kɔ́n nɛ wa, bɛ̀ á n bɔ a din a yɛ ǹ kiwi ni, ka a din dɔɔ̃nɔn laanka a din a sumu minin bii.»

⁵Yezu na á n gɔn da busulən kɔnɔn la walan, á ǹ kaka kɔ. Bɛ̀ á n bɔ bɛ nɛ, a boo la á kaãbaa ǹ sii kɔ́n zɛnaa walan wa.

⁶Ǹ dinin golee Yezu li baã kɛ lɛ-n á kaãbaa da Yezu ganaa. Bɛ kio, Yezu goã n bibiĩ lɛ-a ǹ kiwin ni á n minin darɛɛ.

⁷Yezu lɛ dia a kialandɛnaa fulupaa lɛ la, á ǹ dia dí-a min papaa. Á nɔ̀ɔnɔn loo ǹ pàã kɔ ǹ la,

⁸ á pɛ ǹ nɛ: «Bɛ̀ á n bɔ bàbàla nɛ, ka nyan toa ka màn kɔ́n saa zii tɔ-wɔ lɛ taman yii wa. Ka baran buuru saa wa, ka baran nyankɔ ǹ bɔnaa saa wa, ka baran wɔrɔ dɔ saa ka da kaa zéwo-n wa.

⁹Ka kɔsɔn wɔ ka gòã ganaa, sɛnɛ, ka baran dɔnkɛ paa kaa kɔn la wa.»

¹⁰Á wusoo á pɛ ǹ nɛ doo: «Bɛ̀ ka dɔ kiwi mɛn-a, ka bɛ́ re n yui kion mɛn nɛ, ka goã bɛa kion lɛ-n miɛ̃, yǎa ka wo bǎã kɔsɔ-n doe.

¹¹ Bɛ̀ bǎã mɛn a minin nə́ n piã, mà ka baran n yu ǹsɛn la wa. Bɛ̀ ǹ nə́ n piã, ǹ nə n too kɔ ka lon wa, ka n gòã gusuũ duduu, ka soo ka n bɔ walan: Bɛ n gɔn waa ǹ sii lɛa ǹ wɔ paǹ li.»

¹²A kialandɛnan lɛn nə́ woo ǹ nə́ pɛ minin manɛ, mà ǹ doamaa nɛ ǹ nə n taasɛ, ǹ wusoo ǹ sii baraan kio.

¹³ Ǹ nə́ nɔ̀ɔn gigiã loo ǹ nə́ ǹ bɔ minin ganaa, ǹ nə́ nyɔɔ lɔ busulə gigiã ganaa ǹ nə́ ǹ kaka kɔ.

¹⁴ Bɛa biikoo lɛ li, kii Erɔdi dɔ́ Yezu boo ma, a giala, a tɔ bɔ bǎã tumaa nɛ. Min tɛn na á goã pii mà Zaã, *batɛmu-dali yii na á kaa á n bɔ geren bii, mà bɛ lɛ na á toa pàã tá a lon á kaãbaa ǹ siin zɛnɛɛ.

¹⁵Min tɛn dɔ mà Lawa a boo gii-dali Yilii mɛn doamaa bɛ́ na a daa, mà bɛ lɛ nɛ. Ǹ tɛn dɔ mà a laanka Lawa a lɛlɛ a boo gii-dalin kɛn lɛn man goon.

¹⁶Erɔdi bɛ́ á bɛ ma ǹ mɛn waáraa, á tɔ́n pɛ mà asɛ pɛ, mà ǹ Zaã mɛn lɛ mìi kuru lɛlɛ, mà a din lɛ nɛ, mà a yii na á wusoo á kaa.

¹⁷ Zaã mìi lɛ a kurii saa màn mɛn li á ke: Erɔdi na á Erɔdiadi saa lɔ lɛa, a da yaa a din dɔ diɛ̃giĩ Filipi a lɔ nɛ.

¹⁸Zaã tɔ́n pɛ nɛ mà a doamaa bie a ǹ diɛ̃giĩ lɛ a lɔ lɛ kũ a si la, a baa a lɔ lɛa wa.

¹⁹Bɛ lɛ nɛ, Erɔdiadi foo yoo Zaã li á la yii ni, á goã giɛ a dɛ ǹ gɔn li. Erɔdi tɔ́n pɛ, mà ǹ Zaã kũ ǹ yii ǹ da kòso-n. Á goã Zaã tamaɛ, a ba li mà Erɔdiadi dɛ wa.

²⁰Erɔdi goã nyɛ́ɛ biɛ Zaã nɛ, a giala, á dɔ̃ mà Zaã n Lawa a min sonbore lɛa. Á goã kɔɔ̃n a ganaa a n too kɔ Zaã a boo li, sɛnɛ, bɛ̀ a tá n too koe li, a yiri yii nə n lɔloɛkɔn.

