Read Samo, Southern Luk 11 Bible Online

Luk 11 - Samo, Southern bible

Luk 11

¹Ǹ kɔ́n pinaa Yezu na á goã Lawa nyankoe bǎã kɔ́n nɛ. A bɛ́ á nya, a kialandɛnaa goon pɛ: «Dɛnaa, wɔsɛn daraa Lawa nyankɔ ganaa, ka Zaã bɛ́ á goã a ná a kialandɛnan daraa-a lɔn.»

²Yezu pɛ ǹ nɛ: — Bɛ̀ ka tá Lawa nyankoe, ka pɛ kɛnɛn: «Díi, toa n tɔ gole kɔ, toa n kiibaa daa.

³Wɔa baraabaraa a màn-bii kɔ wɔ la.

⁴Wɔa sii baraan toa wɔ nɛ, a giala wɔ dɔn dininmaan tá wɔ miãn tumaa zɛ̀rɛn toɛ ǹ nɛ. Sii mɛn bɛ́ damagɔ́ɔ̃li ǹ sii lɛa, bɛ wɔlɔ lui wɔ ganaa.»

⁵Yezu pɛ a kialandɛnan lɛn manɛ: «Ka ga a ganaa, bɛ̀ ka dinin kɔ́n a giaára na a tan, yǎa a yoo á wo a giaára lɛ li làan ka sorosoro, á pɛ-n kɛnɛn: Maa giaára ganaa, buuru mìi sɔɔ nyɛnɛ masɛ la.

⁶A giala maa giaára kɔsɔ na á bɔ zii ni á daa, màn kɔ́n ba ma lon ma á koe la wa.

⁷Ka ga-a, bɛ̀ bɛa giaára lɛ nə n toa kion gɔ́ɔ̃ nɛ á giĩ lɛ lɛ si mà a tá asɛ nɔmiɛ. Mà asɛ ná a kiɛnlɛ tã á sɔɔ. Mà asɛ laanka a nɛnyaanan man waa-n tán. Mà asɛ a boe la a yoo a buuru kɔ la wa.»

⁸Yezu pɛ ǹ nɛ: «Ta giĩ lɛ na a yoo á màn kɔ ǹ miã lɛ la giaárabaa kɛ a lɛa wa, bɛ̀ ǹ miã lɛ tá a foo pipii, giĩ lɛ á re yui, ǹ miã lɛ laadoo bɛ́ màn woo màn ganaa, á re bɛ koe la.»

⁹Yezu tɔ́n nə n toa: «Masɛ n pii ka nɛ: Ka màn nyankɔ, Lawa á re màn koe ka la. Ka ga màn li, ka á re màn yii. Ka kiɛnlɛ dɛ, ǹ tá re kiɛnlɛ buĩ ka nɛ.

¹⁰Sonbore, min mɛn bɛ́ màn nyankoe Lawa la, Lawa á re màn koe bɛa dɛnaa la. Min mɛn bɛ́ giɛ màn li Lawa li, bɛa dɛnaa á re màn yii. Min mɛn dɔ bɛ́ kiɛnlɛ dii, Lawa á re kiɛnlɛ buĩ bɛa dɛnaa nɛ.

¹¹Ka dinin bii díi mɛn nɛ, bɛ̀ a nɛ zɔ̀ nyankɔ la, a n die miɛ̃ koe la zɔ̀ lɛ bǎã nɛ, miɛ̃ mɛn bɛ́ a siĩ na a ba we min lɛ-n wa?

¹²Hinlaa bɛ̀ nɛ lɛ koo gìi nyankɔ, a n die ton koe la?

¹³Ka laanka kaa baraabaa kɛ din tumaa nɛ, bɛ̀ kasɛn tá kaa nɛnyaanan foo dùũ mànan doɛ̃ ka n koe ǹ la, sanparɛ ka Díi Lawa nɛ, min mɛnɛn bɛ́ Yiri Fu nyankoe la, a n die koe bɛn la!»

¹⁴Yezu lɛ tere-a goon lɛ bũ. Nɔ̀ɔnɔn man nə́ goã bɛa giĩ lɛ ganaa. Nɔ̀ɔnɔn lɛn bɛ́ ǹ nə́ n bɔ a ganaa lɔn gɔrɔ, á yoo á boo da. Á kaãbaa da zaman lɛ ganaa.

¹⁵ Sɛnɛ, minin lɛn tɛnɛn man nə́ goã pii mà Yezu n nɔ̀ɔnɔn lɛn lui ka nɔ̀ɔnɔn kiã *Sɛtaan pàã nɛ.

