Read Samo, Southern Luk 24 Bible Online

Luk 24 - Samo, Southern bible

Luk 24

¹Piizii a lɛawaa bibinaa pinaa, baayɛlɛ yiisoone, lɔn lɛn nə́ daa Yezu a yala bǎã lɛ nɛ ka ǹ nyɔɔ gìĩ kɔɔ̃n kɛ nɛ, ǹ bɛ́ ǹ nə́ ǹ mɛn zɛnaa a tɔ ganaa.

²Ǹ nə́ woo yaa gere yala lɛ tã ǹ kɔlɔ lɛ nə́ n birikəə á n bɔ yala lɛ lɛ-a.

³Ǹ bɛ́ ǹ nə́ wɔ yala lɛ nɛ, ǹ wo Dɛnaa Yezu gere lɛ yaa wa.

⁴Ǹ yiri bɛ́ á n lɔlɔkɔn bɛa sii lɛ gɔ́ɔ̃ nɛ, giĩ min paa daa gɔrɔ, ǹ nə́ n dinin nyaa lɔn lɛn manɛ, mɔnaa fu ka piepie nə́ ǹ ganaa.

⁵Nyɛ́ɛ lɔn lɛn kũ, ǹ nə́ n mìi zuməə ǹ nə́ giɛ tán. Bɛa biikoo li giĩ min paa lɛ pɛ ǹ nɛ: «Wàa na á baa ka á giɛ min yiikoonaa kɛ li geren bii?

⁶ A ba kànaa wa. A yii kaa á n bɔ geren bii. A bɛ́ á màn mɛn pɛ ka nɛ, bɛ̀ a bɛ́ Galilee gána nɛ, ka n yiri gisĩ bɛ lɛ nɛ.

⁷Táa a na á goã á pɛ mà yǎa Min a Nɛgiĩ nə n koe min baraan la, bɛn nə dere gɔn-a, a gɛ̀ lɛawaa sɔɔbaa ǹ wɔ pinaa a yii kaa a n bɔ geren bii.»

⁸Lɔn lɛn yiri tɔ́n daa bɛa boon kɛn lɛn nɛ.

⁹Ǹ nə́ wusoo ǹ nə́ n bɔ yala lɛ lɛ-a, ǹ nə́ woo sii kɛ din tumaa laakalaa dia dí-a wole fulugoon lɛ nɛ, ka min gialakunun kɛn dɔn nɛ.

¹⁰Lɔn mɛnɛn nə wo boo lɛ pɛ dia dí-a wolen lɛn manɛ, Mariya mɛn bɛ́ boe Magadalaa kiwi, bɛ nɛ ka Zaãnɛ nɛ, ka Zaakin dan Mariya nɛ, ka ǹ miãn gialakunun kɛn nɛ.

¹¹Dia dí-a wolen lɛn yii li boon kɛn man nə́ goã ka nyiǹ bɛ́ lɔn, ǹ golee lɔn lɛn boo li wa.

¹²Sɛnɛ, Piɛrɛ sɛ yoo á baa si á woo yala lɛ lɛ-a. A bɛ́ á n zuməə á n yii kɔ a nɛ, a na á mɔnaa gɔnɔn dininsɔɔ̃nɔn yɛ. A dɔ́ nə́ n kaãbaa bɛa sii kɛ lɛ a zɛnaa ganaa, á wusoo á woo piɛ.

¹³Á ke, a din pinaa lɛ nɛ, kialandɛnan lɛn min paa n woe kiwi kɔ́n nɛ, a tɔ n Emaayusu. Bɛa kiwi lɛ n sɔsɔɔ Zeruzalɛmu ganaa ka kilo fù miã nɛ.

¹⁴Siin mɛnɛn tumaa nə n zɛnaa, ǹ bɛ́ zii la maǹ nə́ goã sùn biɛ bɛn ganaa.

¹⁵Ǹ bɛ́ boo diɛ kun, ǹ nə́ liere koe, Yezu dinmaa daa ǹ li á zii tɔ wɔ kunun ǹ ni.

¹⁶Sɛnɛ, a na á goã ka màn na á n kɔ ǹ yii lɛ, ǹ Yezu dɔ̃ wa.

¹⁷Á nɔ̀n da ǹ la: «Ka n wàa mɛn sùn biɛ kun kaa zii tɔ wɔ lɛ gɔ́ɔ̃ nɛ?» Ǹ nə́ golee, ǹ yɔrɔ n kɔsiɛ-n parsiini.

