Read Samo, Southern Luk 2 Bible Online

Luk 2 - Samo, Southern bible

Luk 2

¹Bɛa biikoo kɛ lɛ li, Rɔmu minin kii gole gole Oguti dí pɛ, mà min woo min tá asɛ a pàã giulun, mà ǹ bɛ tɔ kiɛ̃.

²Bɛa minin-nimii lɛ na a bibinaa lɛa, a na á n zɛnaa bɛ̀ Kirinusu n Siirii gána mìi la.

³Didie na á goã woe a din a kiwi, a n tɔ kiɛ̃ walan.

⁴Zozɛfu dɔ́ soo Nazarɛti kiwi Galilee gána nɛ, á woo Zudee gána nɛ Bɛtlehɛmu, ǹ digolo Davida a kiwi, a giala a dinmaa lɛ na á goã Davida tɔrɔ lɛa.

⁵A na á woo n tɔ kiɛ̃ walan, ka a lɔ wɔsiɛ Mariya nɛ, bɛ á zɛnɛɛ bɛ̀ a n min guguru lɛa.

⁶Ǹ bɛ́ Bɛtlehɛmu kiwi ǹ mɛn waáraa, Mariya a gisiĩ biikoo dɔ.

⁷A ná a gɔn binaa nɛ lɛ yɛ, nɛgiĩ lɛa. Á mɔnaa gɔnɔn pɛnɛ a ganaa. Ǹ bɛ́ tɔɔn kion mɛn nɛ, á naa bɛa tɔɔn lɛn màn bii ǹ goo ne, a giala, bǎã yɛ ǹsɛn wɔ lɛa, tiin yu ǹ kion kɔ́n nɛ wa.

⁸Bɛa kiwi kɛ lɛ a lɛkoro lɛ-a wurun ni, sèren-lɛduə̃lin kɔnɔn man nə́ goã wɛɛ don ǹ tɔɔn li.

⁹Dɛnaa a lon a dia dí-a wole goon nə́ daa bɔ ǹ li, Dɛnaa Lawa a tɛ-pɛ kaa ǹ la, nyɛ́ɛ nə́ ǹ kũ parsiini.

¹⁰Lon a dia dí-a wole lɛ mà ǹ ganaa: «Ka baran nyɛ́ɛ baa wa! Á ke, masɛ n má daa boo kɔɔ̃n pɛ ka nɛ, màn mɛn nə́ die gána kɛ a minin tumaa foo kɔɔ̃n koe parsiini.

¹¹Pelo kɛ lɛ nɛ, Davida a kiwi, Kirisibaali na á yɛ kaa lɛa, Dɛnaa lɛ nɛ, Lawa bɛ́ á pɛ, mà asɛ á re Minin Nyin-sili mɛn lɛ diɛ.

¹²Ka bɛ́ re doɛ̃ màn mɛn li, bɛ n ka kɛ nɛ: Ka á die nɛnyaan tiɛɛ̃n yii, tɔɔn màn bii ǹ goo ne, mɔnaa gɔnɔn nə́ pɛnɛɛ nɛ a ganaa.»

¹³Bɛa bǎã-n gɔrɔ lon a dia dí-a wole gigiã bɔ Lawa li, ǹ nə́ daa goon kɛ lɛ li, bɛ̀ ǹ nə́ Lawa tɔ boe, ǹ nə́ pii:

¹⁴«Lon màn tumaa Lawa guguru kɔ! A na a là nyantoro koe kanaa minin la, a giala, a tá ǹ narɛ.»

¹⁵Lon a dia dí-a wolen lɛn bɛ́ ǹ nə́ n bɔ ǹ li, ǹ nə́ wusoo ǹ nə́ woo lon ǹ mɛn waáraa, tɔɔn-lɛduə̃lin lɛn nə́ pɛ kɔn nɛ kɛnɛn: «Ka daa wɔ n ta yǎa Bɛtlehɛmu, sii mɛn nə n zɛnaa, Dɛnaa Lawa màn mɛn boo da wɔsɛn manɛ, á siĩni wɔ yii bɛ yɛ.»

