Read Samo, Southern TDP 22 Bible Online

TDP 22 - Samo, Southern bible

TDP 22

¹ Bɛ̀ n miã a dii hinlaa a sère na á papaã, n nyan toa n nə n baa ka n nə n yɛ wa. A loo n wo kɔ n miã lɛ la.

²Bɛ̀ tɔɔ lɛ a dɛnaa bǎã á sɔsɔɔ n piɛ ganaa hinlaa bɛ̀ n ba ǹ dɛnaa doɛ̃ wa, n tɔɔ lɛ kũ n wo da n kion, n toa n kion yǎa ǹ dɛnaa die giɛ li. Bɛa biikoo li, n bɔ n kɔ la.

³Ta min a dundun na á papaã, ta a mɔnaa nɛ, ta a màn woo màn nɛ, bɛ̀ ká yɛ, ka zɛnaa miɛ̃. Ka nyan toa ka n baa ka ka yɛ wa.

⁴Bɛ̀ ká ka miã a dundun hinlaa a dii yɛ á mɛnaa zii la, ka nyan toa ka n baa ka ka n ka yɛ wa. Ka doamaa nɛ ka n dɔ ka miã lɛ lɛ, ka tɔɔ lɛ saa ka da lon.

⁵Lɔ doamaa bie a giĩn dɔnkɛ wɔ wa, giĩ dɔ doamaa bie a lɔn dɔnkɛ wɔ wa. A giala, bɛ̀ min mɛn bɛ miã zɛnaa, ǹ dɛnaa na á sii bɔbɔnɛɛ zɛnaa kaa Lawa, Dɛnaa Lawa yɔrɔ-a.

⁶Bɛ̀ ka n zii la yǎa ka bàan kii yɛ da la hinlaa a n tán, a gìi hinlaa a nɛn ná a nɛ, ǹ dan nə́ waa-n la, ka doamaa bie ka bàan dan lɛ laanka a nɛn lɛn waa kun wa.

⁷Ka doamaa-n ka bàan dan lɛ toa a woo, ka a nɛn lɛn goa ka wo ǹ ne. Bɛ lɛ n die toɛ kaa wɔ bǐɛ̃ kɔ, ka nyin sasa yɛ kanaa.

⁸Bɛ̀ ká kion dii dɔ, ka a lɛ kìri dɔ á woo lon, màn mɛn bɛ́ toɛ, min baran bɔ a kala la a mɛnaa, a sii saa a kɔ ka la wa.

⁹ Ka nyan màn tɔrɔ kɔsɔ zumu kaa rezɛ̃ wuru-n wa. Bɛ̀ ká bɛ zɛnaa, màn lɛ tumaa n Lawa wɔ biɛ: n màn tɔrɔ kɔsɔ mɛn zumu, ka *rezɛ̃ da lɛ a nɛ nɛ.

¹⁰Ka nyan dii laanka dundun naa kɔn, mà ka n buu kɔsɛ ǹ nɛ wa.

¹¹Mɔnaa mɛn bɛ́, ǹ nə́ sère ka laanka bòosa lɔlɔkɔn ǹ nə́ tã nɛ, ka nyan bɛ wɔ wa.

¹² Ka bɛ́ mɔnaa mɛn koe ka lɛ, ka die ka pàsa kaa bɛ lɛkoro sii ganaa.

¹³Kɔntan, kaa min kɔn tá re lɔ siɛ, a giã kun ni, bɛ kio, lɔ lɛ tìĩ daa a bɔ a nyin ni.

¹⁴Bɛ̀ á pɛ mà a giã ǹ gɔn na a ba siĩn wa, á ná a tɔ ziziɛ̃ á pɛ: «Má lɔ kɛ saa, má n mɔrɔ a ganaa, sɛnɛ, ma wo yaa kion wa.»

¹⁵Bɛ̀ á bɛ baa, màn mɛn bɛ́ nyɛɛ, mà nɛlɔ lɛ goã kion, ǹ di laanka ǹ dan nə bɛ saa, ǹ da nɛ kiri wɔ ǹ bǎã nɛ, ǹ nyaa min golen ne.

¹⁶Nɛlɔ lɛ di die a pɛ min golen lɛn man kɛnɛn: «Masɛ din a nɛlɔ n ke, má kɔ giĩ kɛ la a lɔ lɛa. Sɛnɛ, a tìĩ na á bɔ a nyin ni.

