Read Samo, Southern Luk 8 Bible Online

Luk 8 - Samo, Southern bible

Luk 8

¹Bɛ kio, Yezu woo kiwi dadaran laanka a bɔnboɛɛnɛn nɛ. A na á goã *Lawa a kiibaa ǹ Boo Tii Kɔɔ̃n pii. A min fulupaa mɛn bɔ, bɛn nə́ goã kun ni,

² ka bɛ dɔ nɛ, a lɔn mɛnɛn si nɔ̀ɔn baraan la ka busun ni, bɛn dɔn nə́ goã kun ni. Ǹ tɔn man ke: Magadalaan Mariya nɛ, nɔ̀ɔn sɔbaa nə n bɔ min mɛn ganaa;

³Zaãnɛ nɛ, kii Erɔdi a sumu dí nyɛɛnaan-bɔle goon mɛn bɛ́ a tɔ n Kuuza, bɛa lɔ n bɛ nɛ; Suzaanɛ nɛ, ka lɔ gigiã kɔsɔn nɛ. Bɛn tumaa na á goã Yezu laanka a kialandɛnan toe ka ǹ gɔn màn nɛ.

⁴Zaman gigiã bɛ́ boe kiwi din tumaa nɛ, ǹ nə́ die n lɛ soekɔn a li, Yezu boo saa á boo giməə kɛ da:

⁵«Giĩ goon na á soo á woo a màn tɔrɔ pɛsɛ̃. A bɛ́ màn tɔrɔ lɛ pɛsɛ̃, a nàn kɔ́n nə́ mɛnaa zii lɛkoro-a, minin nə́ tɔtɔrɔ la, bàanan nə́ mui.

⁶Màn tɔrɔ lɛ a kɔ́n dɔ́ mɛnaa bǎã kɔsɔ nɛ, bǎã mɛn a tataã bɛ́ a sɔsɔɔ wa, á bɔ, sɛnɛ, á wusoo á laa, a giala tán nyɛɛ ba-a wa.

⁷Màn tɔrɔ lɛ a kɔsɔ dɔ́ mɛnaa koronkoron nyandɛnaa bii. Ǹ bɛ́ boe kun, nyan lɛ yoo á màn bɔ tán wole lɛ kũ.

⁸Màn tɔrɔ lɛ mɛn bɛ́ á mɛnaa tán sonbore ne, bɛ́ bɔ, á nɛ kɔ, yǎa nɛ paabiɛ.» Yezu tɔ́n pɛ: «Toon bɛ́ ka lon, ka n too kɔ koe!»

⁹Yezu a kialandɛnan lɛn nə́ nɔ̀n da la ka boo giməə kɛ giala nɛ.

¹⁰ Á n toa ǹ ganaa kɛnɛn: «Lawa bɛ́ a kiibaa ǹ dí mɛn nyɛɛ kanaa, bɛ n sii-durii lɛa á nyaa kasɛn manɛ. Sɛnɛ, a na á nyaa min gialakunun kɛn manɛ ka boo giməə ne, màn mɛn bɛ́ toɛ, ǹ ga, sɛnɛ, ǹ yii baran wɔlɔ yɛ wa, ǹ boo ma, sɛnɛ, ǹ baran a giala ma wa.»

¹¹Yezu mà boo giməə lɛ giala n ka kɛ nɛ: «Màn tɔrɔ lɛ, Lawa a boo kɛ n ka bɛ nɛ.

¹²Min tɛnɛn man goon ka zii lɛkoro bǎã kɛ nɛ màn tɔrɔ mɛnaa a nɛ. Maǹ boo lɛ miɛ, sɛnɛ, *Sɛtaan nə die a boo lɛ bɔ a bɔ ǹ gɔ́ɔ̃ nɛ, màn mɛn bɛ́ toɛ, ǹ baran golee li ǹ kirisibaa wa.

¹³Min tɛnɛn dɔn man goon ka bǎã mɛn bɛ́, a tataã a sɔsɔɔ wa. Maǹ boo lɛ miɛ, ǹ si ka nyɛnyɛɛ nɛ. Sɛnɛ, ǹ ba toɛ boo lɛ giã ǹ wɔlɔ taãn yɛ ǹ foo-n wa. Ǹ golee Lawa li lɛ n biikoo boɛɛn kooro siɛ. Bɛa dɛnan lɛn, bɛ̀ sii kaka nə́ ǹ yɛ lɔn gɔrɔ, maǹ wusii ǹ golee Lawa li kio.

¹⁴Màn tɔrɔ mɛn bɛ́ á mɛnaa nyanɛn bii, bɛ n ka min mɛnɛn bɛ́ boo lɛ miɛ, sɛnɛ, ǹ ba woe nyɛɛnɛ wa, taasiɛn lɛa, gɔn mànan lɛa, ka kanaa a gɔ̀nɔn nyɛɛ ǹ siin lɛa nɛ. Bɛ lɛ n toɛ, ǹ ba nɛ koe a ma wa.