¹⁶Ǹ nə́ yoo fufuu, ǹ nə́ woo kiwi lɛ nɛ, ǹ nə́ woo Zozɛfu laanka Mariya yaa, ka nɛnyaan boɛɛn lɛ dɔ nɛ naa-n tɔɔn màn bii ǹ goo ne.

¹⁷Ǹ bɛ́ ǹ nə́ yɛ, lon a dia dí-a wole bɛ́ á màn mɛn pɛ ǹ nɛ, bɛa nɛnyaan tiɛɛ̃n lɛ wɔ gɔn la, ǹ nə́ bɛ laakalaa.

¹⁸Min mɛnɛn dinin tumaa nə n too kɔ tɔɔn-lɛduə̃lin lɛn lon, bɛn nə́ n kaãbaa ǹ da ǹ boo ganaa.

¹⁹Sɛnɛ, Mariya sɛ na á goã bɛ tumaa tamaɛ a din yiri ni, bɛ̀ á n taasɛ a ganaa.

²⁰Bɛ kio, tɔɔn-lɛduə̃lin lɛn nə́ wusoo ǹ nə́ woo ǹ bǎã nɛ. Ǹ màn mɛn ma, ǹ nə ǹ mɛn dɔ yɛ, ǹ nə́ goã Lawa a golebaa boo diɛ, ǹ ná a tɔ boe bɛa lɛa. Bɛ din tumaa na á n zɛnaa á kɔnpɛ ka lon a dia dí-a wole lɛ a boo pɛ nɛ.

²¹ Lɛawaa kiwisi bɛ kio yǎa nɛ lɛ a kurii dɔ. Ǹ ná a tɔ kɔ mà Yezu, lon a dia dí-a wole bɛ́ á tɔ mɛn boo da, bɛ̀ nɛ lɛ dan din bɛ́ a tɔn na a nɔ̀ si wa.

²² Lɛawaa pusi, nɛ lɛ a yɛ kio, a kɔnpɛ ka Lawa a dí-pɛn lɛn nɛ Muizu ni, Mariya a *gɔ̀ bɔ ma ganaa pinaa dɔ. Zozɛfu laanka Mariya yoo, ǹ nə́ woo ka nɛ lɛ-n Zeruzalɛmu kiwi, màn mɛn bɛ́ toɛ, ǹ nə ǹ landa soɛ̃ siin bɔ ǹ ganaa, ǹ nɛ lɛ kɔ Dɛnaa Lawa la.

²³ Maǹ nə́ zɛnaa miɛ̃, a giala a n kiɛ̃ nɛ Dɛnaa Lawa a dí-pɛn lɛn nɛ, mà bɛ̀ lɔ gɔn binaa nɛginin baa, mà bɛa nɛ lɛ n Lawa wɔ lɛa.

²⁴Ka bɛ dɔ nɛ, Zozɛfu laanka Mariya doamaa nɛ ǹ nə ǹ *wúlu mànan bɔ, a kɔnpɛ ka Dɛnaa Lawa a dí-pɛn lɛn nɛ: «Wuruun màn paa, hinlaa zɛrɛkantoan bɔnboɛɛn màn paa.»

²⁵Á daa yaa giĩ goon tá Zeruzalɛmu kiwi, a tɔ n Simiɔn. Bɛa giĩ lɛ na á goã min pepere lɛa, a n nyɛ́ɛ biɛ Lawa yii ni, bɛ̀ á n yii diɛ Izirayeli minin nyin-sili lɛ la. Lawa a Yiri Fu na á goã la,

²⁶a na á goã á nyaa nɛ mà Dɛnaa Lawa bɛ́ á nyin-sili mɛn boo da, mà a die giɛ̃ bɛ̀ a yii ná a bɛ yɛ wa.

