Read Samo, Southern Luk 20 Bible Online

Luk 20 - Samo, Southern bible

Luk 20

¹Ǹ kɔ́n pinaa Yezu na á goã minin darɛɛ Lawa a kion. A na á goã Boo Tii Kɔɔ̃n kɛ pii. Wúlu-bɔlen goledɛnan nə́ daa ka landa sii-daraalin ni ka min golen ne,

²ǹ nə́ nɔ̀n da la mà a n bɛa siin kɛn lɛn zɛnɛɛ ka wàa pàã nɛ? Mà die na á bɛa pàã lɛ kɔ la? Mà a bɛ pɛ ǹsɛn manɛ.

³Yezu nə́ ǹ lɛ si kɛnɛn: «Masɛ dɔ n die nɔ̀n goon diɛ ka la. Ka pɛ masɛ nɛ:

⁴Die na á Zaã dia *batɛmu lɛ diɛ minin ganaa? Lawa na á dia hinlaa minin manɛ?»

⁵Sɛnɛ ǹ nə́ yoo ǹ nə́ liere koe ǹ dinin bii ni, bɛ̀ ǹ nə́ pii mà bɛ̀ ǹsɛn nə́ pɛ mà Lawa na á dia, mà a n die pii ǹsɛn manɛ mà wàa na á baa ǹsɛn nə waa Zaã a boo la wa?

⁶Sɛnɛ, mà bɛ̀ ǹsɛn nə́ pɛ mà minin man nə́ dia, mà zaman nə die ǹsɛn dii ka kɔlɔ nɛ ǹsɛn nə gã, a giala, mà min tumaa waa la, mà Zaã na á goã Lawa a boo gii-dali goon lɛa.

⁷Ǹ nə́ tɔ́n na a lɛ si mà ǹsɛn ba doɛ̃ min mɛn bɛ́ á dia wa.

⁸Yezu dɔ mà bɛ̀ á miɛ̃, mà asɛ dɔ a pàã lɛ bɛ́ boe bǎã mɛn nɛ, asɛ n siin kɛn lɛn zɛnɛɛ nɛ, mà asɛ a bɛ pii wa.

⁹ Bɛ kio, Yezu boo giməə kɛ da minbuiin lɛ nɛ á pɛ: — Giĩ goon na á da wuru bɔ, á kɔ dí-nyalin la mà ǹ ga a walan, bɛ̀ á nɛ kɔ, ǹ na a nɛ gii kɔn ka asɛ nɛ. Bɛ kio a din nə́ woo zii ni, á n die beleboe walan.

¹⁰Da nɛ niɛ̃ biikoo bɛ́ á dɔ, a ná a bɛ̀rɛgiĩ goon dia wuru dí-nyalin lɛn li, mà ǹ na asɛ a da nɛ gii kɔ la a da nɛ. Sɛnɛ, wuru dí-nyalin lɛn nə́ bɛ̀rɛgiĩ lɛ kũ ǹ nə́ dɛ, ǹ nə́ da á woo ka a gɔn kooro ne.

¹¹Wurudɛnaa lɛ bɛ̀rɛgiĩ kɔsɔ dia, sɛnɛ, wuru dí-nyalin lɛn ná a dɔ kũ ǹ nə́ dɛ, ǹ nə́ sìi da a ganaa, ǹ nə́ da á woo ka a gɔn kooro ne.

¹²Wurudɛnaa lɛ bɛ̀rɛgiĩ lɛ a sɔɔbaa ǹ wɔ dia. Ǹ nə́ bɛ dɔ dɛ, ǹ nə́ mà bɔ a ganaa, ǹ nə́ zũ kanaa.

¹³Wurudɛnaa lɛ tɔ́n pɛ mà asɛ n die wàa zɛnɛɛ kəni? Asɛ a nɛgiĩ mɛn bɛ́ kɔɔ̃n asɛ-a parsiini, mà asɛ n die bɛ lɛ diɛ. Mà kɔntan, ǹ tá re nyɛ́ɛ biɛ bɛ-n sɛn.

¹⁴Sɛnɛ, wuru dí-nyalin lɛn yii bɛ́ á mɛ a ganaa lɔn, ǹ nə́ pɛ kɔn nɛ: «Á ke, a kíɛ̃-saali lɛ nɛ. Ka daa wɔ dɛ, wuru lɛ wɔsɛn dinin wɔ baa.»

¹⁵Ǹ nə́ kũ ǹ nə́ bɔ wuru lɛ nɛ, ǹ nə́ dɛ á gã. Yezu tɔ́n nɔ̀n da: «A bɛ́ á n baa miɛ̃, wurudɛnaa lɛ n die wàa zɛnɛɛ kəni?

