Read Samo, Southern TDP 21 Bible Online

TDP 21 - Samo, Southern bible

TDP 21

¹Kaa Lawa, Dɛnaa Lawa bɛ́ re gána mɛn lɛ koe ka la mà a kaa wɔ baa, ǹ tá boe la ǹ min dɛ ǹ da tán, min na a gere yɛ don walan, sɛnɛ, ǹ nə́ ǹ ba a dɛli doɛ̃ wa.

²Bɛ gɔ́ɔ̃ nɛ, kaa kiwi a min golen laanka kaa sii yɔrɔ bɔlen nə soo. Gere lɛ bɛ́ tán bǎã mɛn nɛ, a saa bɛ ganaa a wo kaa kiwin kɛn lɛ, bɛa bǎã lɛ lɛnpɛnɛ, ǹ bɛa bii lɛ zɔɔ̃,

³màn mɛn bɛ́ toɛ, kiwi mɛn bɛ́ kunu a ganaa, ǹ bɛ dɔ̃. Bɛa kiwi lɛ a min golen nə dii luu kũ, ǹ mɛn nə́ ke ǹ nə́ ǹ tɔn zǔu da a wìi li ǹ nə́ dí nya-n wa.

⁴Bɛa kiwi lɛ a min golen nə wo ka dii luu lɛ-n tà lɛ-a, tà mɛn a mu bɛ́ a ba piɛ̃ wa, ǹ nə́ ǹ ba buu kɔsɛ a lɛ-a wa, ǹ nə́ ǹ ba màn kɔn diɛ a lɛ-a wa. Bɛ̀ ǹ nə́ dɔ walan, ǹ dii luu lɛ mìi yu a dungiala ganaa, tà lɛ lɛ-a.

⁵Bɛa biikoo li, Levii tɔrɔ wúlu-bɔlen kɛn nə n zɔ̃ ǹ dɔ. A giala, kaa Lawa, Dɛnaa Lawa lɛ na á ǹ dinin lɛn bɔ mà ǹ dí nya asɛ nɛ, ǹ barka da minin ganaa ka asɛ tɔ nɛ. Minin bii gɔ́ɔ̃ ǹ sii tumaa laanka kɔn-dɛ a mà bɔ kɔn ganaa ǹ sii tumaa nɛ, ǹ dinin man bɛ yɔrɔ boe.

⁶Ǹ min mɛn lɛ dɛ, kiwi lɛ a min golen mɛnɛn tumaa nə n mɔrɔ a gere ganaa, ǹ dii luu lɛ mìi yu tà mɛn lɛ-a, ǹ nə n gɔnɔn pii a lalan walan,

⁷ǹ pɛ kɛnɛn: «Wɔ gɔn ba giĩ kɛa dɛ sii-n wa, wɔ yii yɛ wa.

⁸E! Dɛnaa Lawa, Izirayeli minin kɛn lɛn, n nə́ ǹ si n nə́ ǹ kaa, ǹ sii baraa toa ǹ nɛ. N nyan zɛ̀rɛbaãnaa kɛa gɛ̀ a dɔlɔ bɔ Izirayeli ganaa wa.» Bɛ̀ bɛ nə́ n zɛnaa, Lawa á die ǹ sii baraa toɛ ǹ nɛ.

⁹Sii mɛn bɛ́ kɔɔ̃n Dɛnaa Lawa ganaa, bɛ̀ ká bɛ zɛnaa, ka á re zɛ̀rɛbaãnaa dɛ lɛ a mìi gɔ́ɔ̃ ǹ sii boe ka bɔ ka bii.

¹⁰Bɛ̀ ká soo ká woo zia baa kaa zɔ́ɔn lɛn ganaa, bɛ̀ kaa Lawa, Dɛnaa Lawa nə́ ǹ wɔ ka gɔn, ka á die minin kuĩ ka wo ǹ ne kòso nɛn lɛa.

