Read Samo, Southern Luk 16 Bible Online

Luk 16 - Samo, Southern bible

Luk 16

¹Yezu pɛ a kialandɛnan manɛ: — Pàãma goon ne á giĩ goon saa á da a gɔn mànan mìi la. Bɛa giĩ lɛ ná a gɔn màn lɛ ziziɛ̃. Pàãma lɛ bɛ́ á bɛ ma,

²á ǹ dia ǹ nə lɛ dia la. Á tɔ́n nɔ̀n da la mà a na á wàa sii zɛnaa ke? Mà a na a dí nya ǹ gɔn nyaa asɛ nɛ. Mà a kũ sisia ganaa mà a ba re asɛ gɔn mànan sii yɔrɔ boe doo wa.

³Giĩ lɛ pɛ a din gɔ́ɔ̃ nɛ mà asɛ n die wàa zɛnɛɛ kəni? Mà asɛ a goledɛnaa bɛ́, á gɔn mànan sii yɔrɔ bɔ si asɛ la. Mà pàã ba asɛ lon asɛ tán kɔsɔ wa, mà nyankɔ dɔ á sìi diɛ asɛ ganaa.

⁴Haya! Mà asɛ sii kɔ́n yɛ á n die zɛnɛɛ, màn mɛn bɛ́ toɛ, bɛ̀ ǹ ná asɛ a dí lɛ si asɛ la, giaáran nə yɛ asɛ la, ǹ na asɛ kũ ǹ na asɛ da ǹ kion.

⁵Yǎa a lɛ dia a goledɛnaa a giɔ̀mɔdɛnan yii la, ǹ nə́ daa a li. Á pɛ ǹ bibinaa nɛ: «Maa goledɛnaa lɛ a giɔ̀mɔ n gia n ganaa?»

⁶Bɛ ná a lɛ si mà nyɔɔ dɔn paabiɛ. Dí mìilandɛnaa lɛ mà a ganaa mà Haya, mà a sɛ́wɔ á ke, mà a giã tán fufuu, a kiɛ̃ a nɛ mà posooro ne.

⁷Á pɛ kɔsɔ dɔ nɛ mà asɛ a goledɛnaa a giɔ̀mɔ lɛ n gia a dɔ ganaa? Bɛ mà asɛ wɔ n *belee boroo paabiɛ. Dí mìilandɛnaa lɛ mà haya, mà a dɔ a sɛ́wɔ á ke, mà a kiɛ̃ a nɛ mà pɔkiwisi ni.

⁸Goledɛnaa lɛ dí mìilandɛnaa sii kɔkɔrɔ-zɛnaali kɛ lɛ para pɛ, a giala mà á dí nya ka yiridɛnaabaa nɛ. Sonbore, min mɛnɛn bɛ́ kanaa kɛ lɛ wɔn lɛa, bɛn man yiri boe ǹ sii zɛnaan gɔ́ɔ̃ nɛ ǹ dinin biin ni á la tɛ fúlu nɛn kɛn manɛ.

⁹Yezu pɛ ǹ nɛ: «Ka ga giaáran li ka dinin manɛ ka kanaa a naforo kɛ nɛ. Màn mɛn bɛ́ toɛ, bɛ̀ bɛa naforo kɛ lɛ nya, Lawa lɛ kɔ ka ganaa ka giã a biikoo nyabaã bǎã kɛ nɛ.

¹⁰Bɛ̀ min mɛn tá foo doa ǹ min lɛa sii boɛɛn gɔ́ɔ̃ nɛ, bɛa dɛnaa n foo doa ǹ min biɛ sii gole dɔ gɔ́ɔ̃ nɛ. Bɛ̀ min mɛn ba foo doa ǹ min lɛa sii boɛɛn gɔ́ɔ̃-n wa, Ǹ dɛnaa ba foo doa ǹ min biɛ sii gole dɔ-n wa.

¹¹Bɛ̀ min foo ba doa nɛ kaa dí nya ǹ gɔn ganaa ka kanaa a naforo kɛ-n wa, die n die naforo lɛ a taãn kɛ koɛ ka li?

¹²Màn mɛn din ba kaa wɔ lɛa wa, bɛ̀ ka foo doa ǹ minin baa bɛ wɔ gɔn la wa, Lawa n die ka dinin wɔ kɛ koe ka la lɔn?

¹³ Dí-nyali kɔ́n ba boe la a dí nya biikoo goon li mìinaa paa-n wa. A n die goon biɛ zɔ́ɔ, a goon narɛ, a n die goon bɔlɔ sii, a goon kɛ puusə kɔ. Ka a boe la ka n dinin kɔ Lawa la, ka n dinin kɔ wɔrɔ dɔ la wa.»

¹⁴*Fariziɛ̃n mɛnɛn bɛ́ wɔrɔ n kɔɔ̃nɛ ǹ ganaa, bɛn dɔn nə́ goã n too koe bɛa boo kɛ lɛ tumaa ganaa, bɛ̀ ǹ nə́ yaa we a ganaa.

¹⁵Yezu pɛ ǹ nɛ: — Kasɛn, ka n nyɛɛ minin yɔrɔ-a mà ka tá pepere, sɛnɛ, Lawa tá ka foon doɛ̃. Sii mɛn bɛ́ sii gole lɛa minbuiin nɛ yɔrɔ-a, bɛ tìĩ n boe-n Lawa nyin ni.

