Read Samo, Southern Luk 7 Bible Online

Luk 7 - Samo, Southern bible

Luk 7

¹Yezu bɛ́ á boo da á nya zaman lɛ yɔrɔ-a, á woo Kafaranaamu kiwi.

²Giĩ goon nə bɛa kiwi lɛ nɛ, Rɔmu min lɛa, a n sɔraasi paabiɛ mìi la. Dí-nyali na á goã a lon á n narɛ parsiini, bɛa dí-nyali lɛ na á goã a lon wa, a n zoɛ̃ mà á giɛ̃.

³Bɛa sɔraasin goledɛnaa lɛ bɛ́ á Yezu boo ma, á Zuifun min yii guguru-an dia a li mà ǹ wo a nyankɔ mà a da asɛ a dí-nyali kɛ si gɛ̀ la.

⁴Dia dí-a wolen lɛn bɛ́ ǹ nə́ dɔ Yezu li, ǹ ná a nyankɔ parsiini ǹ nə́ pɛ nɛ: «Bɛ̀ n tá boe la n sii kɛ zɛnaa sɔraasin giĩ kɛ nɛ, á siĩni. A doamaa nɛ.

⁵A giala wɔsɛn gána á kɔɔ̃n a ganaa, ka bɛ dɔ nɛ, a din na á lɛsɔkɔn kion lɛ dɔ á kɔ wɔsɛn la.»

⁶Yezu zii kũ kunun ǹ ni. A bɛ́ á diri sɔraasin giĩ lɛ a kion la, bɛ ná a giaáran dia mà ǹ da pɛ nɛ: «Mìinaa, n baran nɔmaa da n din mìi-n wa, masɛ mìi á kiɛɛrɛ man laa n ganaa, mà n din Zuifu kɛ da wɔ masɛ kooro kɛ a kion.

⁷Man má bɛ lɛ yɛ má dɔ̃, máa masɛ doamaa bie ma da n li wa. Sɛnɛ, boo goon dinsɔɔ̃ da, masɛ a dí-nyali lɛ a busu á die nyɛɛ.

⁸Masɛ dinmaa lɛ n pàã giulun, sɔraasin nə́ ma dɔ giulun. Bɛ̀ má pɛ goon ne máa a woo, a n woe. Bɛ̀ má pɛ kɔsɔ nɛ máa a daa, a n die. Bɛ̀ má n toa maa dí-nyali ganaa máa a kɛ zɛnaa, a n zɛnɛɛ.»

⁹Yezu bɛ́ á boon kɛn ma, giĩ lɛ a sii kaa a foo la. Á n bɔyaa, zaman mɛn bɛ́ a kio, á pɛ ǹ nɛ: «Masɛ n pii ka nɛ, Izirayeli gána dinmaa nɛ, masɛ golee Lawa li kɔ́n yɛ ka kɛ bɛ́ lɔn wa.»

¹⁰Dia dí-a wolen lɛn bɛ́ ǹ nə́ wusoo ǹ nə́ woo piɛ, ǹ nə́ woo yaa dí-nyali lɛ a busu nya.

¹¹Boɛɛn nɛ bɛ kio, Yezu woo kiwi goon ne, a tɔ n Nayini. A kialandɛnan nə́ zii kũ kun ni, ka zaman gole ne.

¹²Yezu bɛ́ á dɔ kiwi lɛ lɛ-a, á minin yɛ woe gere goon biĩ. Lɔ giɔɔrɔ goon a nɛgiĩ goon toto ne. Zaman gole paã kun ka lɔ lɛ nɛ, ǹ nə́ woe nɛ lɛ biĩ.

¹³Yezu bɛ́ á lɔ lɛ yɛ, a makara kũ, á pɛ lɔ lɛ nɛ: «N baran wuu pɛ doo wa.»

¹⁴Yezu nə́ ǹ mɔrɔ á n gɔn da gere gũ ǹ piì lɛ ganaa. Min mɛnɛn bɛ́ gere lɛ guĩ, bɛn nə́ golee. Yezu pɛ nɛginin gere lɛ nɛ: «Masɛ n pii n ni, yoo.»