¹⁸Ǹ goon mɛn tɔ bɛ́ Kilopaasi, bɛ ná a lɛ si mà siin mɛnɛn nə n zɛnaa lɛawaan kɛn lɛn nɛ, mà a dinsɔɔ̃ n die goɛ̃ Zeruzalɛmu kiwi a ná a bɛn ma wa?

¹⁹A dɔ́ nɔ̀n da ǹ la mà wàa mɛn na á n zɛnaa? Ǹ nə́ wusoo ǹ ná a lɛ si: «N bɛ ma wa? Màn mɛn bɛ́ á n zɛnaa Nazarɛtin Yezu-n lɛn! Táa a na á goã Lawa a boo gii-dali pàãdɛnaa lɛa. A na á bɛ nyaa a zɛnaa ǹ siin li ka a da ǹ boon ne Lawa yɔrɔ-a, gána lɛ a minin dɔn tumaa yɔrɔ-a.

²⁰Wɔa wúlu-bɔlen goledɛnan laanka wɔa goledɛnan kɔsɔn man nə́ kɔ a zɔ́ɔn la, bɛn nə́ gɛ̀ dɔlɔ da a mìi ni, ǹ nə́ dere gɔn ganaa.

²¹A na á goã wɔsɛn yiri ni, wɔ́ a din lɛ n die Izirayeli nɛnyaanan bɔ fuu-n wole lɛ biɛ. Sɛnɛ, bɛa siin lɛn zɛnaa a lɛawaa sɔɔbaa ǹ wɔ n ke pelo.

²²Bɛ tumaa kio wɔa lɔn kɔnɔn man nə́ daa kaãbaa da wɔ ganaa. Maǹ nə́ woo yala lɛ-a baayɛlɛ yiisoone,

²³ǹ na a gere lɛ yɛ wa. Ǹ nə́ wusoo ǹ nə́ daa pɛ, mà ǹsɛn nə́ lon a dia dí-a wolen yɛ, mà bɛn nə́ pɛ mà Yezu lɛ yii á koo.

²⁴Wɔ miãn tɛnɛn nə́ woo yala lɛ lɛ-a, mà ǹ màn mɛn yɛ mà bɛ́ kɔnpɛ ka lɔn lɛn boo diɛ nɛ, sɛnɛ, ǹ Yezu dinmaa kɛ yɛ wa.»

²⁵Yezu tɔ́n pɛ ǹ nɛ: «Yiribaãnaan lɛn, ka a lɛ koe Lawa a boo gii-dalin lɛn boo ganaa fufuu wa.

²⁶Ka a doɛ̃, mà Nyin-sili lɛ doamaa nɛ, a bɛa fuu kɛ lɛ tumaa yɛ, a tɔn wo giã a din a gugurubaa ǹ bǎã kɛ-n wa?»

²⁷Bɛ kio á boo saa doo, Lawa a boo á màn mɛn tumaa diɛ a wɔ gɔn la, á bɛ giala pɛ ǹ nɛ. A ná a giala kɔ Muizu a sɛ́wɔn ganaa, á daa Lawa a boo gii-dalin gialakunun kɛn wɔn yaa.

²⁸Ǹ bɛ́ ǹ nə́ dɔ ǹ woo ǹ kiwi lɛ nɛ, asɛ baa ka a n kiɛ̃ á woe nyɛɛnɛ.

²⁹Ǹ ná a nyankɔ mà a golee kunun ǹsɛn nɛ, a giala biikoo kiɛ̃, wasa mɛ á nya. Á lɛ kɔ á golee á wɔ kion kunun ǹ ni.

³⁰A bɛ́ á giã tán màn-bii la kunun ǹ ni, á buuru saa, á Lawa nyankɔ, á barka da a ganaa, á yiyiɛ kɔn á kɔ ǹ la.

³¹Ǹ yii tɔ́n toɛ̃ bɛa waáraa kəni, ǹ nə́ Yezu dɔ̃, sɛnɛ, á papaã ǹ yɔrɔ-a.

³²Ǹ nə́ pɛ kɔn nɛ mà a bɛ́ boo diɛ ǹsɛn nɛ zii la, á n Lawa a boo giala pii ǹsɛn manɛ, mà a boo lɛ na á goã ǹsɛn foo kuĩ taãn-taãnɛ!

³³A din bǎã-n gɔrɔ ǹ nə́ wusoo ǹ nə́ woo Zeruzalɛmu, ǹ nə́ woo dia dí-a wole fulugoon lɛ yaa, ǹ lɛ n soe-n kɔn kun ka ǹ miãn nɛ.

³⁴Bɛn nə́ pɛ bɔ zii-n wolen lɛn manɛ: «Sonbore ne, Dɛnaa lɛ yii kaa á n bɔ geren bii. Á n din nyaa Simɔn nɛ.»