¹⁶A n die die a wuru dí-nyalin kɛn lɛn dɛ ǹ gã, á wuru lɛ koa min kɔsɔn li, ǹ na a dí nya.» Minin bɛ́ ǹ nə́ boon kɛn ma, ǹ nə́ pɛ mà Lawa die a ǹsɛn kanbaa kɛ ganaa!

¹⁷ Sɛnɛ, Yezu ga ǹ ganaa á pɛ: — Lawa a boo lɛ a paǹ kɛ n wàa mɛn giala pii: «Kion-dɔlen bɛ́ ǹ nə́ n piã ka kɔlɔ mɛn nɛ, bɛ lɛ na a wusoo á kɛ gùrù dɔ ǹ kɔlɔ baa?»

¹⁸Bɛ̀ min mɛn nə́ bɔ á mɛnaa bɛa kɔlɔ kɛ lɛ la, ǹ dɛnaa gù yii n yiyiɛ. Bɛ̀ kɔlɔ lɛ din dɔ bɔ á mɛnaa min mɛn la, a n bɛa dɛnaa yɔyɔrɛ.

¹⁹Landa sii-daraalin laanka wúlu-bɔlen goledɛnan nə́ dɔ̃, mà Yezu na á boo giməə kɛ lɛ da ǹsɛn ganaa. Bɛ lɛ tamaa yii, maǹ nə́ goã giɛ li ǹ kũ bɛa bǎã kɛ lɛ nɛ, sɛnɛ, maǹ nə́ nyɛ́ɛ baa zaman nɛ.

²⁰Ǹ nə́ nɔmaa ǹ nə́ giɛ Yezu gɔn li. Ǹ nə́ minin bɔ, bɛn nə́ n dinin baa ka maǹ min peperen lɛa, ǹ nə́ ǹ dia Yezu li. Bɛn man nə́ goã giɛ li ǹ Yezu kũ a din lɛ gɔ́ɔ̃ ǹ boo-a, a n baa a gòãn kuru pàãdɛnan li ǹ gɔn lɛa.

²¹Ǹ nə́ nɔ̀n kɛ da la: «Mìinaa, wɔsɛn tá doɛ̃ wáa n bɛ́ màn mɛn pii, n bɛ minin darɛɛ ǹ mɛn-a, bɛ á pepere. N ba bɔkɔnlɛ we wa. Minin doamaa bɛ́ nɛ ǹ tɔ wɔ pepere lɔn Lawa a zii la, ma n minin darɛɛ bɛ ganaa sɔnbɔraanɛ.

²²Á siĩni wɔ nyin giɔ̀mɔ saraa Rɔmun kii gole gole kɛ la, hinlaa wɔ baran saraa wa?»

²³Sɛnɛ, Yezu nə́ ǹ minin sã ǹ yiri boo kɛ dɔ̃, á pɛ ǹ nɛ:

²⁴«Ka wɔrɔ we goon nyaa masɛ nɛ. Die mìi nyin na a ganaa, ka die tɔ nɛ?» Ǹ ná a lɛ si mà kii gole gole kɛ nɛ.

²⁵Yezu tɔ́n pɛ ǹ nɛ: «A bɛ́ miɛ̃, màn mɛn bɛ́ kii wɔ lɛa, ka bɛ kɔ kii la, ǹ mɛn dɔ bɛ́ Lawa wɔ lɛa, ka bɛ kɔ Lawa la.»

²⁶Ǹ boo la ǹ nə́ sã ǹ boo kɔn kũ Yezu lɛ-n zaman lɛ yɔrɔ-a wa. Ǹ nə́ n kaãbaa Yezu a boo lɛ si ǹ gɔn lɛ ganaa, yǎa ǹ nɔmaa ǹ nə́ n lɛ tã.

²⁷*Sadusɛɛ̃n mɛnɛn bɛ́ ǹ ba lɛ koe mà geren yii á die kiɛ wa, bɛn kɔnɔn man nə́ daa Yezu li, ǹ nə́ pɛ nɛ:

²⁸ «Mìinaa, Muizu na á landa sii kɛ kiɛ̃ á kɔ wɔsɛn la: bɛ̀ min dɔɔ̃n nə́ lɔ saa, á goã a ná a nɛ yɛ lɔ lɛ-a wa yǎa á woo gã, ǹ dɛnaa nə ǹ dɔɔ̃n a lɔ lɛ saa a nɛnyaanan yɛ a ganaa, màn mɛn bɛ́ toɛ, ǹ dɔɔ̃n lɛ tɔrɔ goã.»

