Read Samo, Southern TDP 12 Bible Online

TDP 12 - Samo, Southern bible

TDP 12

¹Landa boon laanka sii yɔrɔ bɔ ǹ boon lɛn man ka kɛn nɛ. Ka digolon Lawa, Dɛnaa Lawa bɛ́ gána mɛn lɛ koe ka la mà a kaa wɔ baa, ka die ka n yiri koa li, ka bɛn tamaa walan, kaa tá kanaa lɛawaan tumaa gɔ́ɔ̃ nɛ.

²Ka bɛ́ re tɔrɔn mɛnɛn lɛn lui, bɛn nə ǹ dìn guguru kɔ bǎãn mɛnɛn nɛ, kele sasan la, tentenen la, da yiikoonaan giulun, ka die ka bɛa bǎãn lɛn tumaa wuru lenlen.

³ Ka ǹ wúlu bɔ ǹ bǎãn kɛn yu, ka ǹ tíĩn yɔyɔrɛ, ka ǹ dì gɔnɔn kɛn tã. Ǹ màn nyínin mɛnɛn sɛlɛ ǹ nə́ ǹ baa ǹ lawan lɛa, ka bɛn yiyiɛ, ka ǹ tɔ papaã ka bɔ bǎã kɛ lɛ nɛ.

⁴Kaa Lawa, Dɛnaa Lawa guguru kɔ wɔ paǹ li, ka baran ǹ wɔ kɛ tɔrɔ zɛnaa wa.

⁵Kaa Lawa, Dɛnaa Lawa bɛ́ re bǎã mɛn boe kaa tɔrɔn lɛn bii, a n tɔ da la, a baa a giã ǹ bǎã lɛa, ka doamaa-n ka wo a guguru kɔ bɛa bǎã lɛ dinsɔɔ̃ nɛ.

⁶Ka á re die ka kaa *wúlu màn tiɛ̃n nɛ walan, kaa barka da ǹ wúlu mànan nɛ, kaa mànan fùfùbaa ǹ wɔn nɛ, kaa Lawa gɔ ǹ mànan nɛ, kaa lɛ kɔ Lawa la ǹ wɔn nɛ, foo kɔɔ̃nbaa ǹ wɔn nɛ, kaa tɔɔ dadaran laanka a bisinin nɛ bibinaan nɛ.

⁷Ka á re màn bii kaa Lawa, Dɛnaa Lawa din yɔrɔ-a walan ka n nyɛnyɛɛ, ka dinin laanka kaa kion minin ni. A giala, ka bɛ́ re n gɔn diɛ dí woo dí ganaa, Dɛnaa Lawa á re bɛ bǐɛ̃ koe.

⁸Wɔ bɛ́ màn mɛn tumaa zɛnɛɛ kànaa pelo, didie ń zɛnɛɛ a din foo dùũ li, ka nyan toa ka bɛ zɛnaa walan wa.

⁹A giala, ka tɔn dɔ kaa susu ǹ bǎã-n bɔrɔ wa: bɛ n ka gána kɛ nɛ, kaa Lawa, Dɛnaa Lawa n koe ka la, mà a kaa wɔ baa.

¹⁰Sɛnɛ, ka á re Zurdɛ̃ tà kuri, kaa Lawa, Dɛnaa Lawa bɛ́ gána mɛn lɛ koe ka la kaa wɔ lɛa, ka wo giã walan. Kaa zɔ́ɔn mɛnɛn bɛ́ ka lɛnpɛnɛ, á re ka kanbiɛ bɛn ganaa, á re là nyantoro koe ka la.

¹¹Bɛa biikoo li kəni, kaa Lawa, Dɛnaa Lawa lɛ din tá re bǎã goon boe, a n tɔ da la. Ma laa ka ganaa máa ka die ka wo ka mànan mɛnɛn tumaa nɛ, ka die ka wo ǹ ne walan: wúlu màn tiɛ̃n manɛ, kaa barka da ǹ wúlu mànan nɛ, mànan fùfùbaa ǹ wɔn nɛ, Lawa gɔ ǹ wɔn nɛ ka màn mɛn tumaa bɛ́ ká n lɛ kɔ mà ka á re koe Dɛnaa Lawa la.