¹⁶ Ǹ gialakunun man nə́ goã giɛ a lɛ li ǹ da sii zɛnaa ganaa, mà a na a din tɔ bɔ ǹ sii kɔ́n zɛnaa ka Lawa pàã nɛ, a nyaa ǹsɛn manɛ.

¹⁷Sɛnɛ, Yezu bɛ́ ǹ taasiɛn doɛ̃, á pɛ ǹ nɛ: «Bɛ̀ gána mɛn a minin tá zia diɛ kɔn-a, bɛa gána lɛ a mɛnaa a sàabiɛ wa, a kionən man kiɛ kɔn kio ganaa.

¹⁸Bɛ̀ Sɛtaan nə́ yoo a din gialaa, a wɔ n bǐɛ̃ koe lɔn? Ka bɛ́ pii mà masɛ n nɔ̀ɔnɔn lui ka nɔ̀ɔnɔn kiã pàã nɛ.

¹⁹Táa ka n pii miɛ̃, sɛnɛ, ka dinin kialandɛnan kɛn dɔn, bɛn man nɔ̀ɔnɔn lɛn lui ka die pàã nɛ? Táa nɔ̀ɔnɔn kiã pàã bie wa. Bɛ̀ miɛ̃ nɛ, ka dinin kialandɛnan man nyɛɛ, mà ka ǹ ka sã, masɛ bie nɔ̀ɔnɔn lɛn lui ka nɔ̀ɔnɔn kiã pàã-n wa.

²⁰Sɛnɛ, bɛ̀ masɛ n nɔ̀ɔnɔn lɛn lui ka Lawa pàã nɛ, haya, *Lawa a kiibaa lɛ na á n giala kɔ ka li.

²¹Bɛ̀ min kaka tá a kion lɛduĩ ka ziabaa ǹ mànan nɛ, màn ba pɔrɛɛ a gɔn màn kɔ́n-a wa.

²²Min kɔsɔ mɛn bɛ́ kaka á la a dɔ nɛ, bɛ̀ bɛ́ daa, yǎa a boo la, a bɛ́ n foo doɛ zia-baa ǹ mànan mɛnɛn ganaa, bɛa min kaka kɔsɔ kɛ lɛ n bɛn sii, a ná a gɔn màn dɔ si a gii.»

²³ Yezu pɛ: «Bɛ̀ min mɛn ba kun ka masɛ-n wa, bɛa dɛnaa na á n piã ka masɛ nɛ. Doo, bɛ̀ min mɛn ba Lawa a minin lɛ soekɔn kun ka masɛ-n wa, bɛa dɛnaa nə ǹ sasawɛɛ.»

²⁴Yezu pɛ: «Bɛ̀ nɔ̀ɔn baraa nə́ n bɔ min ganaa, a n woe n bibiĩ diə bǎãn nɛ, a ga mìi susu ǹ bǎã li. Bɛ̀ a susu ǹ bǎã yɛ wa, a n pii mà asɛ n die wusii, a wo a bɔ ǹ bǎã lɛ nɛ, a giã walan.

²⁵Bɛ̀ nɔ̀ɔn lɛ daa, a n yiɛ bɛa dɛnaa kɛ lɛ min sonbore baa, a sii yii n telee ne, á n kɔnboe ka kion mɛn bɛ́ ke ǹ nə́ wɔraa, ǹ ná a gɔ́ɔ̃gɔ́ɔ̃ ǹ mànan tetele.

²⁶Nɔ̀ɔn lɛ n wusii a wo ǹ miã sɔbaa kũ, màn mɛnɛn bɛ́ baraa ǹ nə́ la a din ni. Maǹ die ǹ bɛa min lɛ kũ ǹ goã a ganaa. Bɛa dɛnaa lɛ a sisiamaa n baraa koe a la a lɛlɛmaa nɛ.»

²⁷Yezu bɛ́ bɛa boo kɛ lɛ diɛ, lɔ goon nə́ n toa zaman bii á pɛ: «Lɔ mɛn nə n nɔ̀ gũ á n yɛ, á nyɔ kɔ n la, barka n bɛa lɔ kɛ ganaa.»

²⁸Sɛnɛ, Yezu pɛ: «Haayii! Min mɛnɛn bɛ́ n too koe Lawa a boo-a, ǹ nə́ tɔ we á kɔnpii-n kaa, barka á re n diɛ bɛn ganaa!»

