Read Samo, Southern TDP 2 Bible Online

TDP 2 - Samo, Southern bible

TDP 2

¹ Bɛ kio, wɔ́ Sawɛɛ tà kɛa zii saa wɔ́ woo don, ka Dɛnaa Lawa goã á pɛ wɔ-n lɔn. Wɔ́ Seyiiri a kele yii bǎã kɛ lɛnpɛnɛ lɛ̀ damata.

²Bɛ kio, Dɛnaa Lawa tɔ́n boo da ma nɛ, á pɛ ma nɛ:

³«Ká n bibiə̃ kele yii kɛ nɛ, ká belebɔ á la yii ni. Ka wo gɔsɛ a lɛ̀gɔn li.»

⁴ N gɔn waa zaman lɛ nɛ n pɛ ǹ nɛ kɛnɛn: «Ka dɔɔ̃n Ezawu tɔrɔn mɛnɛn lɛn bɛ́ giã-n Seyiiri, ka á re boe bɛn bǎã-n ka kiɛ̃. Ǹ tá re nyɛ́ɛ biɛ ka nɛ, sɛnɛ, ka yiri bɔ taãn-taãnɛ.

⁵Ka baran yɔ bɔ ǹ ganaa wa. Ma a re màn kɔn koe ka la ǹ gána lɛ-n wa, haalɛ gòã da ǹ bǎã din. A giala, man má Seyiiri a kele yii bǎã lɛ kɔ Ezawu tɔrɔn la.

⁶Ka bɛ́ re màn mɛn bii, ka bɛ pii ka wɔrɔ nɛ ǹ lon, ka tɔn bii. Haalɛ kaa mi ǹ mu, ka bɛ dɔ pii ǹ lon ka wɔrɔ nɛ, ka tɔn mi.»

⁷A giala, kaa Lawa, Dɛnaa Lawa lɛ barka da ka ganaa, kaa nya ǹ dí tumaa gɔ́ɔ̃ nɛ, a din na á ga ka walan. Kaa Lawa, Dɛnaa Lawa lɛ lɛ̀ pusi n ke kun ka nɛ, màn kɔn tɔn nyaabaa ka-a wa.

⁸Wɔ dɔɔ̃n Ezawu tɔrɔn mɛnɛn bɛ́ giã-n Seyiiri kiwi, wɔ bɔ bɛn bǎã-n doo wa. Zii mɛn dɔ bɛ́ woe boe nyankɔrɔ lɛ kɛ nɛ ǹ nə́ bíi Arabaa, a kiɛ̃ a wo Elaati laanka Esiɔn-Gebɛɛrɛ kiwi, wɔ́ bɛ toa walan. Wɔ́ n pusu, wɔ́ daa bɔ Moabu don.

⁹ Dɛnaa Lawa tɔ́n pɛ ma nɛ: «Ka baran yoo Moabu minin kɛn gialaa wa, ka baran zia baa ǹ ganaa wa. Ma a re màn kɔn koe ka la ǹ gána lɛ-n wa. A giala, man má Aara gána lɛ kɔ Lɔti tɔrɔn lɛn la ǹ wɔ lɛa.»

¹⁰Emimu tɔrɔn man nə́ goã gána lɛ-n lɛlɛ. Pàã goã ǹ lon, ǹ nə́ gigiã sɔsɔrɔ ka Anaaki tɔrɔn kɛn bɛ́ lɔn.

¹¹Maǹ nə́ goã ǹ dɔn bíi Refaa tɔrɔn ka Anaaki tɔrɔn kɛn bɛ́ lɔn. Sɛnɛ, Moabu tɔrɔn lɛn man nə́ goã ǹ bíi Emimu tɔrɔn.

¹²Seyiiri gána ke, Orii tɔrɔn man nə́ goã walan lɛlɛ. Sɛnɛ, Ezawuu tɔrɔn lɛn nə́ ǹ loo, ǹ nə́ ǹ dɛ, ǹ nə́ giã ǹ bǎã nɛ, ka Izirayeli minin bɛ́ ǹ nə́ zɛnaa lɔn ǹ gána nɛ, Dɛnaa Lawa gána mɛn lɛ kɔ ǹ la.