²¹Sɛnɛ, Erɔdi a yɛ ǹ zɔ́n zɛnaa pinaa na á n baa Erɔdiadi a lɛawaa sonbore lɛa. Bɛ lɛ a pinaa, Erɔdi màn-bii gole zɛnaa a pàã a mìilandɛnan manɛ ka sɔraasin goledɛnan laanka Galilee gána a min dadaran nɛ.

²²Erɔdiadi a nɛlɔ wɔ ǹ bii walan, á bɛ̀ baa, bɛ́ kɔɔ̃n kɔ Erɔdi laanka a min mɛnɛn bíi màn-bii ganaa. Erɔdi tɔ́n pɛ nɛniɛ lɛ nɛ mà a bɛ́ màn mɛn li, mà a pɛ asɛ nɛ, mà asɛ á die koe la.

²³Á tɔ́n liɛ kɛ wɔ nɛ mà a bɛ́ re màn woo màn nyankoe asɛ lon, mà asɛ á die koe la, haalɛ ta asɛ a pàã lɛ a talɛɛ din ni.

²⁴Nɛniɛ lɛ soo á woo nɔ̀n da ǹ dan la mà asɛ pɛ nɛ mà a wàa kɔ? Ǹ dan pɛ mà a pɛ nɛ mà Zaã, batɛmu-dali ke, mà a bɛ mìi kɔ.

²⁵Nɛniɛ lɛ nə́ n nanaa á woo kii li, á pɛ mà Zaã, batɛmu-dali ke, mà asɛ n giɛ li, a bɛ mìi kɔ asɛ la màn nɛ sisia!

²⁶Kii nə́ n yɔrɔ kɔsɛ parsiini, sɛnɛ, a boe la a n lɛ bɔ doɛ̃ doo wa, a giala, a min mɛnɛn bíi, á n liɛ ǹ tumaa yɔrɔ-a.

²⁷Bɛa bǎã-n gɔrɔ, a sɔraasin giĩ mɛn a dí bɛ́ ka bɛ nɛ, á bɛ dia, mà a wo Zaã mìi na, a da nɛ. Sɔraasin giĩ lɛ woo wɔ kòso kion, á Zaã mìi kuru.

²⁸Bɛ kio, á daa ka a mìi lɛ-n màn nɛ, á kɔ nɛniɛ lɛ la, nɛniɛ lɛ dɔ́ tɔ́n saa á kɔ ǹ dan la.

²⁹Zaã a kialandɛnan bɛ́ ǹ nə́ bɛ ma ǹ mɛn waáraa, ǹ nə́ daa a gere saa ǹ nə́ woo bĩ.

³⁰Dia dí-a wolen lɛn nə́ sii mɛn tumaa zɛnaa, ǹ minin daraa sii mɛn tumaa ganaa, ǹ nə́ wusoo ǹ nə́ daa Yezu li, ǹ ná a tumaa laakalaa nɛ.

³¹Woo a daa wolen nə́ mɔnaa parsiini, haalɛ biikoo din ba Yezu laanka a kialandɛnan lon ǹ tá màn bii wa. Bɛ lɛ nɛ á tɔ́n pɛ ǹ nɛ mà ǹ da kun ka asɛ nɛ bǎã kɔ́n nɛ tiãlɛa, ǹ nə n susu boɛɛn nɛ.

³²Ǹ dininsɔɔ̃nɔn nə́ tɔ́n wɔ tà kuru ǹ goo ne, ǹ nə́ woo tiãlɛa.

³³Sɛnɛ, min gigiã nə́ ǹ yɛ woe ǹ nə́ ǹ dɔ̃. Ǹ nə́ bɔ kiwi din tumaa ganaa, ǹ nə́ baa si ka ǹ gòã nɛ, ǹ nə́ dɔ walan Yezu laanka a kialandɛnan nyɛɛnɛ.

³⁴Yezu bɛ́ á soo á n bɔ goo lɛ nɛ ǹ mɛn waáraa, á zaman gole yɛ. Minbuiinin lɛn makara kũ parsiini, a giala mà ǹ nə́ goã goon ka sèren mɛnɛn bɛ́ lɛduə̃li ná a ba ǹ la wa. A ná a giala kɔ á ǹ daraa sii gigiã ganaa.

³⁵Wasa bɛ́ á mɛ, Yezu a kialandɛnan nə́ n zɔ̃ ǹ nə́ dɔ a li, ǹ nə́ pɛ nɛ: «Wasa mɛ, bǎã lɛ dɔ n don lɛa.

³⁶Minin lɛn toa ǹ wo màn-bii pii ǹ dinin manɛ don kionən laanka lɛ-a ǹ kiwin ni.»

³⁷Yezu pɛ ǹ nɛ: «Ka dinin nə màn-bii kɔ ǹ la ǹ bii.» Ǹ nə́ tɔ́n pɛ Yezu ni: «Ma n giɛ li wɔsɛn nə lɛawaa biɛpaa a dí nya ǹ giɔ̀mɔ saa wɔ wo buuru pii ni, wɔ tɔn da kɔ ǹ la ǹ sɔ̃?»