²⁹ Zaman lɛ bɛ́ tɔn die n lɛ soekɔn Yezu li, á pɛ ǹ nɛ: «Pelo minin kɛn man min baraan lɛa. Maǹ nɔ̀n diɛ mà masɛ kaãbaa ǹ sii zɛnaa, màn mɛn bɛ́ nyɛɛ, mà masɛ n boe lon Lawa li. Sonbore, kaãbaa ǹ sii kɔ́n ba re n zɛnɛɛ a n nyaa ǹ nɛ, a kiɛ̃ Zonaasi wɔ kɛ lɛ la wa.

³⁰ Zonaasi na á goã Lawa a sii-nyaa lɛa Ninivu minin gɔn, a na á daa ǹ li ka min bɛ́ a yii kaa, á n bɔ geren bii lɔn, bɛa yɔrɔ kɛ lɛ la, Min a Nɛgiĩ dɔ n die Lawa a sii-nyaa goon biɛ pelo minin kɛn gɔn.

³¹ Kiri-kurii pinaa, lɔ mɛn bɛ́ á goã kii lɛa Saabaa gána nɛ, bɛ á re yui, kun ka pelo minin kɛn nɛ, a ǹ zɛ̀rɛ baa. A giala, bɛa lɔ kɛ na á goã á bɔ kanaa bǎã sɔɔsɔɔ nɛ, á daa n too kɔ kii Salomɔn a sii-doɛ̃ boon kɛn ganaa. Á ke! Min tá kànaa á n gole Salomɔn nɛ.

³² Kiri-kurii pinaa, Ninivu kiwi minin tá re yui, kun ka pelo minin kɛn nɛ, ǹ ka zɛ̀rɛ baa. A giala, Ninivu minin lɛn bɛ́ ǹ nə́ Zonaasi a lɛ-dia lɛ ma, ǹ nə́ wusoo ǹ sii baraan kio, ǹ nə́ ǹ tɔ wɔ ǹ gɔn bɔyaa. Á ke! Min tá kànaa á n gole Zonaasi ni.»

³³ Yezu pɛ: «Min tá bolon diɛ a duru màn giulun? Haayii! Maǹ bolon diɛ ǹ da bólon koa ǹ bǎã nɛ, màn mɛn bɛ́ toɛ, min mɛnɛn bɛ́ we kion, bɛn na a fúlu yɛ.

³⁴Min yiin nànan man ka bolon bɛ́ lɔn a gɔ̀nɔn ganaa. Bɛ̀ min yiin tá siĩni, maǹ wɔlɔ fuli a gɔ̀nɔn din tumaa nɛ. Sɛnɛ, bɛ̀ min yiin ba siĩn wa, a gɔ̀nɔn din tumaa n wɔlɔ tì li.

³⁵Bɛ lɛ nɛ, didie nə n foo lɛ bũ, a toa bolon fúlu kɛ wɔ a nɛ, màn mɛn bɛ́ toɛ, a gɔ́ɔ̃ baran tii wa.

³⁶Bɛ̀ min gɔ́ɔ̃ din tumaa á fu, tì boɛɛn ná a ba a-n wa, bɛa dɛnaa n die goɛ̃, sii yii tumaa n foaã nɛ a ganaa, ka bolon bɛ́ a fúlu sonbore kiɛ a ganaa lɔn.»

³⁷Yezu bɛ́ á boo da á nya, *Fariziɛ̃n giĩ goon nə́ bíi a piɛ, mà a da màn bii. Yezu wɔ kion á giã tán màn-bii la.

³⁸Fariziɛ̃ lɛ bɛ́ á Yezu yɛ a n gɔn pii á kɔnpɛ ka landa sii ni, á tɔ́n màn-bii lɛ giala kɔ wa, á n kaãbaa.

³⁹Dɛnaa Yezu pɛ nɛ: «Á ke, kasɛn Fariziɛ̃n lɛn man kɛnɛn: Ka n paan laanka kunun dɔ̀ɔ̃ pii, mà ǹ *yoreen kɔ. Sɛnɛ, ka dinin gɔ́ɔ̃ kɛ piɛ̃maa nɛ ka mɛnaa minin la ǹ taasiɛn nɛ ka baraabaa nɛ.

⁴⁰Ka baãnaan kɛn! Lawa mɛn bɛ́ á màn dɔ̀ɔ̃ lɛ zɛnaa, a din bie a ná a gɔ́ɔ̃ lɛ dɔ zɛnaa wa?

⁴¹Bɛ̀ ka tá kaa paanan laanka kaa kununun lɛn gɔ́ɔ̃gɔ́ɔ̃ ǹ mànan koe doobaan la, kaa màn din tumaa á die yoreen koe: Kaa paanan nɛ, kaa kununun ni, ka ka dininmaan foon dɔn nɛ.