¹⁵Bɛa bǎã lɛ-n gɔrɔ, gere lɛ yii kaa, á yoo á giã a giala la á boo da. Yezu nɛ lɛ kɔ ǹ dan la.

¹⁶Nyɛ́ɛ min tumaa kũ, ǹ nə́ goã Lawa tɔ boe bɛ̀ ǹ nə́ pii: «Lawa a boo gii-dali gole na á bɔ wɔsɛn bii. Lawa na á daa n dɔ a din a tɔrɔ boe kɛ lɛ.»

¹⁷Zudee gána tumaa nɛ ka a lɛkoro lɛ-a bǎã nɛ, Yezu a dí lɛ a boo kaa minin too ne.

¹⁸Siin mɛnɛn tumaa nə n zɛnaa, Zaã, *batɛmu-dali lɛ a kialandɛnan nə́ woo bɛ laakalaa nɛ.

¹⁹Zaã nə́ ǹ min paa bɔ, á ǹ dia Dɛnaa Yezu li mà ǹ nɔ̀n da la mà ǹsɛn bɛ́ n yii diɛ Minin Nyin-sili mɛn a daa la, mà a din ni, hinlaa ǹsɛn doamaa nɛ ǹ nə n yii da min kɔsɔ la?

²⁰Zaã a dia dí-a wolen lɛn bɛ́ ǹ nə́ dɔ Yezu li, ǹ nə́ pɛ-n kɛnɛn: «Zaã, batɛmu-dali na á wɔ dia, mà wɔ da nɔ̀n da n la mà wɔ bɛ́ n yii diɛ Minin Nyin-sili mɛn a daa la, mà n din ni, hinlaa mà wɔ doamaa nɛ wɔ n yii da min kɔsɔ la?»

²¹A din biikoo lɛ gɔ́ɔ̃ nɛ Yezu min gigiã a busu nya, á bɔlɔkan kaka kɔ, á nɔ̀ɔn baraan loo, á yii tere-a gigiã yii bũ.

²² Á tɔ́n pɛ dia dí-a wolen lɛn manɛ: «Ka woo, ka yii bɛ́ á màn mɛn yɛ, ka too bɛ́ á ǹ mɛn ma, ka bɛ lɛ pɛ Zaã nɛ. Yii tere-an yii wusoo á wɔlɔ yii, siməə wolen tá tɔ we tele ne, gɔ̀nɔn busu babaraa dɛnan nə́ kaka kɔ ǹ sìi nya, too tere-an too á boo miɛ, geren yii á kiɛ. Ka pɛ-n dɔn mà Lawa a Boo Tii Kɔɔ̃n kɛ tá n pii doobaan manɛ.»

²³Masɛ a sii bɛ́ a re min mɛn gù dii wa, Lawa á re barka diɛ bɛa dɛnaa ganaa

²⁴Zaã a dia dí-a wolen lɛn bɛ́ ǹ nə́ wusoo ǹ nə́ woo, Yezu yoo á Zaã boo diɛ zaman lɛ nɛ, a n pii: — Ka n ka woo ga wàa mɛn-a don bii? Buu mɛn bɛ́ piɛ̃ n bìn diɛ a ganaa? Haayii, Zaã goã min gɔ́ɔ̃ lonlankɔ wole lɛa wa.

²⁵Sɛnɛ, ka n ka woo ga wàa mɛn ganaa? Min mɛn bɛ́ nyaǹ bɔ ǹ mɔnaan nə́ goã a ganaa? Táa min mɛnɛn bɛ́ mɔnaa sonboren we, ǹ gɔn màn nə́ gigiã, bɛn man pàãma kion dadaran nɛ. Zaã lɛ goã miɛ̃ wa.

²⁶Sɛnɛ, ka n ka woo ga wàa mɛn ganaa? Lawa a boo gii-dali goon ne? Masɛ n pii ka-n ka boo taãn nɛ, á la bɛ nɛ.

