Read Samo, Southern TDP 25 Bible Online

TDP 25 - Samo, Southern bible

TDP 25

¹Bɛ̀ zia wɔ minin bii, ǹ wo kiri wɔ ǹ bǎã nɛ, ǹ na a yɔrɔ bɔ. Bɛ̀ min mɛn zɛ̀rɛ bie wa, ǹ pɛ mà bɛ zɛ̀rɛ bie wa. Bɛ̀ min mɛn zɛ̀rɛ nɛ, ǹ pɛ mà bɛ zɛ̀rɛ nɛ.

²Bɛ̀ zɛ̀rɛdɛnaa lɛ doamaa-n ka duwəə ne, kiri-kuruli lɛ minin kaa a ganaa, ǹ kũ ǹ naa tán a din yɔrɔ-a, ǹ duwəə kɔ la a dɔ a zɛnaa ǹ sii lɛ li.

³ Ǹ doamaa nɛ ǹ duwəə gunyin pusi, a nyan kiɛ̃ bɛ la wa. Bɛ̀ ǹ nə́ toa á kiɛ̃ bɛ la, maǹ nə́ n dɔɔ̃n lɛ yii puusə kɔ.

⁴ Tɔɔ mɛn bɛ́ wii goɛ, n nyan bɛ kurəə wii lɛ a soɛ̃ ganaa wa.

⁵ Bɛ̀ dɔɔ̃nɔn tá kion kun, bɛ̀ goon gã a ná a nɛgiĩ yɛ wa, a lɔ lɛ doamaa bie a soo kion lɛ nɛ, a wo wɔ giĩ kɔsɔ li kanaa wa. Ǹ zuũ lɛ dɔɔ̃n doamaa nɛ a wɔ lɛ a saa lɔ lɛa, a na a dɔɔ̃nbaa ǹ dí nya lɔ lɛ wɔ paǹ li.

⁶Lɔ lɛ bɛ́ re nɛgiĩ bibinaa mɛn yii, gɛ̀-wɔle lɛ tɔ n die goɛ̃ bɛ ganaa, màn mɛn bɛ́ toɛ, a tɔ baran papaã, a n bɔ Izirayeli minin bii wa.

⁷ Sɛnɛ, bɛ̀ giĩ lɛ ba li a ǹ dɔɔ̃n lɛ a lɔ lɛ si wa, lɔ lɛ wo dɔ kiwi a min golen li kiri wɔ ǹ bǎã a pɛ ǹ nɛ kɛnɛn: «Ma zuũ ǹ dɔɔ̃n na á n piã, mà a ba ǹ dɔɔ̃n lɛ tɔ koɛ Izirayeli minin bii wa. Bɛ lɛ nɛ, á n piã, mà a ba ma zuũ lɛ a dɔɔ̃nbaa ǹ dí nyɛɛ masɛ wɔ paǹ li wa.»

⁸Bɛ kio, kiwi lɛ a min golen nə bíi ǹ boo da nɛ. Bɛ̀ á wusoo á na a nɛ bɛn dɔn yɔrɔ-a, mà asɛ ba lɔ giɔɔrɔ lɛ li wa,

⁹lɔ lɛ nə n zɔ̃ a dɔ a li min golen lɛn yii ni, a giĩ lɛ a kɔsɔ gòã goon bɔ a gòã ganaa, a sɛ̀ duwəə a yɔrɔ nɛ, a pɛ: «Giĩ mɛn bɛ́ a ba ǹ dɔɔ̃n a kion koɛ wa, maǹ kɛ miã sii lɛ zɛnɛɛ bɛa dɛnaa nɛ.»

¹⁰Bɛ kio, Izirayeli gána nɛ, ǹ bɛa giĩ lɛ a kion minin bíi: "gòã kooro-a a minin".

¹¹Bɛ̀ giĩn man a gialaa zia diɛ, ǹ bɛ́ ǹ mɛn dii, bɛ̀ bɛa lɔ nə́ n zɔ̃ á dɔ mà a nə ǹ zuũ lɛ sii, yǎa a n gɔn dia á ǹ zuũ lɛ a dɛle lɛ kũ a giulun ganaa,

¹²ka bɛa lɔ lɛ gɔn kuru. Ka nyan toa ka makara bɔ a ganaa wa.

¹³ Ka nyan toa ka kilo goon tɔrɔ paa kaa kaa boroo ne, kɛ n guguru, kɛ n puusə wa.

¹⁴Ka nyan toa màn zɔɔ̃ ǹ màn goon tɔrɔ paa goã kaa kion, goon nə́ gole, goon nə́ boɛɛn wa.

¹⁵Kilo lɛpiɛ̃ laanka màn zɔɔ̃ ǹ màn taãn doamaa nɛ a yɛ ka lon, màn mɛn bɛ́ toɛ kaa Lawa, Dɛnaa Lawa bɛ́ gána mɛn lɛ koe ka la, ka boo la ka nyin sasa yɛ a nɛ.

¹⁶A giala, min mɛn tumaa bɛ́ bɛ zɛnɛɛ, min mɛn tumaa bɛ́ kɔkɔrɔbaa ǹ sii zɛnɛɛ, bɛa dɛnan tìĩ n boe-n kaa Lawa, Dɛnaa Lawa lɛ nyin ni.

¹⁷ Amalɛki minin nə sii mɛn zɛnaa ka nɛ, bɛ̀ ka bɛ́ ká soo Ezipti ká n zii la, ka n yiri kɔ bɛ nɛ.

¹⁸Ǹ nyɛ́ɛ baa Lawa-n wa. Bɛ lɛ nɛ, ka bɛ́ zii la, ǹ nə́ daa ka gialaa. Bɛa biikoo li, bɛ̀ ká nɔmaa, ka pàã tumaa nya. Kaa min mɛnɛn nə goã kio, ǹ nə́ kaa bɛn la, ǹ nə́ ǹ dɛ.

¹⁹Bɛ lɛ nɛ, kaa zɔ́ɔn mɛnɛn tumaa bɛ́ ka lɛnpɛnɛ, bɛ̀ kaa Lawa, Dɛnaa Lawa ka kanbaa bɛn tumaa ganaa ǹ mɛn waáraa, a bɛ́ re gána mɛn lɛ koe ka la mà a kaa wɔ baa, ka Amalɛki tɔrɔn kɛn dɛ lenlen, ka ǹ bɔ walan. Ka nyan toa ka yiri bɔ wa dɛ!