¹⁵Màn tɔrɔ mɛn bɛ́ á mɛnaa tán sonbore bǎã nɛ, bɛ n kɔnboe ka min mɛnɛn bɛ́ n too koe boo lɛ-a, ǹ si, ǹ kũ foo sonbore laanka a telee wole ne. Bɛa dɛnan lɛn man goɛ̃ bɔlɔgoondɛnaabaa la, yǎa ǹ nɛ koe.»

¹⁶ Yezu pɛ: «Min kɔ́n ba bólon diɛ a tan kuməə-a hinlaa a da gə̀rə̀n giulun wa, sɛnɛ, a n diɛ bólon koa ǹ bǎã nɛ, màn mɛn bɛ́ toɛ, min mɛnɛn tumaa bɛ́ we kion, bɛn na a fúlu yɛ.

¹⁷ Sii-durii kɔ́n banban, mà bɛ ná a die boe kanaa wa. Boo giməə din tumaa á re n doɛ̃ a bɔ kanaa foaãnɛ.

¹⁸ Bɛ lɛ tɔ ganaa, ka yiri bɔ ka dinin too kɔ ǹ gɔn li. A giala màn bɛ́ min mɛn lon, kɔsɔ á re n diɛ bɛa dɛnaa wɔ li, màn boɛɛn bɛ́ min mɛn lon, a ná a ba giɛ a màn da li wa, bɛ lɛ dɔ á re n sii la.»

¹⁹Yezu ǹ dan laanka ǹ diɛ̃n man nə́ daa a li, sɛnɛ, ǹ goã boe la ǹ nə́ we a li wa zaman a lɛa.

²⁰Minin nə́ pɛ Yezu ni mà ǹ dan laanka ǹ diɛ̃n tá golee-n kanaa, mà maǹ giɛ li ǹ yɛ.

²¹Yezu pɛ bɛa minin lɛn manɛ: «Masɛ dan laanka ma diɛ̃n man ka min mɛnɛn bɛ́ ǹ too koe Lawa a boo kɛ ganaa, ǹ nə́ sii, ǹ ná a siin zɛnɛɛ.»

²²Ǹ kɔ́n pinaa Yezu wɔ tà kuru ǹ goo ne kun ka a kialandɛnan nɛ. Á pɛ ǹ nɛ: mà ǹ daa ǹsɛn nə mu kuru, ǹ wo tà lɛkoro goon kɛ ganaa. Bɛa boo lɛ a diɛ kio, ǹ nə́ mɛ mu la.

²³Ǹ bɛ́ mu kuri, nyuù Yezu saa. Piɛ̃ gole yoo tà lɛ la. Bɛ lɛ taman yii, mu n yui á kiɛ goo lɛ nɛ. Ǹ nə́ yɛ mà bɔ̀n nə die ǹsɛn ganaa.

²⁴Yezu a kialandɛnan lɛn nə́ n zɔ̃ ǹ nə́ dɔ a li, ǹ nə́ bũ. Ǹ nə́ tɔ́n pɛ nɛ: «Mìinaa, Mìinaa, wɔ ǹ die bɔ̀n biɛ!» Yezu yoo á paraa piɛ̃ lɛ li, ka tà mu yoo wole lɛ nɛ. Piɛ̃ lɛ-n woo, tà mu lɛ-n woo, ǹ tumaa golee, yǎa wɔlɔ golee ka kiĩni.

²⁵Bɛ kio Yezu pɛ ǹ nɛ: «Kaa golee Lawa li lɛ a tɔn tɛ ka pelo yii-n wa?» Nyɛ́ɛ bɛ́ Yezu a kialandɛnan lɛn-a, ǹ nə́ n kaãbaa bɛ̀ ǹ nə́ pii kɔn nɛ mà wàa mɛn min nə ka giĩ kɛ nɛ? A n boo diɛ ka piɛ̃ laanka mu ni, ǹ ná a bɔlɔ dɔ sii kɛnɛn!

²⁶Yezu laanka a kialandɛnan nə́ mu kuru ǹ nə́ woo dɔ Geraazaa minin gána nɛ, Galilee para li.

²⁷Yezu bɛ́ gisĩ tán ǹ mɛn waáraa, giĩ goon nə́ bɔ kiwi goon ne, á daa n da lɛ. Nɔ̀ɔn baraan man bɛa giĩ lɛ ganaa. A kũ biikoo sɔsɔɔ ganaa a ba mɔnaa we wa. Á goã wɛɛ kiwi wa yǎa geren bĩ ǹ bǎã nɛ.