³⁸Yezu tɔ́n pɛ ǹ nɛ: «Buuru mìi gia n ka lon? Ka wo ga.» Ǹ bɛ́ ǹ nə́ nɔ̀n da, ǹ nə́ wusoo ǹ nə́ daa pɛ nɛ mà buuru mìi sooro laanka zɔ̀ màn paa na a tan.

³⁹Bɛ kio, Yezu pɛ a kialandɛnan lɛn manɛ: «Ka zaman lɛ tatala kɔn kuru kuru, ǹ giã tán buu buruu lɛ la.»

⁴⁰Ǹ nə́ giã tán, kuru tɛn nə min paabiɛ, ǹ tɛn nə min posooro.

⁴¹Bɛ kio Yezu bɛa buuru sooro lɛ laanka zɔ̀ màn paa lɛ goa, á n yɔrɔ dia lon á barka da Lawa nɛ. Á buuru lɛ yiyiɛ kɔn á kɔ a kialandɛnan lɛn la, mà ǹ gii zaman lɛ nɛ. Á zɔ̀ màn paa lɛ dɔ gii ǹ tumaa bii.

⁴²Didie màn bii á kã.

⁴³Buuru gialakun laanka zɔ̀ gialakun mɛn goã, a kialandɛnan lɛn nə́ goa ǹ nə́ woo ne, á kankaan fulupaa pã.

⁴⁴Buuru lɛ a sɔ̃lin man nə́ goã giĩ duu sooro (5 000), lɔn laanka nɛnyaanan gòɛ̃ ná a ba a-n wa.

⁴⁵Bɛ kio gɔrɔ, Yezu ná a kialandɛnan lɛn kaa tà kuru ǹ goo ne, mà ǹ wo asɛ nyɛɛnɛ Bɛtsayidaa kiwi tà lɛ a lɛkoro goon kɛ ganaa, bɛ̀ asɛ din baa zaman lɛ diɛ zii ǹ woo.

⁴⁶A bɛ́ á ǹ da zii ǹ mɛn waáraa, á woo dii kele la á Lawa nyankɔ.

⁴⁷Wɔlɔ bɛ́ á tii, goo lɛ n tà mu bii, bɛ̀ Yezu dinsɔɔ̃ n tán kooro la.

⁴⁸Á yɛ mà mu kurii tá a kialandɛnan lɛn nɔmiɛ parsiini, a giala, piɛ̃ na á goã n diɛ ǹ lɛ. Koonən wuu pɛ waáraa, Yezu tɔ wɔ mu la a tele ǹ ganaa, a na á baa re ǹ niɛ̃ dinin.

⁴⁹Ǹ bɛ́ ǹ nə́ yɛ tɔ we mu la, maǹ nə́ baa gere nyín lɛa, ǹ nə́ ǹ lɛ dɛ.

⁵⁰Ǹ tumaa yɛ lɔn, ǹ nyín yii soo. Bɛa bǎã-n gɔrɔ, Yezu tɔ́n boo da ǹ nɛ, á pɛ ǹ nɛ: «Ka n foo taã. Masɛ nɛ. Ka baran nyɛ́ɛ baa wa.»

⁵¹Bɛ kio á wɔ goo-n kunun ǹ ni, piɛ̃ lɛ tɔ́n golee. A kialandɛnan lɛn nə́ n kaãbaa parsiini haalɛ.

⁵²A giala, a kaãbaa ǹ sii mɛn zɛnaa ka buurun lɛn nɛ, ǹ na a giala ma wa, ǹ yiri a boe la a dɔ a gɔ́ɔ̃-n wa.

⁵³Ǹ nə́ tà kuru ǹ nə́ nya ǹ nə́ dɔ tán kooro ganaa Zenezarɛti gána nɛ, ǹ nə́ ǹ goo doa tà lɛkoro-a.

⁵⁴Ǹ bɛ́ ǹ nə́ soo ǹ nə́ n bɔ goo ne ǹ mɛn waáraa, minin nə́ Yezu dɔ̃.

⁵⁵Ǹ nə́ baa si ǹ nə́ woo a boo da bǎã din tumaa nɛ. Bɛ̀ ǹ nə́ ma mà a tá bǎã woo bǎã nɛ, maǹ busulən goɛ ka ǹ piìn ni bɛ̀ ǹ wo ǹ ne a li.

⁵⁶Yezu bɛ́ woe bǎã mɛn tumaa nɛ, kiwi bisinin ni, kiwi dadaran laanka don kionən ne, minin man die ka ǹ busulən ne zaman paã ǹ bǎã nɛ, bɛn na a nyankɔ mà a toa ǹsɛn nə n gɔn da a mɔnaa lɛkoro ganaa. Min mɛn tumaa bɛ́ á goã n gɔn diɛ a ganaa, bɛn busu nya.