¹³Dɛnaa Lawa tɔ́n pɛ: «Kanna kəni, ka yoo ka Zerɛdi tà gòã kɛ kuru.» Wɔ́ yoo, wɔ́ Zerɛdi tà gòã kuru.

¹⁴ A saa Kadɛsi-Barneya ganaa, yǎa Zerɛdi tà gòã lɛ nɛ, lɛ̀ pɔsɔɔwenkiwisi tɔ-n wɔ́ wɔ. A kũ wɔa soo lɛ ganaa, a da bɛa biikoo lɛ yaa, zia-baalin mɛnɛn nə goã, bɛn tumaa gã ǹ nə́ n bɔ wɔ bii, ka Dɛnaa Lawa goã á n liɛ wɔ-n lɔn.

¹⁵Dɛnaa Lawa dinmaa dɔ na á goã ǹ gialaa, ǹ dii ǹ boe wɔ bii, yǎa á ǹ tumaa dɛ á ǹ nya lenlen.

¹⁶Gɛ̀ bɛ́ á zia-baalin lɛn tumaa dɛ á ǹ bɔ wɔ bii ǹ mɛn waáraa,

¹⁷Dɛnaa Lawa tɔ́n boo da ma nɛ, á pɛ ma nɛ:

¹⁸«Pelo, ka á re boe Aara kiwi, ka Moabu gána gèlè na.

¹⁹ Ka wo dɔ Amɔn tɔrɔn kɛn bǎã yɔrɔ-a. Ka baran yoo ǹ gialaa, ka zia baa ǹ ganaa wa. Ma a re Amɔn tɔrɔn lɛn gána lɛ a màn kɔn koe ka la, kaa wɔ lɛa wa. A giala, ǹ dɔn man Lɔti tɔrɔn lɛa, má bǎã lɛ kɔ ǹ la ǹ wɔ lɛa.»

²⁰Bǎã lɛ na á goã Refaa tɔrɔn bǎã lɛa. A giala bɛn man nə́ goã-n lɛlɛ. Amɔn tɔrɔn lɛn dinin man nə́ goã ǹ bíi Zamuzumu tɔrɔn.

²¹Pàã na á goã ǹ lon, ǹ nə́ gigiã, sɔsɔrɔ ka Anaaki tɔrɔn kɛn bɛ́ lɔn. Sɛnɛ, Dɛnaa Lawa nə́ ǹ dɛ, á ǹ bɔ Amɔn tɔrɔn lɛn nyɛɛnɛ. Bɛn nə́ ǹ bǎã si, ǹ nə́ giã a nɛ.

²²Edɔmu minin mɛnɛn bɛ́ Ezawu tɔrɔn lɛa, giã-n Seyiiri gána nɛ, Dɛnaa Lawa na á goã, á n dɔ bɛn dɔn lɛ miɛ̃. Á Orii tɔrɔn kɛn dɛ, á ǹ bɔ ǹ nyɛɛnɛ. Edɔmu minin lɛn nə́ ǹ bǎã si ǹ nə́ giã a nɛ, yǎa á daa kaa pelo lɛ.

²³Avii tɔrɔn kɛn sɛn mɛnɛn nə goã Gaazaa gána nɛ, Kafutɔɔrɔ minin man nə́ goã ǹ nə́ bɛn dɛ, ǹ nə́ giã ǹ bǎã nɛ.

²⁴Bɛ kio, Dɛnaa Lawa pɛ: «Ka yoo, ka wo Arnɔn tà gòã kɛ kuru. Amɔɔrɔ tɔrɔ Sihɔn ke, Ɛsibɔn gána a kii lɛa, má bɛ laanka a gána wɔ ka gɔn. Ka a giala kɔ, ka zia baa a ganaa, ka si ka baa kaa wɔ lɛa.