²⁷ Zaã bɛ́ min mɛn lɛa bɛ n ka kɛ nɛ, a n kiɛ̃ nɛ a wɔ paǹ li kɛnɛn: «Á ke, masɛ Dɛnaa Lawa n maa dia dí-a wole diɛ n nyɛɛnɛ, a n ziin zɛnaa n nyɛɛnɛ.»

²⁸Yezu pɛ: «Masɛ n pii ka nɛ, min mɛn tumaa yɛ lɔ la, min ba bɛn bii á n gole Zaã-n wa. Ka bɛ lɛ din tumaa dɔ nɛ, min mɛn bɛ́ re goɛ̃ min tumaa a boɛɛn lɛa *Lawa a kiibaa ǹ bǎã kɛ nɛ, bɛ á gole á la Zaã nɛ.»

²⁹ Gána lɛ a minin ni, ka wusuru-silin dɔn dinin ni, ǹ bɛ́ ǹ nə́ ǹ too kɔ Zaã lon, ǹ nə́ dɔ̃, ǹ nə́ lɛ kɔ, mà Lawa màn mɛn pɛ ǹsɛn wɔ gɔn la, mà sonbore ne, ǹ nə́ batɛmu lɛ si Zaã li.

³⁰Sɛnɛ, Lawa bɛ́ á nyin si ǹ sii mɛn yɔrɔ bɔ á dia ǹ la, *Fariziɛ̃n laanka landa sii-daraalin nə́ n piã ka bɛ nɛ. Ǹ lɛ kɔ ǹ nə́ batɛmu lɛ si Zaã li wa.

³¹Yezu pɛ: — Masɛ doamaa nɛ ma pelo minin kɛn zɔɔ̃ kɔn ka dien ne?

³²Maǹ kɔnboe ka nɛnyaanan mɛnɛn bɛ́ zaman paã ǹ bǎã nɛ, ǹ nə́ pii ǹ miãn manɛ: «Wɔ́ pìi pɛ ka nɛ, ka bɛ̀ baa wa! Wɔ́ gɛ̀ loe lɔ ka nɛ, ka wuu dɔ pɛ wa!»

³³Sonbore, Zaã, batɛmu-dali goã n lɛ soɛ biikoo gigiã li, a duvɛ̃ mi duduu wa, ka lɛ n boe mà nɔ̀ɔnɔn manɛ a ganaa!

³⁴Min a Nɛgiĩ dɔ na á daa, asɛ n màn bii, á n màn mii, ka lɛ n boe ma masɛ n nàndɛnaa lɛa, mà masɛ a kiɛ̃ ka duvɛ̃ dɔ-n wa, mà masɛ n wusuru-silin laanka sii baraa-zɛnaali gialakunun giaára lɛa.

³⁵Sɛnɛ, min mɛnɛn nə lɛ kɔ Lawa a sii-dɔ̃ ǹ dí kɛ ganaa, bɛn yii tá-a pepere.

³⁶Fariziɛ̃n giĩ goon nə́ Yezu bíi, mà a da màn bii a piɛ. Yezu woo giĩ lɛ a piɛ, á giã tán á màn bii.

³⁷ Lɔ kɔrɔ goon dɔ na á goã bɛa kiwi lɛ nɛ, a tɔ n ziziɛ̃-n parsiini. A bɛ́ á ma mà Yezu tá màn bii Fariziɛ̃n giĩ lɛ a piɛ bɛa pinaa kɛ lɛ nɛ, á daa wɔ walan ka kɔlɔ donkolon siĩn kɔ́n nɛ, nyɔɔ gìĩ kɔɔ̃n ná a nɛ.

³⁸Lɔ lɛ nə́ n zuməə Yezu kio a gòãn li, bɛ̀ a n wuu pii, á n yii mu kiɛ Yezu gòãn ganaa. Bɛ kio a ná a narɛ ǹ sii zɛnaa, á n mìi ka kũ a ná a gòãn lɛn tuturu ni, á nyɔɔ gìĩ kɔɔ̃n lɛ kaa ǹ ganaa.