³⁵Siin mɛnɛn nə n zɛnaa ǹ dɔn manɛ zii gialaa, Yezu lɛ buuru saa á yiyiɛ lɔn ǹ nə́ tɔ́n dɔ̃, ǹ nə́ bɛn laakalaa.

³⁶Ǹ bɛ́ boo diɛ miɛ̃, Yezu daa soo ǹ bii, á pɛ ǹ nɛ: «Lawa là nyantoro kɔ ka la.»

³⁷Ǹ yiri nə́ n lɔlɔkɔn, nyɛ́ɛ dɔ nə́ ǹ kũ parsiini. Maǹ nə́ goã taasɛ mà ǹsɛn yii n màn nyin ganaa.

³⁸Yezu pɛ ǹ nɛ: «Wàa mɛn yiri lɔlɔkɔn nɛ? Wàa na á baa golee sii goon la ba ka foo-n wa?

³⁹Ka ga ma gɔnɔn ganaa ka ma gòãn nɛ. Ma din ni. Ka n gɔn da ma-a ka ga a ganaa. Gɔ̀nɔn siĩ laanka we ba màn nyin lon, ka ka yii bɛ́ a ganaa masɛ lon lɔn wa.»

⁴⁰A bɛ́ á bɛa boon lɛn da, á n gɔnɔn laanka a gòãn nyaa ǹ nɛ.

⁴¹Ka n pɛ mà nyɛnyɛɛ laanka kaãbaa na á la ǹ yii ni, ǹ goã boe la ǹ nə́ golee li bǎã goon ne wa. Á pɛ ǹ nɛ mà màn-bii kɔ́n tan ǹ lon kànaa ya?

⁴²Ǹ nə́ zɔ̀-tiɛ̃ lɛkoro kɔ la,

⁴³á si á sɔ̃ ǹ yɔrɔ-a.

⁴⁴Bɛ kio á pɛ ǹ nɛ: «Á ke man má goã má boon kɛn pɛ ka nɛ, bɛ̀ ma bɛ́ kun ka nɛ. Màn mɛn tumaa nə n kiɛ̃ masɛ wɔ gɔn la Muizu a dí-pɛn sɛ́wɔ nɛ, Lawa a boo gii-dalin wɔn nɛ, ka Loen sɛ́wɔ nɛ, yǎa bɛ lɛ tumaa lɛ piɛ̃.»

⁴⁵Á tɔ́n nə ǹ yiri bũ, màn mɛn bɛ́ toɛ, ǹ Lawa a boo lɛ giala ma.

⁴⁶Á pɛ ǹ nɛ: «Màn mɛn nə n kiɛ̃ bɛ á ke: Minin Nyin-sili lɛ n die fuu yii, sɛnɛ, a gɛ̀ lɛawaa sɔɔbaa ǹ wɔ pinaa, a yii á re kiɛ a n bɔ geren bii.

⁴⁷Maǹ die a giala koe Zeruzalɛmu ganaa, ǹ Lawa a boo pɛ ka a din tɔ nɛ tɔrɔn tumaa nɛ, mà ǹ wusoo ǹ sii baraan kio, ǹ golee Lawa li, màn mɛn bɛ́ toɛ, Lawa nə ǹ sii baraan toa ǹ nɛ.

⁴⁸Ka dinin lɛn man bɛ lɛ a siéren lɛa.

⁴⁹ Ma Di bɛ́ á n lɛ kɔ ka màn mɛn nɛ, masɛ n die bɛ lɛ diɛ ka la. Sɛnɛ, ka giã Zeruzalɛmu kiwi bɔrɔ, yǎa pàã boe lon a die gisĩ ka la.»

⁵⁰Bɛ kio, Yezu soo, á woo ǹ ne kiwi lɛ kio, dia-n woe Betaanii kiwi la. Á n gɔnɔn goa lon á Lawa nyankɔ mà a barka wɔ ǹ nɛ.

⁵¹A bɛ́ bɛa barka lɛ diɛ ǹ ganaa, á n na á n bɔ ǹ-a, á dii lon gɔ́ɔ̃ nɛ.

⁵²Dia dí-a wolen lɛn nə́ kaa tán-a a giulun, bɛ kio, ǹ nə́ wusoo ǹ nə́ woo Zeruzalɛmu, ǹ foo n piɛ̃-n ka nyɛnyɛɛ nɛ.

⁵³Bɛ kio, ǹ nə́ goã woe Lawa a kion miɛ̃, bɛ̀ ǹ Lawa guguru kɔ.