Read Samo, Southern TDP 15 Bible Online

TDP 15 - Samo, Southern bible

TDP 15

¹Lɛ̀ sɔbaa woo lɛ̀ sɔbaa, ka giɔ̀mɔn toa.

²Giɔ̀mɔ lɛ a toa ǹ gɔn nə́ ke: min mɛn tumaa a giɔ̀mɔ bɛ́ ǹ miã ganaa, a doamaa nɛ a toa nɛ. Ta a n min kɔsɔ ganaa hinlaa ǹ dɔɔ̃n nɛ, a doamaa bie a liɛ la wa. A giala, Dɛnaa Lawa a lɛa nɛ, ǹ nə́ giɔ̀mɔ toa lɛ a lɛ dia.

³Bɛ̀ tii ni, ka á boe la ka liɛ bɛ la. Sɛnɛ, bɛ̀ kaa giɔ̀mɔ tá ka dinin dɔɔ̃n ganaa, ka toa nɛ.

⁴Bɛ̀ á daa a zii li, doobaa din doamaa bie a yɛ ka bii wa. A giala, kaa Lawa, Dɛnaa Lawa bɛ́ gána mɛn lɛ koe ka la mà ka si ka baa kaa wɔ lɛa, á re gɔn màn gigiã koe ka la walan.

⁵A dàn nɛ, ka kaa Lawa, Dɛnaa Lawa lɛ bɔlɔ si. Ma bɛ́ n gɔn wɛɛ ka nɛ ka boon mɛnɛn tumaa-n pelo, ka n yiri koa li ka bɛn tamaa.

⁶A giala, kaa Lawa, Dɛnaa Lawa lɛ á re barka diɛ ka ganaa, ka a bɛ́ á pɛ lɔn. Kasɛn man die giɔ̀mɔ diɛ tɔrɔ kɔsɔn ganaa, ka dinin ba re giɔ̀mɔ siɛ ǹ lon wa. Ka n die giɛ̃ tɔrɔ kɔsɔ gigiã mìi la, sɛnɛ, ka dinin kɛn, ǹ ba boe la ǹ giã ka mìi la wa.

⁷ Kaa Lawa, Dɛnaa Lawa bɛ́ gána mɛn lɛ koe ka la, bɛ̀ ka dɔɔ̃n lɛ mɛn tá a kiwi mɛn nɛ, á n doobaa lɛa ka bii, ka nyan nə n gɔ́ɔ̃ tã a ganaa, ka n piã mà ka a giɔ̀mɔ diɛ a ganaa wa.

⁸Sɛnɛ, ka n gɔn lɛ bũ sɔnbɔraanɛ, ka giɔ̀mɔ da a ganaa, a bɛ́ laadoo mɛn gɔ́ɔ̃ nɛ, a boo la a bɛ saa nɛ.

⁹Haya! Ka yiri bɔ, ka nyan toa ka taasiɛ kooron wɔ ka pɛ mà lɛ̀ sɔbaabaa ǹ wɔ lɛ, giɔ̀mɔ toa ǹ lɛ̀ lɛa, mà bɛ́ dɔ á nya wa. Ka baran n saa bɛa taasiɛ kɛ li, ka n yii baraa bɔ ka dɔɔ̃n doobaa li, ka nu ka màn nɛ wa. Bɛ̀ ká bɛ zɛnaa, bɛ̀ a n lɛ dɛ Dɛnaa Lawa ganaa, a n die sii baraa biɛ ka mìi ni.

¹⁰Ka bɔ ka foo-a, ka kɔ la bɛ̀ ka foo n kɔɔ̃nɛ. Bɛ lɛ n die toɛ kaa Lawa, Dɛnaa Lawa barka da kaa nya ǹ dí tumaa ganaa, ka bɛ́ re n gɔn diɛ dí woo dí ganaa, a bɛ bǐɛ̃ kɔ.

¹¹ Doobaa dɔ bɛ́ a bie re nyɛɛ ka bii gána kɛ-n wa, ma nə n gɔn wɛɛ ka nɛ: ka dɔɔ̃nɔn mɛnɛn bɛ́ kaa gána lɛ nɛ, nɔmaa wolen lɛa, doobaan lɛa, ka n gɔn lɛ bũ bɛn man sɔnbɔraan nɛ.