²⁵Pelo dinin, man die nyɛ́ɛ laanka foo biɛ na diɛ kanaa tumaa a tɔrɔn ganaa ka kaa sii ni. Bɛ̀ ǹ nə́ ka boo ma lɔn, nyɛ́ɛ á die ǹ kuĩ, ǹ gɔ̀nɔn tá re bìn diɛ ka nyɛɛnɛ.»

²⁶Má tɔ́n nə n toa Kedemɔti don, má minin dia ka lɛ sɛ̀ bǐɛ̃ nɛ, máa ǹ wo pɛ Ɛsibɔnɔn kii Sihɔn nɛ kɛnɛn:

²⁷«Toa wɔ da bɔ n gána nɛ wɔ kiɛ̃. Wɔ n die koe zii lɛ kooro, wɔ ń wɔ a kanɛɛ wɔ wo gusin hinlaa gɔsɛ wa.

²⁸Wɔa màn-bii ni ka wɔa mi ǹ mu ni, n die n bɛn sã wɔ la, wɔ ǹ pii. Wɔ n die boe n gána lɛ-n kooro wɔ kiɛ̃.

²⁹Ezawu tɔrɔn mɛnɛn bɛ́ giã-n Seyiiri, ka Moabu minin kɛn nɛ giã-n Aara, bɛn nə lɛ kɔ wɔ la lɔn, ka dɔn nə lɛ kɔ wɔ la miɛ̃, yǎa wɔ Zurdɛ̃ tà kɛ kuri, wɔ woe doe gána kɛ nɛ, wɔa Lawa, Dɛnaa Lawa n koe wɔ la.»

³⁰Sɛnɛ, Ɛsibɔnɔn kii Sihɔn lɛ kɔ, mà wɔ bɔ asɛ a bǎã-n wa. A giala, kaa Lawa, Dɛnaa Lawa lɛ na á goã á ná a foo laa, á ná a too kaka kɔ, màn mɛn bɛ́ toɛ, a na a gána lɛ wɔ ka gɔn. A din gána lɛ n ke ka tá a-n pelo.

³¹Dɛnaa Lawa tɔ́n pɛ ma nɛ: «A kũ sisia ganaa, man die Sihɔn laanka a gána we ka gɔn. A giala kɔ, n gána lɛ si, n baa n wɔ lɛa.»

³²Sihɔn soo á daa n da wɔ lɛ, a din laanka a zaman tumaa nɛ, á zia baa wɔ ganaa Yaasaa kiwi.

³³Sɛnɛ, wɔa Lawa, Dɛnaa Lawa lɛ wɔ wɔ gɔn. Wɔ́ boo la, a din ni, a nɛnyaanan nɛ, ka a zaman lɛ tumaa nɛ.

³⁴Wɔ́ a kiwin lɛn tumaa kũ bɛa waáraa kɛ lɛ nɛ, wɔ́ ǹ tumaa yu lenlen: giĩn ni, lɔn nɛ ka nɛnyaanan nɛ, wɔ́ bɛn dɛ. Wɔ min goon din yii toa koo wa.

³⁵Wɔ kiwin mɛnɛn lɛn kũ, wɔ n wɔ́ bɛn tɔɔn laanka ǹ gɔn mànan dininsɔɔ̃nɔn goa, wɔa wɔ lɛa.

³⁶A saa Aroɛɛrɛ kiwi ganaa Arnɔn tà lɛ-a, ka kiwi kɛ dɔ nɛ, bɛa nyankɔrɔ lɛ nɛ, a wo yǎa Galaati gána nɛ, kiwi kɔn piã wɔ ganaa wa. Wɔa Lawa, Dɛnaa Lawa lɛ ná a tumaa wɔ wɔ gɔn.

³⁷Sɛnɛ, wɔ wo Amɔn tɔrɔn gána kɛ wɔlɔ li wa. Kiwin mɛnɛn tumaa bɛ́ Yabɔki tà lɛ-a, ǹ mɛnɛn bɛ́ kele yii kɛ nɛ, ka wɔa Lawa, Dɛnaa Lawa wɔ kurəə bǎã mɛn tumaa ganaa, wɔ n gɔn da bɛn sɛn-a wa.