Read Samo, Southern TDP 26 Bible Online

TDP 26 - Samo, Southern bible

TDP 26

¹Kaa Lawa, Dɛnaa Lawa bɛ́ gána mɛn lɛ koe ka la mà a kaa wɔ baa, ka á re we a nɛ. Ǹ mɛn waáraa, bɛ̀ ka giã gána

² lɛ nɛ kaa Lawa, Dɛnaa Lawa ń die koe ka la, ka bɛ́ re màn mɛn tumaa a wuru boe a tán la, ka a tumaa a lɛ bibinaa kɔn kaa kɛsɛ nɛ, ka da nɛ bǎã kɛ nɛ kaa Lawa, Dɛnaa Lawa lɛ ń die boe, bɛ̀ a n din nyaa a nɛ.

³Lawa a wúlu-bɔle mɛn bɛ́ dí la bɛa pinaa kɛ lɛ nɛ, didie wo ka a wɔ nɛ bɛ li a pɛ nɛ: «N Lawa, Dɛnaa Lawa na á n lɛ kɔ wɔsɛn digolon la, mà á re gána lɛ koe wɔ la. Man pii n ni pelo, máa má dɔ bɛa gána lɛ nɛ.»

⁴Bɛ kio, wúlu-bɔle kɛsɛ lɛ si a bɔ a gɔn, a wo da tán kaa Lawa, Dɛnaa Lawa a *wúlu bɔ ǹ bǎã kɛ yɔrɔ-a.

⁵Bɛ kio kəni, a golee a Lawa, Dɛnaa Lawa yɔrɔ-a a pɛ kɛnɛn: «Ma digolo na á goã Aramu tɔrɔ lɛa n binbirin boe. Á woo Ezipti gána nɛ, á giã walan gùlibaa nɛ, kun ka minin kɛn nɛ ǹ nə́ goã diɛ zii. Ǹ goã tɛ dinin wa. A bɛ́ walan, a minin lɛn nə́ mɔnaa, ǹ nə́ gána gole baa, pàã nə́ ǹ lon.

⁶Sɛnɛ, Ezipti minin lɛn nə́ bɔ wɔ yii ni, ǹ nə́ wɔ kaa dí kaka nyɛɛ ganaa, ǹ nə́ doobaabaa kaa wɔ ganaa.

⁷Bɛ lɛ nɛ, wɔ́ n lɛ dɛ wɔ digolon Lawa, Dɛnaa Lawa lɛ ganaa, a dɔ́ wɔa lɛ-dɛ ma. Ǹ bɛ́ nɔmaa mɛn diɛ wɔ mìi ni, ǹ bɛ́ fuu mɛn nyɛɛ wɔ nɛ, ǹ bɛ́ boe wɔ yii-n lɔn, á bɛ yɛ.

⁸Dɛnaa Lawa na á tɔ́n sii kakan zɛnaa, kaãbaa ǹ sii dadaran lɛa, á nyɛ́ɛ gole da ǹ nɛ, á wɔ waa ka pàã nɛ, á wɔ bɔ Ezipti gána nɛ.

⁹A din na á daa wɔ nɛ bǎã kɛ nɛ, á gána kɛ lɛ kɔ wɔ la, bɔ̀nyaa laanka zoo nyɔɔ bɛ baa sii gána mɛn nɛ.

¹⁰Dɛnaa Lawa tán mɛn lɛ kɔ ma la, a màn lɛ bibinaa nə́ ke má daa kɔ Dɛnaa Lawa la.» Bɛ kio, bɛa dɛnaa màn lɛ da tán Dɛnaa Lawa yɔrɔ-a, a kaa tán, a kaa Lawa, Dɛnaa Lawa lɛ guguru kɔ.

¹¹Kaa Lawa, Dɛnaa Lawa bǐɛ̃ mɛn tumaa baa ka la, ka dinin laanka kaa kion minin ni, ka bɛa nyɛnyɛɛ wɔ kun ka *Levii tɔrɔn laanka gùlin kɛn nɛ, ǹ mɛnɛn lɛn bɛ́ giã-n ka bii.

