Read Samo, Southern TDP 27 Bible Online

TDP 27 - Samo, Southern bible

TDP 27

¹Muizu laanka Izirayeli tɔrɔn lɛn min golen nə́ n gɔn waa zaman lɛ nɛ, á nə́ pɛ ǹ nɛ: «Ma bɛ́ n gɔn wɛɛ ka nɛ ka boon mɛnɛn tumaa-n pelo, ka ǹ tumaa tamaa.

² Bɛ̀ ká Zurdɛ̃ tà kɛ kuru ǹ mɛn pinaa, ká n woe gána kɛ nɛ kaa Lawa, Dɛnaa Lawa n koe ka la, ka die ka kɔlɔ dadaran goa ka wo ǹ doa tán, ka ton fu lɔ ǹ ganaa.

³Bɛ̀ ká Zurdɛ̃ tà lɛ kuru ǹ mɛn waáraa, ka die ka dí-pɛn boon lɛn tumaa kiɛ̃ bɛa kɔlɔn lɛn ganaa. Ka bɛ zɛnaa ka tɔn wɔ gána lɛ nɛ, kaa Lawa, Dɛnaa Lawa bɛ́ gána mɛn lɛ koe ka la. Ka ka digolon Lawa lɛ pɛ ka-n lɔn, bɔ̀nyaa laanka zoo nyɔɔ bɛ baa sii gana mɛn nɛ.

⁴Ka ma pɛ ka-n lɔn pelo, bɛ̀ ká Zurdɛ̃ tà lɛ kuru, ka bɛa kɔlɔn kɛn lɛn doa tán Ebaali kele la, ka ton fu lɔ ǹ ganaa.

⁵ Bɛ kio, ka *wúlu bɔ ǹ bǎã dɔ walan ka kɔlɔ nɛ, kaa Lawa, Dɛnaa Lawa lɛ wɔ lɛa. Sɛnɛ ka nyan toa fɔlɔ màn wo a kɔlɔ lɛ wɔlɔ li wa.

⁶Ka kaa Lawa, Dɛnaa Lawa a wúlu bɔ ǹ bǎã lɛ dɔ ka kɔlɔ lɛpiɛ̃n nɛ, bɛ̀ ka *wúlu màn tã la a wɔ lɛa.

⁷Ka die ka barka da Lawa nɛ ǹ wúlu bɔ walan, ka bii ka nyɛnyɛɛ nɛ, kaa Lawa, Dɛnaa Lawa din yɔrɔ-a.

⁸Ka die ka bɛa dí-pɛ lɛ a boon kiɛ̃ kɔlɔn lɛn ganaa. Ka ǹ kiɛ̃ ǹ bɔ taãn-taãnɛ.»

⁹Bɛ kio, Muizu laanka *Levii tɔrɔn kɛn nɛ Lawa a wúlu-bɔlen lɛa, ǹ nə́ boo da Izirayeli minin tumaa nɛ ǹ nə́ pɛ: «Izirayeli minin lɛn, ka golee, ka n too kɔ! Pelo, ka kaa Lawa, Dɛnaa Lawa lɛ a zaman baa.

¹⁰Bɛ lɛ taman yii, ka kaa Lawa, Dɛnaa Lawa lɛ bɔlɔ si. Ma bɛ́ gɔn waa ǹ boon laanka landa boon mɛnɛn pii ka nɛ pelo, ka kɔ bɛn lɛ.»

¹¹A din pinaa lɛ nɛ, Muizu nə́ n gɔn waa zaman lɛ nɛ á pɛ:

¹² — Bɛ̀ ká Zurdɛ̃ tà lɛ kuru ǹ mɛn waáraa, tɔrɔn mɛnɛn bɛ́ re golee Garizimu kele kɛ la ǹ lɛn bǐɛ̃ bíi zaman lɛ li, bɛn man ka kɛn nɛ: Simiɔn tɔrɔn manɛ, Levii tɔrɔn nɛ, Zudaa wɔn nɛ, Isakaara wɔ nɛ, Zozɛfu laanka Bɛnzamɛn tɔrɔn nɛ.

¹³Tɔrɔn mɛnɛn dɔn bɛ́ re golee Ebaali kele la lɛn baraa bíi taman yii, bɛn dɔn man ka kɛn nɛ: Urubɛn tɔrɔn manɛ, Gaadi tɔrɔn nɛ, Asɛɛrɛ wɔn nɛ, Zabulɔn wɔn nɛ, Dan laanka Nɛfutalii wɔ nɛ.

¹⁴Levii tɔrɔn kɛn Lawa a wúlu-bɔlen lɛa bɛn die ǹ nə n lɛn saa lon, ǹ kɛ pɛ Izirayeli minin lɛn tumaa nɛ:

¹⁵ Bɛ̀ min mɛn gɔn sɛlɛ màn nyín lɛa, hinlaa a na á fɔlɔ yo á baa dì lɛa, á n die a guguru koe ka durii ni, bɔ̀n na á bɛa dɛnaa yɛ! Bɛa mànan kɛn lɛn minbuiin nɛ nə́ ǹ zɛnaa ka a din gɔn nɛ, ǹ sii a kɔɔ̃n Dɛnaa Lawa ganaa wa. Bɛ kio, zaman lɛ tumaa nə ǹ lɛ si, ǹ pɛ: «A n miɛ̃!»

¹⁶ Bɛ̀ min mɛn nə́ ǹ di laanka ǹ dan puusə kɔ, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

¹⁷ Min mɛn bɛ́ ǹ miãkɛn a gèlè la ǹ kɔlɔ zoɛ̃, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

¹⁸ Bɛ̀ min mɛn yii tere-a da zii babaraa la, bɔ̀n na á bɛa dɛnaa yɛ. Bɛ kio, zaman lɛ tumaa pɛ: «A n miɛ̃!»

¹⁹ Bɛ̀ min mɛn sii kɔkɔrɔ zɛnaa á mɛnaa gùli la, nɛ-toen hinlaa lɔ giɔɔrɔ la, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

²⁰ Bɛ̀ min mɛn giã kun ka ǹ di a lɔ nɛ, bɔ̀n na á bɛa dɛnaa yɛ! A giala, a na á wɔ ǹ di lɛ lon! Bɛ kio, zaman lɛ tumaa pɛ: «A n miɛ̃!»

²¹ Bɛ̀ min mɛn giã kun ka tɔɔ nɛ, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

²² Bɛ̀ min mɛn giã kun ka ǹ miãnɛn nɛ, ta ǹ di a yii ni hinlaa ta ǹ dan na á yɛ giĩ kɔsɔ la, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

²³ Bɛ̀ min mɛn giã kun ka ǹ daãlɛ nɛ, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

²⁴Bɛ̀ min mɛn nə́ ǹ miã dɛ ka durii ni, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

²⁵Bɛ̀ min mɛn toa ǹ ná a lɛ pii ǹ nə́ da zɛ̀rɛbaãnaa dɛ ganaa, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»

²⁶ Min mɛn bɛ́ a re koe bɛa dí-pɛ kɛ lɛ a boon lɛ a ǹ lɛ pã wa, bɔ̀n na á bɛa dɛnaa yɛ! Bɛ kio, zaman lɛ tumaa pɛ: «A n miɛ̃!»