²⁸A bɛ́ á Yezu yɛ, á kaa tán-a a giulun. Á n lɛ dɛ ka kɔsɛkɔsɛ, á tɔ́n pɛ ka lɛn gole ne kɛnɛn: «Yezu, Lawa Gole a Nɛ, n wàa mɛn sii n masɛ a sii ni? Masɛ nə n nyankoe n baran dɔlɔ bɔ masɛ ganaa wa.»

²⁹Sonbore, Yezu na á goã pii nɔ̀ɔn babaraan lɛn manɛ, mà ǹ nə n bɔ giĩ kɛ ganaa. A giala gunyin gigiã nɔ̀ɔnɔn lɛn man nə́ goã giĩ lɛ kuĩ. Bɛ lɛ taman yii, minin man nə́ goã doɛ bɛ̀ ǹ kanan kaa a gòãn-a, ǹ fɔlɔ biɛn yii a gɔnɔn ganaa. Sɛnɛ, a na a gòã yii ǹ mànan lɛn niɛ̃. Nɔ̀ɔnɔn lɛn man nə́ goã nyanɛɛ bɛ̀ ǹ wo-n diə bǎãn nɛ, min bɛ́ a ba bǎãn mɛnɛn nɛ wa.

³⁰Giĩ lɛ bɛ́ tán-a a giulun, Yezu nɔ̀n da la: «N tɔ n die?» Á pɛ Yezu ni: «Ma tɔ n "Damata".» Sonbore ne, nɔ̀ɔn baraa gigiã na á goã giĩ lɛ ganaa.

³¹Bɛa nɔ̀ɔnɔn lɛn man nə́ goã Yezu nyankoe mà a baran ǹsɛn kaa nɔmaa ǹ nyankɔrɔ zuzulu kɛ-n wa.

³²Bɛa bǎã lɛ dɔ nɛ, birii gigiã na á goã màn bii tenten mìi ni. Nɔ̀ɔnɔn lɛn nə́ Yezu nyankɔ mà a toa ǹsɛn nə wɔ bɛa biriin lɛn nɛ. Yezu ná a lɛ kɔ ǹ la.

³³Bɛ lɛ taman yii, nɔ̀ɔn baraan lɛn nə́ n bɔ giĩ lɛ ganaa ǹ nə́ wɔ biriin lɛn nɛ. Bɛ lɛ na á toa, bɛa tɔɔ damata kɛ lɛ baa si á n bɔ tenten mìi kɛ nɛ á daa kaa tà mu li. Mu nə́ ǹ kũ.

³⁴Biriin-lɛduə̃lin lɛn bɛ́ ǹ nə́ sii kɛ yɛ á n zɛnaa, ǹ nə́ baa si ǹ nə́ woo a boo da kiwi gɔ́ɔ̃ laanka lalaa lɛ-a dɛnan manɛ.

³⁵Minin nə́ soo ǹ nə́ daa ga bɛa sii kɛ lɛ ganaa. Ǹ nə́ dɔ Yezu li, ǹ nə́ yɛ nɔ̀ɔn baraan lɛn nə́ n bɔ giĩ lɛ ganaa. Ǹ nə́ giĩ lɛ yɛ giã-n tán-a Yezu li, mɔnaan ná a ganaa, á n minbuiin yii kɔɔ̃n-a dɔ lɛa tán. Nyɛ́ɛ minin lɛn kũ.

³⁶Min mɛnɛn bɛ́ sii lɛ din tumaa nə́ n zɛnaa ǹ yii ni, nɔ̀ɔnɔn lɛn bɛ́ ǹ nə́ n bɔ giĩ lɛ-a lɔn, bɛn ná a laakalaa daa wolen lɛn manɛ.

³⁷Bɛ lɛ a lɛa nɛ, nyɛ́ɛ bɛa gána lɛ a minin kũ parsiini. Ǹ ná a nyankɔ Yezu lon, mà a woo a n bɔ ǹsɛn bǎã nɛ. Yezu wɔ mu kuru ǹ goo ne á woo.

³⁸Giĩ mɛn bɛ́ nɔ̀ɔnɔn nə́ n bɔ-a lɛn, bɛ na á goã Yezu nyankoe mà a toa asɛ wo giã kun ni. Sɛnɛ, Yezu nə́ n piã, á zii kɔ la mà a woo, bɛ̀ á n pii ni

³⁹mà a wusoo a wo piɛ. Lawa bɛ́ á bǐɛ̃ mɛn tumaa zɛnaa nɛ, a wo bɛ laakalaa. Bɛ lɛ tamaa yii, giĩ lɛ woo. Yezu bɛ́ á sii mɛn zɛnaa nɛ, á bɛ laakalaa kiwi lɛ din tumaa nɛ.

⁴⁰Yezu bɛ́ á bɔ tà lɛ lɛkoro goon kɛ ganaa, á daa yaa bɛ̀ min gigiã nə n yii diɛ la. Zaman lɛ nə́ n da lɛ.