³⁹Fariziɛ̃n giĩ lɛ á Yezu bíi màn bii-a, a bɛ́ á sii kɛ yɛ, á pɛ a din gɔ́ɔ̃-n kɛnɛn: «Bɛ̀ giĩ kɛ n Lawa a boo gii-dali lɛa sonbore, lɔ ke n gɔn diɛ a ganaa, bɛ̀ á dɔ̃ a bɛ́ màn mɛn lɛa, bɛa lɔ kɔrɔ kɛ lɛɛ!»

⁴⁰Yezu boo saa á pɛ nɛ: Simɔn ganaa, boo tá ma lɛ-n ma pɛ n nɛ. Yǎa Simɔn nə́ n toa a ganaa mà Mìinaa, mà a pɛ.

⁴¹Yezu nə́ n toa: «Giɔ̀mɔ-dali goon a giɔ̀mɔ n min paa bɔlɔ-a. Ǹ goon wɔ n lɛawaa biɛsooro (500) a wuru dí saraa lɛa. Ǹ goon kɔsɔ kɛ dɔ wɔ n lɛawaa posooro wɔ lɛa.

⁴²Sɛnɛ, màn kɔ́n bɛ́ a ba bɛa min paa kɛ lɛ lon ǹ tá ǹ giɔ̀mɔ sarɛɛ-n wa, giɔ̀mɔ-dali lɛ giɔ̀mɔ lɛ toa ǹ nɛ. Bɛa min paa kɛ lɛ bii, die n die giɔ̀mɔ-dali lɛ narɛ á la yii ni?»

⁴³Simɔn pɛ mà asɛ n taasɛ mà min mɛn bɛ́ ǹ nə́ giɔ̀mɔ lɛ a gole gole kɛ toa nɛ. Yezu mà a taãn pɛ.

⁴⁴Yezu nə́ n yɔrɔ bɔyaa, á ga lɔ lɛ ganaa, á pɛ Simɔn nɛ: «N yii tá lɔ kɛ ganaa? Má wɔ n dinmaa lɛ a kion, n mu kaa masɛ gòãn ganaa wa, sɛnɛ, lɔ ke, bɛ na á masɛ gòãn basã ka a yii mu ni, bɛ kio á tuturu ka a mìi ka nɛ.

⁴⁵N dinmaa lɛ fòo da masɛ-n ka narɛ ǹ gɔn nɛ wa, sɛnɛ, a kũ lɔ kɛ a daa ganaa, a masɛ narɛ ǹ sii zɛnaa lɛ da wa.

⁴⁶N dinmaa lɛ nyɔɔ sonbore kaa masɛ mìi-n wa, sɛnɛ, lɔ lɛ sɛ na á nyɔɔ gìĩ kɔɔ̃n kaa ma gòãn ganaa.

⁴⁷Yezu pɛ Simɔn nɛ: Bɛ̀ masɛ pɛ mà lɔ kɛ lɛ a sii baraa gigiã kɛ nə́ n toa nɛ, a giala n ka kɛ nɛ, mà á kɔn-narɛɛ gole nyaa. Bɛ̀ sii baraa boɛɛn nə́ n toa min mɛn nɛ, bɛa dɛnaa n kɔn-narɛɛ boɛɛn nyɛɛ.»

⁴⁸Yezu pɛ lɔ lɛ nɛ: «N sii baraan nə́ n toa n nɛ gɔrɔ.»

⁴⁹Min mɛnɛn bɛ́ màn bii ǹ bǎã lɛ nɛ kunun ǹ ni, bɛn nə́ pɛ ǹ gɔ́ɔ̃ nɛ mà wàa mɛn min ni ka kɛ nɛ, a n minin sii baraan toa ǹ nɛ lɛn zoɛ̃?

⁵⁰Yezu wusoo á pɛ lɔ lɛ nɛ: «N din a goleemali na á n kirisibaa. Wo ka nyɛnyɛɛ nɛ.»