¹⁶A kũ lɛlɛ-lɛlɛ ganaa a da Zaã a biikoo yaa, Lawa a dí-pɛn laanka a boo gii-dalin sɛ́wɔn dininsɔɔ̃nɔn man nə́ goã. Sɛnɛ sisia, Boo Tii Kɔɔ̃n kɛ tá n pii, mà Lawa n kii lɛa. Didie nə n doɛ a tá n wen woɛ, màn mɛn bɛ́ toɛ, a wɔ *Lawa a kiibaa ǹ bǎã nɛ.

¹⁷ Lon laanka tán tá re kiɛ̃, a ná a dí din biɛ wa, sɛnɛ, Lawa a boo kɛ a lɛkoro boɛɛn din ba re papaɛ̃ wa.

¹⁸ Min woo min ná a lɔ loo, á kɔsɔ saa, bɛa dɛnaa na á naarɛbaa zɛnaa. Lɔ mɛn dɔ bɛ́ ǹ zuũ loo, bɛ̀ min mɛn bɛ dɔ saa, ǹ dɛnaa na á naarɛbaa zɛnaa.

¹⁹Giĩ goon na á goã, a n pàãma lɛa. A na á goã mɔnaa sonbore sonboren we. A na á goã zɔ́n màn-bii zɛnɛɛ baraabaraa.

²⁰Giĩ doobaa goon dɔ́ goã a tɔ n Lazaarɛ. Baayɛrɛ goã a paǹ tumaa ganaa. A na á goã wɛɛ tán pàãma lɛ a kiɛnlɛ-a.

²¹A na á goã giĩ doobaa lɛ gɔ́ɔ̃ nɛ, bɛ̀ a n boe la, pàãma lɛ a màn-bii pɔnpɔsɛn mɛn bɛ́ kiɛ, a bɛ goa a bii. Ginin mɛnɛn nə goã die a baayɛrɛ lɛn piɛ̃, a goã boe la á bɛn lui wa.

²²Bɛa doobaa lɛ daa á gã, yǎa lon a dia dí-a wolen ná a telenboen saa ǹ nə́ woo da Abrahamu genli Lawa a piɛ. Pàãma lɛ dɔ́ daa á gã, ǹ nə́ bĩ.

²³Pàãma lɛ bɛ́ yii wɔ̃ ǹ bǎã-n geren piɛ, á n yii saa lon á Abrahamu yɛ sɔsɔɔ, Lazaarɛ ná a genli.

²⁴Á tɔ́n nə n lɛ dɛ á pɛ: «Abrahamu, masɛ din a díi, makara bɔ ma ganaa, n Lazaarɛ dia a wo n gòon nyin sã mu li a da da masɛ lɛwɔn la, màn mɛn bɛ́ toɛ, ma bɔlɔ yala basã. A giala, ma á nɔmaa-n tɛ kɛ nɛ á la yii ni.»

²⁵Abrahamu pɛ nɛ: «Maa nɛ, n yiri gisĩ a nɛ, ń gɔn màn gigiã yɛ kanaa, Lazaarɛ sɛ na á goã á nɔmaa gole yɛ. Sisia Lazaarɛ dɔ na a yii-nyɛɛ ǹ bǎã nɛ, bɛ̀ n dɔ á fuu yii.

²⁶Ka bɛ dɔ-n doo, nyankɔrɔ gole tá ka laanka wɔsɛn bii. Bɛa yɔrɔ lɛ la, min mɛnɛn bɛ́ giɛ li ǹ bɔ wɔsɛn li ǹ wo ka li, bɛn baran boo la wa, min dɔ baran boo la a bɔ ka dɔn li a da wɔsɛn li wa.»

²⁷Pàãma lɛ mà Díi ganaa, mà asɛ na a nyankoe, a Lazaarɛ dia asɛ di kion.

²⁸Mà asɛ dɔɔ̃n sooro tan. Mà a wo n gɔn waa ǹ nɛ, màn mɛn bɛ́ toɛ, ǹ dɔn baran da fuu yɛ ǹ bǎã kɛ-n wa.

²⁹Abrahamu ná a lɛ si mà Lawa landa siin mɛnɛn kɔ Muizu la, ka a boon mɛnɛn dɔn kɔ a din a boo gii-dalin la ǹ nə́ pɛ, mà bɛn tá ǹ dɔɔ̃nɔn lɛn li, ǹ nə́ n gɔn wɛɛ ǹ nɛ. Mà ǹ nə n too kɔ bɛn lɛn lon.

³⁰Pàãma lɛ mà Díi Abrahamu ganaa, mà bɛa sii lɛ a boe wa. Sɛnɛ, mà bɛ̀ min yii kaa á bɔ geren bii á woo ǹ li, mà bɛa waáraa mà ǹ tá re wusii ǹ sii baraan kio ǹ golee Lawa li.

³¹Sɛnɛ, Abrahamu mà Lawa landa siin mɛnɛn kɔ Muizu la, ka a boon mɛnɛn dɔn kɔ a din a boo gii-dalin la, mà bɛ̀ ǹ nə n too kɔ bɛn-a wa, mà ta min yii na á kaa á bɔ geren bii á woo boo da ǹ nɛ, mà ǹ ba re wɛɛ ǹ dɛnaa a boo la wa.