¹¹Kɔntan kaa min kɔn tá re lɔ yii kòso nɛn lɛn bii a yɔrɔ n siĩn sɔnbɔraa nɛ. Bɛ̀ a yii bɔ li, á n giɛ li a saa a lɔ lɛa,

¹²á boe la a kũ a wo-n piɛ. Sɛnɛ, lɔ lɛ doamaa nɛ a n mìi kɔɔ̃, a n gòon tɔ́nɔn kukuru,

¹³dɔnkɛ mɛn goã a ganaa bɛ̀ ǹ bɛ́ kuĩ kòso nɛ lɛa a bɛ bɔ, a giã giĩ lɛ a kion, a na kɔn-a ke ǹ di laanka ǹ dan nɛ, a bɛa wuu pɛ mui goon lɛpiɛ̃. Bɛ kio kəni, giĩ lɛ á boe la a n mɔrɔ a ganaa a n zuũ baa, lɔ lɛ na a dɔ wɔ baa.

¹⁴Sɛnɛ, bɛ̀ a tìĩ daa á bɔ a nyin ni, a n gɔn bɔ-a a wo kiĩni. A doamaa bie a sã a wɔrɔ si a ganaa wa, a doamaa dɔ bie a kũ bɛ̀rɛ lɛa wa. A giala, a na á baa a lɔ lɛa ka pàã nɛ.

¹⁵Ká bɛ̀ lɔ paa n giĩ goon lon, á n goon narɛ, a ná a ba goon narɛ wa. Ǹ dinin paanan daa ǹ nə́ nɛgiĩn yɛ. A bɛ́ a lɔ mɛn lɛ narɛ wa, nɛgiĩ bibinaa lɛ n bɛ wɔ lɛa.

¹⁶Bɛ̀ a tá a gɔn mànan gii a nɛnyaanan lɛn bii kíɛ̃ lɛa ǹ mɛn pinaa, a bɛ́ lɔ mɛn lɛ narɛ, a doamaa bie a kiã baa ǹ wɔ gii kɔ bɛa nɛgiĩ lɛ la wa. Bɛ̀ á zɛnaa miɛ̃, a bɛ́ a lɔ mɛn lɛ narɛ wa, a n mɛnɛɛ bɛa nɛgiĩ lɛ la, bɛ mɛn bɛ́ nɛ lɛ a bibinaa lɛa.

¹⁷Sɛnɛ, a bɛ́ a lɔ mɛn lɛ narɛ wa, a doamaa nɛ a lɛ kɔ mà bɛa nɛgiĩ lɛ n nɛ lɛ a bibinaa lɛa, a na a wɔ gii baa paa a kɔ la, a gɔn mànan tumaa gɔ́ɔ̃ nɛ. A giala, bɛa nɛgiĩ kɛ lɛ na a kakabaa waáraa a nɛ bibini lɛa. Kiã baa ǹ wɔ gii lɛ n doe a din ganaa.

¹⁸Bɛ̀ nɛgiĩ too kaka-a piã wole ta giĩ mɛn lon, haalɛ ta ǹ di laanka ǹ dan dɛ, a ná a ba n too koe ǹ boo li wa,

¹⁹ǹ kũ ǹ wo ne ǹ kiwi lɛ a min golen li, kiwi lɛ a kiɛnlɛ-a.

²⁰Ǹ pɛ min golen lɛn manɛ kɛnɛn: «Wɔsɛn nɛgiĩ á ke, too kaka-a nɛ, piã wɔle ne, a ba n too koe wɔsɛn lon wa. A dí n ka màn-bii laanka yɔ-mii dinsɔɔ̃ nɛ.»

²¹Bɛ kio, kiwi lɛ a minin tumaa kɔlɔ kaã bɔ a ganaa ǹ dɛ a gã. Bɛ̀ ká zɛnaa miɛ̃, ka á re sii baraa boe ka bɔ ka bii. Izirayeli minin tumaa á re bɛ miɛ̃, nyɛ́ɛ á re ǹ kuĩ.

²²Bɛ̀ min na á sii baraa zɛnaa a doamaa-n ka gɛ̀ nɛ, bɛ̀ ká dɛ ká a gere lɔɔ lon da ganaa,

²³ ka nyan toa a gere lɛ lɛ̀ waa da lɛ ganaa wa. Ka doamaa-n ka bĩ a din pinaa. A giala, bɛ̀ ǹ nə́ min dɔ gere lɔɔ lon miɛ̃, Lawa na á koe bɔ bɛa dɛnaa ganaa. Bɛ lɛ nɛ, kaa Lawa, Dɛnaa Lawa bɛ́ gána mɛn lɛ koe ka la mà a kaa wɔ baa, ka nyan toa ka a tán zaãbaa wa.