Read Samo, Southern TDP 19 Bible Online

TDP 19 - Samo, Southern bible

TDP 19

¹ Kaa Lawa, Dɛnaa Lawa á die tɔrɔn kɔsɔn papaɛ̃ a n bɔ ka nyɛɛnɛ, a ǹ gána kɔ ka la. Ka á re ǹ lui, ka giã ǹ kiwin laanka ǹ kionən ne.

²Kaa Lawa, Dɛnaa Lawa bɛ́ re gána mɛn lɛ koe ka la mà ka baa kaa wɔ lɛa, ka die ka kiwi sɔɔ bɔ walan, ka ǹ koa ǹ gɔrɔn kaa gána lɛ bii.

³Ka ziin bɔbɔ ǹ wo ǹ ganaa, màn mɛn bɛ́ toɛ, bɛ̀ min gɛ̀ dɛ, a wo n mìi duru walan. Kaa Lawa, Dɛnaa Lawa bɛ́ re gána mɛn lɛ koe ka la, ka bɛ tatala kɔn wɔlɔ sɔɔ.

⁴Bɛ̀ min mɛn gɔn sã á ǹ miã dɛ, a da yǎa a ná a bie biɛ zɔ́ɔ lɛlɛ wa, bɛ miã dɛnaa dinsɔɔ̃ n boe la a baa si, a wo n mìi duru walan a tɔn la.

⁵Ka bɛ̀ min na á woo gɔn kuru daã nɛ kun ka ǹ miã nɛ. A bɛ́ á n gɔn saa mà a n gɔn lɛ kuri, yǎa a sɛ̀miɛ̃ nàn sɔlɔ, á ǹ miã lɛ kũ, á gã. Bɛa dɛnaa lɛ á boe la á baa si a wo n mìi duru bɛa kiwin lɛn goon ne, a tɔn la.

⁶Sɛnɛ, gɛ̀ dòo-bɔle baran n gɔn kũ zii lɛ a sasabaa kɛ ganaa, a yoo ka a foo ne, a mɛ gɛ̀-dɛle lɛ kio a loo, a dɔ a ganaa a dɛ wa. A giala, a bɛ́ a bie ǹ miã lɛ biɛ zɔ́ɔ lɛlɛ wa, gɛ̀-dɛle lɛ doamaa bie ka gɛ̀-n wa.

⁷Bɛ lɛ na á toa, ma á n gɔn wɛɛ ka nɛ máa ka kiwi sɔɔ bɔ, ka koa a gɔrɔn.

⁸Ma bɛ́ n gɔn wɛɛ ka nɛ ka boon mɛnɛn tumaa-n pelo, bɛ̀ ká bɛn tamaa ká kɔ ǹ lɛ, bɛ̀ ká kaa Lawa, Dɛnaa Lawa lɛ narɛ, ká kɔ a foo sii lɛ biikoo tumaa li, a din tá re màn diɛ kaa gána lɛ li ǹ kɔn pinaa, ka a bɛ́ á n liɛ ka digolon man lɔn. Á re gána lɛ tumaa koe ka la, ka a bɛ́ á n lɛ kɔ ka digolon la ka a sii-n lɔn. Bɛa biikoo li kəni, ka wusoo ka kiwi sɔɔ ti sɔɔ bibinaa kɛ lɛ ganaa.

¹⁰Ka die ka zɛnaa miɛ̃, màn mɛn bɛ́ toɛ, kaa Lawa, Dɛnaa Lawa bɛ́ re gána mɛn lɛ koe ka la mà a kaa wɔ baa, zɛ̀rɛbaãnaa mà nyan kaa tán a-n wa. Bɛ bie wa, a sii n goɛ̃ ka dinin mìi ni.

¹¹Sɛnɛ, min tá boe la a ǹ miã baa zɔ́ɔ, a kuu kɔ a ganaa, a mɛ la a dɛ yǎa a giɛ̃. Ta bɛ miã dɛnaa baa si á woo n duru bɛa kiwin lɛn goon ne,

¹²a kiwi a min golen nə min dia a wo kũ, ǹ kɔ gɛ̀ dòo-bɔle lɛ la a dɛ a gã.

¹³Ka nyan makara bɔ a ganaa duduu wa. Min mɛn lɛ zɛ̀rɛbaãnaa lɛ mà kaa, ka bɛ lɛ bɔ ka bɔ ka bii, màn mɛn bɛ́ toɛ, kaa wɔ bǐɛ̃ kɔ.

¹⁴ Kaa Lawa, Dɛnaa Lawa bɛ́ re gána mɛn lɛ koe ka la mà a kaa wɔ baa, bǎã mɛn bɛ́ re doe ka-a walan, lɛlɛ minin nə gèlè mɛn koa, ka nyan bɛ na, ka n dɔ ka miãkɛnɛn wɔ-n wa.

¹⁵ Siére goon toto a boe la a yoo min gialaa mà a na á gɛ̀ dɛ, mà a na á sii baraa zɛnaa, hinlaa mà a na á sã wa. Haalɛ ta sii mɛn tɔrɔ din ni ǹ dɛnaa zɛnaa, a yɔrɔ doamaa nɛ a n bɔ siére paa hinlaa sɔɔ a da ǹ boo li.

¹⁶Bɛ̀ min yoo ǹ miã gialaa á soɛ da la, mà a na á sii la,

¹⁷sii lɛ bɛ́ ǹ dinin min paa mɛn bii, ǹ doamaa nɛ, ǹ wo golee Dɛnaa Lawa yɔrɔ-a, ǹ nə ǹ sii lɛ yɔrɔ pɛ Lawa a wúlu-bɔlen laanka sii yɔrɔ-bɔlen manɛ, ǹ mɛnɛn bɛ́ dí la bɛa biikoo lɛ gɔ́ɔ̃ nɛ.

¹⁸Sii yɔrɔ-bɔlen lɛn nə n doa, ǹ sii lɛ gɔsɛ taãn-taãnɛ. Ǹ tá re woe yiɛ mà siére lɛ n soɛ boe, mà a na á soɛ da ǹ miã lɛ la.

¹⁹Bɛ gɔ́ɔ̃ nɛ, a bɛ́ á goã giɛ li, mà ǹ sii mɛn zɛnaa ǹ miã lɛ nɛ, ka bɛ lɛ zɛnaa a din ni. Bɛ lɛ n die toɛ ka sii baraa bɔ ka bɔ ka bii.

²⁰Min kɔsɔn tá re bɛ miɛ, nyɛ́ɛ á re ǹ kuĩ. Bɛ n die toɛ min kɔn yii á re we, a bɛa baraabaa ǹ sii kɛ miã tɔrɔ zɛnaa ka bii doo wa.

²¹ Ka nyan makara bɔ a ganaa duduu wa: nyin giɔ̀mɔ nə n sarɛɛ ka nyin ni, yii wɔ nə n sarɛɛ ka yii ni, sɔ wɔ n ka sɔ nɛ, gɔn wɔ n ka gɔn nɛ, gòã wɔ n ka gòã nɛ.