²⁷Lawa a Yiri Fu lɛ da a yiri-a, mà a wo Lawa a kion biikoo mɛn waáraa, bɛ̀ nɛnyaan tiɛɛ̃n Yezu lɛ di laanka ǹ dan daa kɔ Lawa la, a kɔnpɛ ka Lawa a dí-pɛn lɛn nɛ.

²⁸Simiɔn lɛ nɛ lɛ saa a gɔn, á barka da Lawa nɛ ka loe ne:

²⁹«Dɛnaa Lawa, sisia, n lɛ kɔ ǹ boo lɛ lɛ pã kəni. N tá boe la n toa masɛ mɛn bɛ́ n din a bɛ̀rɛgiĩ lɛa, ma wo geren piɛ sisia ka nyɛnyɛɛ nɛ.

³⁰A giala, ma yii yɛ, n ná a giala kɔ n tá n minin nyin si ǹ dí lɛ nyɛɛ kəni.

³¹Tɔrɔ din tumaa dɔ n die bɛ yii:

³² A n die wɔlɔ fúlu boe tɔrɔn tumaa nɛ, a n gugurubaa koe n din a tɔrɔ boe kɛ la, bɛ mɛn bɛ́ ka Izirayeli ni.»

³³Simiɔn goã boo mɛn yii diɛ nɛ lɛ wɔ gɔn la, bɛn man nə́ goã kaãbaa diɛ ǹ di laanka ǹ dan ganaa.

³⁴Bɛ kio, Simiɔn ná a nyankɔ Lawa lon, mà á barka wɔ ǹ nɛ, á tɔ́n pɛ nɛ lɛ dan Mariya nɛ: «Lawa na á nɛ kɛ lɛ bɔ á dia, á n die Izirayeli min gigiã a mɛnaa a bɔ̀n baa ǹ gòã biɛ, a gigiã dɔ a yoo a kirisibaa ǹ gòã baa. Nɛ lɛ n die Lawa foo dí-nyaali biɛ, sɛnɛ, minin man die n piɛ̃ nɛ, ǹ boo baraa dɔ a ganaa.

³⁵Bɛ lɛ gɔ́ɔ̃ nɛ, a n die min gigiã gɔ́ɔ̃gɔ́ɔ̃ ǹ taasiɛ duriin boe, a ǹ kaa wɔlɔ fúlu ganaa. Sɛnɛ nsɛ, busii á die n là paparɛɛ ka gɔya a min fɔ̃ ǹ bǎã bɛ́ lɔn.»

³⁶Lɔ goon dɔ na á goã a din Zeruzalɛmu kiwi lɛ nɛ, Lawa a boo gii-dali lɛa, a tɔ n Anɛɛ, n di tɔ na á goã Fanoeli, Asɛɛrɛ tɔrɔ nɛ. Bɛa lɔ lɛ zizi kɔ parsiini. A na á giã kun ka ǹ zuũ ni lɛ̀ sɔbaa dinsɔɔ̃, yǎa ǹ zuũ gã.

³⁷Bɛ kio, á goã lɔ giɔɔrɔbaa nɛ, yǎa á zizi kɔ á woo dɔ lɛ̀ pɔkiwisiwensii. A goã soe doo á n boe Lawa a kion wa, a na á goã Lawa guguru koe tèlò laanka penleen ne, bɛ̀ a nə́ n lɛ soɛ á n Lawa nyankoe.

³⁸A dɔ bɛ́ á soo gɔrɔ á kɔnpɛ ka nɛnyaan lɛ a kɔ Lawa la nɛ, á yoo á n Lawa tɔ boe. Bɛ kio, á nɛ lɛ boo da Zeruzalɛmu kiwi minin manɛ, ǹsɛn mɛnɛn bɛ́ ǹ yii diɛ mà Lawa á die ǹsɛn gána nyin sii.