²⁹Sadusɛɛ̃n lɛn nə́ pɛ: «Á ke, dɔɔ̃nɔn kɔnɔn man nə́ goã min sɔbaa. Ǹ bibinaa lɔ goon saa, a nɛ yɛ-a wa, á gã.

³⁰Ǹ paabaa ǹ wɔ dɔ́ lɔ lɛ wɔ,

³¹bɛ kio ǹ sɔɔbaa ǹ wɔ. Sii lɛ nə́ n zɛnaa kɔn kio-a miɛ̃, yǎa á woo dɔ ǹ sɔbaamaa tumaa ganaa. Sɛnɛ, ǹ tumaa gã bɛ̀ ǹ kɔ́n ná a nɛ yɛ lɔ lɛ-a wa.

³²Bɛ tumaa kio kəni, lɔ lɛ dɔ́ gã.

³³Haya, bɛ̀ geren yii kaa ǹ mɛn pinaa, bɛa lɔ kɛ lɛ n die goɛ̃ die wɔ lɛa? A giala, ǹ dinin sɔbaamaa tumaa wɔ lɔ lɛa!»

³⁴Yezu nə́ ǹ lɛ si á pɛ ǹ nɛ: «Lɔ saa laanka wɔ giĩ li n kanaa kɛ wɔ lɛa.

³⁵Sɛnɛ, geren yii kaa li, Lawa bɛ́ re lɛ koe min mɛnɛn nə giã kanaa dii kɛ nɛ, bɛn ba re lɔ siɛ wa, lɔn dɔn ba re we giĩ li wa.

³⁶Bɛn ba boe la ǹ gã doo wa. Maǹ goon ka lon a dia dí-a wolen ne. Maǹ Lawa a nɛnyaanan lɛa, a giala, ǹ yii kaa ǹ nə́ n bɔ geren bii.

³⁷ Muizu nyaa foaãnɛ, mà geren yii doamaa nɛ a kaa. Tɛ yoo daãn mɛn ganaa, Muizu bɛ́ bɛ boo diɛ sɛ́wɔ paǹ mɛn nɛ, a na á Dɛnaa bíi mà "Abrahamu a Lawa, Izaaki a Lawa, ka Zakɔba a Lawa".

³⁸Lawa lɛ, a n yiikoonaan Lawa lɛa, a bie geren Lawa lɛa wa, a giala, min tumaa yii n koo Lawa yɔrɔ-a.»

³⁹Landa sii-daraalin kɔnɔn nə́ boo saa ǹ nə́ pɛ mà Mìinaa ganaa, mà á boo sonbore da.

⁴⁰A giala, ǹ yii goã we la doo, ǹ nə́ nɔ̀n diɛ ka sii kɔ́n nɛ wa.

⁴¹Yezu pɛ zaman lɛ nɛ: — A n siɛ lɔn minin nə́ pii mà Minin Nyin-sili lɛ n Davida a nɔ̀ɔn lɛa?

⁴² Kii Davida dinmaa dɔ lɔ loe-n kɛnɛn: Dɛnaa Lawa pɛ maa Dɛnaa nɛ: «Giã ma gusin,

⁴³yǎa ma gɔ̀lɔ̀baa lɛ piɛ̃ koe n la, n zɔ́ɔn nə die kiɛ tán n gòãn giulun.»

⁴⁴Kii Davida n Nyin-sili lɛ bíi mà asɛ a Dɛnaa. A n goɛ̃ a nɔ̀ɔn dɔ lɛa lɔn doo?

⁴⁵Zaman mɛn tumaa bɛ́ n too koe a lon, Yezu pɛ a kialandɛnan manɛ bɛn lɛn yɔrɔ-a kɛnɛn:

⁴⁶«Ka n dinin kũ landa sii-daraalin kɛn ganaa. Bibiə̃ ka mɔnaa dadaran nɛ n kɔɔ̃nɛ ǹ ganaa. Ǹ fòo da ǹ nɛ, ǹ nə ǹ guguru kɔ, bɛ n kɔɔ̃nɛ ǹ-a zaman bǎãn nɛ. Lɛsɔkɔn kionən ne ka zɔ́n màn bii ǹ bǎãn nɛ, maǹ giɛ nyɛɛnaa ǹ bǎãn li, màn mɛn bɛ́ toɛ, ǹ nə ǹ yɛ.

⁴⁷Maǹ Lawa nyan sɔsɔrɔn koe, ǹ nə́ n dinin biɛ min taãnan lɛa minin yɔrɔ-a, a da yaa maǹ mɛnɛɛ lɔ giɔɔrɔn la, ǹ tá ǹ gɔn mànan sii ǹ la. Lawa á die dɔlɔ gole diɛ ǹ mìi ni a la ǹ miãn wɔ nɛ.»