¹² Lɛ̀ sɔɔ woo lɛ̀ sɔɔ, ka màn mɛn yɛ kaa tán-kɔsiɛ gɔ́ɔ̃ nɛ, ka a fùbaa ǹ wɔ tumaa bɔ. Bɛ̀ ká bɔ, ka kɔ Levii tɔrɔn kɛn la, gùlin ni, nɛ toenən ne ka lɔ giɔɔrɔn nɛ, màn mɛn bɛ́ toɛ, ǹ dɔn nə màn bii ǹ dinin bǎã nɛ ǹ kã.

¹³Bɛ kio, ka tɔn kɛ pɛ kaa Lawa, Dɛnaa Lawa yɔrɔ-a: «Màn mɛn doamaa bɛ́ nɛ a dɔ Lawa ganaa, má bɛ waa má bɔ maa kion, má kɔ Levii tɔrɔn la, gùlin ni, nɛ-toenən ne, ka lɔ giɔɔrɔn nɛ, a kɔnpɛ ka n gɔn waa ǹ boon kɛn tumaa nɛ, ń nə́ ǹ pɛ ma nɛ. Ma bɛa gɔn waa ǹ boon kɛn lɛn kɔn la bɔ wa, ma yiri dɔ bɔ ǹ nɛ wa.

¹⁴Ma bɛ́ maa yɔrɔ-kɔsiɛ gɔ́ɔ̃ nɛ ǹ mɛn waáraa, ma màn kɔn bɔ a nɛ má bii wa, ma màn kɔn bɔ a nɛ má *gɔ̀ sii zɛnaa-n wa, ma ǹ kɔn dɔ kɔ geren la wa. Má n too kɔ maa Lawa, Dɛnaa Lawa lon, má zɛnaa á kɔnpɛ ka a gɔn waa ǹ boo lɛ tumaa nɛ.

¹⁵Sisia kəni, n toa n bǎã sonbore kɛ-n lon, n barka da n din a minin Izirayeli tɔrɔn lɛn ganaa, ka tán kɛ dɔ nɛ ń kɔ wɔ la, bɔ̀nyaa laanka zoo nyɔɔ bɛ baa sii gana mɛn nɛ, a kɔnpɛ ka n lɛ-kɔ kɛ nɛ ń wɔ wɔ digolon manɛ.»

¹⁶Pelo, kaa Lawa, Dɛnaa Lawa nə n gɔn wɛɛ ka nɛ, mà ka kɔ asɛ a landa boon laanka asɛ a sii yɔrɔ bɔ ǹ boon kɛn lɛ. Mà ka ǹ tamaa ka kɔ ǹ lɛ, ka ka foo tumaa nɛ, ka kaa taasiɛ tumaa nɛ.

¹⁷Pelo ká pɛ mà Dɛnaa Lawa n kaa Lawa lɛa. Mà ka tá re a bɔlɔ sii dɔn, ka a landa boon kɛn tamaa, a gɔn waa ǹ boon laanka a sii yɔrɔ bɔ ǹ boon kɛn nɛ, ka n too kɔ a lon.

¹⁸ Dɛnaa Lawa dɔ pɛ pelo mà ka na a asɛ a zaman lɛa, mà ka na a dinsɔɔ̃ wɔ lɛa, ka a bɛ́ á pɛ ka-n lɔn, ka a gɔn waa ǹ boon kɛn tumaa tamaa.

¹⁹A giala, Lawa tɔrɔ kɔsɔn mɛnɛn tumaa zɛnaa, a n die gugurubaa koe ka la, a ka tɔ bɔ, ka golebaa yɛ a la bɛn manɛ. Bɛ gɔ́ɔ̃ nɛ, a n giɛ li ka goã asɛ din wɔ lɛa, ka a bɛ́ á pɛ lɔn.