¹²Ka á re n nyɛnyɛɛ kaa Lawa, Dɛnaa Lawa lɛ yɔrɔ-a walan, ka dinin ni, kaa nɛgiĩn laanka kaa nɛlɔn nɛ, kaa bɛ̀rɛgiĩn laanka kaa bɛ̀rɛlɔn nɛ, ka *Levii tɔrɔn kɛn nɛ, giã nɛ kaa kiwin ni. A giala, ǹ goã ǹ nə́ bǎã kɔ Levii tɔrɔn lɛn la ǹ wɔ lɛa ka bii wa.

¹³Ka yiri bɔ ka dinin li, ka nyan kaa wúlu màn tã bǎã tumaa nɛ, yǎa a din bɛ́ bǎã lɛa ká yɛ wa.

¹⁴Sɛnɛ, Dɛnaa Lawa bɛ́ re bǎã mɛn boe kaa tɔrɔn lɛn bii, ka kaa wúlu mànan tã bɛa bǎã lɛ dinsɔɔ̃ nɛ. Man gɔn waa ka nɛ ka sii mɛn tumaa nɛ, ka a tumaa zɛnaa walan lɛ dinsɔɔ̃ nɛ.

¹⁵Sɛnɛ, ka bɛ́ giã-n bǎã mɛn nɛ, bɛ̀ kaa Lawa, Dɛnaa Lawa lɛ gɔn màn kɔ ka la, bɛ̀ ka tá li, ka á boe la ka tɔɔ dɛ ka sɔ̃ walan. *Gɔ̀ bɛ́ min mɛn ganaa ka min mɛn bɛ́ *yoreene, ǹ tumaa á boe la ǹ sɔ̃, ka ǹ bɛ́ yuun siĩ soɛ̃ lɔn.

¹⁶ Sɛnɛ, ka nyan màn mà sɔ̃ wa. Ka die ka bɛ kaa tán ka mu bɛ́ lɔn.

¹⁷Mànan fùbaa ǹ wɔ mɛn doamaa bɛ́ nɛ a n kɔ Lawa la, ka doamaa bie ka bɛ bii ka dinin piɛ wa: *Belee ne, duvɛ̃ nɛ, nyɔɔ nɛ, tɔɔ dadaran laanka a bisinin nɛ bibinaan nɛ, ka bɛ́ re n lɛ koe Lawa la ka mànan mɛnɛn nɛ, foo kɔɔ̃nbaa ǹ wúlu mànan laanka Lawa gɔ ǹ wɔn nɛ.

¹⁸Kaa Lawa, Dɛnaa Lawa din bɛ́ re bǎã mɛn boe, yǎa ka soɛ̃ walan a din yɔrɔ-a: ka dinin ni, kaa nɛgiĩn laanka kaa nɛlɔn nɛ, kaa bɛ̀rɛgiĩn laanka kaa bɛ̀rɛlɔn nɛ, ka Levii tɔrɔn kɛn nɛ, giã nɛ kaa kiwin ni. Ka dí mɛn tumaa nya, ka á re n nyɛnyɛɛ kaa Lawa, Dɛnaa Lawa yɔrɔ-a walan bɛa lɛa.

¹⁹A ka toa kaa tán la, ka yiri bɔ, ka nyan toa ka yiri bɔ ka Levii tɔrɔn kɛn nɛ wa.

²⁰Bɛ̀ kaa Lawa, Dɛnaa Lawa kaa bǎã lɛ giala bɔ li ǹ mɛn waáraa, ká a din bɛ́ á n lɛ kɔ ka la lɔn, bɛ̀ siĩ sii ka kũ ǹ mɛn pinaa, ká pɛ mà ka n die siĩ soɛ̃, ka á boe la ka sɔ̃ a ka bɔ.

²¹Kaa Lawa, Dɛnaa Lawa bɛ́ re bǎã mɛn lɛ boe a n din tɔ da la, bɛ̀ bɛ wɔlɔ á sɔsɔɔ ka mɛnɛn ganaa, Dɛnaa Lawa bɛ́ re tɔɔn mɛnɛn koe ka la, ta a gole hinlaa a boɛɛn nɛ, didie na a wɔ dɛ a din a kiwi, ka ma bɛ́ má pɛ ka-n lɔn. Ka bɛ́ giɛ li mà ka siĩ lɛ sɔ̃ lɔn, ka á re soɛ̃ miɛ̃.