¹² Bɛ̀ ka dɔɔ̃n *Ebrəə min lɛ mɛn nə́ n din sã ka la bɛ̀rɛ lɛa, giĩ-n hinlaa lɔ nɛ, a doamaa nɛ a dí nya ka nɛ lɛ̀ sɔrɔ gɔ́ɔ̃ nɛ. A lɛ̀ sɔbaabaa ǹ wɔ, ka n gɔn bɔ a ganaa a woo a n bɔ ka li, a ná a din gɔn wìi a lɛa.

¹³Bɛ̀ ka á n gɔn boe a ganaa mà a woo a n bɔ ka li, a ná a din gɔn wìi a lɛa, ka nyan toa a wo ka a gɔn kooro-n wa.

¹⁴Kaa Lawa, Dɛnaa Lawa dí mɛn bǐɛ̃ kɔ ka dɔn gɔn, ka da zii sɔnbɔraanɛ ka bɛ lɛ a mànan nɛ: sèren ne, bòen ne, *belee ne ka duvɛ̃ nɛ.

¹⁵Ka n yiri koa li, mà ka n ká goã bɛ̀rɛ lɛa Ezipti gána nɛ, mà kaa Lawa, Dɛnaa Lawa lɛ na á ka bɔ a nɛ. Bɛ lɛ na á toa, ma á n gɔn wɛɛ ka nɛ ka bɛa sii lɛ-n pelo.

¹⁶Kɔntan bɛ̀rɛ lɛ á re pii ka nɛ mà asɛ á re woe a n bɔ kaa kion wa. A giala, a tá ka narɛ, ka dinin laanka kaa kion minin ni, a n yii-nyɛɛ dɔ la kaa kion.

¹⁷Bɛ̀ á n baa miɛ̃, ka kiɛ saa, ka bɛ̀rɛ lɛ too naa kiɛnlɛ-a ǹ goo ganaa, ka fɔ̃. Ka bɛa yɔrɔ lɛ nɛ, a n die goɛ̃ kaa bɛ̀rɛ lɛa yǎa duduu. Ta bɛ̀rɛlɔ dɔ nɛ, ka zɛnaa miɛ̃.

¹⁸Ka n gɔn bɔ bɛ̀rɛ lɛ ganaa, a woo a n bɔ kaa piɛ, a goã a din gɔn wìi a lɛa. Ka nyan toa bɛ sii kaka baa ka yii li wa. A giala, a lɛ̀ sɔrɔ dí mɛn nya ka nɛ, a màn tá n timii dí-nyali a saraa la gunyin paa. Bɛ lɛ nɛ, ka n gɔn bɔ a ganaa a woo. Kaa Lawa, Dɛnaa Lawa á die barka diɛ kaa nya ǹ dí tumaa ganaa.

¹⁹ Kaa diin ni, kaa sèren ne ka kaa bòen ne, bɛn bɛ́ re nɛ bibinaan mɛnɛn yii gɔ̀lɔ̀ lɛa, ka die ka bɛn kɔ kaa Lawa, Dɛnaa Lawa la. Dii gɔ̀lɔ̀ mɛn bɛ́ ǹ dan gɔ́ɔ̃ binaa lɛa, ka nyan dí nya ka bɛ-n wa. Sère gɔ̀lɔ̀ mɛn bɛ́ ǹ dan gɔ́ɔ̃ binaa lɛa, ka nyan bɛ ka kuru wa.

²⁰Dɛnaa Lawa din bɛ́ re bǎã mɛn boe, lɛ̀ woo lɛ̀, ka die ka bɛn sɔ̃ walan kun ka kaa kion minin ni, kaa Lawa, Dɛnaa Lawa din yɔrɔ-a.

²¹Sɛnɛ, bɛ̀ wɔ̀lɔ̀ tá tɔɔ lɛ mɛn-a, bɛ̀ a n simii hinlaa a yii na á tã, hinlaa ta wɔ̀lɔ̀ tɔrɔ kɔsɔ mɛn nɛ, ka nyan bɛ kɔ kaa Lawa, Dɛnaa Lawa la *wúlu màn lɛa wa.

²²Ka bɛ sɔ̃ kaa piɛ. Min mɛn bɛ́ yoreene, *gɔ̀ bɛ́ min mɛn dɔ ganaa landa wɔ paǹ li, ǹ tumaa á boe la ǹ sɔ̃, ka yuùn laanka don a zù bɛ́ lɔn.

²³ Sɛnɛ, ka nyan tɔɔ mà sɔ̃ wa. Ka kaa tán, ka ǹ bɛ́ mu kiɛ tán lɔn.