³⁹ Mariya laanka Zozɛfu bɛ́ ǹ nə́ ǹ siin yii yɔrɔ bɔ, á kɔnpɛ ka Dɛnaa Lawa a dí-pɛn lɛn nɛ, ǹ nə́ wusoo ka Yezu ni, ǹ nə́ woo Galilee gána nɛ, ǹ kiwi Nazarɛti.

⁴⁰Nɛ lɛ sɛ na á goã gole koe, bɛ̀ á n pàã yii, a na á goã woe nyɛɛnɛ parsiini Lawa foo sii doɛ̃ gɔ́ɔ̃ nɛ, a n foaã nɛ dɔn mà Lawa á narɛ.

⁴¹ Lɛ̀ woo lɛ̀, Yezu a yɛ wolen man woe Zeruzalɛmu kiwi, ǹ Zuifun soo a *kiɛ̃mala ǹ zɔ́n zɛnaa.

⁴²A kɔnpɛ ka ǹ landa sii ni, Yezu bɛ́ á dɔ lɛ̀ fulupaa, ǹ nə́ woo zɔ́n lɛ ganaa ka a dɔ nɛ.

⁴³Zɔ́n lɛ bɛ́ á nya, ǹ nə́ wusoo ǹ nə́ woo piɛ, sɛnɛ, Yezu lɛ sɛ goã Zeruzalɛmu kiwi, ǹ di laanka ǹ dan nə bɔ a siére-a wa.

⁴⁴Maǹ nə́ goã taasɛ, mà Yezu na á goã kun ka ǹ miã lɛ zii tɔ-wɔlen ne, ǹ nə́ zii tɔ wɔ yǎa wasa mɛ. Bɛ kio, ǹ nə́ yoo ǹ nə́ giɛ li ǹ tɔrɔn laanka ǹ giaáran bii.

⁴⁵Ǹ nɛ lɛ yɛ wa, bɛ lɛ taman yii, ǹ nə́ wusoo ǹ nə́ ga li yǎa Zeruzalɛmu kiwi doo.

⁴⁶A lɛawaa sɔɔbaa ǹ wɔ pinaa kəni, ǹ nə́ woo yaa Lawa a kion, á n giã-n tán landa sii-daraalin bii, a nə́ n too koe ǹ lon, bɛ̀ á n nɔ̀n diɛ ǹ la.

⁴⁷Min mɛnɛn yii goã n too koe nɛ lɛ lon, bɛn tumaa goã n kaãbiɛ a sii-doɛ̃ ganaa ka a boon lɛ si ǹ gɔn nɛ.

⁴⁸Ǹ di laanka ǹ dan bɛ́ ǹ nə́ yɛ, bɛa sii lɛ nə́ ǹ tɔwaa parsiini, ǹ dan nə́ tɔ́n pɛ nɛ: «Maa nɛ, wàa na á baa ń kɛ zɛnaa wɔsɛn manɛ? N di laanka masɛ gɔ́ɔ̃ biimaa nɛ, bɛ̀ wɔ á giɛ n li.»

⁴⁹Yezu tɔ́n pɛ ǹ nɛ kɛnɛn: «Wàa na á baa ka á giɛ ma li? Ka a doɛ̃ mà masɛ doamaa nɛ ma goã ma Di a kion wa?»

⁵⁰Sɛnɛ, ǹ bɛa boo kɛ lɛ giala ma a lon wa.

⁵¹Bɛ kio, Yezu yoo á woo kunun ǹ ni Nazarɛti kiwi, á goã ǹ di laanka n dan bɔlɔ sii. N dan Mariya na á goã bɛa siin kɛn lɛn tumaa tamaɛ a gɔ́ɔ̃ nɛ.

⁵² Yezu dinmaa lɛ sɛ na á goã gole koe, bɛ̀ á n gɔ̀nɔn yii, a yiri dɔ n gole koe woe nyɛɛnɛ. A sii na á goã kɔɔ̃n Lawa ganaa ka minbuiinin ni.