⁴¹Giĩ goon ne, a tɔ n Zayirusu, bɛ dɔ́ daa. Bɛa giĩ lɛ na á goã kiwi lɛ a Zuifun lɛsɔkɔn kion a goledɛnaa lɛa. Á kaa tán Yezu giulun, a ná a nyankɔ mà a da asɛ a piɛ.

⁴²A giala, mà nɛlɔ goon toto na asɛ lon, a lɛ̀ fulupaa miã nɛ, mà bɛ lɛ dɔ n giɛ li á giɛ̃. Yezu bɛ́ mà a n woe, zaman lɛ ná a lɛ gɛwaa a paǹan tumaa ganaa.

⁴³Lɔ goon dɔ na á goã bǎã lɛ nɛ, lɔn mà kaa ǹ busu na á goã a ganaa á dɔ lɛ̀ fulupaa. A na á goã á n gɔn màn yii ziziɛ̃ dagòã-dalin-a, a busu dɔ nya wa.

⁴⁴Bɛa lɔ lɛ nə́ n zɔ̃ á dɔ Yezu li, á golee a kio á n gɔn da a mɔnaan lɛkoro ganaa. A din bǎã lɛ-n gɔrɔ, a mà kaa lɛ golee.

⁴⁵Yezu nɔ̀n da mà die na á n gɔn da asɛ ganaa? Min kɔ́n nə lɛ kɔ mà asɛ nə́ n gɔn da-a wa. Piɛrɛ sɛ ná a lɛ si kɛnɛn: «Mìinaa, n din yii tá zaman lɛ dɔ ganaa, ǹ nə́ n lɛnpɛnɛ, ǹ nə́ n lɛ gɛwaa, ma n tɔn nɔ̀n diɛ mà die na á n gɔn da nsɛ ganaa!»

⁴⁶Sɛnɛ, Yezu pɛ nɛ: «Min nə́ n gɔn da ma-a, a giala má dɔ̃ máa pàã kɔ́n bɔ ma nɛ á n dɔ min lɛ.»

⁴⁷Lɔ lɛ dɔ̃ mà á bɔ asɛ a sii lɛ siére-a, á daa kaa tán Yezu giulun, bɛ̀ a gɔ̀nɔn nə́ bìn diɛ. A n gɔn da Yezu-a mìi mɛn-a, ka bɛ dɔ nɛ, a busu lɛ nya bǎã goon ne ka yɔrɔ mɛn nɛ, á bɛ laakalaa min tumaa yɔrɔ-a.

⁴⁸Yezu pɛ nɛ: «Maa nɛ, n din a goleemali na á n kirisibaa. Wo ka nyɛnyɛɛ nɛ.»

⁴⁹Yezu bɛ́ boo diɛ ka lɔ lɛ-n miɛ̃, dia dí-a wole goon bɔ goledɛnaa Zayirusu lɛ a piɛ, á daa pɛ nɛ: mà a nɛlɔ lɛ gã, mà a baran Mìinaa lɛ nɔmaa wa.

⁵⁰Sɛnɛ, Yezu bɛ́ á boo lɛ ma, á pɛ Zayirusu ni: «N baran nyɛ́ɛ baa wa, yǎa n goleemali wɔ, n nɛlɔ lɛ a re kirisibiɛ.»

⁵¹Yezu bɛ́ á dɔ Zayirusu a piɛ, a lɛ kɔ min kɔ́n wɔ kun ni kion wa, bɛ̀ á n bɔ Piɛrɛ nɛ, Zaã nɛ, Zaaki ni, ka nɛ lɛ di laanka ǹ dan nɛ.

⁵²Min tumaa na á goã wuu pii ǹ nə́ n lala diɛ nɛ lɛ a lɛa. Yezu pɛ ǹ nɛ: «Ka baran wuu pɛ wa. Nɛ lɛ bie á gã wa, a n nyuù we.»

⁵³Minin lɛn man nə́ goã yaa we Yezu ganaa, a giala ǹ nə́ goã doɛ̃ mà nɛ lɛ gã.

⁵⁴Sɛnɛ, Yezu nɛ lɛ gɔn kũ, á pɛ nɛ ka lɛn gole ne kɛnɛn: «Nɛ lɛ, yoo lon.»

⁵⁵Nɛ lɛ telenboen nə́ wusoo á daa wɔ a nɛ, á yoo lon bǎã goon ne. Yezu pɛ a minin manɛ mà ǹ màn-bii kɔ la a bii.

⁵⁶Nɛ lɛ a yɛ wolen nə́ n kaãbaa parsiini, sɛnɛ, Yezu laa ǹ ganaa, mà sii mɛn bɛ́ á n zɛnaa, mà ǹ baran bɛ boo da min ni wa.