⁴² Fariziɛ̃n lɛn, kaa wɔ n ka bɔ̀n nɛ. Ka n Lawa wɔ gii boe màn din tumaa nɛ, haalɛ dù tɔrɔ din tumaa. Sɛnɛ, ka n peperebaa laanka Lawa narɛɛ sii diɛ para li. Bɛ̀ ka doamaa nɛ ka bɛn lɛn zɛnaa, a ná a ba gialakun kɛ lɛ dɔ sàabiɛ wa.

⁴³Fariziɛ̃n lɛn, kaa wɔ n ka bɔ̀n nɛ. Nyɛɛnaa ǹ bǎãn lɛn man kɔɔ̃n ka ganaa, lɛsɔkɔn kionən ne. Bɛ̀ minin tá guguru kɔ ǹ fòo diɛ ka nɛ pii ni, bɛ dɔ n kɔɔ̃n ka ganaa.

⁴⁴Kaa wɔ n ka bɔ̀n nɛ. Ka n ka gere yalan bɛ́ lɔn, minin yiri ná a ba màn mɛnɛn li wa, ǹ nə́ tɔ we la ǹ nə́ ǹ ba boe a siére-a wa.»

⁴⁵Landa sii-daraalin lɛn goon pɛ Yezu ni: «Mìinaa, n bɛ́ boo kɛ diɛ kɛnɛn, ma n sɔ koe wɔsɛn dɔn ganaa.»

⁴⁶Yezu ná a lɛ si: «Ka dɔn wɔ n ka bɔ̀n nɛ, kasɛn landa sii-daraalin lɛn. Bɛ̀ ka tá landa siin lɛn pii, a n ka guĩ gugurun mɛnɛn bɛ́, min ba boe la wa, ka n yii diɛ minin mìi ni, ka dininmaan ba n doe ǹ lɛ boɛɛn nɛ kɛnɛn dinin ka gũ wa.

⁴⁷Kaa wɔ n ka bɔ̀n nɛ. Ka digolon nə Lawa a boo gii-dalin mɛnɛn dɛ, kasɛn man bɛn yalan zɛnɛɛ pelo.

⁴⁸Ka n nyɛɛ kɛnɛn, mà ka digolon nya ǹ dí lɛ á kɔɔ̃n ka ganaa. Bɛn nə́ Lawa a boo gii-dalin dɛ, kasɛn manə ǹ yalan zɛnɛɛ.

⁴⁹Bɛ lɛ nɛ, Lawa pɛ a boo ne: «Ma á re maa boo gii-dalin laanka maa dia dí-a wolen diɛ ka la. Ka tá re ǹ tɛnɛn dii ǹ gã, ka tá re fuu nyɛɛ ǹ tɛnɛn manɛ.»

⁵⁰Bɛ lɛ taman yii, ka Lawa a boo gii-dalin mɛnɛn tumaa dɛ, a kũ kanaa diɛ biikoo ganaa, bɛa dɔlɔ á die n boe pelo minin kɛn ganaa.

⁵¹ A kũ Abeli a gɛ̀-a a da Zakarii wɔ yaa, ǹ Zakarii mɛn dɛ *wúlu bɔ ǹ bǎã laanka wúlu-bɔlen kɔn yɛ ǹ bǎã bii ni, sonbore, dɔlɔ á die n boe pelo minin kɛn lɛn-a bɛa gɛ̀-dɛ kɛ lɛ tumaa a lɛa.

⁵²Kaa wɔ n ka bɔ̀n nɛ, kasɛn landa sii-daraalin lɛn. Ka n ka wɔ sii-doɛ̃ nɛ ǹ kiɛnlɛ lɛ a goo nɛ saa. Ka dinin ba we wa, min mɛnɛn dɔn bɛ́ zoɛ̃ mà ǹ wɔ, ka n bɛn dɔn kurii.»

⁵³Yezu bɛ́ á n bɔ bɛa bǎã kɛ nɛ, landa sii-daraalin laanka Fariziɛ̃n ná a giala kɔ ǹ nə́ foo-yoo baraa kɔ́n nyɛɛ nɛ, bɛ̀ ǹ nə́ nɔ̀n diɛ la sii tɔrɔ gigiã wɔ gɔn la,

⁵⁴maǹ nə́ goã n diɛ a para li ǹ nə́ giɛ, bɛ̀ á re a din da kanaa ǹ boo kɔ́n diɛ.