¹⁷Á ke a zɛ̀rɛ biɛ a giã ǹ gɔn taman yii á n pii mà asɛ wo maa nɛlɔ lɛ yaa kion wa. Màn mɛn bɛ́ nyɛɛ mà á goã kion, bɛ á ke!» Ǹ kɔn yɛ mɔnaa mɛn la bibinaa nɛ, lɔ lɛ di laanka ǹ dan bɛ lɛ bɔ kiwi lɛ a min golen yɔrɔ-a.

¹⁸Bɛ gɔ́ɔ̃ nɛ, bɛa kiwi lɛ a min golen nə giĩ lɛ kũ ǹ dɔlɔ bɔ a ganaa.

¹⁹Ǹ doamaa nɛ ǹ wɔrɔ paabiɛ[2] da a mìi ni, ǹ bɛ si ǹ kɔ nɛlɔ lɛ a díi la. A giala, giĩ lɛ na á soɛ da Izirayeli minin nɛlɔ la. A giĩ lɛ toa a yii n koo, lɔ lɛ na a wɔ lɛa, a doamaa dɔ bie a loo wa.

²⁰Sɛnɛ, bɛ̀ sii lɛ taãn baa, màn kɔn ná a yɛ bɛ́ n nyɛɛ mà a woo nɛlɔ lɛ yaa kion sonbore wa,

²¹ǹ nɛlɔ lɛ kũ ǹ soo ne ǹ di a kiɛnlɛ-a. Bɛ kio, kiwi lɛ a giĩn nə kɔlɔ kaã bɔ a ganaa ǹ dɛ a gã, a giala, a bɛ́ á n toa ǹ di kion á giĩ si, a na á sìi da ǹ sii zɛnaa Izirayeli gána nɛ. Ka zɛnaa miɛ̃ ka sii baraa bɔ ka bɔ ka bii.

²²Lɔ mɛn bɛ́ zuũ li, bɛ̀ ǹ nə́ giĩ mɛn kũ a gialaa giɛ bɛ li, giĩ lɛ laanka lɔ lɛ nɛ, ǹ doamaa nɛ ǹ nə ǹ dinin paanan dɛ. Ka zɛnaa miɛ̃ ka sii baraa bɔ ka bɔ Izirayeli gána nɛ.

²³Bɛ̀ nɛniɛ mɛn a san tan, bɛ̀ giĩ kɔsɔ kaa bɛa nɛniɛ lɛ lɛ kiwi gɔ́ɔ̃ nɛ yǎa a kũ a ga li,

²⁴ka ǹ dinin paanan kũ ka da ǹ nɛ kiri wɔ ǹ bǎã, ka kɔlɔ kaã bɔ ǹ ganaa, ka ǹ dɛ ǹ gã. Nɛniɛ lɛ doamaa-n ka gɛ̀ nɛ a giala, a n lɛ dɛ mà min da asɛ si wa, a da yaa, a n kiwi gɔ́ɔ̃ nɛ. Giĩ lɛ dɔ doamaa-n ka gɛ̀ nɛ, a giala, a na á ga ǹ miã a lɔ-wɔsiɛ li. Ka zɛnaa, miɛ̃ ka sii baraa bɔ ka bɔ ka bii.

²⁵Sɛnɛ, bɛ̀ giĩ lɛ na á kaa nɛniɛ lɛ lɛ don á kũ á ga li, a da yǎa nɛniɛ lɛ a san tan, ǹ doamaa nɛ ǹ giĩ lɛ dinsɔɔ̃ dɛ a gã.

²⁶Ka nyan sii kɔn zɛnaa nɛlɔ lɛ sɛ-n wa, a giala, a sii kɔn zɛnaa, bɛ́ n gɛ̀ boe wa. Bɛa sii kɛ n goon ka min mɛn nə́ ke, ǹ miã kɔsɔ mɛnaa la á dɛ.

²⁷Giĩ lɛ bɛ́ na á woo nɛniɛ lɛ yaa don, haalɛ ta nɛniɛ lɛ nə́ n lɛ dɛ, min kɔn ba re yii a si la wa.

²⁸ Nɛniɛ mɛn nə́ ke a san ná a banban, bɛ̀ giĩ mɛn kaa bɛ lɛ, yǎa a kũ ka pàã nɛ á ga li, bɛ̀ ǹ nə́ ǹ kũ bɛ ganaa,

²⁹giĩ lɛ doamaa nɛ a wɔrɔ posooro kɔ nɛniɛ lɛ a díi la. A bɛ́ á ga li á nya, a toa a yii n koo, lɔ lɛ na a wɔ lɛa, a doamaa dɔ bie a loo wa.