Read Samo, Southern TDP 18 Bible Online

TDP 18 - Samo, Southern bible

TDP 18

¹*Levii tɔrɔn wúlu bɔlen kɛn laanka Levii tɔrɔ gialakunun kɛn tumaa, bɛn ba re bǎã yii ǹ wɔ lɛa, ka Izirayeli minin gialakunun kɛn wɔ bɛ́ lɔn wa. Ǹ bɛ́ re wúlu mànan mɛnɛn koe Dɛnaa Lawa la ka mànan kɔsɔn mɛnɛn nɛ, bɛ á re goɛ̃ ǹ màn-bii lɛa.

² Bǎã ba Levii tɔrɔn lɛn gɔn ǹ dɔɔ̃n Izirayeli minin lɛn bii wa. A giala, Dɛnaa Lawa a dí kɛ lɛ nə ǹ wɔ gii lɛa, ka a din goã á pɛ ǹ nɛ lɔn.

³Lawa a wúlu-bɔlen lɛn doamaa bɛ́ ka màn mɛn nɛ, a bɔ Izirayeli minin kɛn li die wúlu boe ka dii hinlaa ka sère ne, bɛ n ka kɛ nɛ: ǹ doamaa nɛ ǹ na a nyàa kɔ Lawa a wúlu-bɔle lɛ la, a lɛ káwɔ nɛ ka a bundara nɛ.

⁴Kaa *belee lɛ bibinaa nɛ, kaa duvɛ̃ dii laanka kaa nyɔɔ wɔ nɛ, ka kaa tɔɔ bisinin bibinaa wɔ nɛ, ka bɛn dɔn kɔ ǹ la.

⁵A giala, kaa Lawa, Dɛnaa Lawa na á Levii tɔrɔn lɛn bɔ tɔrɔn tumaa bii, màn mɛn bɛ́ toɛ, ǹ golee asɛ yɔrɔ-a duduu, ǹ dí nya asɛ Dɛnaa Lawa nɛ.

⁶Bɛ̀ Levii tɔrɔ lɛ mɛn soo a kiwi, ta a din nə giã-n Izirayeli kiwi lɛ mɛn nɛ, bɛ̀ a tá a foo ne a wo bǎã kɛ nɛ Dɛnaa Lawa bɔ a din wɔ lɛa,

⁷á boe la a daa, a na a dí nya walan a Lawa, Dɛnaa Lawa nɛ, ka ǹ dɔɔ̃n Levii tɔrɔ gialakunun lɛn wɔ bɛ́ lɔn, Dɛnaa Lawa a bǎã sonbore kɛ nɛ.

⁸Màn-bii sii wɔ paǹ li, a gii doamaa nɛ a goã goon ka miãn wɔ bɛ́ lɔn. A màn mɛn sã ǹ dikion, bɛ gòɛ̃ ná a ba a-n wa.

⁹Kaa Lawa, Dɛnaa Lawa bɛ́ gána mɛn lɛ koe ka la, bɛ̀ ká dɔ walan ǹ mɛn waáraa, tɔrɔ kɔsɔn mɛnɛn bɛ́ a nɛ, ka nyan toa ka n saa bɛn giã ǹ gɔn bɔbɔnɛɛ kɛ li wa.

¹⁰ Min nyan yɛ ka bii, á n wúlu boe ka a nɛgiĩ hinlaa ka a nɛlɔ-n wa. Min nyan yɛ ka bii, a n wɔ-kũlibaa ǹ dí hinlaa boobaa ǹ dí nyɛɛ wa. A nyan yɛ ka bii min lɛa giɛ siin ganaa a ná a giala pii, hinlaa kɔnkoã lɛa wa.

¹¹ A nyan yɛ ka bii paa-kaali, kɔ́lɔnbaali lɛa, hinlaa nyín-biili lɛa wa.

¹²A giala, min mɛn tumaa bɛ́ bɛa siin kɛn lɛn zɛnɛɛ, ǹ tìĩ n boe-n Dɛnaa Lawa nyin ni. Bɛa sii bɔbɔnɛɛn lɛn lɛa nɛ, kaa Lawa, Dɛnaa Lawa tá re tɔrɔ kɔsɔn lɛn lui a ǹ bɔ ka nyɛɛnɛ.

¹³ Kasɛn nə n doa ka n naa kaa Lawa, Dɛnaa Lawa lɛ ganaa taãn-taãnɛ.

¹⁴Ka bɛ́ re tɔrɔn mɛnɛn lɛn lui ka ǹ bɔ ǹ bǎã nɛ, bɛn manə n too koe boobaa ǹ dí-nyalin laanka wɔ-kũlin lɛn lon. Sɛnɛ kasɛn, kaa Lawa, Dɛnaa Lawa lɛ kɔ ka la, mà ka bɛ miã siin kɛn zɛnaa wa.

¹⁵ A din tá re a boo gii-dali diɛ ka la, ka masɛ Muizu bɛ́ lɔn. A n die boe ka dinin bii, ka dinin tɔrɔn lɛn min goon ne. Ka die ka n too kɔ bɛ lɛ lon.

¹⁶A giala, ka nɔ̀n da kaa Lawa, Dɛnaa Lawa la ka màn mɛn nɛ, bɛ̀ ka bɛ́ soen kɔn Orɛbu kele la ǹ mɛn pinaa, a din taãn lɛ n ka kɛ nɛ. Ka n ká goã ká pɛ kɛnɛn: «Wɔsɛn ba li wɔ wɔa Lawa, Dɛnaa Lawa lɛ lɛ ma boo diɛ wɔ-n doo wa. Wɔ ba li wɔ wusoo wɔ bɛa tɛ gole kɛ lɛ yɛ doo wa, wɔ ba li wɔ gã wa.»

¹⁷Dɛnaa Lawa tɔ́n pɛ ma-n kɛnɛn: «Ka màn mɛn pɛ, á siĩni.

¹⁸Masɛ n die Lawa a boo gii-dali goon diɛ ka ma din bɛ́ lɔn, ka dinin tɔrɔn lɛn min goon lɛa. Ma á re maa boo we a lɛ-n. Ma bɛ́ re n gɔn wɛɛ nɛ ka sii woo sii ni, a tá re a tumaa pii ka nɛ.

¹⁹ Maa boon mɛnɛn lɛn bɛ́, Lawa a boo gii-dali lɛ á re ǹ pii ka ma tɔ nɛ, bɛ̀ min mɛn nə n too kɔ bɛn li wa, ma á re a dɔlɔ boe bɛa dɛnaa ganaa.

²⁰Sɛnɛ, ma bɛ́ má pɛ boo gii-dali lɛ nɛ máa a boo mɛn da wa, bɛ̀ á n saa din gole kɔ li yǎa a bɛ da ka masɛ tɔ nɛ, hinlaa ka lawa kɔsɔn tɔ nɛ, boo gii-dali lɛ din doamaa-n ka gɛ̀ nɛ.»

²¹Kɔntan, ka n die nɔ̀n diɛ ka dinin la kɛnɛn: «Min nə siɛ lɔn a dɔ̃, mà Dɛnaa Lawa bie á boo lɛ da wa?»

²²Boo gii-dali lɛ boo mɛn da ka Dɛnaa Lawa tɔ nɛ, bɛ̀ a sii nə n zɛnaa wa, ka dɔ̃ mà Dɛnaa Lawa bie á bɛa boo lɛ da wa. Boo gii-dali lɛ na á n saa din gole kɔ li á da. Ka nyan nyɛ́ɛ baa-n wa.