²²Min mɛn bɛ́ gɔ̀dɛnaa lɛa, ǹ mɛn dɔ bɛ́ yoreen ne, ǹ tumaa á boe la ǹ bɛa siĩ lɛ sɔ̃, ka ǹ bɛ́ yuùn siĩ soɛ̃ lɔn.

²³ Sɛnɛ, ka n doa taãn-taãnɛ, ka nyan toa ka màn mà sɔ̃ wa. A giala, yiikoonaabaa lɛ n mà nɛ. Bɛ lɛ nɛ, ka baran siĩ sɔ̃ ka a mà na a-n wa.

²⁴Ka baran sɔ̃ wa, ka kaa tán ka mu bɛ́ lɔn.

²⁵Ka baran sɔ̃ wa, bɛ á re toɛ kaa wɔ bǐɛ̃ kɔ, ka dinin laanka kaa nɛnyaanan mɛnɛn bɛ́ re goɛ̃ ka kio. A giala, bɛ̀ ká zɛnaa miɛ̃, ka n ká Dɛnaa Lawa foo sii zɛnaa.

²⁶Sɛnɛ, ka tɔɔn mɛnɛn kaa ǹ gɔrɔn Lawa wɔn lɛa, ka lɛ kɔ Lawa la ǹ wúlu mànan kɛn nɛ, Dɛnaa Lawa bǎã mɛn lɛ bɔ, ka wo ka bɛn nɛ walan.

²⁷Kaa wúlu màn tiɛ̃n kɛn, ǹ siĩ laanka ǹ mà nɛ, ka die ka bɛn kɔ kaa Lawa, Dɛnaa Lawa a *wúlu bɔ ǹ bǎã kɛ lalan. Bɛ̀ wúlu mànan manɛ Lawa wɔ lɛa, ka bɛn mà kaa kaa Lawa, Dɛnaa Lawa a wúlu bɔ ǹ bǎã lɛ lalan, ka ǹ siĩ sɔ̃.

²⁸Ma bɛ́ n gɔn wɛɛ ka-n ka boon mɛnɛn nɛ, ka bɛn lɛn si, ka ǹ tamaa. Bɛ̀ ká zɛnaa miɛ̃, ka n ká sii sonbore zɛnaa, sii mɛn bɛ́ pepere kaa Lawa, Dɛnaa Lawa yii li. Bɛ lɛ dɔ n die toɛ kaa wɔ bǐɛ̃ kɔ miɛ̃ duduu, ka dinin laanka kaa nɛnyaanan nɛ.

²⁹Ka bɛ́ woe bǎã mɛn lɛ nɛ, tɔrɔn mɛnɛn bɛ́ giã-n walan ka n die ǹ lui, kaa Lawa, Dɛnaa Lawa á die ǹ dii a ǹ bɔ ka nyɛɛnɛ. Ka á re ǹ gána lɛ sii ǹ la, ka giã a nɛ.

³⁰Bɛ̀ ǹ nə́ papaã ǹ nə́ n bɔ ka nyɛɛnɛ, kasɛn nə yiri bɔ ka dinin li taãn-taãnɛ, ka nyan toa ka n saa ǹ li wa. Ka yii baran bɔ bɛa tɔrɔn kɛn lɛn dìn li wa. Ǹ goã ǹ dìn guguru koe lɔn, ka nyan pɛ mà ka n nɔ̀n diɛ ka bɛ-n wa. Ka nyan pɛ mà ka nə ǹ wɔ kɛ tɔrɔ zɛnɛɛ wa.

³¹Ka nyan nə ǹ wɔ kɛ tɔrɔ zɛnaa, kaa Lawa, Dɛnaa Lawa lɛ-n wa. A giala, sii mɛn tumaa bɛ́ sii bɔbɔnɛɛ lɛa Dɛnaa Lawa yii li, a ná a ba li wa, maǹ nə́ bɛ zɛnaa ǹ dìn lɛn manɛ. Minin dinin nə́ ǹ nɛgiĩn laanka ǹ nɛlɔn kɔ dìn lɛn la, ǹ nə́ ǹ tã.